O Afafine i Lo’u Malo

Suesue i mea nei, ma pe a talafeagai ai, ia talanoaina faatasi ma uso e te asia. Faaaoga fesili e fesoasoani ai ia te oe e faamalolosia ai ou uso ma avea ai le Aualofa ma se vaega ola o lou lava olaga.

Faatuatua, Aiga, Toomaga

O i tatou o afafine a lo tatou Tama o i le Lagi. Na te silafiaina i tatou, e alofa ia i tatou, ma e i ai sana fuafuaga mo i tatou. O se vaega o lena fuafuaga e aofia ai le o mai i le lalolagi e aoao ai ina ia filifili le lelei mai le leaga. Pe a tatou filifili e tausi poloaiga a le Atua, ua tatou faamamaluina o Ia ma faailoa atu lo tatou faasinomaga o ni afafine o le Atua. O loo fesoasoani le Aualofa e faamanatu mai ia i tatou lenei tofi paia.

Ua faamalosia ma lagolagoina i tatou e le Aualofa ma lona talafaasolopito. Na saunoa mai Julie B. Beck, o le peresitene aoao o le Aualofa, faapea: “I le avea ai ma afafine o le Atua, o loo outou sauniuni mo ni tofiga e faavavau, ma ua tofu outou ma se faasinomaga, natura, ma se tiute faatamaitai. O le manuia o aiga, nuu, o lenei Ekalesia, ma le ata taua o le faaolataga e faalagolago i lo outou faatuatua. … Na faamoemoe [lo tatou Tama Faalelagi] i le Aualofa e fesoasoani e fausia Lona nuu ma saunia i latou mo faamanuiaga o le malumalu. Na ia faatuina [le Aualofa] ina ia faalaugatasia ai Ona afafine ma Lana galuega ma fesili atu i ai mo la latou fesoasoani i le fausiaina o Lona malo ma faamalolosia aiga o Siona.”¹

Ua tuuina mai ia i tatou e lo tatou Tama oi le Lagi se galuega faapitoa ina ia fesoasoani e fausia Lona Malo. Ua Ia faamanuiaina foi i tatou i ni meaalofa faaleagaga tatou te manaomia e faataunuu ai lenei galuega faapitoa. E ala i le Aualofa, ua tatou maua ai ni avanoa e faaaoga ai a tatou meaalofa e faamalolosia ai aiga, fesoasoani ia i latou e le tagolima, ma aoao i le auala e ola ai faapei o soo o Iesu Keriso.

Na saunoa Peresitene Dieter F. Uchtdorf, Fesoasoani Lua i le Au Peresitene Sili, e uiga i le avea ai ma soo: “O le savavali ma le onosai i le ala o le avea ai ma soo, tatou te faaalia ai ia i tatou lava le malosi o lo tatou faatuatua, ma lo tatou naunau e talia le finagalo o le Atua, ae le o o tatou loto.”²

Ia tatou manatua o i tatou o afafine o le Atua, ma ia taumafai e ola faapei o ni Ona soo. Pe a tatou faia faapea, o le a tatou fesoasoani e fausia le malo o le Atua i lenei lalolagi, ma agavaa e toe foi atu i Lona afioaga.

Mai Tusitusiga Paia

Sakaria 2:10; Mataupu Faavae ma Feagaiga 25:1, 10, 16; 138:38–39, 56; “O Le Aiga: O Se Folafolaga i le Lalolagi” (Liahona, Nov. 2010, 129)

Mai lo Tatou Talafaasolopito

I le aso 28 o Aperila, 1842, na saunoa atu ai le Perofeta o Iosefa Samita i tamaitai o le Aualofa: “Ua tuuina nei outou i se tulaga e mafai ai ona outou galulue e tusa ai ma na tigaalofa ua totoina e le Atua i [o outou loto]. … Afai tou te ola agavaa ai i o outou avanoa, e le mafai ona taofia agelu i le avea ai ma a outou paaga.”³

O le iloaina o le mana o le Aualofa e auauna atu ai i isi ma fesoasoani i tagata taitoatasi e faateleina le faatuatua, na folafola atu ai e, Zina D. H. Young, o le peresitene aoao lona tolu o le Aualofa, i le usoga i le 1893, “Afai o le a outou eliina i le taele o o outou lava loto, o le a outou maua ai, faatasi ma le fesoasoani a le Agaga o le Alii, le penina tautele, le molimau o lenei galuega.”⁴