Mensahe sa Unang Kapangulohan
Ang Pagpili nga Mahimong Mapasalamaton
Ang atongAmahan sa Langit nagsugo kanato nga magmapasalamaton sa tanang butang (tan-awa sa 1 Mga Taga-Tesalonica 5:18), ug Siya nagsugo kanato nga kita magpasalamat sa mga panalangin nga atong madawat (tan-awa sa D&P 46:32). Kita nasayud nga ang tanan Niyang sugo gihimo aron kita magmalipayon, ug kita usab nasayud nga ang pagsupak sa mga sugo makapaalaut kanato.
Busa aron magmalipayon ug makalikay sa kaalautan, kita kinahanglan nga adunay mapasalamaton nga kasingkasing. Atong nakita sa atong kinabuhi ang koneksyon tali sa pagpasalamat ug kalipay. Kitang tanan ganahan nga mobati nga magpasalamat, apan dili sayon nga kanunay nga magmapasalamaton sa tanang mga butang sa mga pagsulay sa kinabuhi. Mga kasakit, kasagmuyo, ug ang pagkamatay sa mga tawo nga atong gihigugma usahay mahitabo sa atong kinabuhi. Ang atong mga kasubo makapalisud sa pagtan-aw sa atong mga panalangin ug sa pagdayeg sa mga panalangin nga giandam sa Dios kanato sa umaabut.
Usa ka hagit ang pag-ihap sa atong mga panalangin tungod aduna kitay kalagmitan nga mobaliwala sa maayong mga butang. Kon kita mawad-an og kapasilungan, kalan-on, o pagkamabination sa atong mga higala ug pamilya, kita makaamgo kon unsa gyud unta kita kamapasalamaton sa dihang anaa pa kining mga butanga kanato.
Labaw sa tanan, usahay lisud alang nato nga mapasalamaton kaayo sa labing nindot nga mga gasa nga atong madawat: ang pagkatawo ni Jesukristo, ang Iyang Pag-ula, ang saad sa pagkabanhaw, ang oportunidad nga makatagamtam sa kinabuhing dayon uban sa atong mga pamilya, ang Pagpahiuli sa ebanghelyo uban sa priesthood ug sa mga yawe niini. Pinaagi lamang sa tabang sa Espiritu Santo nga kita mosugod sa pagbati unsay kahulugan niadtong mga panalangin alang kanato ug niadtong atong gihigugma. Ug pinaagi lamang niana nga kita makalaum nga magmapasalamaton sa tanang mga butang ug makalikay nga makasala sa Dios sa pagka-ingrato.
Kita kinahanglang mangayo pinaagi sa pag-ampo nga ang Dios, pinaagi sa gahum sa Espiritu Santo, motabang kanato nga makaklaro sa atong mga panalangin bisan pa diha sa tunga-tunga sa atong mga pagsulay. Siya makatabang kanato pinaagi sa gahum sa Espiritu sa pag-ila ug mahimong mapasalamaton sa mga panalangin nga atong gibaliwala. Ang nakatabang gyud kanako mao ang pagpangutana sa Dios pinaagi sa pag-ampo, “Mahimo ba nga Imo kong giyahan ngadto sa usa ka tawo nga akong matabangan alang Kanimo?” Pinaagi sa pagtabang sa Dios sa pagpanalangin sa uban nga mas klaro nakong nakita ang akong kaugalingong mga panalangin.
Ang akong pag-ampo natubag sa makausa sa dihang usa ka magtiayon nga dili nako kaila midapit kanako sa pag-adto sa ospital. Didto akong nakita ang usa ka gamay kaayo nga masuso nga makaigo ra sa akong kamot. Mga pipila lamang ka semana sa kinabuhi, siya nakasinati na og daghang mga opera. Ang mga doktor miingon na sa mga ginikanan nga mas lisud nga opera ang gikinahanglan alang sa kasingkasing ug sa baga aron sa pagpatunhay sa kinabuhi niadtong gamay kaayo nga anak sa Dios.
Sa hangyo sa mga ginikanan, ako mihatag sa bata og panalangin sa priesthood. Ang panalangin milakip og saad nga sumpayan ang kinabuhi. Labaw pa sa paghatag sa panalangin, ako mismo nakadawat sa panalangin sa usa ka mas mapasalamaton nga kasingkasing.
Uban sa tabang sa atong Amahan, kitang tanan makapili nga mobati nga mas mapasalamaton. Kita makahangyo Kaniya sa pagtabang kanato nga kita mas makakita og klaro sa atong mga panalangin, bisan unsa pa man ang atong mga sirkumstansya. Alang kanako nianang adlawa, ako mapasalamaton kaayo nga walay sama sa una sa milagro sa akong kaugalingong kasingkasing ug baga nga mga maayo og kondisyon. Samtang mipauli nagpasalamat ko sa mga panalangin sa akong mga anak nga mas klaro nakong nakita ang mga milagro sa pagkamabination gikan sa Dios ug gikan sa matarung nga mga tawo nga naglibut kanila.
Labaw sa tanan, mibati ko nga mapasalamaton sa ebidensya sa Pag-ula nga nagtandog sa mga kinabuhi sa nabalaka nga mga ginikanan ug sa akoa. Akong nakita ang paglaum ug gugmang putli ni Kristo nga nagsanag sa ilang mga panagway, bisan pa sa ilang labing lisud nga pagsulay. Ug mibati ko sa ebidensya nga inyong mabati kon kamo mohangyo sa Dios sa pagpadayag kaninyo nga ang Pag-ula makatugot kaninyo sa pagbati og paglaum ug gugma.
Kitang tanan makapili sa pagpasalamat pinaagi sa pag-ampo ug sa paghangyo sa Dios og giya sa pagserbisyo sa uban alang Kaniya—ilabi na niining panahon sa tuig nga kita mosaulog sa pagkatawo sa Manluluwas. Ang Dios nga Amahan mihatag sa Iyang Anak, ug si Jesukristo mihatag kanato sa Pag-ula, ang labing mahinungdanon sa tanang mga gasa (tan-awa sa D&P 14:7).
Ang pagpasalamat pinaagi sa pag-ampo makapakita nato sa kadak-on niining mga panalangin ug sa tanan pa natong mga panalangin ug sa ingon modawat sa gasa sa usa ka mas mapasalamaton nga kasingkasing.
Mahilum nga Gabii, ni Liz Lemon Swindle, dili mahimong pakopyahan