Tibuok Simbahan

Mga Batan-ong Babaye sa Liberia Nakakat-on mahitungod sa Personal nga Kauswagan

Ang mga batan-ong babaye sa Liberia, Africa, mitudlo sa usag usa kalabut sa ilang balaanong kinaiya ug sa programa sa Personal nga Kauswagan sa Young Women uban sa gamay ra nga panabang gikan sa mga batan-ong babaye sa laing bahin sa kalibutan atol sa usa ka espesyal nga district Young Women conference pagka Agosto 2009.

Ang pagbansay ug pagpangandam nagsugod og tulo ka bulan nga sayo pa alang sa mga batan-ong babaye, kinsa nagpuyo sa Monrovia Liberia Bushrod Island District sa Sierra Leone Freetown Mission. Ang tema alang sa komperensya mao ang “Prinsesa sulod sa usa ka Adlaw, Reyna sa Kahangturan.” Ang matag branch sa district mao ang responsable sa pagpresentar og usa ka workshop mahitungod sa usa ka mithi ug sa paghimo og usa ka mubo nga drama sa pagtudlo og lain nga mithi, naghatag og gibug-aton kon unsaon sa usa ka anak nga babaye sa Dios pagtratar sa uban ug ang iyang kaugalingon.

“Kini nga mga batan-ong babaye mao ang kaugmaon sa Africa, ang mga pioneer sa ilang nasud niining mahimayaon nga ebanghelyo,” miingon si Sister Belinda Wire, usa ka full-time nga misyonaryo kinsa miapil sa komperensya kuyog sa iyang bana, si Elder Bill Wire.

Human sa mga workshop, mga drama, ug laing mga kalihokan, ang mga nag-organisar mihatag sa mga batan-ong babaye og mga sulat nga gipadala sa mga batan-ong babaye gikan sa lain nga nasud, mipakigbahin sa ilang mga pagpamatuod mahitungod sa ebanghelyo ug sa Personal nga Kauswagan.

“Mga kasingkasing nahiusa sa tibuok kalibutan,” miingon si Sister Wire. “Samtang kining batan-on nga mga sister nagkupot sa mga sulat, sila nasayud nga kadtong mga batan-ong babaye nagtuo sama sa ilang gituohan, nagbasa sa samang mga basahon, nagsunod sa samang mga programa, gigiyahan sa sama nga propeta, ug gihigugma sa sama nga Dios.”

Hugot nga Pagtuo Gigantihan sa Galapagos

Bisan tuod og gamay ra ang gidaghanon, ang mga Santos sa Galapagos Islands, nga nahimutang sa layong kabaybayonan sa Ecuador sa Pacific Ocean, mga lig-on og pagtuo. Pagka Septyembre ang mga miyembro nakakita sa pagkahuman sa unang meetinghouse sa isla.

Ang giabangan nga building diin gipahigayon sa una ang mga tulumanon sa Galapagos Islands Branch, nga gitawag og “el Castillo Blanco” sa mga miyembro, dili kaayo dako aron mapahigayon ang sakrament miting sa usa lamang ka kwarto, mao nga ang mga miyembro kinahanglang magpundok sa tulo ka kwarto sa usa ka higayon.

Sa dihang sila si Elder Floyd ug Sister Susan Baum, ang senior missionary couple nga na-assign sa mga isla, unang misulod sa bag-ong building, nakahilak sila. “Nindot kaayo kini,” miingon si Elder Baum. “Maayo kaayo ang kalidad.”

Si Emma Bastidas nakahinumdom sa dihang siya ug ang iyang pamilya kinahanglang mobiyahe ngadto sa mainland sa Ecuador aron mabunyagan pagka 1985. Siya ug ang iyang pamilya nakakita sa pagkatukod sa branch, ug mihilak siya sa dihang ang unang mga misyonaryo miabut sa mga isla.

“Karon nagtukod sila og chapel nga duol ra kaayo nga malakaw ra nako,” miingon si Sister Bastidas.

Gawas sa pagsangkap og usa ka kapundokan nga dapit alang sa gamay nga grupo sa mga Santos, ang bag-ong chapel nakahatag og uban pang mga panalangin. Si Leonor Machua nakadungog mahitungod sa bag-ong meetinghouse sa wala pa siya mobiya sa usa ka mubo nga biyahe ngadto sa Guayaquil, Ecuador. Samtang didto sa Ecuador nangutana siya sa usa ka tawo kalabut sa bag-ong building ug sa relihiyon nga girepresentaran niini. Ang estranghero mitubag sa iyang mga pangutana ug misugyot nga makighimamat siya sa mga misyonaryo sa higayon nga mobalik na siya sa ila. Pipila ka adlaw ang milabay iyang nakit-an ang mga misyonaryo diha sa eskina sa usa ka dalan ug midawat sa imbitasyon nga matudloan. Si Sister Machua nabunyagan dayon human sa sesyon sa Sabado sa hapon sa kinatibuk-ang komperensya pagka Oktubre 2009, ang unang tawo nga nabunyagan sa baptismal font sa bag-ong meetinghouse.

Ang Simbahan bag-o pa gayud diha sa mga isla. Sa wala pa ang pormal nga pag-organisar sa branch, upat ka mga pamilya ang nagsugod og pundok didto sa lungsod sa Puerto Ayora sa isla sa Santa Cruz. Pagka 1998 ang mga lider sa Simbahan mi-organisar og branch sulod sa Guayaquil Ecuador South Mission ug ang mga miyembro nagsugod og pundok sa isla sa San Cristobal sa wala pa mobalhin ngadto sa el Castillo Blanco.

Karon mga 120 ka mga miyembro ang nagtambong matag semana sa bag-ong meetinghouse sa isla sa Santa Cruz.

Bisan tuod ang branch gamay ug layo gikan sa mainland, ang mga Santos sa Galapagos Islands napanalanginan, miingon si Daniel Calapucha, ang branch president.

“Sa tinuod lang wala ko mobati nga nalahi tungod kay anaa kanamo ang giya sa atong Amahan sa Langit,” miingon siya.

Mga Bata sa Columbia Mibisita sa Templo

Sobra sa usa ka dosena nga mga bata sa Primary gikan sa Fusagasuga Ward, Soacha Colombia Stake, migahin og espesyal nga adlaw sa Templo sa Bogotá Colombia, nagkat-on mahitungod sa kaimportante sa templo.

Pagka Nobyembre 2009 ang kapangulohan sa Primary sa ward miuban sa 15 ka mga bata sa Primary ngadto sa templo. Didto ang mga bata adunay oportunidad nga mahimamat ang presidente sa templo, si Jorge J. Escobar, ug nakapangutana. Ang mga bata nakakat-on nganong kinahanglan silang maghulat hangtud nga sila mag-12 aron makasulod sa templo sa paghimo og mga buhat sa templo, nganong ang hulagway ni anghel Moroni diha sa spire sa templo nagkupot og usa ka trumpeta, ug nganong kasagaran nag-atubang siya sa silangan.

Sa katapusan sa kalihokan, ang mga bata mipakigbahin sa ilang mga pagbati kalabut sa kasinatian.

Si Maria Fernanda Sanchez, ang secretary sa Primary sa ward, miingon nga usa kadto ka espirituhanong kasinatian. “Usa kadto ka espesyal, dili makalimtan nga adlaw dili lamang alang kanila apan alang kanamo isip ilang mga lider sa Primary,” miingon siya.

Ang batan-ong mga babaye sa Liberia ug ang ilang mga lider nagpundok alang sa usa ka espesyal nga district Young Women conference mahitungod sa Personal nga Kauswagan.

Litrato sa maayong kabubut-on ni Bill Wire