Happy Birthday, Presidente Monson!

Sa miaging Agosto, sa dihang gipangutana kon unsay iyang gustong regalo sa birthday, si Presidente Thomas S. Monson miawhag kanato sa “pagpangita og tawo nga nagkalisud, … ug sa pagtabang kanila.”¹ Kini nga tuig ang mga bata sa tibuok kalibutan mitabang sa uban aron sa paghatag ni Presidente Thomas S. Monson unsay iyang gusto kaayo.

Daghan kaayo nga mga bata ang mibuhat sa awhag ni Presidente Monson sa paghimo og serbisyo alang sa uban. Maimprinta lamang nato ang pipila sa mga sulat nga among nadawat. Apan kamong tanang buotan nga mga bata mihatag og regalo nga serbisyo sa inyong minahal nga propeta, ug ang tanan nanghinaut kaniya og usa ka malipayon kaayo nga birthday niining bulana!

Mitabang ako og pamilya pinaagi sa paghatag kanila og mga butang nga wala na nako gamita ug mga dulaan nga maayo pa. Nindot ang akong gibati sa dihang gibuhat nako kini. Sama kini sa unsay buhaton sa Amahan sa Langit ug ni Jesukristo alang kanato. Sila motabang kanato sa atong mga hagit ug mohatag kanato og daghang mga panalangin.

Alma V., edad 11, Capital District, Colombia

Ang mga bata sa Oakridge Farms Ward, Farmington Utah Oakridge Stake, nagkapundok alang sa usa ka kalihokan diin ilang gisumpay-sumpay ang mga quilt. Ang mga quilt sa kaulahian gidonar ngadto sa Humanitarian Center sa Simbahan.

Ang akong papa mitabang sa akong igsoong lalaki, nga si Maximo, ug kanako sa paghimo og mga pasol alang sa akong mga higala sa Primary. Ganahan kaming mamasol isip pamilya. Kada higayon nga akong imbitaron ang among mga higala sa pagpamasol, sila walay magamit sa pagpamasol. Ang pagkakita kon unsa ka malipayon ang daghan kanila tungod kay sila karon aduna nay ilang kaugalingong mga pasol nakapalipay usab nako.

Luciano N., edad 9, Entre Ríos, Argentina

Ang lungsod diin ako magpuyo tugnaw kaayo. Sa pagtabang sa mga misyonaryo nga mainitan, naghimo ako og dakong panyo uban sa tabang sa akong mama.

Mirai H., edad 10, Hokkaido, Japan

Nakat-on ako sa pagbasa sa dihang nag-edad ako og singko anyos. Karon akong gibuhat sa akong manghud nga ig-agaw unsay gibuhat sa akong mga ginikanan kanako—sa pagtudlo kaniya sa pagbasa pinaagi sa paggamit sa mga kasulatan

Nicolas N., edad 7, São Paulo, Brazil

Ang akong higala gikan sa Peru, apan nagpuyo na siya sa Italy sulod sa pipila ka mga tuig. Upat sa iyang igsoong mga lalaki ug babaye nabunyagan, ug sa miaging Oktubre ang iyang mama nahimo usab nga miyembro sa Simbahan. Karon ang akong higala gusto nga magpabunyag. Ang mga misyonaryo mihangyo kanako sa pagtabang kanila sa pag-andam alang sa iyang bunyag. Mao nga atua ako kada higayon nga sila makigkita kaniya aron hisgutan ang mahitungod sa ebanghelyo. Manghinaut ako nga siya mabunyagan na sa dili madugay.

Eleonora A., edad 11, Piedmont, Italy

Atol sa among bakasyon, kami giuhaw. Nangayo ako sa akong mama og kwarta aron ipalit og tubig. Sa akong paggawas gikan sa tindahan, akong nakita ang usa ka lalaki nga nangita og tubig sa basurahan. Akong gitan-aw ang akong mga kamot. Duna koy mga sensilyo, mao nga gipalitan nako siya og usa ka botelya nga tubig.

Orson B., edad 10, Sonora, Mexico

Ang akong higala nga si Jonah nabalian sa iyang tiil. Nag-wheelchair siya sa dugay na nga panahon. Kada adlaw tabangan nako siya pinaagi sa pagtulod sa iyang wheelchair kon maniudto, mag-recess, o bisan asa nga gusto niyang adtoan. Malipayon ako nga nakatabang sa akong higala.

Emma S., edad 8, Arizona, USA

Ako usa ka gamay nga bata nga gustong moserbisyo. Gusto kaayo ko nga magluto, ug gusto nga magbuhat og mga waffle uban sa akong lola. Gusto usab nako nga mohatag sa mga waffle sa akong mga silingan.

Jonas V., edad 5, Wallonia, Belgium; sa tabang gikan sa iyang inahan