ទំនុកចិត្តលើសេចក្តីសញ្ញាតាមរយៈព្រះយេស៊ូវគ្រីស្ទ
នៅពេលយើងចូលទៅក្នុងព្រះដំណាក់របស់ព្រះអម្ចាស់ នោះយើងនៅលើផ្លូវដ៏ពិសិដ្ឋនៃការរៀនសូត្រ ដើម្បីក្លាយជាសិស្សកាន់តែល្អ និងបរិសុទ្ធរបស់ព្រះគ្រីស្ទ ។
បងប្អូនប្រុសស្រីជាទីស្រឡាញ់ ខ្ញុំសូមអធិស្ឋានថា យើងអាចនឹងត្រូវបានរំឭកខាងវិញ្ញាណ តាមរយៈសារលិខិតដ៏បំផុសគំនិតពីថ្នាក់ដឹកនាំយើងនៅចុងសប្តាហ៍នេះ ហើយរីករាយនឹងអ្វីដែលខ្ញុំចូលចិត្តហៅថា « ទំនុកចិត្តលើសេចក្តីសញ្ញាតាមរយៈព្រះយេស៊ូវគ្រីស្ទ » ។ ទំនុកចិត្តនេះគឺជាការធានាដ៏ស្ងប់ស្ងាត់ ប៉ុន្តែជាក់លាក់អំពីការទទួលបានពរជ័យដែលព្រះសន្យាសម្រាប់អស់អ្នកដែលគោរពតាមសេចក្ដីសញ្ញាពួកគេ ហើយវាត្រូវការជាចាំបាច់ក្នុងស្ថានភាពដ៏លំបាកនៃសម័យយើង ។
ការសាងសង់ដំណាក់ព្រះអម្ចាស់ថ្មីៗនៅលើពិភពលោក ក្រោមការដឹកនាំដ៏បំផុសគំនិតរបស់ប្រធាន រ័សុល អឹម ណិលសុន បានបណ្ដាលឲ្យមានអំណរដ៏មហិមានៅក្នុងចំណោមសមាជិកសាសនាចក្រ និងជានិមិត្តរូបដ៏សំខាន់មួយនៃការពង្រីកនគររបស់ព្រះអម្ចាស់ ។
ពេលនឹកគិតពីបទពិសោធន៍ដ៏គួរឲ្យស្ញប់ស្ញែងរបស់ខ្ញុំនៅឯការឧទ្ទិសឆ្លងព្រះវិហារបរិសុទ្ធ ហ្វែធើ រីវើរ កាលីហ្វ័រញ៉ា កាលពីខែតុលាឆ្នាំមុន ខ្ញុំឆ្ងល់ថា តើយើងភ្លេចខ្លួនព្រោះតែរំភើបចិត្តដែលមានព្រះវិហារបរិសុទ្ធថ្មីនៅក្នុងទីក្រុង និងសហគមន៍របស់យើង រួចភ្លេចផ្ដោតទៅលើគោលបំណងកាន់តែពិសិដ្ឋនៃសេចក្ដីសញ្ញាពិសិដ្ឋដែលបានធ្វើនៅក្នុងព្រះវិហារបរិសុទ្ធឬទេ ។
ស្លាកចារឹកនៅខាងមុខព្រះវិហារបរិសុទ្ធនីមួយៗគឺជាសេចក្តីថ្លែងការណ៍ដ៏ឧឡារិកថា ៖ « បរិសុទ្ធភាពថ្វាយព្រះអម្ចាស់ » ។១ ពាក្យដ៏បំផុសគំនិតទាំងនេះគឺជាការអញ្ជើញយ៉ាងច្បាស់ថា នៅពេលយើងចូលទៅក្នុងព្រះដំណាក់របស់ព្រះអម្ចាស់ នោះយើងនៅលើផ្លូវដ៏ពិសិដ្ឋនៃការរៀនសូត្រ ដើម្បីក្លាយជាសិស្សកាន់តែល្អ និងបរិសុទ្ធរបស់ព្រះគ្រីស្ទ ។ នៅពេលយើងធ្វើសេចក្ដីសញ្ញាដោយបរិសុទ្ធនៅចំពោះព្រះ ហើយតាំងចិត្តធ្វើតាមព្រះអង្គសង្គ្រោះ នោះយើងទទួលបានអំណាចដើម្បីផ្លាស់ប្តូរដួងចិត្តរំឭកខាងវិញ្ញាណយើងញ ហើយធ្វើឲ្យយើងជិតស្និទិ្ធនឹងទ្រង់កាន់តែខ្លាំង ។ នៅពេលធ្វើការខិតខំដូច្នេះ នាំឲ្យព្រលឹងយើងញែកជាបរិសុទ្ធ ហើយបង្កើតជាចំណងដ៏ពិសិដ្ឋមួយជាមួយព្រះ និងព្រះយេស៊ូវគ្រីស្ទ ដែលទ្រង់សន្យាថា យើងអាចទទួលគ្រងមរតកនៃជីវិតដ៏នៅអស់កល្បជានិច្ច ។២ ជាលទ្ធផលនៃដំណើរការរៀនសូត្រដ៏ពិសិដ្ឋនេះយើងទទួលបានទំនុកចិត្តកាន់តែល្អ និងកាន់តែបរិសុទ្ធជាងមុនក្នុងជីវិតប្រចាំថ្ងៃក្នុងរង្វង់សេចក្ដីសញ្ញារបស់យើងដែលបានធ្វើតាមរយៈព្រះយេស៊ូវគ្រីស្ទ ។
ទំនុកចិត្តបែបនេះគឺជាចំណុចកំពូលនៃទំនាក់ទំនងដ៏ទេវភាពរបស់យើងជាមួយព្រះ និងអាចជួយយើងបង្កើនការថ្វាយ និងអំណរគុណរបស់យើងចំពោះព្រះយេស៊ូវគ្រីស្ទ និងការពលិកម្មដ៏ធួនរបស់ទ្រង់ ។ វាពង្រឹងសមត្ថភាពយើងឲ្យស្រឡាញ់ និងបម្រើអ្នកដទៃ ហើយវាពង្រឹងដល់ព្រលឹងយើងឲ្យនៅរស់រានក្នុងពិភពអួរអាប់ ដែលកាន់តែងងឹតងងុល និងបាក់ទឹកចិត្ត ។ វាផ្ដល់អំណាចឲ្យយើងយកឈ្នះលើគ្រាប់ពូជនៃការសង្ស័យ និងអស់សង្ឃឹម ភាពភ័យខ្លាច និងខកចិត្ត ការឈឺចិត្ត និងក្ដីអស់សង្ឃឹម ដែលមារសត្រូវព្យាយាមដាក់ទៅក្នុងចិត្តយើង ជាពិសេស នៅពេលជីវិតជួបការលំបាក ការសាកល្បងរយៈពេលយូរឬស្ថានភាពលំបាកៗ ។ ខគម្ពីរប៊ីបមួយផ្ដល់ដំបូន្មានល្អសម្រាប់យើងម្នាក់ៗ នៅពេលយើងតទល់ទៅនឹងបញ្ហាខាងលោកិយថ្ងៃនេះ ៖ « កុំឲ្យបោះបង់ចោលសេចក្តីក្លាហានរបស់អ្នករាល់គ្នា » ។៣
បងប្អូនប្រុសស្រីជាទីស្រឡាញ់ អស់អ្នកដែលទុកចិត្តពិតចំពោះសេចក្ដីសញ្ញាដែលបានធ្វើនៅក្នុងព្រះដំណាក់របស់ព្រះអម្ចាស់ តាមរយៈព្រះយេស៊ូវគ្រីស្ទ នោះនឹងទទួលបានអំណាចដ៏មានអានុភាពបំផុតមួយនៅក្នុងជីវិតនេះ ។
ពេលយើងបានសិក្សាព្រះគម្ពីរមរមននៅក្នុង ចូរមកតាមខ្ញុំ នាឆ្នាំនេះ យើងបានធ្វើជាសាក្សីថា នីហ្វៃជាគំរូដ៏មានអានុភាពអំពីទំនុកចិត្តលើសេចក្ដីសញ្ញានេះ តាមរយៈភាពស្មោះត្រង់ នៅពេលលោកប្រឈមមុខនឹងការលំបាក និងបញ្ហានានាដូចជាការយកផ្ទាំងតាមបញ្ជារបស់ព្រះអម្ចាស់ជាដើម ។ នីហ្វៃ ទោះជាសោកសៅខ្លាំងចំពោះភាពភ័យខ្លាច និងការខ្វះសេចក្ដីជំនឿរបស់លេមិន និងលេមយួលក្ដី ក៏លោកបន្ដមានទំនុកចិត្តលើព្រះអម្ចាស់ថា នឹងប្រគល់ផ្ទះចំណារដល់ពួកគេផងដែរ ។ លោកបាននិយាយទៅបងប្រុសលោកថា « ប្រាកដដូចជាព្រះអម្ចាស់ទ្រង់មានព្រះជន្មរស់នៅ ហើយប្រាកដដូចជាយើងមានជីវិត នោះយើងនឹងមិនចុះទៅរកឪពុកយើងនៅក្នុងទីរហោស្ថានឡើយ ទាល់តែយើងបានសម្រេចនូវកិច្ចការដែលព្រះអម្ចាស់ទ្រង់បានបញ្ជាយើងសិន » ។៤ ដោយសារតែនីហ្វៃមានទំនុកចិត្តលើការសន្យារបស់ព្រះអម្ចាស់ លោកអាចសម្រេចនូវអ្វីដែលលោកត្រូវបានបញ្ជាឲ្យធ្វើ ។៥ នៅក្នុងការនិមិត្តរបស់លោកក្រោយមក នីហ្វៃ បានឃើញឥទ្ធិពលនៃទំនុកចិត្តនេះ ដោយសរសេរថា « ខ្ញុំ នីហ្វៃ បានឃើញថាព្រះចេស្ដានៃកូនចៀមនៃព្រះ បានយាងចុះមកសណ្ឋិតលើពួកបរិសុទ្ធក្នុងសាសនាចក្រនៃកូនចៀម ហើយលើរាស្ត្រដែលនៅក្នុងសេចក្ដីសញ្ញានៃព្រះអម្ចាស់ … ហើយពួកគេប្រដាប់អាវុធដោយសេចក្ដីសុចរិត និងដោយព្រះចេស្ដានៃព្រះ ដោយសិរីល្អដ៏អស្ចារ្យ » ។៦
ខ្ញុំបានឃើញផ្ទាល់ភ្នែកនូវការសន្យា និងព្រះចេស្តាពេញដោយក្តីស្រឡាញ់របស់ព្រះអម្ចាស់ហូរចូលក្នុងជីវិតបុត្រាបុត្រីរបស់ព្រះ ដោយពង្រឹងពួកគេដើម្បីប្រឈមមុខនឹងស្ថានភាពជីវិត ។ ថ្ងៃមួយបន្ទាប់ពីការថ្វាយបង្គំនៅព្រះវិហារបរិសុទ្ធភរិយាខ្ញុំមកផ្ទះវិញប្រាប់ខ្ញុំថា គាត់រំជួលចិត្តណាស់ចំពោះអ្វីដែលគាត់បានជួបនៅទីនោះ ។ ពេលគាត់ចូលទៅក្នុងព្រះដំណាក់របស់ព្រះអម្ចាស់ គាត់បានឃើញបុរសម្នាក់អង្គុយលើរទេះរុញរំកិលទៅមុខយឺតៗ ហើយមានស្ត្រីម្នាក់កាន់ឈឺច្រត់ដើរលំបាកយ៉ាងខ្លាំង ពួកគាត់ទាំងពីរមកថ្វាយបង្គំ ព្រះអម្ចាស់នៅក្នុងដំណាក់របស់ទ្រង់យ៉ាងក្លៀវក្លា ។ ពេលភរិយាខ្ញុំដើរចូលទៅកន្លែងធ្វើពិធីការលាងជម្រះ គាត់បានឃើញស្រ្តីពិការដ៏គួរឲ្យស្រឡាញ់ម្នាក់ ដៃម្ខាងដាច់—ហើយដៃម្ខាងទៀតកំបុត—កំពុងបំពេញកិច្ចការគាត់យ៉ាងល្អ និងបរិសុទ្ធ ។
នៅពេលយើងនិយាយដល់បទពិសោធន៍នោះ យើងសន្និដ្ឋានថា មានតែទំនុកចិត្តដ៏បរិសុទ្ធ និងស្មោះសរទៅលើការសន្យាដ៏អស់កល្បជានិច្ច ដែលព្រះប្រទានឲ្យតាមរយៈការចុះសេចក្ដីសញ្ញាបរិសុទ្ធនៅក្នុងដំណាក់ទ្រង់ប៉ុណ្ណោះ ដែលបណ្តាលឲ្យសិស្សដ៏អស្ចារ្យរបស់ព្រះគ្រីស្ទ ហ៊ានចេញពីផ្ទះនៅថ្ងៃដ៏ត្រជាក់នោះ ទោះជាស្ថានភាពជីវិតរបស់ពួកគាត់យ៉ាងណាក្ដី ។
មិត្តសម្លាញ់ខ្ញុំអើយ បើមានអ្វីមួយដែលយើងអាចទទួលបាន—ជាវត្ថុមួយដែលយើងអាចចែកដល់កូនៗ និងចៅៗយើង ដើម្បីជួយពួកគេម្នាក់ៗនៅក្នុងការសាកល្បង និងការលំបាកនាពេលខាងមុខ—វានឹងជាទំនុកចិត្តលើសេចក្ដីសញ្ញាដែលបានធ្វើតាមរយៈព្រះយេស៊ូវគ្រីស្ទនោះឯង ។ ការទទួលបានសម្បត្តិដ៏ទេវភាពបែបនេះ នឹងជួយពួកគេឲ្យរស់នៅដូចដែលព្រះអម្ចាស់បានសន្យានឹងអ្នកដើរតាមដ៏ស្មោះត្រង់របស់ទ្រង់ ៖ « ពួកសិស្សរបស់យើងនឹងឈរនៅក្នុងទីបរិសុទ្ធទាំងឡាយ ហើយនឹងពុំត្រូវបានរើឡើយ » ។៧
តើយើងទទួលបានទំនុកចិត្តបែបនេះតាមយៈព្រះយេស៊ូវគ្រីស្ទដោយរបៀបណា ? វាកើតឡើងតាមរយៈការបន្ទាបខ្លួន ដោយផ្តោតជីវិតយើងទៅលើព្រះអង្គសង្គ្រោះ ការរស់នៅតាមគោលការណ៍នៃដំណឹងល្អនៃព្រះយេស៊ូវគ្រីស្ទ ការទទួលពិធីបរិសុទ្ធនៃសេចក្តីសង្គ្រោះ និងភាពតម្កើងឡើង និងការគោរពសេចក្តីសញ្ញាដែលយើងធ្វើនៅក្នុងដំណាក់ដ៏បរិសុទ្ធរបស់ទ្រង់ ។
នៅក្នុងសុន្ទរកថាបញ្ចប់ក្នុងសន្និសីទទូទៅខែតុលា ឆ្នាំ ២០១៩ ព្យាការីជាទីស្រឡាញ់បានរំឭកយើងអំពីជំហានដ៏សំខាន់មួយក្នុងការសម្រេចបាននូវទំនុកចិត្តលើសេចក្ដីសញ្ញា ដោយមានប្រសាសន៍ថា ៖ « ភាពស័ក្ដិសមផ្ទាល់ខ្លួនដើម្បីចូលក្នុងដំណាក់របស់ព្រះអម្ចាស់តម្រូវឲ្យមានការរៀបចំច្រើនខាងវិញ្ញាណផ្ទាល់ខ្លួនម្នាក់ៗ ។… ភាពស័ក្ដិសមផ្ទាល់ខ្លួនម្នាក់ៗតម្រូវឲ្យមានការប្រែចិត្តជឿទាំងស្រុងទាំងក្នុងគំនិត និងដួងចិត្តដើម្បីប្រែក្លាយកាន់តែដូចជាព្រះអម្ចាស់ ជាពលរដ្ឋស្មោះត្រង់ ជាគំរូល្អប្រសើរ និងជាមនុស្សកាន់តែបរិសុទ្ធ » ។៨ ដូច្នេះ បើយើងផ្លាស់ប្តូរការរៀបចំខ្លួនរបស់យើងដើម្បីចូលក្នុងព្រះវិហារបរិសុទ្ធ នោះយើងនឹងផ្លាស់ប្ដូរបទពិសោធន៍របស់យើងនៅក្នុងព្រះវិហារបរិសុទ្ធ ដែលនឹងផ្លាស់ប្តូរជីវិតយើងនៅខាងក្រៅព្រះវិហារ បរិសុទ្ធផងដែរ ។ « ខណៈនោះអ្នកនឹងមានចិត្តក្លាហានឡើងនៅចំពោះវត្តមាននៃព្រះ ហើយគោលលទ្ធិអំពីបព្វជិតភាពនឹងចុះមកលើព្រលឹងរបស់អ្នកដូចជាទឹកសន្សើមចុះពីលើមេឃ » ។៩
ប៊ីស្សពដែលខ្ញុំស្គាល់ម្នាក់បាននិយាយថា ថ្នាក់អង្គការបឋមសិក្សាសម្រាប់ក្មេងធំៗពុំហៅថាថ្នាក់ « អង្គការបឋមសិក្សា » ទេ ប៉ុន្តែហៅថាថ្នាក់ « រៀបចំខ្លួនទៅព្រះវិហារបរិសុទ្ធ » វិញ ។ នៅខែមករា ប៊ីស្សពអញ្ជើញសមាជិក និងគ្រូបង្រៀនក្នុងថ្នាក់របស់ពួកគេមកកាន់ការិយាល័យគាត់ និយាយអំពីរបៀបដែលពួកគេនឹងចំណាយពេលពេញមួយឆ្នាំ ដើម្បីរៀបចំខ្លួនទៅព្រះវិហារបរិសុទ្ធ ។ ប៊ីស្សពត្រូវចំណាយពេលមើលសំណួរសម្ភាសទទួលប័ណ្ណចូលព្រះវិហារបរិសុទ្ធដែលត្រូវនឹងកុមារ បន្ទាប់មក ដាក់បញ្ចូលក្នុងមេរៀនអង្គការបឋមសិក្សារបស់ពួកគេ ។ គាត់អញ្ជើញក្មេងៗឲ្យត្រៀមខ្លួន នៅពេលពួកគេមកកាន់ការិយាល័យប៊ីស្សពក្នុងរយៈពេលមួយឆ្នាំទៀត ពួកគេនឹងមានទំនុកចិត្ត ជាទំនុកចិត្តលើសេចក្តីសញ្ញា ត្រៀមខ្លួនដើម្បីទទួលប័ណ្ណចូលព្រះវិហារបរិសុទ្ធ ហើយចូលក្នុងព្រះដំណាក់របស់ព្រះអម្ចាស់ ។ នៅឆ្នាំនេះ ប៊ីស្សពមានក្មេងស្រីតូចៗបួននាក់ ដែលរំភើបចិត្តខ្លាំង បានរៀបចំខ្លួន និងមានទំនុកចិត្តក្នុងការទៅព្រះវិហារបរិសុទ្ធ ដែលពួកគេចង់ឲ្យប៊ីស្សពបោះពុម្ពប័ណ្ណរបស់ពួកគេនៅថ្ងៃចូលឆ្នាំថ្មីនៅម៉ោង ១២:០១ នាទីព្រឹក ។
ការរៀបចំខ្លួនពុំមែនសម្រាប់តែអ្នកដែលទៅព្រះវិហារបរិសុទ្ធជាលើកដំបូងនោះទេ ។ យើងទាំងអស់គ្នាគួរតែរៀបចំខ្លួនជានិច្ច ដើម្បីទៅកាន់ព្រះដំណាក់របស់ព្រះអម្ចាស់ ។ ស្តេកមួយដែលខ្ញុំស្គាល់បានប្រកាន់យកបាវចនាថា « សាសនាចក្រគាំទ្រដល់ការផ្ដោតលើគេហដ្ឋាន ហើយចងភ្ជាប់ដោយព្រះវិហារបរិសុទ្ធ » ។ ចងភ្ជាប់១០គឺជាពាក្យគួរឲ្យចាប់អារម្មណ៍ដែលវាមានន័យថា ផ្ដោតទៅលើទិសដៅមួយ ប៉ុន្តែវាក៏មានន័យថា ធ្វើឲ្យជាប់នឹង ឬធ្វើឲ្យមានសុវត្ថិភាព បានដោះស្រាយ និងបានប្តេជ្ញាចិត្តពិតប្រាកដផងដែរ ។ ដូច្នេះ ការចងទៅនឹងព្រះវិហារបរិសុទ្ធធ្វើឲ្យយើងមានសុវត្ថិភាពនឹងព្រះអង្គសង្គ្រោះ ផ្ដល់ការដឹកនាំត្រឹមត្រូវ និងស្ថេរភាពដល់យើង ទាំងធានាថា យើងមានទំនុកចិត្តលើសេចក្ដីសញ្ញាតាមរយៈព្រះយេស៊ូវគ្រីស្ទ ។ ដូច្នេះហើយ យើងទាំងអស់គ្នាគួរតែមានចេតនាពង្រីកការចងភ្ជាប់នេះ ដោយមានការណាត់ជួបជាមួយព្រះអម្ចាស់នាពេលខាងមុខ នៅក្នុងព្រះដំណាក់ដ៏បរិសុទ្ធរបស់ទ្រង់ មិនថាព្រះវិហារបរិសុទ្ធនៅជិត ឬឆ្ងាយនោះទេ ។១១
ព្យាការីជាទីស្រឡាញ់របស់យើង ប្រធាន រ័សុល អិម ណិលសុន បានរំឭកយើងអំពីគោលការណ៍សំខាន់ទាំងនេះដោយថ្លែងថា ៖ « ព្រះវិហារបរិសុទ្ធស្ថិតនៅចំណុចកណ្ដាលដើម្បីពង្រឹងសេចក្ដីជំនឿ និងកម្លាំងខាងវិញ្ញាណរបស់យើង ដោយសារព្រះអង្គសង្គ្រោះ និងគោលលទ្ធិរបស់ទ្រង់ គឺស្ថិតនៅចំបេះដូងនៃព្រះវិហារបរិសុទ្ធ ។ អ្វីៗគ្រប់យ៉ាងដែលបានបង្រៀននៅក្នុងព្រះវិហារបរិសុទ្ធតាមរយៈការណែនាំ និងតាមរយៈព្រះវិញ្ញាណ នឹងបង្កើនការយល់ដឹងរបស់យើងអំពីព្រះយេស៊ូវគ្រីស្ទ ។ ពិធីបរិសុទ្ធដ៏ចាំបាច់ទាំងឡាយរបស់ទ្រង់ចងភ្ជាប់យើងទៅនឹងទ្រង់ តាមរយៈសេចក្តីសញ្ញាដ៏ពិសិដ្ឋនៃបព្វជិតភាព ។ បន្ទាប់មក នៅពេលយើងរក្សាសេចក្តីសញ្ញារបស់យើង នោះទ្រង់នឹងប្រទានព្រះចេស្ដានៃការព្យាបាល ព្រះចេស្ដានៃការពង្រឹង របស់ទ្រង់ មកដល់យើង ។ ហើយយើងនឹងត្រូវការព្រះចេស្តារបស់ទ្រង់សម្រាប់ថ្ងៃខាងមុខកាន់តែខ្លាំង » ។១២
ព្រះអង្គសង្គ្រោះមានព្រះទ័យចង់ឲ្យយើងត្រៀមខ្លួនដើម្បីយល់ច្បាស់អំពីរបៀបប្រព្រឹត្តដូចដែលយើងធ្វើសេចក្ដីសញ្ញាជាមួយព្រះវរបិតាសួគ៌នៅក្នុងព្រះនាមទ្រង់ ។ ទ្រង់ចង់ឲ្យយើងត្រៀមខ្លួនទទួលបទពិសោធន៍អភ័យឯកសិទ្ធិ ការសន្យា និងការទទួលខុសត្រូវរបស់យើង ដើម្បីត្រៀមខ្លួនទទួលបានការយល់ដឹងខាងវិញ្ញាណ និងការយល់ដឹងដែលយើងត្រូវការនៅក្នុងជីវិតនេះ ។ ខ្ញុំដឹងថា នៅពេលព្រះអម្ចាស់ទតឃើញសូម្បីតែបំណង ឬពន្លឺនៃការខិតខំដ៏សុចរិតតែបន្តិចនៅក្នុងឆន្ទៈយើង ដើម្បីផ្តោតជីវិតយើងទៅលើទ្រង់ ពិធីបរិសុទ្ធ និងសេចក្តីសញ្ញាដែលយើងធ្វើនៅក្នុងព្រះដំណាក់របស់ទ្រង់ នោះទ្រង់នឹងប្រទានពរដល់យើងតាមវិធីទ្រង់ដ៏ល្អឥតខ្ចោះជាមួយនឹងអព្ភូតហេតុ និងក្ដីមេត្តាដ៏ទន់ភ្លន់ដែលយើងត្រូវការ ។
ព្រះដំណាក់របស់ព្រះអម្ចាស់គឺជាកន្លែងដែលយើងអាចបានផ្លាស់ប្តូរកាន់តែល្អ និងបរិសុទ្ធ ។ ដូច្នេះ ពេលយើងដើរចេញពីព្រះវិហារបរិសុទ្ធ យើងត្រូវបានផ្លាស់ប្តូរដោយសង្ឃឹម ទៅលើការសន្យានៃសេចក្តីសញ្ញា ប្រដាប់ដោយអំណាចពីស្ថានលើ នោះយើងនាំយកព្រះវិហារបរិសុទ្ធទៅជាមួយយើង ចូលទៅក្នុងគេហដ្ឋាន និងជីវិតយើង ។ ខ្ញុំសូមធានាដល់បងប្អូនថា ការមានព្រះវិញ្ញាណនៃព្រះដំណាក់របស់ព្រះអម្ចាស់នៅក្នុងយើង នោះវាផ្លាស់ប្តូរយើងទាំងស្រុង ។
យើងរៀនពីព្រះវិហារបរិសុទ្ធផងដែរថា ប្រសិនបើយើងចង់ឲ្យព្រះវិញ្ញាណនៃព្រះអម្ចាស់ ខ្លាំងក្នុងជីវិតយើង នោះយើងមិនអាច និងមិនត្រូវមានអារម្មណ៍មិនល្អចំពោះអ្នកណាម្នាក់ឡើយ ។ ការទុកកន្លែងក្នុងចិត្ត ឬគំនិតយើងឲ្យមានអារម្មណ៍ ឬគំនិតមិនល្អនឹងបង្កើតពាក្យ និងសកម្មភាពដែលមិនសមរម្យ មិនថានៅលើប្រព័ន្ធផ្សព្វផ្សាយសង្គម ឬនៅក្នុងផ្ទះយើង ដែលបណ្តាលឲ្យព្រះវិញ្ញាណនៃព្រះអម្ចាស់ដកថយចេញពីដួងចិត្តយើង ។ ដូច្នេះហើយ សូមកុំបោះចោលទំនុកចិត្តរបស់បងប្អូនឡើយ ប៉ុន្តែត្រូវឲ្យទំនុកចិត្តរបស់បងប្អូនរឹងមាំវិញ ។
ការបន្តនិងពន្លឿនការសាងសង់ព្រះវិហារបរិសុទ្ធនឹងបន្តនូវក្តីរំភើប បំផុសគំនិត និងផ្ដល់ពរដល់យើង ។ ប៉ុន្តែដែលសំខាន់ជាងនោះទៅទៀត នៅពេលយើងផ្លាស់ប្តូររបៀបរៀបចំខ្លួនដើម្បីចូលព្រះវិហារបរិសុទ្ធ នោះយើងនឹងផ្លាស់ប្ដូរបទពិសោធន៍នៅក្នុងព្រះវិហារបរិសុទ្ធ ដែលនឹងផ្លាស់ប្តូរជីវិតយើងនៅខាងក្រៅព្រះវិហារបរិសុទ្ធផងដែរ ។ សូមឲ្យការផ្លាស់ប្តូរនេះបំពេញយើងដោយទំនុកចិត្តទៅលើសេចក្តីសញ្ញាបរិសុទ្ធរបស់យើង ដែលបានធ្វើជាមួយព្រះតាមរយៈព្រះយេស៊ូវគ្រីស្ទ ។ ព្រះមានព្រះជន្មរស់ ព្រះយេស៊ូវគឺជាព្រះអង្គសង្គ្រោះយើង ហើយនេះគឺជាសាសនាចក្រដែលបានស្ដារឡើងវិញរបស់ទ្រង់នៅលើផែនដី ។ ខ្ញុំសូមប្រកាសនូវសេចក្តីពិតនេះ នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ៕