Elder Larry Echo Hawk
No te Hitu Ahuru
Mai taua mahana ra no te matahiti 1972 mai â, i to Elder Larry Echo Hawk faarooraa ia Elder Spencer W. Kimball (1895–1985) paraparauraa i to’na mana‘o no te nunaa ai‘a no Marite ei feia faatere ite, ua faataa oia i to’na oraraa no te « faateitei mai i te mau taata ».
No roto mai oia i te nunaa initia Pawnee e ua fanauhia oia i Cody, i Wyoming, i te mau Hau Amui no Marite, i te ava‘e atete 1948 e Ernest raua Jane Echo Hawk. Ua paari oia i Farmington, i New Mexico, i te mau Hau Amui no Marite, i reira oia e to’na utuafare i haapiihia e i bapetizohia e te mau misionare o te Ekalesiai te matahiti ra 1962.
I te matahiti 17, ua pepe to’na mata e te hoê popo paari « baseball » e ua fafau atura i te Fatu e, e tai‘o oia i te Buka a Moromona mai te peu aita to’na mata e pô roa. Ua maitai mai to’na mata e ua tai‘o atura oia 10 api i te mahana hoê no na toru ava‘e i muri mai.
« Ua riro te reira ei ohipa puai roa a‘e i te pae varua o ta’u i farii, ua faaite papû mai te Varua Maitai ia’u e, e parau mau te Buka a Moromona », ua na ô mai Elder Echo Hawk « Ua horo‘a mai teie iteraa ia’u i te puai no te haamaitai atu â ia’u iho i roto i to’u oraraa ».
Ua ravehia oia i roto i te pŭpŭ faahoro popo marite no te fare haapiiraa tuatoru no Brigham Young University–Provo e i reira ua farii atoa oia i te tahi mau parau tu‘ite no te ohipa haapiiraa e te haapa‘oraa animala. I te matahiti ra 1970, ua matara mai oia mai te Tino faehau ihitai (Marine Corp) no te mau Hau Amui no Marite, i muri mai piti matahiti taviniraa. Ua farii oia i te parau tu‘ite tahu‘a tuatoru no te ohipa haapa‘o ture i te haapiiraa tuatoru University of Utah i te matahiti 1973.
Ua ohipa Echo Hawk ei auvaha ture, ei iriti ture no te hau, ei auvaha ture rahi, ei orometua haapii ture i BYU, e ei tauturu papa‘i parau no te Tuhaa faatere o te mau ohipa roto a te nunaa Initia—e ti‘araa ta’na i vaiiho no te farii i te piiraa i roto i te pŭpŭ matamua no te Hitu Ahuru.
Na Elder Kimball i rave i te faaipoiporaa o Elder Echo Hawk raua ta’na vahine, Terry Pries, i roto i te hiero no Roto Miti i te ava‘e titema 1968. Ua ti‘a noa ta’na vahine i pihai iho ia’na a tavini ai oia ei orometua, ei episekopo, ei melo apooraa teitei, e ei peresideni tĭtĭ. E ono tamarii ta raua.