Fesili ma Tali
“Ou te fefe nei ofo mai e se tasi ia te au se meainu malosi po o ni fualaau faasaina. Ou te le manao e fai atu leai i tagata pe faatupu so latou le fiafia ia te au. E mafai faapefea ona ou mautinoa ou te le gauai i ai?”
Ia vave fai lau faaiuga—i le taimi nei—o le a e fai atu leai. Afai e te toilalo ai, o le a faigata i le lumanai ona e fai atu leai. O le tele lava o tagata o le a latou faaaloalogia oe ona o lou ola i ou tulaga faatonuina. Ma atonu o le a latou le toe fai atu ia te oe e inu pe faaaoga na mea i le lumanai.
Aua e te popole i le le fiafia o tagata ia te oe. O la latou filifiliga lava lena pe a latou faia, ae o lau filifiliga foi le faatumauina o le Agaga ia te oe ae le o le faia o se mea e te toe faanoanoa mulimuli ai.
Atonu o le a faigofie atu ona e fai atu leai pe afai e i ai sau uo e te lua aufaatasi. O le lagolago a se uo e mafai ona fesoasoani e te tu malosi atu ai i se vaega.
Ma le isi, ia taumafai e puipuia le oo atu o se tulaga faapea. Filifili uo e tutusa ma faaaloalo i ou tulaga faatonuina. Mo se faataitaiga, afai o le a e alu i se pati, fesili po o ai o le a i ai. Aua e te alu pe afai e te lagona le le mautonu pe musuia foi oe e aua e te alu.
Tausi Lau Folafolaga
Ina ua uma ona ou papatiso, ou te lei toe alu i pati e i ai ni ava malolosi ma ni sikaleti. I se tasi aso na fai mai ai a’u uo, “Se sau, tatou o. E leai se mea e tupu ai.” Ae na ou fai i ai e leai aua na ou folafola atu ou te le inu ava, ulaula, pe faaaoga fualaau faasaina. Sa latou malamalama aua na latou iloaina ou te auai i le Ekalesia, ma latou te iloa le taua o le faia o se folafolaga.
E le tatau ona tatou faamalieina a tatou uo ae o lo tatou Tama Faalelagi. Afai tatou te faataunuuina folafolaga na tatou faia ia te Ia ina ua tatou papatiso, o le a faamanuiaina i tatou.
Roxana C., 19, Lima, Peru
Fai le Tautinoga
Sa ou fefe lava e fai se mea e tuu ai i lalo au uo. Ae sa ou faapea ifo ia te au lava, afai ou te toilalo ai, o ai le isi tagata o le a ou tuuina i lalo? O le mea na sili ona aoga ia te au o le faia o le faaiuga ae lei taitai tupu mai lea tulaga. Na ou faia ai se tautinoga ia te au lava o le a ou fai atu leai i fualaau faasaina ma le ava malosi. Ina ua uma ona ou fai atu leai i nisi o taimi, sa faapea ona sili atu le faaaloalogia o au mo le filifiliga na ou faia. Ina ua mavae sina taimi, pe a toe fai mai se isi pe au mai sa’u pia, e faapea atu se tasi o au uo, “Leai, e le inupia Calder.” Sa faigofie ia te au ina ua iloa e au uo sa ou filifili ou te le inu.
Elder Calder, 20, Misiona a Idaho Pocatello
Ia Maua le Lototele e Tumau Faamaoni Ai
O le amataga o le tausaga lenei, na ofoina mai ai ia te au ni fualaau faasaina. Ou te lei manao e faaita le tagata lea, ae na ou maua le lototele e fai atu i ai, ou te le manao ai. E le mafai ona ou faamatalaina lou loto faafetai mo le tumau faamoani i le mea na ou talitonu i ai. E lua vaiaso mulimuli ane, ae fai mai le alii na ofoina mai ia te au ia fualaau faasaina, sa faagaeetia lava o ia ona sa ou tu atu mo lou talitonuga. Fai mai o ia, e lei fetaui lava i se tagata e mafai ona ia faia lena mea, ma e manaomia ai le tele o le lototele. Fai mai o ia o le a le galo ia te ia lena aafiaga.
E ala atu i au faataitaiga, e mafai ona avea ai oe ma malamalama i isi ma se uunaiga lelei (tagai Mataio 5:16).
Mary T., 16, Arisona, ISA
Ia Tutumau ma le Le Mafaagaeetia
O le a faaaloalogia oe e lau tupulaga mo le fai atu leai ma le tausia o ou tulaga faatonuina. Ia siomia oe i uo e tutusa o outou tulaga faatonuina. O le a latou lagolagoina oe e ala i le tutumau ma le le mafaagaeetia.
Lindy S., 15, Iuta, ISA
Fai Nei Lau Faaiuga
Afai e te filifili nei ia aua lava nei e taliaina fualaau faasaina po o le ava malosi, o le a faigofie ona e le tagofia na mea. O le a e le toe tau mafaufau faalua i lau tali. O le a tele ina faaaloalo tagata i lau filifiliga, ma atonu o le a e maua ai se aafiaga faafaifeautalai e ala i le tau atu ia i latou o le Upu o le Poto.
Chandler H., 14, Alapama, ISA
Ia Maua le Lototele
Na i ai so’u aafiaga faapena. Sa ou tatalo i lo tatou Tama Faalelagi. Sa ou faitau i tusitusiga paia ma mafaufau loloto i ai ma taumafai e faamalosia lau molimau. Ma ina ua ou fetaiai ma se tulaga faapena, sa ou faapea atu, “Ia malie, ou te le inu pia. O au o se tagata O Le Ekalesia a Iesu Keriso o le Au Paia o Aso e Gata Ai.” Sa ou taumafai e fesoasoani i isi ia malamalama i ou tulaga faatonuina. O le taimi muamua sa ou popole lava, ae o le taimi lenei ua ou masani ai, ma o loo faaauau pea ona ou tausia poloaiga a le Alii. Sa ou faatoilaloina le tofotofoga i le fesoasoani mai o le Alii, ma sa faamanuiaina foi au i le talitonu ia te au lava, faatuatua, ola maloloina lelei, ma tulaga faatonuina maualuluga. Faamolemole ia fai atu i au uo e leai faatasi ma lou lava talitonu mautinoa ma le lototele. Afai e te le tau faatauvaaina ou tulaga faatonuina, o le a mafai ona e susulu atu e pei o se malamalama susulu.
Lee, M., 17, Seoul, Korea