Nahinumdom Ako sa Manluluwas

Iris Adriana Leal Castilla, Colombia

Sa milabay nga panahon ako miagi og panahon nga ako nabug-atan sa daghang personal nga mga problema ug mibati nga walay mitabang kanako sa pagsulbad niini. Nagsimba ako kanunay apan wala magmalampuson sa pagpangita og mga solusyon sa akong mga kalisud. Ang kahadlok sa kasagaran mibuntog kanako, ilabi na sa panahon sa kagabhion. Nagmasulub-on kaayo ako.

Usa ka adlaw niana sa dihang mibati ako og kabalaka, naningkamot ako nga makigkita sa presidente sa misyon. Sa laing adlaw dako kaayo ang akong tinguha nga makontak ang Presidente sa Simbahan. Naghunahuna ako nga kon makasulti lamang ako o makasulat kaniya, siya mohatag kanako og tubag nga akong gipangita.

Samtang ania niining kahasol nga kahimtang sa hunahuna, mitambong ako og usa ka sesyon sa komperensya sa district didto sa Cúcuta, Colombia. Akong nakaplagan ang tubag nga akong gikinahanglan atol sa usa ka pakigpulong sa presidente sa misyon. Sa dihang nangutana si Presidente Canals, “Kanus-a ang katapusan nga higayon nga kamo nakasinati og espirituhanon nga kasinatian?” Ako nakaamgo nga ako napuno kaayo sa pagpaningkamot sa pagpangita og tawo nga motabang kanako sa pagsulbad sa akong mga problema nga ako nakalimot na hinoon sa tawag sa Manluluwas sa pagduol ngadto Kaniya (tan-awa sa D&P 88:63). Sa akong pagdali-dali sa pagpangita og solusyon, ako nakalimot na hinoon sa Tawo nga adunay gahum sa paghatag kanako og kalinaw sa akong mga kasakit ug sa pagtubag sa akong mga pag-ampo.

Nianang adlawa gayud nagsugod ako sa proseso sa pagpaduol ngadto sa akong Langitnong Amahan ug sa Iyang Anak, nga si Jesukristo. Akong gisultihan ang Langitnong Amahan sa akong kahadlok ug sa pag-antus, ug ako nag-ampo diha sa pangalan ni Jesukristo nga unta ako makabaton sa Iyang Espiritu uban kanako. Akong gibutang ang akong tanang mga palas-anon sa tiilan sa Manluluwas, naghinumdom sa Iyang saad: “Umari kanako, kamong tanan nga nabudlay ug nabug-atan, ug papahulayon ko kamo” (Mateo 11:28).

Wala gihapon akoy tubag sa tanang mga pangutana sa akong personal nga mga problema, apan ako nakadawat og kalig-on ug kahupayan. Nakadawat usab ako og impresyon nga kon ako magpuyo og matarung nga kinabuhi, magsunod sa mga sugo, ug moserbisyo sa Ginoo sa akong tibuok kasingkasing, Siya motabang kanako sa pagsulbad sa akong mga problema o mohatag kanako og kalig-on sa paglahutay niini (tan-awa sa Mosiah 24:14).