E Mafai Ona Avea Au ma Faifeautalai i le Taimi Nei
“Ou te i ai faatasi ma oe; ma soo se mea e te folafola atu ai lou igoa o le a faaavanoaina ia te oe se faitotoa aoga, ina ia latou talia lau upu” (MFF 112:19).
Sa tau pogipogi a o tootutuli Mika ma lona uso laitiiti o Noa, e fai a la tatalo. Sa mafaufau lava o ia i lona tuaoi, o se tamaloa matua e igoa ia Samu. O le taimi tonu lena na oo atu ai Tina i le faitotoa.
“Ua ou fiafia o le a fai a oulua tatalo,” o lana tala lea, ma ataata atu i le auso e toalua.
“O le a aofia ai Samu i a’u tatalo i le po nei,” o le tala lea a Mika. “O le a ou fai ia te ia e sau tatou te o i le lotu i le Aso Sa, ma ou te manaomia le fesoasoani a le Tama Faalelagi pe a ou fesili atu ia te ia.”
“E te manatu o le a sau o ia tatou te o i le lotu?” Na fesili ai Noa. “Na fai mai lo matou faiaoga o le Peraimeri, o le a fiafia le Tama Faalelagi pe a matou valaaulia o matou tuaoi e o mai i le lotu.”
“Ou te iloa o le a fesoasoani le Tama Faalelagi ia te oe e fai atu ia Samu,” o le tala lea a Tina.
O le taeao na sosoo ai na alapopo ai lava Mika ma Noa. Sa fiafia i laua e talanoa ia Samu. Ua leva ona nofo Samu e tuaoi ma le aiga o Mika ma Noa ae lei taitai fananau i laua. Na iloa e Mika na faanoanoa lava Samu i le tuua na o ia talu ona maliu lona toalua.
Sa teu e tamaiti o la moega e aunoa ma le tau faamanatuina i ai, sa faavave ona inu le la ti, a o lei o atu i fafo o le faitotoa.
“O e fefe?” O le fesili lea a Noa ia Mika.
“Leai. Ou te iloa o le a fai mai Samu ua lelei,” o le tali lea a Mika. “Ia, masalo o loo ou fefe laitiiti,” sa ia faaopoopo mai ai.
Sa taufetuli atu le toalua i le fale o Samu. Na mautinoa e Mika na tutusa lo la’ua popole ma Noa. Ae faapefea pe a fai mai Samu leai? Ae faapefea pe a le toe manao Samu e avea ma a laua uo ma le toe aveina i latou ma Tama e fagogota?
Sa la savavali gugu atu i luma o le faitotoa a Samu. O le taimi lava sa la tuituia ai le faitotoa, na savali mai ai se tagata i le isi itu i fafo o le fale. “Talofa, sole!” sa ia fai mai ai, a o savali mai ia i laua. “O a lua mea a fai i lenei aso?” E ui lava ina punitia ona foliga i se pulou lauvaovao tele, ae na iloa lava e tamaiti mai le leo o Samu lea. Ma sa la iloaina sa ataata o ia.
“Na ma o mai e asi oe,” o le tala lea a Mika.
“E sao,” na fai atu ai Noa. Sa vave lava ona ia faaopoopo atu, “E i ai se fesili a Mika e fia fai atu ia te oe.”
Sa tatavale le fatu o Mika i lona fatafata. Sa manava tele o ia i totonu ma oso atu loa lana tala, “E mafai ona tatou o i le lotu taeao? E mafai ona tatou o i le matou taavale—e lava lava le avanoa—ma e mafai ona tatou nonofo faatasi i le lotu.”
“Ia, ou te vaai lava e o le tou aiga i le lotu i taeao uma o Aso Sa, ma ua leva tele ou te lei toe alu i se lotu,” o le tala lea a Samu. “Ou te manatu o le a le afaina lo tatou o i le lotu i le Aso Sa nei.”
“Seki a!” sa tau alalaga uma ai tama i le taimi lava lea e tasi.
Na faapea atu Noa, “Matou te o ese i le 9:30. O le a matou pikiina oe i le taimi lena!”
A o taufetuli atu tamaiti i le fale, na faliu Mika ma valaau atu ia Samu, o le sa ataata pea lava. “Tatou feiloai taeao i le 9:30!”
A o la ulu atu i lo latou fale, sa faatalitali mai Tina ma Tama mo i laua.
“Na fai mai e a Samu?” O le fesili lea a Tama. “E sau tatou te o i le lotu?”
Na ataata Mika. “Ioe. Sa ma fai i ai o le a tatou pikiina o ia i le 9:30.”
O lena afiafi a o fai a la tatalo, sa manatua e Noa ma Mika e faafetai atu i le Tama Faalelagi mo le fesoasoani ia laua e fai atu ia Samu latou te o i le lotu.
“Ua matua ou fiafia lava,” o le tala lea a Mika.
“E faapena foi au,” na fai mai ai Noa.
Sa tulioso loa tama i o la moega, ma na manatua e Mika se mea na fai atu ai le epikopo i le sauniga faamanatuga i le vaiaso ua te’a: “O tagata uma lava o le ekalesia o se faifeautalai!”
Ata na tusia e Gregg Thorkelson