Mme Ndaha Inemesit
Ndibɔp ke itiat idak isɔŋ Jesus Christ edi akpan ɔnɔ inemesit nnyin.
Nte ami nkade isaŋ mdubehe ke ubom ofim ke ediwak mme isua emi ekebede, ami nkut idem mi nte ntiede mkpere owo kiet emi eketiede ekpere eren emi otode Netherlands. Ami mma nyene udɔŋ ndiki se enye koro ami nkenamde utom ke Belgium mme Netherlands nte ekpri ɔkwɔrɔ ikɔ.
Nte nnyin imehede, enye ɔnɔ mi ekpri ŋwed mbubehe esie ye eti enyiŋ ewetde “profesor eke inemesit.” Ami mma nkɔm enye ke anana mbiet ubɔk utom esie ndien mbup enye se profesor inemesit akenam. Enye ɔdɔhɔ ke enye esikpep owo adaŋa nte esinyenede uwem inemesit ke nditɔŋɔ eti ebuana mme ekikere ini iso. Ami ma mbɔrɔ, “Oro ɔfɔn, edi nso idi edieke afo nko ekemede ndikpep adaŋa nte mme ebuana oro ekemede ndika iso mbɔhɔ udi nyuŋ mbɔrɔ mme mbume ukpɔŋ efen, kpɔ nte nso idi ntak uwem, didie ke nnyin ikeme ndikan mmem idem nnyin, ebiet ewe ke nnyin idikka ke nnyin ima-ikpaŋa?” Enye enyime ete ke oro ɔfɔn edieke nnyin inyeneke mme utɔ ibɔrɔ inɔ mme utɔ mbume oro, ndien ami mankop inem ke ndibuana mme enye nte nnyin ikinamde.
Mfin emi, ami nyema ndifiak nse mme akpan edinam ifaŋ kabaŋa ata inemesit emi etiede nte ediwak enana ke ererimbot ndutimede emi, emi ediwak ŋkpɔ edide se emade edi esesit enehede edi akpan ŋkpɔ.
Alma ama ekpep mbon eyo esie, “Edi sese, ami ndɔhɔ mbufo nte ke odu ediwak ŋkpɔ edide; ndien sese, odu ŋkpɔ kiet emi enehekede edi akpan ŋkpɔ akan mmɔ kpukpru—edi sese, ini iniɔŋke nte ke Andifak odu uwem enyuŋ edi ke ufɔt mme owo.”1
Ndinam anwaŋa emi edi akpan ɔnɔ nnyin mfin emi nte nnyin ikerede inyuŋ ibeŋede idem inɔ edidi Christ ɔyɔhɔ iba!
Ke ntre, akpa ŋkpɔ se-nkutde edi man ibɔp idot ke itiat idak isɔŋ Jesus Christ edi akpan ɔnɔ inemesit nnyin. Emi edi ata itiat idak isɔŋ, “itiat-idak-isɔŋ edide edieke ebɔpde ikemeke ndiduɔ.”2 Ndinam ntre ebeŋe nnyin idem abaŋa mme idomo uwem, nte ekpededi.
Ediwak isua emi ekebede, ami mma nka Nna-ekɔŋ eke ini ndaeyo ye eyen nnyin eren Justin. Nte edinam ekekade iso, enye ke inemesit etiŋ ete ke mme ufan esie ekeyom ndinyene eti ndaha ke utigha idaŋ. Ndinam oro oyom mme nditɔ iren ete mmɔ ebe ekpri ewewet udomo ndien etigha ke ebiet eyomde.
Esit mi ama ɔduɔ. Ke ini kiet, Justin ama okop mmem-idem otode ke ubiak esit, udɔŋɔ emi enye anwanade tɔtɔŋɔ ke uyen esie. Ami mma mkpaidem mme enye eyekeme ndiduri utigha man anam idaŋ aka ebiet eyomde.
Nte enye ye mme ufan esie ewɔrɔde eka ubet ukpep utigha idaŋ, ami mbɔŋ akam ke ndedibe man enye okubɔ esuene ke se edikutde. Ke mme ediwak awa nyeŋidem ebede, ami mma nkut enye asaŋade ke usuŋ ekpere mi ye inua imam. “Ete!” enye ofiori. “Ami mmebɔ mmana adikan! Ami mma nyene ke enyen; enye okodu ke ebiet eyomde ekperede okim, edi ami mma nyene enyen enaŋ. Enye ama ekeme ndiduri utigha nka edem ye kpukpru ukeme esie ndien ayak utigha efe, ikikemeke ndikpeme se eyomde. Adaŋa didie ke nkenem esit otode ke ndifiɔk item andikpep mbre utiha emi mikitiŋke, “inh inh, unyeneke ke ebiet eyomde!” Utu utu, kini nkutde ndaha Justin ye eti ukeme, enye ke ima ɔbɔrɔ, “Eti utom!”
Oro edi ntak emi nnyin edieke inamde ukeme nnyin ke nditiene Christ ye mme prophet Esie ke misehe mme ndaha nnyin. Edieke nnyin idide itiene Enye ke ndinim mme ediomi ye ndikabara mkpɔŋ ndiɔi ŋkpɔ, nnyin iyedara ndikop etop nto Andinyaŋa nnyin: “Sɔsɔŋɔ, mbufo nti ye enyene mbuɔtidem mbon utom.”3
Ami medi ntiense kabaŋa ndaha Andiyaŋa ke ererimbot ye ke edidemere ima Esie ye odudu edikɔk, ndisɔŋɔ, ye ndimenere nnyin kini nnyin idomode ke akpanikɔ nditiene enye. Ke nditiŋ, usuŋ efen iduhe nnyin ikemede ndisaŋa ye anya anya mme nko nditiene Jesus. Andinyaŋa ama akan mkpa, udɔŋɔ, mme idiɔk ŋkpɔ onyuŋ ɔnɔ usuŋ ɔnɔ ata mfɔn mman edieke iditienede Enye ke ofuri esit nnyin.4
Udian ŋkpɔ se-nkutde edi ke edi akpan ɔnɔ inemesit nnyin man nnyin iti ite ke nnyin idi nditↄ iren ye iban eke Ete eke Heaven emi amade nnyin. Ndifiɔk ye ke ndidori enyen ke akpanikɔ emi okpuhɔre kpukpru ŋkpɔ.
Ke mme ediwak isua emi ekebede, ke ndife nyɔŋ ufɔk otode utom ufɔk Abasi, Eyen-eka anwan Sabin ye ami ima ikut idem nnyin nte itiede ke nsakiso ke edem ata akamba owo kiet emi ekenyenede akamba, iso iyaresit emi ewetde ŋkpɔ ke edem ebɔ-ibuot esie ye mme ibat 439.
Kini nnyin ikisimde isɔŋ, ami ndɔhɔ, “Yak nkut fi, ete. Nte afo eyema edieke mbupde mbaŋa ufɔn ibat emi ewetde ke edem ibuot fo?” Ami nkidomoke ndibup mbaŋa iso iyaresit.
Enye ete, “Oro edi ami. Se ami ndide edi oro. Ami nyene ebiet oro: 219!”
439 ekenehede edi ibat ke ibuot esie, ndien ami mma ndu ke mkpaidem ke enye ikinene koro enye ekedide akpan ŋkpɔ ɔnɔ enye.
Mankere adaŋa mfuhɔ ekedide ke ndifiɔk ete oro ye ndaha uwem ɔkɔŋɔ ke ndiwet mme ibat emi enyenede ndinam mme nka ebiet-iduŋ. Ami nkere ke idem mi: ɔkpɔsɔŋ owo emi ini kiet ke ekedi ekpri eyen eren owo emi osuk oyomde ndikop ufɔn nyuŋ ndu. Okporo nte ke enye ɔfiɔk ata owo emi enye edide ye ata ebiet emi enye ojtode, koro ke nnyin kpukpru ema “edep nnyin ke ekɔm urua.”5
Odu enyene ibuot udim ikɔ ikwɔ otode ndise video Eyen Ɔbɔŋ Egypt emi ɔdɔhɔde, “Se uwem fo to ke enyen heaven.”6 Nte ifiɔk eke ata ubon nnyin mme nsinsi ukeme nnyin osuhɔkede oduk ukpɔŋ nnyin, nnyin iyekeme ndikut uwem nte enyene ufɔn, ndifuhɔre ŋkpɔ nduŋɔre ke ndikpep nnyuŋ nkɔri nto, kpa nte “nnyin ikutde ito ke ekpeme, ekimde”7 ke ekpri ini.
Ɔyɔhɔ ndaha ita kabŋa inemesit edi nditi ekɔm urua ukpɔŋ. Nnyin inam ukeme emi ke nditiene item Andinyanga “Ema kiet eken nte Ami mmade mbufo.”8
Enye nko ama ekpep, “Adaŋa nte mbufo ekenamde ŋkpɔ emi enɔ kiet ke otu nditɔ-ete mi, mbufo ekanam eno mi.”9
Ŋwed mme Ŋke enehede ekpep ete, “Ekutre ndinɔ nti esɔk mbon oro edotde, kini odude ke ubɔk fo ndinam oro.”10
Nnyin idituaha ŋkpɔfiɔk ke ndifɔn. Ke enyen Abasi, mfɔnido edi nsakiso edikpon. Kiet kotu ndifɔn ido edi ndifen nnɔ nnyuŋ ubiomoke ndo.
Ke mme ediwak isua ekebede ufɔk emana nnyin ekeka ndise ndise video ke mbono mbubreyo ufɔk emana. Kpukpru nnyin ikidu ke moto ibɔhɔke eyen eren nnyin kiet mme ŋwan esie, Valerie. Eyo okodo nkim-nkim, ndien nte eyen nnyin eberede usuŋ onyuŋ efehe aka ke moto, enye ke mifiɔke atigha ukot esie ke se enye ekekere ke ekedi obusi ke ŋkpɔ itie. Ke ndiɔkiso kabaŋa eyen eren nnyin ye ŋwan mi, emi okodude ke ata edem esie, enye ikidihe obusi nnyin edi ekedi ata ayat esit unam, emi ekenamde mmɔ efiɔ enye. Kpukpru nnyin ima inyɔŋ ufɔk, emi mmɔmbiba ekeyerede mmɔŋ enyuŋeyet idet mmɔmme mmɔŋ tomato, ata edikɔk ɔnɔ nditre utebe unam oro. Kini mmɔ ekekurede ndiyere mmɔŋ nnyuŋ mkpuhɔre ɔfɔŋ mmɔ, kpukpru nnyin ikikopke ufik oro aba, nko nnyin inyime ke nnyin ima idu yak ɔfɔn ke ndika nkese ndise oro.
Kini ikitiede ke edem ubed ndise, kiet kiet mme owo edude ye nnyin ewɔrɔ enyime ndikimen popcorn nsɔk nnyin. Kini mmɔ enyɔŋde edi, ke misehe, ikiduhe owo eke enyɔŋde eketie ke ebiet mmɔ.
Nnyin ima isak imam nte nnyin ikitide ŋkpɔ ntibe oro, edi didie edieke ofuri mme idiɔk ŋkpɔ nnyin enyene ufik? Didie ediieke nnyin ikpikemede ndikop utebe nsu, idiɔk itɔŋ, ufi mme nkohode idem? Ye mme mmemidem nnyin ayarade, nnyin ye idorenyin imikeme nditiŋ inyuŋ ikpeme idem ye mbon efen ndien, ukem oro, mmɔ ye nnyinnte nnyin inamde mme ufɔn emi eyomde ke uwem nnyin. Ami mmema ufik unwɔŋ ke ufɔk Abasi, koro enye owut ke owo ke odomo ndikpuhɔre. Mmɔ eyom ekɔm nnyin ye mmɔ.
President Russell M. Nelson ama ekpep ye eti ibuot, “Mmem mmem usuŋ kiet ndifiɔk ata anditiene Jesus Christ edi nte owo oro enyenede mbɔm abaŋa mbon efen.”11
Paul ekewet ɔnɔ mbon Ephesus, “Ndien mbufo efɔn uwem ye kiet eken, mmem mmem esit, ndifen nnɔ kiet eken, kpa nte Abasi ke ntak Christ ama adahado ɔnɔ.”12
Nte mme mbet Jesus Christ, edi nte ebupde mbufo ndinim Ete eke Heaven mme Andifak nnyin ndien idomoke ndikpuhɔre mmɔ. Jesus Christ anehede ɔfiɔk kpukpru mmem-idem nko eyeduŋɔre mmɔ ɔfɔn.
Ɔyɔhɔ ndaha inemesit mi inaŋ edi ndaha nsinsi. Uduak Ete nnyin ɔniɔŋ ekesim nsinsi; emem ndiwuk enyen mi ndien idahaemi ndien efre ke emi ebede.
Mma ŋkpep ukpep ŋkpɔ emi ye odudu ke ediwak isua emi ekebede nto eyen anwan nnyin isua 16, Jennifer. Kini enye okoyomde ndinam ukphɔhɔre esit esie mbiba, ebiet emi ekenade nte ekpuhɔre ofuri ofuri udɔŋɔ ition ke esit esie nnyuŋ nsin mkpri mme enyene uwem iba, emi nti mme mbiet Christ ufan esie ekenɔde. Ekedi ata akamba ŋkpɔ ndik, edi okoneyo mbemiso edisiak esie, esesit Jennifer ekpeke ɔkwɔrɔ ikɔ ɔnɔ mi ye kpukpru pound esie 90 (41 kilogram), ɔhɔhɔde ete, “Ku ufina idem, Ete mi! Mkpɔŋ ami nyedemede ye mme obufa esit, mme ami nyedemede ke eti ebiet. Kiet ekededi eyefɔn.” Oro edi mbuɔtidem; oro edi nsinsi ndaha! Ndikut uwem nto ke ndaha nsinsi owut ɔfɔn, ɔdɔŋ esit, ɔnɔ uko, ye idorenyin.
Kini ekurede usiak-idem, kini usen emi ekiyomde edisime ndisio ŋkpɔ unwek ofim esie nnyuŋ mkpuhɔre nnim-me ŋkpɔ unwek ofim emi ekenamde Jennifer enwek, nnyin ibet ke nyikidem ndikut mme mkpri esit esie iba eyefɔn. Kini enye enwekde akpa inwek esie, enye ke ndo ndo oro ɔtɔŋɔ nditua eyet. Ndikut mfina nnyin, enye ɔsɔsɔp ofiori, “Enehede enem ndinwek.
Tɔŋɔde ke usen oro, ami mma nkɔm Ete eke Heaven ke usenubɔk mme okoneyo ke ukeme mi ndinwek. Nnyin iyɔhɔ mme unana udomo mme edidiɔŋ emi nnyin ikemeke ndimen didie didie edieke nnyin mitimke ise. Ke nditiŋ kini umukereke ndinyene ŋkpɔ ndomo kiet ndien kpukpru ŋkpɔ ema, uwem akabare edi magic.
President Nelson ama ɔdɔhɔ ete: “Kpukpru ufa usenubɔk edi enɔ otode Abasi. Kpa nte ofim emi inwekde edi enɔ ima emi otode Abasi. Enye ekpeme nnyin kusen kusen onyuŋ anwam nnyin osio ke ini kiet ekesim eken. Ke ntre, akpa eti utom nnyin ke usenubɔk ana edi ndibɔŋ akam ekɔm.”13
Oro ada mi esim ɔyɔhɔ ition mme akpatre ŋkpɔ se-nkutde, edide ke afo udunemke esit ukan nte akpenemde.
Ɔbɔŋ ama etiŋ, “Ndien owo emi ekebɔde kpukpru ŋkpɔ ye esit ekɔm eyenam enye enyene ubɔŋ.”14 Ke akpan emi edi ke esit ekɔm ɔnɔ mme ediwak nti uduot.
Adaŋa nte mbufiɔk nnyin edikpuhɔde edieke nnyin ke kpukpru usenubɔk idemekede ye edidiɔŋ emi nnyin ikibeŋeke ke okoneyo. Nditre ndikɔm ke mme edidiɔŋ ekeme ndinam inyene unana uyuhɔ, emi ekemede ndibɔ nnyin idara ye inemesit emi ekɔm akamade. Mbon oro ekedude ke akwa ye ana-inwaŋ ufɔk emi edomo nnyin ndise nkan adaŋa, ke ntre itre ndikut adaŋa ofuri ofuri.
Ke ererimbot, nkpon nkan inemesit ye edidiɔŋ eke uwem isɔŋ eyekut enye ke se nnyin idide otode ke mfɔn Abasi nte nnyin inamde inyuŋ ikpemede ndisana ediomi ye Enye. Andinyaŋa nnyin eye otuk onyuŋ anam isana otode ke mfɔn eke uwa usio isop Esie ndien Enye ama etiŋ ɔnɔ mbon oro etienede Enye ke unyime amɔ, “Mmɔ eyedi okim ke usen emi kini ndidide ndinam mme ŋkpɔ uto mi.”15
Ami menwɔŋɔ nnɔ mbufo nte edieke idibɔpde ke itiat-idak-isɔŋ Jesus Christ; ikpono ata ndaha nnyin nte nditɔ iren ye iban Abasi; eti ekɔm urua ukpɔŋ mbufo; emum nsisnsi ndaha ekama; ndien ke ekɔm idara mme ediwak edidiɔŋ nnyin, akpan akpan ikot eke Christ ndidi nditiene Enye, nnyin imikeme ndinyene ata inemesit nnyin iyomde ke isaŋ usuŋ uwem isɔŋ. Uwem eyesuk enyene mfina esie, edi nnyin iyikeme ndinehede nyɔ kiet kiet ye eti ufɔn ye emem ke ntak eke nsinsi akpanikɔ emi ifiɔkde inyuŋ idu.
Ami me ntie ntiense mi mbaŋa edisana ye akpanikɔ odu-uwem Abasi, edima Ete nnyin, ye Edima Eyen Esie, Jesus Christ. Ami nko metie ntiense mbaŋa mme oduwem prophet, mme asiak uduak, ye mme andiyarare. Ewe edidiɔŋ ke edi nke ndibɔ item eke heaven otode mmɔ. Nte Andinyaŋa etiŋde anwaŋa ete, “Mme okpoto ke uyo mi mme uyo eke isuŋutom mi, ke edi ukem.”16 Ke edisana enying Jesus Christ, amen.