E a Tau
“Man ana Babaire Tamara are i Karawa a Kona Utu ni ikotaki n aki toki” (Children’s Songbook, 188).
Boboto iaon te karaki ae koaua
E kaoi ranin matana Carlito. Bon te aoraki tinana inanon namakaina aika mwaiti. N tokina Papá e karekea ana kariaia buuna bwa e na nakon te kaawa ae bubura, ae mwaiti te kiromiita raroana man aia kaawa ae uarereke i Chile, bwa e na tuoaki iroun te taokita. Imwin tutuo aika mwaiti, e a taku te taokita bwa e kaentia tinan Carlito.
E bon rawa n nanokawaki Mamá ibon ibukina. “E bon mwaiti tabeu ae N na karaoi,” e taku neiei.
Te bong teauana, uoman kairake norteamericanos (kaain Amerika Meang) a kaoti n aia mataroa ni mweengaia ae uarereke. “Ngaira bon man Ana Ekaretia Iesu Kristo Ibukia Aika Itiaki ni Boong Aika Kaitira,” e taku temanna n taetae n Spanish ae tokitoki.
E kakauongo raoi Mamá ao n tabetai e titiraki. E kariaia aia rongorongo ataeinimwaane n te tai ae waekoa. “Bon te koaua,” e taku neiei.
N aki tabeakina aorakina are e karika te maraki ae korakora, e matoa nanon Mamá bwa e na bwabetitoaki ao ni kamatoaki.
N te ingabong n te Kaonobong a mwananga te utu nakon te auti ni bootaki ike e a bwabetitoaki iai neiei iroun Unimwaane Metzer. E ruru ni mariiri neiei ngke e a waerake man te tabo ni bwabetito.
“Mamá, ko a mwaitoro,” e taku Carlito ao e rabuni bebena ni baina. “Ko riai n oki nakon mweengara mani kaabueko.”
E ioioa atuna Mamá. “E aki tau. N na tiku ni karokoa ae I a tia ni kamatoaki. N na kanga ni mariri ngkana e kabueai te euangkerio?” E bon kamatoaki bwa kaain Ana Ekaretia Iesu Kristo Ibukia Aika Itiaki ni Boong Aika Kaitira.
E aki naba rau nanon Mamá n anne. E bon iangoia neiei bwa Papá ao Carlito a na reiakina te euangkerio ae manga kaokaki n arona ae a tia. E tuangia neiei “Bwa ngkana kam bon tataro, ao kam na bon ataa te koaua ae a taekinna mitinare”.
A reireinaki ana euangkerio Iesu Kristo irouia unimwaane. E na riai ni katoka mokona Papá. E kakauongo Carlito nakon aia reirei unimwaane ao e namakina te rau ae bwanin inanona. E a moanna ni mataata n te abue are e a tia ni kabwarabwara Mamá.
Inanon teuana namakaina ao e a toki mokon Papá. E aki maan imwina ao a uaia Papá ao Carlito ni bwabetitoaki ao ni kamatoaki. Tabeua te wiiki imwina ao e a karekea te Nakoanibonga ae te Aaron Papá. Ao Carlito e na riai n tataninga teniua riki te ririki imwain ae na kona ni karekea te nakoanibonga.
E a bon rangi ni mamaara Mamá, ma e aki toki n nanako n taromauri ao ni kakawaria naake aoraki n te kaawa.
“Ngaira bon kaain ana Ekaretia te Atua, ma e bon aki naba tau,” e taku Mamá nakon Papá ao Carlito n te tairiki teuana.
E a titiraki Carlito “Tera ae ti riai ni karaoia ngkai?” E tangira reiakinan taekan te euangkerio ao ni kan maiuakinna raoi n tainako.
E taku Mamá “Ti riai ni kabaeaki inanon te tembora”.
Te kabanea ni kaan n tembora nakon mweengaia bon are e mena i Santiago. Ma e bon aki tau aia mwane ibukin mwanangaia nako ikekei. Ana raka ni mwane Papá ae karekea e bane ni kaboan ana bwainaoraki Mamá.
Ngaia are Mamá e a moana ana bwatoro ni kaiko mwane nakon te tembora. E katikua irarikin te mataroa. Taian maibibi ake e kaikoikoi e a bon rikirake ni karokoa ae a tau te mwane ibukin mwanangan te utu. A kabaeaki aia utu inanon te tembora ibukin te tai aei ao nakon ae akea tokina.
E onrake n te kukurei Mamá. Ao e a taku neiei “E a bon tau”.
“I ataia ae karikaki te aba ao ana Ekaretia te Uea e a manga kaokaki bwa aonga ni kona ni kabaeaki taian utu ao ni karietataaki.”
Unimwaane Russell M. Nelson man te Kooram n Abotoro ake Tengaun ma Uoman, “Nurturing Marriage,” Riaona, Meei 2006, 36.