E Buoka ana Burokuraem Mexico te Ekaretia
Man te1929 te tautaeka ni Mexico e a tia ni kataia ni katamaroa maiuia ataei rinanon ae ataaki ngkai bwa te National System for the Integral Development of the Family (DIF). E waakinaki n ana karinan te tautaeka, titeite, ao kaawa aika bubura, DIF e a tia n riki bwa te waaki ni kakorakoraia utu ao ni buokia aomata aika uarereke n aia kareke mwane. Ngkai te Ekaretia e a mwakuri ma DIF n reitanako katamaroan maiuia ataei.
Luis Camarillo, te manatia ni ibuobuoki n te aono ibukin Mexico North Area, e a tia n noora aia kangaanga ataei ake a kaitara ma ngaai n te aono ao e tangiria ni buokia ataei. Ngaia ao tabeman riki a tia ni moana kakaean aia kangaanga ataei inanon te aono ao a kunea bwa a mwaiti aika a tia ni korakai n rootaki man bwaai aika uoua.
“Nuevo Leon State akea iai ataei akea mweengaia; ma e ngae n anne, iai ataei ake a korakai n rootaki n te bwainikirinaki ke ataei ake a kitanaki,” e taku te Tari Camarillo.
Te Tari Camarillo ao tabeman riki kaain te Ekaretia a karekea taekan ana mwakuri DIF ni buokia ataei rinanon te buroukuraem ibukin tararuaia ataei n te tai ae aki maan ao a baireia bwa a na buoka DIF. E reitaki ma Dr. Alejandro Alberto Morton Martínez, te tarekita ibukin kamanoaia ataei ao te utu n te DIF ao e kaota nanona ni kan reitaki ni mwakuri ma te kurubu ni buoka te burokuraem. Imwin anne, kaain te Ekaretia a tia ni mwakuri ma Dr. Morton iaon te burokuraem ibukin onean mwiia kaaro n tararua.
Te kaitau n anganano man te Ekaretia ao ana waaki te Titeite ae Utah n tararuaia ataei, te DIF ao tabeman ake a ira waakina ao n tia ni karekei kataneiai aika kakaawaki iaon te botoniango ibukin te tararua n onean mwiia kaaro.
“Tabeman taanga ni mitinare a roko ikai i Monterrey mai Utah ao ni karaoa te moan kataneiai nakoia tao 50 naake a kan riki bwa taan anga te kataneiai,” e taku te Tari Camarillo.
Rinanon te Humanitarian Services, te Tari Camarillo, Dr. Morton, ao tabeman riki a tia ni mwananga nako Utah ni karekea te kataneiai ae korakora man te Utah Department of Children and Family Services. Te kataneiai e rinanon te moan waaki ni kaota aron moan katean ao kawakinan te tararua n onean mwiia kaaro ao e reke naba aia tai taan ira te kataneiai n noora raoi aron karaoan te mwakuri. Inanon aia tai n tiku i Utah, taan kataneiaaki a karoko naba n te Church Welfare Department and LDS Family Services.
E ngae ngke e teimatoa ni waaki te burokuraem ibukin tararuaia ataei n onean mwiia kaaro inanon Nuevo Leon, te kataneiai are a tia ni karekea te Tari Camarillo ao tabeman riki e a moanna ni bongana.
“Ibukin te kataneiai, DIF e a tia ni katamaroa karekeaia ao rineakina utu n tararua n onean mwiia kaaro n te tai ae aki maan,” e taku te Tari Camarillo. “A kantaningaki ataei bwa a na karekei waaki aika tamaroa riki … nakoia ataei ake tabeman ake a katukaki inanon utu ake aki rineaki ao aki kamwakuri kanoan aia reirei aika boou ake a tia n reiakinna rinanon te Ekaretia.”
Ni karokoa ngkai te rabakau ni mwakuri ma DIF e a tia n tamaroa ibukia ni kabane ake a ira waakina, ni ikotaki ma te Tari Camarillo. “E bon kangaanga karekean te bootaki ae kaainaki irouia aomata aika kabanea raoi nanoia ni karaoan ae tamaroa n ai aroia naake a mwakuri ibukin DIF,” e taku te Tari Camarillo. “Bon te waaki ae moan te tamaroa te mwakuri ma te aekaki ni bootaki aei.”
N ikotaki ma buokan moan waakinan te burokuraem n tararua n onean mwiia kaaro, e a tia te Tari Camarillo ni baronga te karikirake ibukin buokaia aomata man te DIF, are a bwaintangiraaki iai kaintekateka ibukia mwauku, bwai ni mwakuri n onaoraki, ao bwain nanon auti.