Mga Pangutana ug mga Tubag
“Ang akong ubang mga higala sa Simbahan makiglalis sa dili miyembro nga mga higala kabahin sa relihiyon. Nasayud ako nga ang panagbingkil sayop, apan unsaon man nako sa pagpahibalo sa akong mga higala unsay akong gibati mahitungod sa ebanghelyo?”
Imbis mosulay sa pagpakigbahin sa imong mga pagbati kon ang mga tawo mora og nasuko ug ang Espiritu wala diha, pangita og mga oportunidad nga makaduol sa imong mga higala tag-tagsa, sa usa ka panahon ug sa usa ka lugar diin ang ang Espiritu Santo makatabang.
Pag-ampo alang sa mga oportunidad nga makasulti sa imong mga higala kabahin sa ebanghelyo. Kon hatagan og oportunidad, ipasabut ang imong mga pagtuo ug pagpamatuod. Siguroa nga imong ipakita kanila nga ikaw matinud-anong naghunahuna kanila. Kon ang imong mga higala interesado nga makakat-on og mas daghan pa, mahimo nimo silang hatagan og pass-along card, imbitahon sila sa simbahan, i-refer sila ngadto sa Mormon.org, o kontakon ang mga misyonaryo.
Pag-ampo alang sa giya sa Espiritu aron makahibalo unsa ang isulti ngadto sa imong mga higala ug unsaon sa pagsulti niini. Pag-ampo alang sa panabang aron makalikay sa panagbingkil. Kon ang imong mga higala magsugod sa pakiglalis kanimo, Mas maayo nga lainon kanunay ang hilisgutan o dili na lang maghisgot.
Pag-ampo alang sa Giya
Ang panagbingkil dili gikan sa Dios (tan-awa sa 3 Nephi 11:29), busa kini dili ang maayong paagi sa pagsangyaw niining talagsaong ebanghelyo. Usa ka maayong paagi sa pagsangyaw sa ebanghelyo mao ang pagdapit sa imong mga higala sa pagtambong sa simbahan o mga kalihokan. Ang pag-ampo nakatabang kanako nga masayran unsaon nako sa pagsangyaw sa ebanghelyo uban sa akong mga higala. Ako nasayud nga ang Ginoo motubag sa mga pag-ampo. Iyang ipakita kanunay ang saktong pamaagi sa pagbuhat og mga butang.
Celeste R., 22, California, USA
Likayi ang Panagbingkil
Ako adunay usa ka higala kinsa miyembro sa lain nga simbahan. Sa miaging tuig siya miduol kanako didto sa eskwelahan usa niana ka adlaw ug misugod sa pagsulay sa pagpamatuod kanako nga ang Basahon ni Mormon dili tinuod ug ang Simbahan ni Jesukristo sa mga Santos sa Ulahing mga Adlaw dili usa ka Kristyanong simbahan. Human og tubag sa tanan niyang mga pangutana, ako misugod sa pagkaamgo nga siya wala manumbaling sa akong mga tubag tungod kay iya kong kanunay nga hagiton sa parehong pangutana. Gikan sa akong nakat-unan niini nga kasinatian, ang akong tambag mao nga ang imong tanan nga mahimo mao ang pagpasabut nga ikaw dili gusto og panagbingkil ug ipamatuod ang katinuod sa Simbahan sa Dios.
Jayden C., 13, Washington, USA
Ang Panagbingkil Makahimo og Kasuko
panagbingkil dili gayud mao ang saktong paagi. Kini makapalayo sa Espiritu sa Ginoo ug magbilin og pagbati sa kasuko ug kalagot. Kini usab makapausab sa imong pagtan-aw sa ubang mga tawo. Sa kasagaran, ang kanunay nga lalisan sa mga tawo mosangput ngadto sa mga punto sa doktrina, busa importante gyud kaayo nga mahimo kang usa ka tigpasiugda sa kalinaw ug ayaw kalimut sa pagpamatuod kabahin sa mga kamatuoran sa ebanghelyo ug sa maayong mga bunga nga nadala niini diha kanimo.
Carlos F., 19, Guárico, Venezuela
Tahura ang Gituhoan sa Uban
Imbis mosulti ngadto sa imong mga higala nga, “Ang akong relihiyon tinuod, ug ang inyoha dili,” ipakigbahin ngadto kanila ang imong pagpamatuod. Pangita og higayon nga ikaw ug ang imong higala kamo lamang duha, ug pangutan-a kon ikaw mahimo bang mopaambit sa imong pagpamatuod. Ako mibuhat niini makausa ngadto sa suod kaayo nga higala kinsa usa ka Kristyano ug kinsa matinud-anon sa iyang simbahan. Siya naghunahuna nga kini nindot kaayo nga ako adunay pagpamatuod. Human niadto, kami naghisgot unsa ang among gituohan, apan walay panaglalis. Apan, kon ikaw moadto ug mosulti. “Ang inyong simbahan dili tinuod,” ikaw mahimong walay pagtahud ngadto sa usa ka butang nga duol sa ilang mga kasingkasing. Ang managhigala dili mobuhat niana. Ikaw mahimong dili mouyon sa punto sa mga doktrina uban sa imong mga higala, apan ang tinuod nga higala maminaw sa imong pagpamatuod ug mosabut nga ang ebanghelyo importante para kanimo.
Amber P., 17, Utah, USA
Sunda sa Ebanghelyo
Pagpuyo sa paagi aron kadtong nakaila kanimo ug wala makahibalo niining tinuod nga ebanghelyo gustong makahibalo niining ebanghelyo tungod kay sila nakaila kanimo. Himoa nga ang kalipay sa ebanghelyo makita diha kanimo. Himoa nga ikaw usa ka kahayag, usa ka giya, ug ang labing maayo nga ehemplo kutob sa imong mahimo ngadto sa imong mga higala ug sa uban.
Elder Kamah, 20, Ghana Cape Coast Mission
Pagpamatuod
Ang labing maayo nga paagi sa pagpakigbahin sa ebanghelyo mao ang pagbuhat niini nga kinasingkasing ug mahigugmaon. Ang panaglalis wala gyuy padulngan. Si Jesukristo wala makiglalis sa mga Pariseo; hinoon, Siya mitudlo kanila pinaagi sa gugma, pulong, ug ehemplo. Nakasulat sa Isangyaw ang Akong Ebanghelyo: “Ang mga tawo usahay sa makinaadmanong paagi mangutana kon unsay inyong gitudlo, pero lisud kwestyunon ang usa ka sinsero, kinasingkasing nga pagpamatuod” ([2004], 242). Pagpamatuod unsa ang imong nahibaloan nga tinuod ug giunsa nimo sa pagkahibalo niini. Kon ang Espiritu mopamatuod sa pagkatinuod unsa ang imong gisulti, kana mao ang labing nindot nga oportunidad alang sa imong mga higala nga makasabut.
Ephraim S., 20, New South Wales, Australia