Pagpakighigala
Pagtabang sa Iyang Pamilya
Ang mga bata sa tibuok kalibutan ganahan nga motabang sa ilang mga pamilya—sama kaninyo! Niining bulana atong ila-ilahon si Cinthia Noemí Jara Humada nga taga Asunción, Paraguay.
Pag-ila-ila ni Cinthia
Sa gawas lamang gayud sa siyudad sa Asunción, Paraguay, nahimutang ang gamay nga ayohanan ug pandayanan. Ang shop puno sa metal nga kahimanan ug mga butang nga kinahanglang ayohon. Sa luyo sa shop mao ang usa ka gamay nga balay. Sa luyo nga beranda nakahayhay ang bag-ong linabhan nga mga sinina. Mao kini ang balay sa nuebe anyos nga si Cinthia Noemí Jara Humada ug sa iyang pamilya.
Pagtinabangay diha sa Panimalay
Si Cinthia adunay manghud nga lalaki, nga si Gustavo (7), ug usa ka igsoong babaye nga masuso, si Débora. Sa kasagaran siya motabang sa pag-atiman ni Gustavo, apan siya gusto nga motabang usab ni Débora. Ang iyang mama miingon nga si Cinthia daghan og gikatabang pinaagi sa paglimpyo sa iyang kwarto, paglimpyo palibut sa balay, ug pagpanilhig sa beranda. Sa umaabut si Cinthia gusto nga mamahimong usa ka mama ug makabaton og unom ka anak.
Pagbarug nga Lig-on diha sa Eskwelahan
Ang eskwelahan ni Cinthia puli-puli ang oras. Ang ubang mga estudyante mosulod sa buntag, ang uban sa hapon, ug ang uban sa gabii. Si Cinthia moadto sa eskwelahan sa buntag. Anaa siya sa grade III ug maayo kaayo nga estudyante. Ang iyang paborito nga subject mao ang social studies.
Ang iyang eskwelahan adunay kapin sa 1,000 ka mga estudyante, apan 12 lamang ang mga miyembro sa Simbahan. Ang iyang mga kauban sa eskwelahan sa kasagaran mangutana kaniya mahitungod sa iyang relihiyon. Siya motubag sa mga pangutana kutob sa iyang mahimo ug mopakita og maayong ehemplo pinaagi sa pagsunod sa ebanghelyo.
Mga Family Home Evening
Si Cinthia kanunay nga andam nga motabang sa family home evening. Usahay kon ang iyang amahan bisi sa iyang pandayanan, si Cinthia moboluntaryo sa pagtabang kaniya pinaagi sa pag-andam sa leksyon sa family home evening. Si Cinthia gusto nga mahimong magtutudlo kon modako na siya. Malingaw siya nga motudlo sa uban.
Pagkat-on gikan sa mga Kasulatan
Si Cinthia ganahan nga mobasa—ilabi na sa mga kasulatan. Ang iyang paborito nga istorya sa kasulatan mao ang mahitungod ni Ammon nga nagsangyaw ngadto sa mga Lamanite (tan-awa sa Alma 18). Siya ganahan kon giunsa niini sa pagpakita nga kitang tanan kinahanglang mohimo sa misyonaryo nga buhat.