Tala Faamamai o le Talalelei
O Lesona mai le Matai
Na faauuina Marvin J. Ashton e avea ma Aposetolo i le aso 2 Tesema, 1971. O le tusiga o loo i lalo o se vaega mai se saunoaga na ia tuuina atu i se faigalotu a le Iunivesite a Polika Iaga i le aso 5 Iuni, 1988.
Po o le a lava le umi e mafai ona ou manatua ai, e i ai so’u alofa faapitoa mo Iesu Keriso. Sa aoaoina a’u o Ia o le Alo o le Atua soifua. Sa aoaoina a’u o Ia o la’u uo, o lo’u faiaoga, ma o lo’u malosiaga. I tausaga ua mavae atu, ina ua oo mai i lo’u olaga se valaauga ma se tiutetauave ma le mamalu o le tauaveina o se molimau faapitoa e uiga ia te Ia, sa ou taumafai malosi lava ina ia aoaoina a’u e ala i Lona soifuaga ma Ona ala. E moni, o Ia o le Faiaoga o Faiaoga. Ina ia fesoasoani ia te a’u i a’u galuega ma tautinoga, sa ou liliu soo atu i le mataupu e valu o le Ioane i le Feagaiga Fou mo le malosi, mo le taitaiga, ma mo le faataitaiga. Afai e mafai faamolemole, sei o tatou faitau i nisi o mau e faamalolosia ai o tatou olaga ma a tatou sootaga ma Iesu. Na fesoasoani nei laina ma upu ia te au ou te malamalama atili ai ia te Ia ma tuuina mai ai ia te au le naunautaiga ina ia faia ma avea atili ai e faapei o Ia. …
Na aumai mai ia te Ia e le [au tusiupu ma le au faresaio] le fafine na maua ina o mulilua. O nei fili … na taumafai e tofotofo ia te Ia. Sa latou faanofoina [le fafine] i le ogatotonu e pei o se faaaliga, o se tagata agasala, o se tagata eleelea. E le’i sola ese mai ai o Ia. … Sa molia o ia i le mulilua—i le agasala lava lea. E le’i i ai se masalosalo e uiga i lona ta’usalaga. Sa latou tofotofoina o Ia i se tulaga na foliga mai e le mafai ona aloese mai ai. Na fai mai le tulafono a Mose e fetogi o ia i maa. “A o oe, pe se a se mea e te fetalai mai i ai?” [Ioane 8:5] sa latou fesili, ma tofotofo ia te Ia, ina ia ūtia o Ia—ma tuu ai o Ia i se tulaga e le mafai ona malo ai.
Po o le a lava Sana fetalaiga, o le a tuuaia o Ia i le fai o le mea sese, faamasinoga sese. Sa latou tofotofoina o Ia pe mafai ona uma Lona onosai ma faagalo Lona tagata. O le fetogiina i maa o le [fafine] o se tulaga saua. O le le amanaiaina o ia o se mea sese. … Na punou o Ia i lalo ma tusitusi i le eleele ma foliga mai e Na te le’i lagonaina i latou (na gauai atu i latou ma saunia tagata uma o loo faalogo mai ina ia aoaoina). … Ma a o leai se pisa, sa latou toe fesili atu. Sa mafai ona ou lagonaina fesili lē mafaufau: “Se tope, fai mai sau upu. Ua maua nei oe. E te fefe e tali mai?” Peitai na pule lava Iesu. …
Na ea a’e Iesu lava Ia i luga, ma fetalai atu ma le lotomaulalo ma le agamalu i se tulaga malualii i upu nei ua sili ona mamana: “O so outou e leai sana agasala, ia lua’i togi se maa ia te ia” [Ioane 8:7]. O se tali atoatoa mai i se tamalii atoatoa.
E manaomia le faamanatu mai pea lava pea o lenei mea ia i tatou i le taimi nei, i o tatou tiutetauave, tulaga, ma valaauga. I a tatou fegalegaleaiga ma tagata uma, tuu atu i se tasi e leai sana agasala na te muai faitio pe saili se sese pe tau faaleaga. … Na Ia punou i lalo ma tusitusi i le eleele. Sa latou lagona Lana fetalaiga. Sa latou lagona le aafiaga o le filemu o Lona agaga a o le’i tuuina mai Sona finagalo. Ina ua ta’usalaina e o latou lava mafaufau, na o ese i o latou lava loto fuatia ifo, ae le’i tuliesea. Sa taitoatasi ma latou o i fafo—e lei o e su’e ni maa ae na o e fōfō o latou manu’a faaleagaga.
Sa tuua na o Ia ma le fafine. Ou te fiafia sa faamauina lena mea. O nisi o i tatou e taumafai e taumamao mai ia i latou ua pauu. … Na Ia fetalai, “O fea ea i latou e na molia oe? ua le faasala mai ea se tasi ia te oe?” [Ioane 8:10]. … Na umi se taimi sa fesili ai ma faafofoga Iesu Keriso. Oi, pe ana mafai ona tatou faia sooa lena mea! O le a matuai faigofie a tatou tali, ma matuai faaleleia. …
Na tali atu le fafine na molia i le mulilua i le fesili a le Alii e uiga i e na molia o ia, “Le Alii e, e leai lava se tasi.” Ona tuuina mai ai lea o lenei fetalaiga mamana: “Alu ia oe, aua e te toe agasala” [Ioane 8:11]. Sa aoao atu le Matai i lena vaitaimi ma o loo aoao mai pea i lenei lava itula. O Lana savali maoae: inoino i le agasala, ae alofa i le tagata agasala. Ou te faamoemoe ua mafai ona aumaia i lena mea lo tatou malosi ma le mautinoa ma se sootaga vavalalata i lo tatou Faaola o Iesu Keriso. E le faapea na le amana’iaina e Iesu le mulilua. Na Ia avatu i le fafine le alofa nai lo le tuuina atu o se lauga pulepuletutu. Sa manaomia e le fafine ma e na molia o ia se lesona o le alofa. Sa manaomia i lea tulaga le alofa mutimutivale ma le agaalofa. E ese le taua o le iloaina e talitonu Iesu e sili atu le tagata nai lo ana agasala uma. Pe o se mea ea e ofo ai le faasino atu ia te Ia o le “Leoleo Mamoe Lelei”? Sa alofa o Ia i Ana mamoe uma pe na taase, fiaaai, le mautonu, maalilili, pe na leiloloa.
I le faaiuga o lenei aafiaga faaleaoaoga maoae, lenei lesona o le alofa ma le agaalofa, o loo i ai se fuaiupu taua.
“Ona toe fetalai atu lea o Iesu ia te i latou, ua faapea atu, O a’u nei o le malamalama o le lalolagi: o le mulimuli mai ia te au, e le savali o ia i le pouliuli, ae ia te ia le malamalama o le ola” (Ioane 8:12).
Se’i o tatou mulimuli i Lona malamalama. Se’i o tatou taulai atu soo i upu nei. Ou te molimau atu ia te outou sa faapolopoloina mo le lelei o tagata uma.
O Le Fafine na Molia i le Mulilua, saunia e Harry Anderson © Ekalesia Aso Fitu, e le mafai ona kopiina