Kaokoron te Ekaretia e Uruana Aroia Ake Aki Bibitaki

Iaon Harlem, te bitiobi ae tei Africa-America e kaira te tataro nakoia kaain ana bootaki n taromauri. Iaon Miami, kaain rarikia a rin inanon te umwantabu ae tokatoka babobona ao ni kamauri imarenaia n te taetae n Haiti. Iaon Kaawan Salt Lake ae bubura, te tia reirei e reireinia ana kiraati n te Baibara n te taetae n China. Ao n te tai naba anne, iaon Florida, kaain te bootaki n taromauri a anene ni kabane n karaoan kanikina ni baia man te American Sign Language. Ao iaon California te ataei ae uarereke e anga ana moan taetae n te Moanrinan n te taetae n Spain.

Te tamnei aei bon te waaki ae korakora ni kaitara te banna ni kakaokoroaki ake a mwaiti ibukia kaain te Ekaretia iaon te United States n aroia aika mainaina, karinan-n-aomata ake inuuka mai Utah. Ma e bon kaota te banna ae eti raoi n aron bitakin teia kaain te Ekaretia, are e a bon rikirake ni kakaokoro, ni kaoti aekakin nako katei ao rabakau aika mwaiti.

Te kakaokoro aei tiaki n ae aki noorakia irouia taan koro rongorongo ake a takaruaia n atuun aia kaongora n aron ae “A Rikirake Moomon I Nukan Kaawa Aika Bubura—Anaki Nanoia I Bwabwata ao Hispanic nakon te Ekaretia” n te Philadelphia Inquirer, “Te Ekaretia Ibukia Aomata Aika Itiaki E Iriia Membwa nako Nuukan Kaawa aika Bubura” inanon te Denver Post, “Onimaki ae Aki Kinaa te Kara” inanon te Chicago Reporter, ao “Ibukiia Moomon i Harlem, E Anoia nakon Taabo aika Mwaawa” inanon te New York Times.

Jan Shipps, te tia reirei ngkoa n te reirei ae rietaata ibukin rongorongon ngkoa ao kamatebwaian taekan aaro n te Indiana University, e taku neiei bwa aki toki ni weteia taan kareke rongorongo, ni miimi n rikiraken te Ekaretia i nukan kaawa aika bubura. “‘A mena iara kaain te Moomon?’ a titiraki. I tuangia bwa, ‘A mena n taabo ni kabane.’”

N aron te katooto aei, iaon te United States, e raka nakon 150 aia bootaki Aomata Aika Itiaki ni Boong Aika Kaitira ae 20 aia taetae aika kakaokoro, n ikotaki ma taetae aika Polish, Navajo, Russian, Spanish, ao German.

Mwaitin rikiraken te Ekaretia e bon riki man te waaki ni mwakuri n anganano irouia mitinare ni kabuta te aonaaba, te kabanea ni bubura n aekakina n te aonaaba. E raka nakon 52,000 mitinare ake anga reirei inanon 347 mition inanon aaba ae raka nakon 140.

“Ti mwakuri korakora ni kanakoa te rongorongo ae na karekea te kantaninga,” e taku Unimwaane Earl C. Tingey man te Beretitentii n te Itingaun. “Ti tibwauai rongorongo ake a buokia utu. Ti uota te kantaninga ibukin aron te tama n riki bwa te tama, te tina n riki n tina—ao aikai ni kabane a boboto iaon ana reirei Iesu Kristo.”

N te tai naba aei, Unimwaane Tingey e bon waekoa ni kaota aron kaokoroia Aomata Aika Itiaki ni Boong Aika Kaitira inanon te aonaaba ni Kiritian. E taku bwa te Ekaretia bon tiaki te Katorika ke te Kamatu, ma bon manga kaokan ana Ekaretia Iesu Kristo are ngkoa.

Te Ekaretia naba e a rikirake n taabangaki ni kabuta te aonaaba. E raka nakon iteran mwaitia kaain te Ekaretia ngkai ae a maeka itinanikun te United States, e koro bukin te mwaneka aei inanon Beberuare 1996.

Kaain te Ekaretia ni kabuta te aonaaba ngkai e a kaania 13 te mirion Aomata aika Itiaki ni Boong Aika Kaitira bon te maranga ae korakora man ti onoman kaain te Ekaretia inanon Eberi 1830, ngke e katea te Ekaretia Iotebwa Timiti i meangin New York.

Aron te rikirake imarenaia katei ao botanaomata aika kakaokoro e bon riki bwa katabean te Ekaretia ae moanibwaiaki. Ibukin buokan kabebeteana, te Ekaretia e rairi boki aika tabu, waakin kanoan maungatabu, kanakobwana iaon tiataraite, bokinreirei iaon te karikiram, maekatin, bwain kaombiuta, rongorongo man Webu tiaite, ao bwain reirei riki tabeua nakon taetae aika raka iaon 100 mwaitina. Ao ibukin aekaki ni waaki aikai ao te waaki n raitaeka bon te kabanea ni bubura ibukin te reitaki n te aonaaba.

Inanon 2000 taetaena nakon te National Press Club iaon Washington, D.C., te Beretitenti n te Ekaretia Gordon B. Hinckley e taku bwa rikiraken te Ekaretia e a tia ni uota tabeua kakaewenako aika moan te kangaanga. “Te moan bon kataneiakia taan kairiiri n aia tabo,” e taekinna Beretitenti Hinckley. “Te kauoua … bon katauraoan taabo n nebonebo ngkai e waekoa te rikirake.”

Ibukin karekean taabo riki n nebonebo aika kainnanoaki, a ware bubua kateitei aika boou ake a tabe ni kateaki ni kabuta te aonaaba ni katoa ririki.

Ma kataneiakia taan kairiiri inanon bootaki n taromauri ike akea temanna ae a tia ni kaaina te Ekaretia inanon te tai ae maan e karika te kakaewenako ae raka arona. Inanon aaba tabeua ike e a tiba kateaki iai te Ekaretia, tabeman taan kairiiri a tia ni karekea katabeaia ni kairiiri ti tabeua namakaina imwin kaainakin te Ekaretia. Taan kairiiri aika boou aikai e bon karako rabakauia iaon mwiokoaia ni kairiiri.

N ataakin te kangaanga aei, e a tia te Ekaretia ni katei aobitin aono ni kabuta te aonaaba, man tararuaki irouia Mataniwi ni Kabuta. A bootaki ma taan kairiiri aika boou n te tabo ao ni kataneiaia ni kabonganai oin taetaen abaia.

Ao n raonaki ma te rikirake ae moan te kamiimi e roko te kangaanga ibukin katiteuanakia Aomata aika Itiaki ni Boong aika Kaitira man katei aika mwaiti. Unimwaane Dallin H. Oaks man aia Kooram Abotoro ake Tengaun ma Uoman e taku bwa rikiraken te kakaokoro i marenaia kaain te Ekaretia bon te bwai ae riai n riki, tiaki kanoan ana waaki te Ekaretia ae kantaningaia. Kanoan raoi te waaki bon te katiteuanaki, tiaki te kakaokoroakii. “Ti tataekina te katiteuanaki inanon te botanaomata ibukia Aika Itiaki ao te kona ni butimwaea aron okorona temanna ake a bon aki kona n totokoaki inanon te botanaomata ae okoro aia koaua ao anuaia.”

Ao n tokina, e korakora waakinan te anga reirei nakoia Aomata aika Itiaki ni kabuta te aonaaba iaon ana reirei te Ekaretia ao ni kataneiaia taan kairiiri n te tabo man aki angania katein America.

“N tabetai ara katei ao katein Maeao a bon rangi ni kaokoro,” e taku Seung Hwun Ko, kaain te Ekaretia mai Seoul, Korea, “ma ngkana ti taekina taekan ana euangkerio Iesu Kristo, ti boonnano.”