Sa Latou Saunoa Mai ia i Matou
O Mai, Tatou Vivii ia te Ia
I le Kerisimasi talu ai a o ou galue ai i le laumua o le Ekalesia i le Aai o Sate Leki, Iuta, ISA, sa ou fetaia’i ai ma se tulaga faalelotoifale o le tau e ta’u o se feliua’iga. O se felua’iga o se tulaga e malulu atu ai le ea e latalata i le palapala nai lo le ea i luga atu, o le faafeagai—o le feliua’iga—o le tulaga masani. O feliua’iga e le o se mea e tulaga ese i le Aai o Sate Leki, ae e tele lava ina iloa lona aafiaga aua o le aai e tu i se vanu e siosiomia e mauga maualuluga. O le mea lena e punitia ai le asu o le aai ma to’a feteena’i ai ma le fola o le vanu, ma ufitia ai le aai ma ona faoā aai i se ao mafiafia, pogisa, ma le malulu. O le asu e matautia mo le soifua maloloina o i latou e i ai toatuga o le mānava, ma e aafia ai le agaga o le toatele o isi, aua e lagona le palapala o le ea ma e ufitia le la mo le tele o aso, e oo lava i vaiaso, i se taimi.
Peitai, o sina tietie atu i le taavale i luga o mauga, e iloa ai o le asu e na o ni nai futu pe fiaselau le mafiafia. I ni nai minute, e mafai ai ona e i ai i le mutigitigi o le la, manavaina le ea manino lelei, pulato’a atu i atumauga mama a’ia’i, ua faapulou i le kiona. Sa iloa lelei lava le eseesega ma le vanu i lalo ifo. Pe a e a’e atili atu i luga o mauga, ma tilotilo ifo i lalo i le asu na e vaai ai i le vanu, ma ua foliga e pei o se palanikeke eleelea i lalo ifo o le lagi lanumoana.
E i ai taimi i o tatou olaga tatou te lagonaina ai lo tatou punitia i lalo i le vanu, i le pogisa o le puaoa asuasu uliuli. Ona o filifiliga le lelei tatou te faia, o amioga e faatiga ai i le Agaga, pe na o faaiuga ma luitau tiga ma le faaumiumi masani o le olaga nei, tatou te manatu ai ua pa’ulia i le puaoa mafiafia, ma le lofituina. E le mafai ona manino la tatou vaai, tatou te lagona le fememea’i, ma tatou te manatu ua tatou aveesea mai i tatou lava mai le malamalama ma le mafanafana o le alofa o lo tatou Tama Faalelagi. E galo ia i tatou o loo faatalitali mai mo i tatou le malamalama atoatoa o le Alii, o loo talotalo mai, ma ua na o ni nai sitepu lava le mamao o le faatuatua. E tatau ona tatou iloaina ua ia te i tatou le mana ma le malosi tatou te aveesea mai ai i tatou lava mai le ea palapala o le vanu ae o mai i le lasusulu malamalama o le filemu ma le faamoemoe lea e na o le o mai i le Faaola e maua ai.
I le taimi lea o le Kerisimasi i le tausaga, tatou te olioli ai i le soifua mai o Iesu Keriso, o le Malamalama o le Lalolagi, o le ua valaauina i tatou uma e o mai ia te Ia ma le malamalama. E mafai ona tatou faitau i tusitusiga paia e uiga i alii ma tamaitai sa faamanuiaina moni lava e o mai ia te ia i le taimi o le Soifua mai o le Faaola. O nisi e mamao le mea na o mai ai, a o isi e latalata. O nisi sa mauaina le asiasiga a agelu, o isi foi na gaoioi i luga o faaaliga faaletagata lava ia. Ae sa talia e tagata taitoatasi le valaaulia e o mai ia te Ia.
O a ni mea e mafai ona tatou aoao mai leoleo mamoe, Simeona, Ana, ma le Au Makoi, o i latou uma sa fiafia e o mai e vaai i le tamaitiiti o Keriso, i o latou lava mata? A tatou mafaufau loloto i a latou tali atu ma le faatuatua i le valaaulia e o mai ia Keriso, e mafai ona tatou iloa ai ina ia si’i a’e atili ma le mataalia i tatou lava mai o tatou feliua’iga, mai le pogisa ma le fenumia’i, ma aumaia i tatou lava i le Malamalama o le Lalolagi. O iina, ia te Ia, tatou te lagonaina ai pe o ai moni lava i tatou, ma le mea tonu e fetaui ai i tatou i le ata o le faavavau. E faaleaogaina lo tatou lava feliua’iga ae toefuatai mai le vaaiga lelei.
O Leoleo Mamoe
I fuaiupu lauiloa mai le Luka 2, tatou te aoao ai i mea moni taua e uiga i na uluai molimau o le soifua mai o Keriso, o leoleo mamoe i le vao e latalata i Peteleema. Ina ua “tu mai ia i latou le agelu a le Alii, … sa matua fefefe lava i latou” (fuaiupu 9). Peitai sa latou faalogo i “le tala lelei e olioli tele ai” ua fanau mai le Faaola ua loa ona mua’i ta’u mai, o le Mesia, le Keriso (fuaiupu 10). Sa latou faalogo ia iloa le faailoga e mafai ai ona latou iloa le Faaola, o le a “aui [o Ia] i le ie, o loo taoto i le falepovi” (fuaiupu 12). Ina ua mae’a le folafolaga fiafia a ‘au o le lagi, sa vave ona tali atu le au leoleo mamoe, ua faapea atu, “Ina tatou o ia i Peteleema, tatou te vaavaai i lenei mea ua faia” (fuaiupu 15). Sa latou “faataalise atu” (fuaiupu 16) ma maua Keriso le pepe meamea e pei lava ona sa ta’u atu ai e le agelu, ona latou “foi mai lea, o vivii ma faafetai i le Atua” (fuaiupu 20). O lo latou mananao e faasoa atu le talafou mamalu i le soifua mai o le Faaola, “na latou faailoa ai [le tala] i nuu mamao” (fuaiupu 17).
E faapei o leoleo mamoe, e tatau foi ona tatou tali vave atu, ma le faanatinati, i soo se taimi e fetalai mai ai le Agaga ia i tatou. I le saunoaga a Peresitene Thomas S. Monson, e “lē tatau, lē tatau lava, ona tatou tolopoina le mulimuli i se uunaiga.”1 O nisi taimi pe a uma ona gauai atu i se uunaiga, e le mafai ona manino la tatou vaai pe aisea ua taialaina ai i tatou e le Agaga e fai se mea patino. Ae o le tele lava o taimi, e pei foi o leoleo mamoe, tatou te vaai i vavega o tutupu, ona faamautuina ai lea o la tatou tali atu ma le faamaoni. Ona mafai ai lea ona tatou faaaogaina avanoa e faasoa atu ai lo tatou olioli ma a tatou molimau i isi. O le faia o lena mea e mafai ai ona faamalolosia le faatuatua ma le faamoemoe o isi, ma saga faamautuina ai a tatou lava molimau ma tatou latalata atili ai i le Faaola ma Ona ala.
Simeona
O le isi molimau lelei i le tama meamea o Keriso, o Simeona. O ia o se tagata “amiotonu ma le mata’u i le Atua” sa fesootai e le aunoa ma le Agaga Paia (Luka 2:25). Sa faailoa atu ia te ia “e le oo ia te ia le oti, seia muai vaai i le Keriso o le Alii” (fuaiupu 26), ma sa ola o ia ma le faamoemoe ma le naunau atu i lena aafiaga paia. Sa uunaia o ia e le Agaga e sau i le malumalu i le aso na aumaia ai e Maria ma Iosefa le pepe meamea o Iesu i Ierusalema “e tuu atu ai i luma o le Alii” (fuaiupu 22). Sa iloa e Simeona le pepe o le Mesia na folafola mai ona “sapaia lea o ia i ona lima, ma faafetai atu i le Atua” (fuaiupu 28), ma vavalo e uiga i le taunuuga o le pepe paia o le “malamalama e faamalamalamaa’i Nuu Ese, ma le mamalu o lou nuu o Isaraelu” (fuaiupu 32).
O le olaga amiotonu ma le faamaoni o Simeona na mafai ai e ia ona i ai i le malumalu ina ia mafai ai ona ia molimau e uiga i le Malamalama ina ua i’u ina ia mauaina. O i tatou, e faapei foi o Simeona, e mafai ona taumafai ia tele atu le gauai ma le usiusitai i musumusuga a le Agaga Paia ina ia mafai ai e o tatou olaga ona savavali i le ala ua finagalo ai lo tatou Tama Faalelagi mo i tatou. Talu ai sa atiina ae e Simeona lona tomai e faalogo ai ma tali atu i le Agaga, o lea sa i ai o ia i le nofoaga sa’o i le taimi sa’o, ma sa faataunuuina folafolaga a le Alii ia te ia i le ala e aupito sili ona mamalu.
E mafai foi ona maua na lava avanoa e i tatou taitoatasi ma mafai ai ona tatala mai le fuafuaga a le Alii i o tatou olaga. A tatou feagai ma le faia o faaiuga e faavavau le taua, a tatou i ai i se fetaula’igaala i o tatou olaga, e manaomia le manino o o tatou mafaufauga ma le vaaiga sa’o. O nisi taimi o le natura tonu lava o le faia o nei faaiuga taua, e afua ai ona tatou lagona le faaletonu, lē mautu, ma lē mafai ai ona gaoioi, i lalo i le vanu pogisa i le feliua’iga. Peitai a tatou savavali i le faatuatua ma gaoioi ai e tusa ma mataupu faavae amiotonu, e i’u lava ina tatou vaaia le fuafuaga a le Atua ua tulai mai i o tatou olaga, ma toe aumaia ai i tatou i le lasusulu malamalama o le alofa o le Atua.
Ana
O Ana o se fafine ua “loomatua” o se fafine nofofua ua faamatalaina o se “perofeta fafine” (Luka 2:36), o lona olaga umi ma le faamaoni sa iloga i ana anapogi ma talosaga i ao ma po ma sa “lei alu ese o ia i le malumalu” (fuaiupu 37). Ina ua vaai o ia i le pepe i le malumalu, sa ia “faafetai” mo le pepe o Keriso “ma tautala e uiga ia te ia i tagata uma lava e na faatali atu i le togiola i Ierusalema” (fuaiupu 38).
Ua tatou aoao mai le aafiaga o Ana e mafai ona tatou ola faamaoni i ituaiga tau uma pe afai tatou te tumau i lo tatou anapogi ma tatalo ma pe afai tatou te le ō ese mai le malumalu i o tatou loto. Afai tatou te lei maua lava le avanoa e malaga ai i se malumalu ma maua ai ona faamanuiaga, e mafai lava ona tatou olioli i faamanuiaga e tafe mai i o tatou olaga pe a tatou umia ma le agavaa se pepa faataga o le malumalu. Ua faatele ona valaaulia i tatou e perofeta ia umia se pepa faataga tusa lava pe le mafai ona auai atu i le malumalu ona o tulaga tatou te i ai.2 E mafai ona tatou si’i a’e i tatou lava mai taimi o le pogisa ma o atu i le malamalama o le lotofaafetai e ala i a tatou tapuaiga i le malumalu ma ala i le molimau atu e uiga ia Iesu ia i latou uma o loo sailia le filemu ma le faamoemoe.
O Le Au Makoi
O le mea mulimuli, i le Mataio 2 tatou te faitau ai i le Au Makoi, o ē sa malaga mai i le mea mamao, ina ua “vaai i lona fetu i sasae” ma ua malamalama i le faailoga (fuaiupu 2). Sa latou saunia meaalofa e saafi ai ma ifo atu ai, ma sa latou o mai e saili ia te Ia, ma fesili “Po o fea o i ai le ua fanau mai o le tupu o tagata Iutaia?” (fuaiupu 2). Ina ua mae’a la latou sailiga sa latou mauaina le pepe o Keriso, sa latou “faapauu i lalo, ma ifo atu ia te ia” ma tuuina atu a latou oloa (fuaiupu 11). E ui ina sa latou fetaia’i ma le faa’ole’ole a Herota, ae sa “faailoa atu ia te i latou i le miti e aua ne’i foi atu ia Herota” ae ia latou foi “i le tasi ala” (fuaiupu 12). Sa faatino e le Au Makoi e ala i le faaaliga mai le Atua ma sa puipuia le aiga paia mai faamoemoega leaga o Herota.
E tele mea e mafai ona tatou aoao mai i le Au Makoi. E faapei foi o i latou, e tatau ona tatou suesue i tusitusiga paia ma iloa faailoga e matauina a o tatou taufai saunia uma le lalolagi mo le Afio Mai Faalua o le Faaola. O iina la, a tatou saili ma mafaufau loloto i tusitusiga paia, o le a tatou naunau atili atoatoa ai e saili le Alii i aso uma o o tatou ola, ma avea o se meaalofa mo Ia, lafoai le manatu faapito, faamaualuga ma le fouvale. A oo mai faaaliga patino e fetuuna’i ia fuafuaga ua tatou faia, e mafai ona tatou usitai, ma faatuatua ma faalagolago e silafia e le Atua le mea e sili mo i tatou. Ona oo mai lea o le taimi, i o tatou olaga o ni soo moni, e tatau ai ona tatou faapauu i lalo ma ifo atu i le Faaola i le lotomaulalo ma le alofa.
O lo tatou tulaga o ni soo e le manaomia ai i tatou e tuua a tatou mamoe i le lotoa pe laasia ia toafa. O la tatou faigamalaga ia te Ia e le faaletino; e faaleagaga ma faaleamio. E aofia ai le taliaina ma le faatauaina o le mea moni e faapea o Lana Togiola e le i’u ma e aofia ai vaega uma o o tatou olaga—o a tatou agasala, vaivaiga, tiga, ma’i, ma puapuaga (tagai Alema 7:11–13). O lona uiga e mafai ona tatou lafoaia na mea o loo taofiofia ai i tatou i lalo i le pogisa o le puaoa o o tatou lava feliua’iga ma ola ai nai lo le mafanafana o le alofa o le Malamalama o le Lalolagi. E pei ona sa aoao mai e Peresitene Henry B. Eyring, Fesoasoani Muamua i le Au Peresitene Sili: “O upu ‘o mai ia Keriso’ o ni valaaulia. O se valaaulia e pito i sili ona taua e mafai ona e ofoina atu i se isi tagata. O se valaaulia sili ona taua e mafai ona talia e se tagata.”3
Ata na pueina e Tom Smart, Deseret News; Pele i Lona Loto, saunia e Kathy Lawrence, mai le Faaputuga o Faaaliga o le Faatuatua na saunia e Mill Pond press, Inc., Venice, Florida, e le mafai ona kopiina
Faasilasilaga i Leoleo Mamoe, saunia e Del Parson; Tatalo o le Faafetai a Simeona, saunia e Robert T. Barrett; O Le Fatu o le Faamoemoe, saunia e Elspeth Young, e le mafai ona kopiina; O Le Taunuu Atu, saunia e Michael Albrechtson, e le mafai ona kopiina