Saili e le Ekalesia Talaaga o Paionia o Aso Nei
A mafaufau tagata o le Ekalesia i paionia, e tele lava ina latou vaai faalemafaufau ia i latou o le seneturi lona 19 o e sa malaga atu i le Iunaite Setete i sisifo e ala i vaa pe savavali foi.
E toatele atonu latou te le iloa o i latou o paionia taulamua o aso nei.
O loo sailia i le taimi nei e le Matagaluega o Talafaasolopito o le Ekalesia ia talaaga o paionia o aso nei. A o taliaina e le matagaluega ia tusiga o talaaga patino, o loo faapitoa lava ona latou faamemelo i talaaga o tagata liliu mai, tagata o loo alaala i se eria o loo fausia pe sa fausia ai se malumalu fou, faifeautalai o loo auauna atu i se misiona fou, ma i latou o loo ola i le talalelei i o latou olaga ae latou te le o mafuta ai ma nisi tagata e toatele o le Au Paia o Aso e Gata Ai.
“O talaaga patino o isi e mafai ona fesoasoani ia i latou o e atonu na oo foi i ai nei lava aafiaga pe nonofo foi i le nofoaga po o le eria e tasi,” o le faamatalaga lea a Brad Westwood, o le pule o atinaega fatufatuai i le Matagaluega o Talafaasolopito o le Ekalesia.
Na saunoa Brother Westwood, o talaaga patino e mafai ona tumu i talaaga o le olaga po o soo se mea, e pei o mea e manatua mai se misiona, aafiaga patino o se matua, po o isi tala faapitoa e faatatau i se mea taua na tupu.
“Tatou te talitonu e tutusa uma lava fanau a le Atua i Lana silafaga,” na saunoa ai Brother Westwood. “E tofu uma i tatou ma se tala taua e faamatala—e tofu i tatou ma se aafiaga faataitai i lenei lalolagi, ma ua tatou iloa o lena talaaga e fesoasoani e fausia ai molimau.”
Fai mai Brother Westwood, i le selau tausaga mai le taimi lenei, atonu e faitau ai e se tasi e le’i i ai sana ia lava faamaumauga o talaaga faaleaiga ia lou talaaga ma faapea mai, “E faapenei la le mea e ta’ua o le tagata liliu mai.”
A malamalama tagata i tagata o o latou aiga po o isi paionia—e aofia ai tauiviga sa latou oo i ai, o lesona sa latou aoaoina, ma le poto na latou maua—e mafai foi ona latou maua ai fautuaga ma fesoasoaniga mo o latou lava olaga.
A auina mai talaaga i le faletusi, e lisiina ma e avanoa mo le maimoaina ma le faitauina e tagata e asiasi i ai. O tusiga po o tusi ua teuina i le siosiomaga e puipuia ai mai le tau i le Faletusi o Talafaasolopito o le Ekalesia, lea e umi ai ona faasaoina.
Na tuuina mai e Brother Westwood, le fautuaga lenei ia i latou o loo mafaufau e auina mai a latou talaaga patino i le Faletusi o Talafaasolopito o le Ekalesia.
Ia tusitusi mo le faaaogaina e tagata lautele. E ui lava o tusi ma api talaaga o ni punaoa matagofie ia o mea na tutupu i aso ua mavae, ae e masani lava ona faatatau i mea na tutupu i aso uma ma mafaufauga o le tagata lava ia, lea e le talafeagai ai mo tagata lautele. O nisi taimi o nei tusi ma api talaaga e mafai ona lamatia ai le tulaga faalilolilo o se tagata. Afai o talaaga e aofia ai faamatalaga e mafai ona faaleagaina ai se igoa tauleleia o se tasi, o le a taliaina ae o le a le mafai ona faaalia i tagata lautele.
Ia tusi tala i ni vaega ma mataupu. E masani lava, o le taumafai e amata mai i mea e manatua mai lava i lou laitiiti ma aofia ai mea uma e tau mai i le asō e ono lofituina. Amata i se tala se tasi i le taimi. Mo se faataitaiga, amata ona tusi e uiga i lau misiona. A uma loa, see atu i se vaega e ese mai o lou olaga.
Faaaoga faamatalaga autu. Afai o i ai sau tusi, sii pe tuu i totonu o se tusi. Afai o i ai ma se ata, ia tuu i ai. Afai e te faaaogaina faamatalaga mai se tusi faapitoa, ia tusi se faamatalaga puupuu e uiga i ai. O api e faapipii ai ni ata, tusiga, ma otiotiga po o isi mea e i ai foi o latou sao i talaaga patino. Peitai, o i latou e faia ia api e masani lava latou te le aumaia ai ni faamatalaga pe tusitusi foi e uiga i mea na tutupu o loo faaalia i ata, o le tala lea a Brother Westwood. Na ia fautuaina mai le faaaluina o ni nai minute e tusitusi ai e uiga i mea o loo tutupu i ata e faapipii i se api o ata, tusiga ma otiotiga.
Faafesootai ma faatalanoa isi. “E masani ona tatou mafaufau e uiga i o tatou talaaga patino o ni o tatou lava manatu, ae o le tele lava o manatu faaalia e te tuuina i ai, o le tele foi lena o lona taua,” na saunoa ai Brother Westwood. O le faatalanoaina o isi tagata e maua ai se vaaiga fou ma fesoasoani ai foi e faalelei atili lou talaaga.
Tusi e uiga i aafiaga faaleagaga, taimi e sili ona taua, ma aafiaga, tagata ma mea na tutupu. Fai mai Brother Westwood, “E fiafia tagata i se tala e lelei ona faamatalaina.” Tusitusi e uiga i aafiaga e i ai se amataga, ogatotonu, ma se faaiuga. “Aua le faaaluina ni itulau se 60 e uiga i lou olaga ao le’i atoa le lua o ou tausaga. Atonu e te le tusia, ma o le a le faitauina e tagata.”
Tusi e uiga i mea e te faamemelo i ai. Na fautuaina mai e Brother Westwood e faapea, nai lo le tusitusi i se faasologa o le taimi na tutupu ai ia mea, e mafai ona e tusitusi e uiga i ni autu po o se mea foi e te fiafia i ai.
Ae o le mea e sili ona taua, e le tatau i tagata ona auina mai se talaaga patino pe faaleaiga i le Ekalesia e aunoa ma le tufaina atu muamua i tagata o le aiga, aua e tatau ona faamalosia ai le aiga lea e aumai ai.
E talitonu Brother Westwood, o i latou e faaaluina le taimi e faamaumau ai se talaaga patino, tusitusi faamaoni e uiga i taimi faigata ma taimi lelei, o le a mafai ona latou vaaia le aao o le Alii i o latou olaga, ma o le a faapea ona tuua ai se talatuu ma mea e manatua o le a faapea ona faamalolosia ai o latou aiga ma isi tagata o le Ekalesia.
Afai o oe o se paionia o aso nei ma e te manao e faasoa mai ou aafiaga, ia auina mai lou talaaga i le Matagaluega o Talafaasolopito o le Ekalesia.
E mafai ona momoli mai pe lafo mai lou talaaga i le: Church History Library, 15 East North Temple Street, Salt Lake City, UT 84150-1600, USA, Attention: Acquisitions.
O taimi e mafai ona momoli mai i le 9:00 i le taeao e oo i le 5:00 i le afiafi, Aso Gafua i le Aso Faraile.
E mafai foi ona i-meli mai lou talaaga i le ChurchHistoryAcquisitions@ldschurch.org pe telefoni i le ofisa autu mo valaau a le Church History Acquisition i le 1-801-240-5696.
O se ata puupuu i le soifuaga o Joseph Millett, o loo maua i le gagana Peretania i le news.lds.org, o loo faamatala ai se tala faatupu faatuatua ua maua i aso nei aua sa teuina e ala i talaaga patino.
Vaaiga sa pueina mai le vitio e uiga ia Joseph Millett
O talaaga patino e mafai ona fesoasoani i isi e faamalolosia ai o latou faatuatua.
© 2006 David Stoker