E Na’na e Faaora ia Outou
Ua mauiui to‘u aau e to’na atoa. Ua hinaaro rahi au ia tauturu ia’na no te mea ua ite au e e mea mau to’na oto e to’na hinaaro ia rave i te ohipa ti‘a.
Te tavini ra vau ei misionare a farerei ai au ia Susie (ua tauihia te i‘oa). Ua haapiihia oia e to’na ra utuafare i te evanelia e na misionare e piti tei rave na i te ohipa i te piha toro‘a o te misioni e o vau nei. Ua farii ratou i te taatoaraa o te mau haapiiraa e ua farii ratou i te aniraa ia bapetizohia e ia haamauhia. E haamaitairaa na‘u ia uiui i teie nei utuafare faahiahia e maha taata : te metua vahine, te metua tane, te tuaane, e Susie.
Ua faaoti au i te mau uiuiraa no te bapetizoraa no na melo e toru no te utuafare e ua ite au e ua faaineine-maitai-hia ratou e ua oaoa roa ratou i te riro ei tuhaa no te basileia a te Fatu. A tomo mai ai ra o Susie i roto, e au ra e vai hau noa oia e te feaa ra oia i te farerei ia‘u.
Ua haamata vau i te ani i te mau uiraa no ni‘a i te mau mea tei haapiihia’tu ia’na. Ua ite oia i te aamu no te peropheta Iosepha Semita e ua ti‘aturi oia i te reira ; ua tai‘o oia i te Buka a Moromona e ua ite oia e e parau mau te reira ; e ua farii oia i te Ekalesia ei Ekalesia parau-ti‘a ana‘e e te mea ora i ni‘a i te fenua nei e ua hinaaro oia ia riro ei melo no te reira. Ua ani au ia Susie no ni‘a i to’na hinaaro ia ora i te ture no te tuhaa ahuru, te Ture no te Parau Paari, e te tahi atu mau faaueraa. Ua parau oia e ua taa ia’na teie mau faaueraa e ua ineine oia i te ora i te reira e te toe‘a o to’na ra oraraa. Oia mau, ua riro te uiuiraa mai ta‘u i ite e i te toe‘a o to’na ra utuafare.
Ua ani au i muri iho, « E nehenehe anei ta oe e faaite mai ia‘u eaha te ture no te viivii ore ? » Ua taui ihora to’na hoho‘a mata. Ua ite oioi vau e teie te tumu no teaha oia i feaa ai i te farerei ia‘u. Hou a nehenehe ai ia‘u e parau i te tahi parau, ua tapo‘i ihora oia i to’na hoho‘a mata i to’na na rima, ua tuu ihora i to’na hoho‘a mata e to’na rima i ni‘a i to’na na turi ava‘e, e haamata ihora i te ta‘i ma te faaea ore.
Ua parahi ihora maua ma te paraparau ore no na minuti e rave rahi. Aita vau i papû eaha te parau, e aita i nehenehe ia Susie ia faaea i te ta‘i. Ua pure au no te tautururaa a te Fatu e ua ani au ia Susie eaha ra te fifi. I te pae hopea ua hi‘o mai oia e ua parau ia‘u e e rave rahi mau hebedoma hou a farerei ai oia i te mau misionare, ua rave oia e to’na hoa tane i te mau mea ta te mau misionare i haapii ia’na e e mea hape mai te au i te ture a te Fatu. Ua parau a‘ena oia i to’na hoa tane i te mea ta’na i haapii e ua parau atu ia’na e eita oia e tamau noa â i teie huru auraa. Ua parau atoa oia ia’na e ia farerei oia i te mau misionare e ia faaroo i te mea ta’na i ite i teie nei e e parau mau. Te teiaha noa ra te mana‘o hape no te mau mea ta’na i rave i roto i to’na ra aau.
Ua ite to‘u aau te mauiui o to’na ra aau. Ua hinaaro rahi au i te tauturu ia’na no te mea ua ite au e e mea mau to’na oto e to’na hinaaro ia rave i te mea ti‘a e ia bapetizohia. I taua taime ra, ua tae maramarama mai te pahonoraa i ta‘u nei pure. Ua ani au ia’na, « Susie, te hinaaro anei oe ia matara oe i te mana‘o hape e te mauiui no teie nei hara ? » Ua tapo‘i faahou â to’na rima i to’na hoho‘a mata e ua pio ihora to’na ra upoo i raro. Ua parau noa oia te hoê noa parau : « E ». Ua tahe rahi mai to’na mau roimata, e ua tamahanahana vau ia’na na roto i te parauraa’tu i te parau no te Taraehara e nahea oia e nehenehe ai e faaohipa i te reira i roto i to’na ra oraraa. Ua tatara atu vau e te hoê tumu no te bapetizoraa e te haamauraa o te faaoraraa ïa i te mau varua o te mau taata tei hinaaro mau i te tatarahapa, e ma te feaa ore ua ite au e e ua hinaaro mau oia.
Ua faaoti maua i te uiuiraa na roto i te hoê pure. Ua parahi mau mai te Varua o te Fatu, hau atu i te puai i te mau taime na mua’tu i roto i te hoê uiuiraa.
Ua tae atu vau e to‘u hoa i te fare pureraa na mua noa‘e i te bapetizoraa. Aita e taime no te paraparauraa ia Susie aore râ i to’na ra utuafare na mua‘e i te oro‘a bapetizoraa. I muri a‘e i te mau himene e te mau a‘oraa, ua bapetizohia ratou—to’na metua vahine na mua, i muri iho to’na metua tane, i muri iho to’na tuaane e i te pae hopea o Susie. Ua pou atu oia i roto i te vahi bapetizoraa, e ua faaite mai ta’na ata i te aamu—te ohipa ra te raau faaora a te Fatu i roto i to’na aau. A haere mai ai oia i rapae i te pape, te vai nei te mau roimata i roto i to’na ra mata e to‘u atoa. Ua rahi atu â to’na mata ataata i na mua’tu, e ua anaana maite to’na hoho‘a mata. Ua taa ia‘u i taua taime ra no teaha te Faaora i haapii ai, « E haere mai outou ia‘u nei, e te feia… tei teiaha i te hopoi‘a, e na‘u outou e faaora » (Mataio 11:28).
Ua paraparau poto noa matou i muri a‘e i te oro‘a bapetizoraa. Ua farii au i te utuafare ei mau melo apî no te basileia a te Fatu. A aroha rima ai au ia Susie, ua hinaaro vau i te parau atu ia’na te faufaa rahi no teie ohipa tei tupu no‘u nei. Ua tatarahapa na vau i roto i to‘u nei oraraa e ua ite au i te mana no te Taraehara, ua mauruuru râ vau i te ite-puai-raa’tu i te reira hau atu i na mua’tu na roto i to‘u matauraa’tu ia’na.
Ua riro mau te amuiraa’tu i te Ekalesia ei tamataraa i te mau taime atoa. Te amuiraa’tu na roto i taua huru pe‘ape‘a ua riro ïa ei tamataraa rahi atu no Susie, e no te mau melo apî atoa e rave rahi. Na te Taraehara râ a Iesu Mesia i haamâmâ i te tamataraa e i arata‘i i teie nei tamahine faahiahia a te Atua i te e‘a no te faafariuraa e te faaoraraa o te varua. Ua haapii atoa te reira i te hoê misionare apî roa i te hoê haapiiraa faufaa rahi no ni‘a i te faaohiparaa i te Taraehara i roto i to’na iho oraraa.