E Tatau Lava Ona i Ai o Ia Iina!
I se tasi taeao o se Aso Toonai, na ou maua ai se telefoni mai se uo, o se isi talavou nofofua matua i la matou uarota i Wiltshire, Egelani. O le toalua o lona tama, o le o loo nofo i le nuu lava lea e tasi sa ou i ai, sa faataotolia i se gasegase. Sa tau le mafai ona minoi ma, e ui lava e le o ia o se tagata o le Ekalesia, ae na talosaga mai pe mafai ona ou tuuina atu se faamanuiaga mo ia.
Sa avea au ma se tagata o le Ekalesia mo na o ni nai masina, ae ona o aoaoga i le sauniga perisitua, na ou lagonaina ai lou saunia e tuuina atu se faamanuiaga, e ui ina sa fai si ou popole. Sa ou fai atu i ai o le a ou sueina sau soa ma o atu loa i le vave e mafai ai.
Sa vave lava ona ou mafaufau i le toeaina aupito lata mai o le uarota ma ou alu atu loa i lona fale. Sa tali mai lona faletua ma faamanatu mai ua o atu uso ua maua faaeega paia o le Uarota a Swindon i le malumalu i le aso lena. A o ou toe aluese mai, na fai si ou faanoanoa, sa ou faatuina le taavale ma ole atu i le Tama Faalelagi mo se taitaiga.
A o ou tatalo, sa ou fesili atu pe o i ai se tagata o umia le Perisitua Mekisateko o avanoa ma te o. Na vave ona oo mai i lou mafaufau le igoa o Stuart Ramsey. Sa le ia te au lana numera telefoni, ae o i laua ma lona faletua o Gill, sa nonofo i le nofoaga o le ea fosi pe a ma le ono maila le mamao.
Ina ua ou taunuu atu i lo latou fale, sa ou tuitui i le faitotoa ma lou talitonuga atoa o le a mafai e Stuart ona sau ma te o. “E le o iinei o ia,” o le tala lea a Gill na ou tei ai. “Ua alu i le nofoaga autu.”
Ou te lei lotovaivai ai, ae na ou fesili atu pe mafai ona ou faafesootaia o ia. Sa ia faamatala mai, o Stuart, o se enisinia, o loo fesoasoani atu i se uo i lana taavale i se eria maotua o le nofoaga autu [o le ea fosi] E le mafai ona maua o ia i se telefoni, ma o le a le mafai ona faatagaina au ou te sopo atu i tua o le faitotoa o le pa puipui.
Aisea o le a ou lagonaina ai se uunaiga malosi e sue le fesoasoani a Stuart, ae o lenei e le o avanoa o ia? Pe na ou le malamalama i le tali o lau tatalo? “Leai,” sa ou mafaufau ifo ai ia te au lava, “e tatau lava ona i ai o ia iinei.”
O le taimi tonu lava lena na ou faalogoina ai se leo fiafia mai ou tua atu. “Paulo, o le a lau mea o fai iinei?” O Stuart! Sa taumafai lava o ia e lipea le taavale a lana uo ae sa ia lagonaina le uunaiga e tatau ona foi mai i le fale. Sa ou faamatala atu i ai lou faalavelave, ma sa malie fiafia mai o ia e fesoasoani ia te au i le tuuina atu o se faamanuiaga.
Sa ou faafetai lava i le mauaina o le aafiaga a Stuart. O ia sa faauuina, ae o au sa ou faamauina le faauuga, sa ou lagonaina le uunaia e tuuina atu se faamanuiaga o le faamalologa. A o ou toe momoliina atu Stuart i le fale, sa olioli o ia i le mafai ona taitaiina e le Agaga e tuu ana galuega i lena taimi ina ia ma feiloai ai i lona fale.
Sa matuai ou fiafia lava i le taeao na sosoo ai i le iloaina sa faasolosolo manuia le toalua o le tama o la’u uo. E tele faamanuiaga sa ou tuuina atu talu mai lena taimi, ae ou te faafetai lava ona sa ou vave aoaoina e tusa lava pe o le a lo tatou vaivai i o tatou tiute faaleperisitua, ae a tatou faalagolago i le Alii, tausi Ana poloaiga, ma fai le mea sili tatou te mafaia e faalautele ai o tatou valaauga, o le a Ia taialaina i tatou i le ala e ao ona tatou ui ai.