Nnyin Idi Nditɔ Esie.
Nnyin inyene ukem edisana emana ye ukem anana-utit ukeme otode ke mfɔn Jesus Christ.
Ndi mbufo emeti se ikitibede inɔ prophet Samuel ke ini Jehovah ɔkɔdɔŋde enye aka ke ufɔk Jesse man ekemek obufa edidem ke Israel? Samuel okokut Eliab, akpa eyen Jesse. Eliab, eketie nte, ama ɔkiɔŋ onyuŋ enyene mbiet adausuŋ. Samuel ama okut oro onyuŋ ɔsɔsɔp ebiere. Ekikere oro ɔkɔwɔrɔ ikpu-ikpu mi akakanade edi idiɔk ubiere, ndien Jehovah eteme Samuel: “Kuse enye iso, kunyuŋ use nte enye ɔkɔŋde; …koro owo esede enyin, edi Jehovah esit.”1
Ndi mbufo emeti se ikitibede inɔ Ananias ke ini Jehovah ɔkɔdɔŋde enye ɔkɔdiɔŋ Saul? Etop Saul ama aka anyan ke obio, Ananias onyuŋ okob abaŋa Saul ye ibak, okposong ukɔbɔ esie ye ikɔt Abasi. Ananias ama okob onyuŋ ɔsɔsɔp ebiere ette ke ikpinaha inyaŋa saul. Ekikere oro ɔkɔwɔrɔ ikpi-ikpu, ndien Ɔbɔŋ eteme Ananias, “Enye edi anam-utom eke mmekde, nte aka ke iso mme Gentiles, ye mbɔŋ, ye nditɔ Israel.”2
Nso ŋkpɔ ekedi mfina ɔnɔ Samuel ye Ananias ke ŋkpɔ-ntibe iba emi? Mmɔ ekekut ke enyin mmɔ enyuŋ ekob ke utɔŋ mmo, ndien ke ntak oro, mmɔ ekebiere enɔ mbon efen etiene se ekutde ye se ekobde.
Ini emi mme scribe ye pharasee ekekutde ŋwan oro ekemumde ke efibe, nso ke mmɔ ekekut? Idiɔk anwan, anam idiɔk-ŋkpɔ emi odotde mkpa. Ini Jesus okokutde enye, nso ke Enye okokut? Nwan emi akayakde idem ke ibio-ibio ini ɔnɔ mmem-idem obukidem edi ekeme ndifak oto ke edikabare esit ye Erifak Esie. Ini otu-owo ekekutde centurion oro, emi owo esie ɔkɔdɔŋɔde akpa-ubeŋ, nso ke mmɔ ekekut? Ekeme ndidi mmɔ ekekut owo-ntime, esen, owo ekpesinde. Ini Jesus okokutde enye, nso ke Enye okokut? Eren emi oyomde ufɔn ɔnɔ owo ke ufok esie, emi okoyomde Ɔbɔŋ ke akpanikɔ ye mbuɔtidem. Ini otu owo ekekutde nwan oro ye udɔŋɔ uwɔrɔ-iyip, nso ke mmɔ ekekut? Ekeme ndidi ndedehe anwan, enye emi ebinde esio eduɔk man ekpesin. Ini Jesus okokutde enye, nso ke Enye okokut? Nwan emi ɔdɔŋɔde, edi ikpɔŋ ye ubahare oto ndaha emi enye mikanke, emi odoride-enyin ndibɔ erikɔk nyuŋ mfiak nduk otu.
Ke kpukpru mfina, Ɔbɔŋ ama okut mme owo emi ke se mmɔ ekedide onyuŋ ɔdiɔŋ mmɔ kiet-kiet. Nte Nephi ye eyeneka esie ɔdɔhɔde:
Enye okot kpukpru owo ete edi etiene Enye … , mfia ye mbubit, ifin ye amana-isŋŋ, iren ye iban; Enye onyun eti mbon esen idut; kpukpru enyuŋ edi ukem ke iso Abasi.”3
“Owo kiet ɔfɔn ke iso esie nte owo enye eken.”4
Yak nnyin nko ekuyak enyen nnyin, utɔŋ nnyin, mme ndik nnyin etin nnyin usuŋ edi atat esit nnyin ye utɔŋ onyuŋ ɔdiɔŋ mbon emi edude ye nnyin, nte Enye akanamde.
Mme isua ekebede, nwan mi, Isabelle, ama enyene saa-saŋa uton ndika nkese owo. Ekedɔŋ enye aka ekese usɔŋ ebe-akpa kiet ke ward nnyin, nwan emi ɔɔkdɔɔɔde, ndien ikpɔŋ-uwem esie esin mfina ke uwem esie. Ema efuk ɔfɔŋ-usuŋ esie; ubet esie abari; enye ikoyomke eka ekese enye, onyuŋ asian ette, “iduhe se nkemede ndinam nnɔ owo ndomokiet.” Ke ifik, Isabelle ɔbɔrɔ, “Ih, ŋkpɔ mmodo! Emekeme ndinam ŋkpɔ nnɔ nnyin ke afo ndiyak nnyin idi idise fi.” Ke ntre Isabelle akaiso, ke mbuɔtidem.
Ekpri ini ama ekebe, eti anwan emi ama enyene usiak-idem ke ukot esie, emi anade ekpuho bandage kpukpru usen, ŋkpɔ emi enye mikpikemeke ndinam ke idem esie. Ke ediwak usen, Isabelle esika ufɔk esie, eke-eyet enye ukot, onyuŋ ɔkpuhɔ bandage esie. Enye ikekwe mbat; ikinyuŋ ikopke utebe. Enye ɔkɔsuk okut ediye eyen-anwan Abasi emi oyomde ima ye mfɔn.
Ke ediwak isua, ami ye anana-ibat mbon efen ebo eridiɔŋ eto enɔ Issabelle ndikut nte Ɔbɔŋ okutde. Ekpedi afo edi stake president mme ɔkɔm-owo ke ward, ekpedi afo edi edidem England mme ɔduŋ ke ntaha ufɔk, ekpedi afo etiŋ usem esie mme efen, ekpedi afo emenim kpukpru ibet mme odomo ndinam ndusuk, enye eyenɔ fi ata edinem udia esie ke ata ndiye usan esie. Ndaha inyene, uduot idem, ndutim obio, obio otode, ndaha eti-ido, ndaha ke obio, mme ŋkpɔ efen anamde ediɔŋɔ fi mme ididiɔŋɔ idihe ŋkpɔ ndomokiet inɔ enye. Enye okut ye esit esie; enye okut eyen Abasi ke idem kpukpru owo.
President Russell M. Nelson ekekpeb ete:
“Andidiɔk adat-esit ke idiɔɔŋɔ koro mmɔ eyebahare nnyin enyuŋekpaha usuŋ emi nnyin ikerede ibaŋa idem nnyin ye kiet eken. Edi ŋkpɔ mfuhɔ nnyin ndikpono idiɔŋɔ nkan nte ikponode kiet eken.
“Idiɔŋɔ ada usiongo-ndɔ ye usua edi. Idiok uwem mme utuk ndomokiet emi inamde kiet eken ke ntak obio itode, usem, ntat-enyn,uduot-emana, ifiɔk-ŋwed, ndutim-obio, mme mme akpan iiɔŋɔ eken edi idioknkpo ke iso Andibot nnyin!”5
Usem french idihe se ami ndide; enye edi ebiet nkamanade. Afia idihe se ami ndide; enye edi nkem ikpok-idem mi, mme iduhe-du do. Ekpeb-ŋwed idihe se ami ndide; enye edi se ami nnamde nda mbok ubon mi. nkamanade. General Authority Seventy idihe se ami ndide; enye edi ebiet namde utom ke ubɔŋ Abasi idahaemi.
“Akpa ye akpan,” nte President Nelson etide nnyin, Ami ndi “eyen Abasi.”6 Ntre ke afo edi, ntre nko ke kpukpru owo edi. Mmebenge yak nnyin ikpinehede inyene ifiɔk nwɔrɔnda akpanikɔ emi. Enye eyekpuhɔre kpukpru kpɔ!
Nnyin iwɔrɔ ito nsio-nsio edu-uwem; imekeme nditɔ nsio-nsio ndaha inyene; eno idade ito obot, esinede idut nnyin, mbuwet ikpok-idem, udia imade, ifiok ukara-obio., ye ŋkpɔ eken adiangare akamba-akamba. Edi nnyin idi nditɔ Esie, kpukpru nnyin, iduhe eke esiode efep. Nnyin inyene ukem edisana emana ye ukem anana-utit ukeme otode ke mfɔn Jesus Christ.
C. S. Lewis esin oro ntem: “Edi ata ŋkpɔ owo ndiduŋ ke ererimbot mbon ekemede ndidi abasi-iren ye abasi-iban, nditi nte owo emi midihe ŋkpɔ ndomokiet afo ekpenemede nneme, usen kiet ekeme ndidi ŋkpɔ, emi, edieke afo okpokutde idahaemi, ɔkpɔdoɔ fi ndituak ibuot nnɔ. … Iduhe mbon edide ikpikpu owo. Akananam afo utiŋke ikɔ ye owo edide ubɔk-ubɔk. Idut, edu-uwem, utom-uso, ntat-enyin—mmo edi se edikpangade, ndien uwem mmɔ ndidomo ye eke nnyin etie nte uwem nsuŋ. Edi, mbon emi midikpaha ke nnyin ida ibre-mbre, inam utom, ido-ndɔ, isuŋi, inyuŋ ibiaŋa.”7
Ubon nnyin enyene ukeme ndiduŋ ke nsio-nsio idut ye edu-uwem; ndito nnyin enyuŋ enyene mfɔn-iso ndidɔ-ndɔ ke nsio-nsio usem. Ami mmɔfiɔk ke ikɔ Abasi Jesus Christ edi akwa andinam ŋkpɔ edi ukem-ukem. Nte nnyin inyimede enye ke akpaniko, “Spirit ke Idemesie ye spirit nnyin edi ntiense, ke nnyin idi nditɔ Abasi.”8 Enyene nyɔ akpanikɔ emi atat nnyin ayak, ndien kpukpru idiɔŋɔ ye ubahare emi akpafinade nnyin ye ebuana nnyin ye kiet eken “emen emen esin ke … Christ.”9 Ɔsɔp ndinwaŋa ette nnyin, ye mbon efen, “idihe aba isen ye oduduŋ, edi edi mbio-obio kiet ye ikɔt Abasi, enyuŋ edi mbon ufɔk Abasi.”10
Ibihike mma nkop branch president ke nkɔk nnyin kiet enyenede usem mbuaha-edu-uwem etingde abaŋa ifiɔk emi, nte Elder Gerrit W. Gong anamde, nte ebuana ediomi.11 Nsuto ediye ifiok! Nnyin idu ye otu owo emi enwanade ndinim Andinyaŋa ye ediomi mmɔ ke ufɔt uwem mmɔ enyuŋ enam gosel ke idaresit. Ke ntre, utu ke ikut kiet eken ke ukwaŋ ukut-iso ererimbot, gospel edibede enyen nnyin onyuŋ anam nnyin ikut kiet eken ke eti ukut-iso emi midikpuhɔkede, otode ndisana ediomi. Ke inamde ntre, nnyin iyetɔŋɔ ndiduɔk nda-mmana idiɔk-ido nnyin, ye ibak-esit inyenede ibaŋa mbon efen, emi ediwɔŋɔde inam mmɔ esuhɔre idiɔk-ido ye ibak-esit kabaŋa nnyin,12 ke utibe isaŋ ebe. Ke akpanikɔ, nnyin iditiene ikot edima prophet nnyin: “Ndima nditɔ eka iren ye iban, nte nnyin inamde ŋkpɔ ye kiet eken edi ata akpan ŋkpɔ! Nte nnyin itiŋde ikɔ inɔ, mme, ibaŋa mbon efen ke ufɔk, ke ufɔk Abasi, ke utom, ye ke ofum, edi ata akpan ŋkpɔ. Mfin, ami ndɔhɔ yak nnyin idu ye mbon efen ke nkoŋ-koŋ, edisana usuŋ.”13
Uwemeyo emi, ke spirit ikot oro, ami mmadian ewɔŋɔ mi, ye eke ndiye nditɔ Primary:
Edieke afo musangake nte ediwak owo enamde,
Ndusuk owo eyedaha ekpɔŋ fi,
Edi Ami ndinamke! Ami ndinamke!
Edieke afo mutiŋke ikɔ nte ediwak owo enamde,
Ndusuk owo eyetiŋ enyuŋ esak fi,
Edi Ami ndinamke! Ami ndinamke!
Ami nyesaŋa ye afo. Ami nyetiŋ iko ye afo.
Edi ntem ke ndiwut nte mmade fi.
Jesus akasaŋa ye kpukpru owo
Enye ɔkɔnɔ ima esie ɔsɔk kpukpru.
Ntre ke ami ndinam. Ami nyenam!14
Ami mmɔnɔ ikɔ ntiense ke Enye emi nnyin ikotde Ete ke Heaven, edi Ete nnyin ke akpanikɔ, ke Enye amma nnyin, ke Enye ɔdiɔŋɔ kpukpru nditɔ Esie mfɔn-mfɔn, ke Enye ekere eti-eti abaŋa kpukpru owo, ndien ke kpukpru nnyin itie nte Enye. Ami mmɔnɔ ikɔ ntiense nte ke usuŋ emi nnyin inamde ŋkpɔ ye kiet eken edi nnen-nnen ndaha ifiɔk inyenede ibaŋa, ye inemesit iwutde inɔ akakan nwa-idem, ye usio-isop Eyen Esie, Andinyaŋa nnyin, Jesus Christ. Mmebeŋe nte, nte Enye, yak nnyin ima mbon efen koro oro edi nnen-nnen ŋkpɔ ndinam, idihe koro mmɔ enamde nnen-nnen ŋkpɔ mme emende esin ke “rnnen-nnen” itie. Ke enying Jesus Chrst, amen.