Elder Scott D. Whiting
No te Hitu Ahuru
Te tiaturi nei Elder Scott Duane Whiting e, ua riro te taime o to’na oraraa ta’na i faataa no te tavini i te Atua ei faahopearaa no te tahi maa faaotiraa rahi.
Fanauhia i te ava‘e eperera 1961 e Duane raua Beverly Whiting, ua paari Elder Whiting i Roto Miti, i Utah, i te mau Hau Amui no Marite. Te faaite nei oia e, ta’na faaotiraa rahi matamua, o te taviniraa ïa i te hoê misioni, e tei muri noa mai, te faaotiraa i te roaraa taime e tavini atu. I tera mau tau ra, ua horo‘ahia ia Elder Whiting i te ma‘itiraa ia tavini e 18 ava‘e e aore râ e piti matahiti. « Ua riro ta’u faaotiraa ia tavini na ono ava‘e hau ei faaineineraa papû no’u no te tavini i roto i te Ekalesia i muri iho », te na ô ra oia.
I muri mai ta’na taviniraa i roto i te Misioni no Japan Tokyo North, ua farerei oia i ta’na vahine, o Jeri Olson, aua‘e te tahi hoa ta raua toopiti i matau. Ua riro atura te ma‘itiraa ia faaipoipo ia’na i te tahi faahou faaotiraa rahi. Ua taatihia raua i roto i te hiero no Roto Miti i te ava‘e eperera 1984.
I muri mai te noaaraa te hoê parau tu‘ite « bachelor » reo tapone mai Brigham Young University, ua roaa ia Elder Whiting i te parau tu‘ite tahu‘a tuatoru no ture i te University of the Pacific, te McGeorge School of Law.
Te tahi atoa faaotiraa rahi ta elder Whiting i rave maori râ te fariiraa i te piiraa ta Elder M. Russell Ballard, no te Pŭpŭ no te Tino Ahuru Ma Piti Aposetolo, i tuu i mua ia’na ia tavini ei episekopo. Ua ani Elder Ballard ia’na e, e rave hope anei oia i ta’na mau hopoi‘a. Ua horo‘a oia i to’na parau i te aposetolo, e noa’tu pai e, ua titau mai te tahi mau ohipa hoona pae moni ia faanuu oia i te tahi atu vahi, ua tape‘a noa râ Elder Whiting i ta’na fafauraa.
Na roto i ta’na taviniraa, ua tupu mai to’na hinaaro rahi ia « hahaere i te utuafare o te mau melo paruparu e ia tauturu ia ratou ia faaapî e aore râ ia rave i te mau fafauraa e te Atua ».
E pae tamarii to te utuafare Whiting. Na mua a‘e ta’na piiraa i te pŭpŭ matamua no te Hitu Ahuru, ua ohipa oia no te hoê taiete tapihooraa fenua e te fare i te fenua Vehi. Ua tavini Elder Whiting ei peresideni no te pŭpŭ peresibutero, ei episekopo, ei melo apooraa teitei, ei peresideni Feia Apî Tamaroa tĭtĭ, ei peresideni tĭtĭ, e ei Hitu Ahuru area.