O Lau Molimau I Aso Uma
O lau molimau e sau mai le ola i le talalelei mai lea aso i lea aso ae le mai se taimi o se vavega se tasi.
A o ou tuputupu ae, sa ou sailia se taimi o se vavega ina ia faamaonia ai ia te au e i ai sau molimau. Sa ou faalogo i tala ma lea tala e uiga i ni taimi faavavega pe a aoao tagata e aunoa ma se masalosalo i le moni o le talalelei. E faasolo mai tala i le tu atu i se faaosoosoga po o se tulaga matautia, e oo i le taitaiina mai o tagata tai selau i le Ekalesia ona o gaoioiga laiti ma faatauvaa, e oo i taimi e susue ai tusitusiga paia e tali ai faafitauli o le olaga. O lau tala sili ona fiafia i ai e uiga i se tagata na agai atu i le fale i le po, na pasi atu i se tulaga na lamatia ai o latou ola latou te lei iloaina seia oo i le aso na sosoo ai. Na ou faalogo i vavega o faamalologa po o agelu e puipuia tagata. Ua tau le mafai ona ou faatali seia oo mai lou taimi ia maua se taimi faapea. Na ou faamoemoe e vaai i agelu ma malamalama e tau mai ai ia te au o loo i ai sau molimau i le Ekalesia.
Na aoao au e ou matua e tatalo, alu i le lotu, faitau tusitusiga paia, laei talafeagai, ola mama ia saoloto mai faatosinaga a le lalolagi, ma faalagolago i le Alii. Na i ai ia te au le lototele e ola sao. Na ona ou manao lava ia faamaonia e i ai sau molimau ma ia amanaia e se tasi au ona o lena mea.
I afiafi faaleaiga po o le Aoga Sa, matou te aoao mau o le a fesoasoani ia i matou e tutu atu i taimi o faaosoosoga mai tupulaga. Ua le mafai ona ou faatali e faaaoga na mau. Mo se faataitaiga, na ou vaai faalemafaufau o matou tafafao ma au uo. O le a toso ae e se tasi se mea inu malosi ma faasolo mai. O le a tuu mai ia te au le apa pia, ma ua aumai uma mata i le mea o loo ou i ai. O le a faateteleina le mamafa. O le a ou tu i luga ma fai atu, “Leai! O au o se Mamona, ma ou te le inu!” O le a taufaiofo uma tamaiti. E le mafai e le tele o lo latou faatauanau ona faaosoina au. O le a vave taape le pati, ma o le a faapea mai se tasi faapitoa o le pati na ou matua faaofoina o ia i lou mausali ma ua ia manao e aoao atili e uiga i lau lotu. O le a pepese e agelu viiga, ma o le a faatumuina au i se malamalama.
E lei tupu lava. E lei faaosoosoina lava au e se tasi faapena. E foliga mai ua latou iloa lelei ou tulaga faatonuina i le auala ua ou ola ai. I lou faanoanoaga, e lei oo mai lava lou “taimi mamalu”.
Ae o lenei ua ou iloa o le i ai o se molimau e le tau aumaia e ni agelu. O lau molimau e maua mai le ola i le talalelei i lea aso ma lea aso, lagonaina le molimau a le Agaga Paia, ma olioli i faamanuiaga laiti e oo mai le usiusitai.
Ua ou iloa po o ai au. Ou te iloa e alofa le Atua ia te au. Ou te iloa na togiolaina e le Faaola au agasala. O lau molimau lenei. O le iloaina o lenei mea e aumaia ai le filemu i lou mafaufau.
E le mafai ona ou fai atu na i ai sou taimi faavavega ina ua ou iloa e moni le Ekalesia, ae ua ou fiafia ua ou iloa e i ai sau molimau. O lea la, seia oo i lena taimi pe a faaali mai agelu ia te au, o le a faamalieina lava au i le ola ai i se olaga manaia masani, faatasi ai ma se faamanuiaga faigofie o le iloaina e moni le talalelei.
Ata na tusia e Annie Henrie