Faiaoga Asiasi

Malamalama i le Mana o le Auaunaga

Saunia e le Au Peresitene Aoao o le Aualofa

E manaomia e lo tatou Tama Faalelagi i tatou ina ia mulimuli i se ala e maualuga atu ma faaalia lo tatou uiga faalesoo e ala i le tausia ma le faamaoni o Ana fanau.

A o soifua Keriso i le lalolagi, na Ia auauna atu i isi. A o tatou mananao ia avea ma Ona soo, e tatau ona tatou vaai atu ia te Ia o lo tatou faataitaiga. Na Ia aoao mai, “Ona o galuega ua outou vaai na ou faia o mea ia tou te faia foi; aua o mea na outou vaai ua ou faia o mea lava ia ia outou faia” (3 Nifae 27:21). Ua faatumuina le Feagaiga Fou i faataitaiga o le auaunaga a Keriso. Na Ia faaali atu i le fafine Samaria o Ia o le Mesia. Na ia faamaloloina le tina faaletulafono o Peteru. Na ia toe faatuina mai le afafine o Iairo i ona matua ma Lasalo i ona tuafafine faavauvau. E oo lava i Lona tiga ogaoga i luga o le satauro, sa faaalia lava e le Faaola “le popole mo Lona tina, o le ua pei o se fafine ua oti lana tane ma ua manaomia ai se vaavaaiga.”¹ I luga o le satauro, na ia talosaga ai ia Ioane e tausi i Lona tina.

Na saunoa mai Julie B. Beck, o le peresitene aoao o le Aualofa: “E ala i le Aualofa [ma faiaoga asiasi] tatou te faataitaia ai le avea ma soo o Keriso. Tatou te aoaoina mea semanu Na te tuuina mai tatou te aoaoina, tatou te faia mea semanu Na te tuuina mai tatou te faia, ma avea i tatou ma ē e finagalo o Ia tatou te avea ai.”²

Malamalama i le Mana o le Auaunaga

O le auaunaga ma le tuuina atu o le toomaga i isi ua avea lava pea ma fatu o le Aualofa. “I le gasologa o tausaga, sa aoaoina ai e uso o le Aualofa se la’a se tasi i le taimi ma faaleleia atili ai i lo latou gafataulimaina lea ona vaavaaia o isi. E i ai taimi sa tele ina taulai atu ai tamaitai i le faamae’aina o asiasiga, aoaoina atu o lesona, ma tuua ni pepa ua tusia ai ni savali pe a afea fale o uso o le Aualofa ae le o i ai. Sa fesoasoani nei faiga i uso e aoao ai mamanu o le vaavaaiga. E faapei foi o tagata i le taimi o Mose, sa matele i le tausia o lisi uumi o tulafono, e i ai foi taimi na uunaia ai e uso o le Aualofa le tele o tulafono tusitusia ma tulafono e le tusitusia i o latou lava luga, ona o lo latou naunau ia malamalama pe faapefea ona faamalosi e le tasi le isi.

“Ona o le manaomia tele o le toomaga ma le laveai i olaga o uso ma o latou aiga i le taimi nei, ua manaomia ai i tatou e lo tatou Tama Faalelagi ina ia mulimuli i se ala e maualuga atu ma faatino lo tatou avea ai ma soo e ala i le tausia ma le faamaoni o Ana fanau. Faatasi ai ma lenei faamoemoega taua i le mafaufau, ua aoaoina nei ia taitai e talosagaina ni lipoti e uiga i le soifua manuia faaleagaga ma le faaletino o uso ma o latou aiga ma le auaunaga o loo tuuina atu. Ua i ai nei i faiaoga asiasi le tiutetauave e “faamaoni lo latou iloa ma le alolofa i tuafafine taitasi, e fesoasoani ia te ia e faamalosia lona faatuatua, ma tuuina atu i ai le auaunaga.’”³

O la tatou talafaasolopito o le Aualofa, O Afafine i Lou Malo, ma le Tusitaulima 2: Taitaiina o le Ekalesia ua aoaoina i tatou i le ala tatou te mulimuli ai i se auala e maualuga atu ma faaalia lo tatou avea ma soo:

Tatalo i aso uma mo i latou o loo e faiaoga asiasi ai ma o latou aiga.
Saili musumusuga ia iloa ai manaoga o ou uso.
Asiasi soo i ou uso ina ia faamafanafana ma faamalosia i latou.
Faafesootai soo atu i ou uso e ala i asiasiga, telefoni, tusi, imeli, tusitusiga i telefoni, ma gaoioiga faigofie o le alofa.
Faafeiloai ou uso i le lotu.
Fesoasoani i ou uso pe a maua i latou i se mai po o se isi manaoga faafuasei.
Aoao ou uso i le talalelei mai tusitusiga paia ma le Savali a Faiaoga Asiasi.
Musuia ou uso e ala i le faia o se faataitaiga lelei.
Lipoti atu le tulaga faaleagaga ma le faaletino o ou uso i se taitai o le Aualofa.⁴

Ia tulimatai atu i le Auaunaga

O i tatou o aao o le Alii. E faalagolago mai o Ia ia i tatou taitoatasi. O le tele lava ina tatou vaai i o tatou tofiga o ni faiaoga asiasi, i le avea ai o se tasi o tiutetauave sili ona taua ua tatou maua, o le tele foi lena ona tatou auauna atu ia i latou o loo tatou asia.

O le a tatou tuuina atu aafiaga e valaaulia ai le Agaga ma fesoasoani i o tatou uso e faateleina le faatuatua ma le amiotonu patino.
O le a loloto lo tatou popole ia i latou o loo tatou asia ma fesoasoani ia i latou e faamalosia o latou aiga ma auaiga.
O le a tatou faia se gaoioiga pe a manaomia le fesoasoani e o tatou uso.

O le faataitaiga lenei a Maria ma Gretchen—o ni faiaoga asiasi o e malamalama i le mana o le auaunaga. O i ua mafai ai ona tatou vaai ua maua nei e faiaoga asiasi le avanoa e asiasi taitoatasi ai pe o faatasi foi. E mafai ona la faitaulia lo la “agalelei atu” e tusa lava pe la te asiasi faatasi pe leai foi, ma tuuina atu le savali. E mafai ona la faia se gaoioiga talafeagai e aunoa ma le faatonuina. E mafai ona la saili ma le maelega, taliaina, ma galue e ala i faaaliga patino ia iloa ai le ala e tali atu ai i manaoga faaleagaga ma faaletino o uso taitasi o loo la asia.

O loo maitaga Rasela i lana pepe muamua ma e tatau ona malolo o ia i le moega i le tele o masina o lona maitaga. Na tatalo ona faiaoga asiasi mo le musumusuga ia iloa ai ni auala sili ona lelei e fesoasoani atu ai ia te ia. O Maria, e nofo latalata ane, sa mafai ona fesoasoani i le aiga o Rasela i le tele o aso a o lei alu e faigaluega. O le tasi aso na ia faamama ai le faletaele; o le aso na sosoo ai na ia faamama ai le vaega o totoe. O se tasi aso na ia faamamaina ai le potu malolo, ma o le aso na sosoo ai na ia faia ai le meaai o le aoauli mo Rasela. Ma na faaauauina lana auaunaga a o ia faia tagamea, tafi pefu, pe soo se mea lava na manaomia e Rasela.

Na telefoni soo atu Gretchen ia Rasela ina ia faafiafiaina lona aso. O nisi taimi la te talanoa ma tōē. O nisi taimi e asiasi atu ai Gretchen ma Maria ia Rasela i autafa o lona moega ma fefaasoaai a latou molimau, faitau tusitusiga paia, po o le Savali a Faiaoga Asiasi. Ma ina ua fanau le pepe a Rasela, na la faaauau pea ona fesoasoani atu ia te ia.

I le taimi atoa lenei, na galulue foi Maria ma Gretchen faatasi ma le au peresitene o le Aualofa e faamaopoopo nisi fesoasoaniga e manaomia e Rasela ma lona aiga. Na fono le au peresitene o le Aualofa ma le epikopo ma le aufono a le uarota ina ia mafai ona tuuina atu e faiaoga o aiga ma isi nisi fesoasoaniga.

Sa sili atu ona suamalie le auaunaga a o faatupuina e nei uso le alofa mo le tasi ma le isi ma a o latou fefaasoaai aafiaga faaleagaga. I le avea ai ma faiaoga asiasi e mafai ona tatou mulimuli i nei lava mamanu e tasi ma mataupu faavae o le auaunaga ma maua na faamanuiaga lava e tasi.

Faia o le auaunaga e pei ona sa faia e Keriso

“I le avea ai ma soo tuuto atu o le Faaola, ua faaleleia atili ai lo tatou tomai i le faia o mea semanu Na te faia pe ana o i ai o Ia iinei,” na saunoa mai ai Sister Beck. “Ua tatou iloa e taua ia te Ia la tatou tausiga, ma o lea ua tatou taumafai ai e punoua’i i le tausiga o o tatou uso ae le o le faamae’aina o lisi o mea e fai. O le auaunaga moni e sili atu ona fuatiaina i le tele o lo tatou alofa, nai lo le faaatoatoaina o a tatou faamaumauga”⁵

I le avea ai ma faiaoga asiasi o le a tatou iloa ua faamanuiaina i tatou i la tatou auaunaga pe afai e faapea mai o tatou uso: “Ua fesoasoani mai ou faiaoga asiasi e faatupuina lou faaleagaga. Ua ou iloa e matua popole lava ou faiaoga asiasi ia te au ma lou aiga, ma pe a i ai ni ou faafitauli, ou te iloa o le a la fesoasoani mai ia te au.” E ala i le mulimuli i se ala maualuga atu o ni faiaoga asiasi, tatou te auai ai i le galuega ofoofogia a le Alii ma le ausiaina o faamoemoega o le Aualofa e faateleina le faatuatua ma le amiotonu patino, faamalolosia aiga ma auaiga, ma fesoasoani ia i latou o e le tagolima.

Ata na tusia e Jerry Garns