Pag-angkon sa Labing Maayong Butang gikan sa mga Bugal-bugalon
Gikinahanglan nga siya akong atubangon, apan unsaon?
Kon ikaw 12 anyos, ang kinabuhi lisud gayud. Anaa sa tunga-tunga tali sa pagkabata ug sa pagkatin-edyer, naningkamot ka nga mailhan kon si kinsa gayud ikaw. Diha na ako sa tunga-tunga niana nga paningkamot sa dihang ang akong mga ginikanan mipahibalo nga mamalhin kami ngadto sa usa ka gamay nga lungsod sa pikas bungtod. Ang balhinan mga pipila lamang ka milya ang gilay-on, apan alang kanako daw tibuok kalibutan ang gilay-on niini.
Nagtubo ako sa usa ka hilit nga lungsod nga may 30,000 ka tawo. Maglakaw ra ako sa pag-eskwela. Ang dulaanan ug ang youth center usa lamang ka eskina gikan sa balay. Ug ako motan-aw og sine matag Sabado.
Ang bag-o namong balay lahi ra. Usa kini ka gamay nga lungsod nga may mga 6,000 ka tawo—ug giplanohan nga magpuyo sa ingon niana nga paagi. Anaa na ko sa gilay-on nga usa ka milya og tunga (2.4 km) gikan sa eskwelahan ug kinahanglan nga mosakay og bus. Ang akong dulaanan adto na sa duol nga mga kakahoyan ug kabungturan. Ang pagtan-aw ug mga pasundayag matag Sabado nahimo na lang nga panagsang espesyal nga okasyon.
Ang pagbalhin mismo dili dautan. Gusto ko og mga panimpalad ug ganahan nga maglaag. Apan naglisud ako sa pagpahiangay sa kausaban sa eskwelahan. Ang ubang estudyante mga barkada nang daan, ug ako dili apil kanila. Ang nakaapan pa gayud, ako dili motago sa akong mga emosyon ug sayon rang madiskitaan sa mga bugal-bugalon.
Ang usa sa kinadak-an sa mga bugal-bugalon nga akong atubangon mao si Tracy. Dili hinoon kaayo bati, gawas lang kay si Tracy usa ka babaye.
Nakaatubang na ako og mga lalaki nga bugal-bugalon kaniadto. Mahimo nimo silang atubangon o magkat-on ka sa paglikay kanila. Apan si Tracy daw anaa bisan asa: diha sa agianan, sa tingpaniudto, sa akong mga klase. Aduna siyay pamaagi sa mga pagpanginsulto nga daw motagud-tagod kanimo. Mahadlok kong makakita kaniya bisan asa.
Tungod kay ingon og dili ako makalikay kaniya, kinahanglan nako siyang atubangon, apan wala ako masayud kon unsaon. Usa ka pakigpulong nga akong nadungog didto sa simbahan ang nakapausab niadtong tanan. Wala ako makahinumdom kon si kinsa ang namulong, apan nahinumdom ako kon unsay giingon. Ang mamumulong naghisgot mahitungod sa pagpakig-atubang sa lisud nga mga tawo. Siya miingon nga, “Kon ikaw dili makapildi kanila, ayaw’g lugaki sila sa paghigugma hangtud molagom ka.” Napakatawa niya ang kongregasyon, apan gihunahuna ko kini sa pipila ka higayon. Sa katapusan nakahukom ako kon unsay akong buhaton kang Tracy. “Lumsan nako siya sa pagkamabination.”
Gisugdan dayon nako sa pagpangita si Tracy pagkasunod adlaw. Sa dihang siya akong nakita, miingon ko, “Tracy, nindot kaayo kang tan-awon.” Daw nakalitan siya ug nagkapuliki sa pagsulti og pasalamat samtang milabay kami sa agianan. Gipadayon nako kini. Sa matag higayon nga ako makakita kaniya, daygon nako siya sa dili pa siya makahigayon sa pagsulti bisan unsa. Ang panginsulto nahunong na, ug ang akong kinabuhi nakabaton og gamayng kalinaw.
Pipila ka bulan ang milabay, ang tingklase hapit na mahuman. Usa sa panapos nga mga kalihokan mao ang sayaw-sayaw didto sa gym panahon sa tingklase. Miadto ako didto apan wala ko mobati nga mohangyo og sayaw ni bisan kinsang babaye. Sa tinud-anay, wala pa gayud ako makahangyo og usa ka babaye kaniadto. Apan usa ka babaye miduol kanako ug mihangyo kanako sa pagpanayaw.
Nakalitan ako sa pagkakita nga si Tracy kadto. Miingon ko og oo, ug kami nanayaw. Sa pagkahuman sa sonata, miingon ko, “Salamat,” ug si Tracy milakaw.
Wala ko na gayud siya igkita pag-usab. Mibalhin siya og dapit nianang panahona sa ting-init. Nanghinaut ako nga unta siya makauyon sa iyang bag-ong eskwelahan nga mas sayon kay sa akong nasinati. Apan akong nakat-unan nianang adlawa nga ang akong giplano nagsilbi gayud. Diin anaa ang akong kaaway, nakakaplag ako og higala.
Paghulagway pinaagi ni Gregg Thorkelson