Бидний байнгын хамтрагч
Та бид Ариун Сүнсийг байнгын хамтрагчаа болгох боломжтой байдаг.
Хайрт ах, эгч нар аа, энэхүү чуулганаар бид адислагдаж, илчлэлтийн их хур бидний дээр бялхтал буулаа. Их Эзэн Есүс Христийн үйлчлэгчид үнэн, урам зориг, удирдамжийн үгсээ хэллээ. Үргэлжлүүлээд ч хэлэх болно.
Ариун Сүнсээр дамжуулан Их Эзэн бидэнтэй хувьчлан ярьдаг ба энэ чуулганаар хуваалцсан гэрчлэлүүд сэтгэлийг минь хөдөлгөлөө. Бид залбирч, Сүнсний өдөөлтүүдэд анхаарлаа хандуулахын хэрээр ирж буй хүнд хэцүү өдрүүдэд биднийг чиглүүлэх илүү агуу ойлголт хийгээд адислалуудыг хүлээн авдаг.
Ерөнхийлөгч Рассэлл М.Нэлсон “Ирэх өдрүүдэд Ариун Сүнсний заан чиглүүлж, удирдаж, тайтгаруулах, байнга хамт байх нөлөөгүйгээр энэ нь сүнслэгээр оршин тогтнох боломжгүй байх болно”1 хэмээн сэрэмжлүүлэхийг бид дахин сонслоо.
Уг бошиглогчийн сэрэмжлүүлэг намайг хүүхдүүд, ач зээ, ачинцар зээнцрүүддээ ирээдүйн хүнд өдрүүдэд тэрхүү чухал удирдамжийг хэрхэн дагах талаар юу заахаа бодоход хүргэсэн юм.
Тиймээс өнөөдрийн энэ захиас бол үр удамдаа ирээдүйн онцгой өдрүүдэд намайг дэргэд нь байхгүй үед тэдэнд туслах миний богино захидал юм. Би тэдэнд юу тусалж болохыг мэдсэн тэр зүйлийг тэд мэдээсэй гэж хүсэж байна.
Бидний амьдарч байгаа энэ цаг үед Ариун Сүнсний байнгын нөлөөлөлтэй байхын тулд бидэнд юу хэрэгтэй болохыг би илүү сайн ойлгосон юм. Би өнөөдөр Ариун Сүнсийг урьж, чадах чинээгээрээ өөрийн байнгын хамтрагч байлгах тухай хувийн туршлагаасаа ярих мэдрэмж төрлөө. Тэдэнд урам зоригийг өгч чадахын төлөө би залбирч байна.
Хиламаны хөвгүүд болох Нифай, Лихай болон тэдэнтэй хамт хөдөлмөрлөж байсан Их Эзэний бусад үйлчлэгчийн тухай бодож, залбирахыг тэднээс хүснэ. Тэд хүчтэй эсэргүүцэлтэй тулгарч байсан. Тэд ёс бус газарт үйлчилж, аймшигт худал хуурмагтай учирсан. Хиламаны номын дараах шүлгээс би эр зоригийг мэдэрдэг. Та ч мэдэрч болно.
“Мөн далан есдүгээр онд их маргаан байж эхлэв. Гэвч улиран тохиох дор Нифай, Лихай хоёр сургаалын үнэн заалтуудын талаар мэдсэн тэдний ах дүүсийн олон нь, өдөр бүр олон илчлэлт хүлээн авсан учир, тиймийн тул тэд хүмүүст номлож, үүний хэрээр тэд мөнхүү онд тэдний маргааныг төгсгөл болгов.”2
Энэ түүх надад урам өгсөн тул та нарт ч урам өгч болох юм. Хиламаны хөвгүүд олон удаа Ариун Сүнсээр заалгуулан, чиглүүлэгдэж байсан. Энэ түүх бид Ариун Сүнсээр заалгуулж, Түүнээс шат шатаар суралцаж, хэрэгтэй зүйлээ хүлээн авч, дараа нь бэлэн болсон үедээ бүр ч илүү ихийг авна гэдгийг надад баталдаг.
Мөн Нифайг Иерусалим руу буцан очиж Лебенээс ялтаснуудыг авахыг зарлигласан түүхээс би мөн адил урам зориг мэдэрдэг. Өөрийнхөө хийсэн сонголтод Марк ямар сэтгэгдэлтэй байсан бэ. Харин тэрээр “Би явж бас Их Эзэний зарлиг болсон тэр зүйлүүдийг биелүүлэх болно”3 гэж хэлсэн.
Их Эзэнээс гэдгийг нь мэдэж байсан ч өмнөх туршлагаас маань эсвэл өөрийн мэдэж байгаа чадавхаас хэт давсан үүрэгт ажлуудад ханцуй шамлан орох үед Нифайн уг үүрэг даалгаврыг Ариун Сүнсний оролцоотойгоор гүйцэлдүүлсэн түүх надад урам зориг өгч байсан.
Энэ туршлагын талаар Нифай: “Мөнхүү энэ нь шөнөөр тохиов; мөн би [ах нарыгаа] хэрмийн гадна өөрсдийгөө далдлан нуух болгов. Мөн тэднийг нуугдсаны дараа, би, Нифай, хотод сэм гэтэж ороод, Лебений гэрийг чиглэн явав” хэмээн хэлснийг та нар санаж байгаа байх.
Тэр цааш нь “Би хийвэл зохих зүйлүүдийг урьдаас мэдэхгүй байсны учир бибээр Сүнсэнд хөтлөгдөн байлаа”4 хэмээсэн.
Их Эзэний ажилд шөнийн турш, цаг хором бүрд Нифайг Ариун Сүнс чиглүүлж байсныг би мэдэж байсан учир энэ нь намайг урамшуулж байсан.
Бидэнд мөн та бүхэнд Ариун Сүнсний байнгын нөхөрлөл хэрэгтэй байх болно. Одоо бид энэ нөхөрлөлийг хүсдэг ч, үүнийг олж авах нь хэцүү гэдгийг өөрсдийн туршлагаас мэднэ. Бидний хүн нэг бүр өдөр бүр Сүнсийг гомдоох ямар нэгэн зүйл бодож, хэлж мөн үйлддэг.
Ийм зүйл тохиодог ба тийм үед бид Их Эзэний зэмлэлийг мэдэрч болох юм. Мөн бид ганцаараа гэж бодон уруу татагдаж магад. Бид наманчилж, долоо хоног бүр ариун ёслолоос хүртсэнээр “тэд Түүний Сүнсийг өөрсөдтэйгөө үргэлж хамт байлгаж болно”5 гэсэн баттай амлалтыг хүлээн авдгаа санах нь чухал юм.
Хэрэв та өнөөдөр Ариун Сүнсний нөлөөг мэдэрсэн бол үүнийг Цагаатгал таны амьдралд үйлчилж буйн нотолгоо гэж үзэж болно.
Ахлагч Жэффри Р.Холланд: “Бидэнд туйлын хүнд хэцүү цаг мөч тохиолдох үед Бурхан биднийг орхисон эсвэл Тэр бидний залбирлыг сонсдоггүй гэсэн айдастаа ялагдаж болохгүй. Тэр биднийг сонсдог. Тэр биднийг хардаг. Тэр биднийг хайрладаг”6 хэмээн хэлсэн.
Түүний батлан хэлсэн үг надад тусалж байсан. Би Бурханаас холдож байгаагаа мэдэрч, залбирлын минь хариулт ирэхгүй байгаа мэт санагдахад амьдралаа эргэн харж, наманчлах боломжийг эрж хай гэсэн ерөнхийлөгч Нэлсоны зөвлөгөөг дагаж сурсан. Тэрээр бидэнд “Өдөр тутмын наманчлал нь цэвэр ариун байдалд хүрэх зам бөгөөд цэвэр ариун байдал нь хүч чадлыг авчирдаг”7 хэмээн сануулсан.
Хэрэв та Ариун Сүнсийг мэдрэхгүй байвал таны амьдралд наманчилж, өршөөлийг хүлээн авах ямар нэгэн зүйл байгаа эсэхийг тунгаан бодож болох юм.8 Та цэвэршүүлэгдэж, Ариун Сүнсний байнгын нөхөрлөлийг хүлээн авахад тавигддаг шаардлагыг хангахын тулд юу хийвэл зохихоо итгэлтэйгээр залбирч асууж болно.
Хэрэв та Ариун Сүнсний нөхөрлөлийг хүлээн авахыг хүсвэл зөв учир шалтгаанаар үүнийг хүсэх ёстой. Таны зорилго Их Эзэний зорилго байх ёстой. Хэрэв таны сэдэл хэт аминчхан үзэл дээр суурилсан байвал Сүнсний өдөөлтийг хүлээн авч, мэдрэхэд амаргүй байх болно.
Таны мөн миний хувьд гол түлхүүр нь Аврагчийн хүсдэг зүйлийг хүсэх юм. Бидний сэдэл Христийн цэвэр хайраар хөтлөгдсөн байх ёстой. Бидний залбирал “Таны хүсэж буй бүхнийг би хүсэж байна. Таны хүсэл биелэх болтугай” гэх ёстой.
Би Аврагчийн золиослолыг болон намайг гэх хайрыг нь санахыг хичээдэг. Тэгээд Тэнгэрлэг Эцэгт залбиран талархахдаа Тэр залбирлыг минь сонсдог бөгөөд надад болон хайртай хүмүүст маань хамгийн сайныг өгөх болно гэсэн хайр, баталгааг мэдэрдэг. Энэ нь миний гэрчлэлийг хүчирхэгжүүлдэг.
Ариун Сүнсний гэрчилдэг бүх зүйлийн дундаас бидний хувьд хамгийн эрхэм нь Есүс бол Христ, амьд Бурханы Хүү гэх гэрчлэл юм. Аврагч “Эцэгээс гарах үнэний Сүнс болох Туслагчийг Би та нарт Эцэгээс илгээхэд тэр Сүнс Намайг гэрчилнэ9 хэмээн амласан.
Хэдэн жилийн өмнө, нэгэн эх над руу сандарсан байдалтай залгасан юм. Охин нь гэрээсээ хол нүүсэн бөгөөд холбоо бараг барихгүй байгаа нь ямар нэг муу зүйл болсон гэдгийг илтгэж байгааг надад хэлэв. Тэр надаас тусламж гуйсан юм.
Би охиных нь гэрийн багш хэн болохыг олж мэдсэн юм. Уг нэрийг сонсоод та энэ нь олон жилийн өмнө болсон гэдгийг мэдэх байх. Би түүн рүү залгалаа. Тэр залуу хүн байв. Залуу хүн хэр нь тэр хамтрагчтайгаа хоёулаа тэр шөнө охинд нь санаа зовон сэрснээр барахгүй амьдралд нь гуниг зовлонг авчрах сонголтуудыг хийх гэж байгааг нь мэдрүүлсэн сүнслэг өдөөлтийг хүлээн авснаа надтай хуваалцсан юм. Сүнснээс хүлээн авсан тэрхүү өдөөлтөө л даган тэд түүнтэй уулзахаар явжээ.
Эхлээд тэр охин өөрийн нөхцөл байдлын талаар тэдэнд хэлэхийг хүссэнгүй. Сүнслэг нөлөөлөл дор тэд түүнээс наманчилж, Их Эзэний түүнд зориулсан замыг сонгохыг ятгасан байна. Миний таамаглаж байгаагаар, удалгүй охин тэд зөвхөн Бурханы тусламжтайгаар өөрийнх нь амьдралын талаар мэдэх боломжтой гэдгийг Сүнсээр дамжуулан ухааран ойлгожээ. Ээж нь хайраар хөтлөгдөн Тэнгэрлэг Эцэгт болон Аврагчид зовлонгоо тоочжээ. Ариун Сүнс Их Эзэнд үйлчлэхэд бэлэн гэрийн багш нарыг илгээсэн байв. Тэд Сургаал ба Гэрээний дараах шүлэгт өгсөн зөвлөгөө, амлалтыг дагасан юм.
“Хэвлий дотор чинь тэрчлэн бүх хүмүүнд, мөн итгэлийн тогтмол байдалд энэрлээр дүүрэн байг, мөн бодол санааг чинь ариун журам зогсолтгүй чимэн гоёг, тийнхүү итгэлтэй байдал чинь Бурханы оршихуйд хүчтэй болох болно, мөн санваарын номлол тэнгэрээс буух шүүдэр лугаа адил чиний сүнсэн дээр намуухан буух болно.
Ариун Сүнс чиний байнгын хамтрагч мөн чиний очирт таяг, зөв шударга ёс хийгээд үнэний хувиршгүй очирт таяг байх болно, мөн эзэгнэл чинь үүрдийн эзэгнэл байх болно, мөн албадлагын арга хэрэгсэлгүйгээр энэ нь чам уруу үүрд мөн мөнхөд урсах болно.”10
Их Эзэн амлалтаа биелүүлдгийг, мөн Есүс Христийн Сүмийн итгэлтэй, гэрээгээ сахидаг гишүүд рүү Ариун Сүнсийг илгээдгийг би гэрчилж байна. Та нарын туршлага өвөрмөц байх бөгөөд Сүнс таны итгэл, өөртөө болон өөрийн хайрладаг, үйлчилдэг хүмүүсийнхээ төлөө илчлэлтийг хүлээн авах чадавхад тань таарч тохирох арга замаар хөтлөн чиглүүлэх болно. Би та нарын өөртөө итгэх итгэл өсөн нэмэгдээсэй хэмээн чин зүрхнээсээ залбирч байна.
Бурхан Эцэг амьд гэдгийг би гэрчилж байна. Тэр та нарт хайртай. Тэр та нарын залбирал бүрийг сонсдог. Есүс Христ биднийг заан чиглүүлж, тайтгаруулж, бидэнд үнэнийг гэрчлүүлэхээр Ариун Сүнсийг илгээхээр Эцэгт хандан залбирсан юм. Эцэг, Түүний хайрт Хүү хоёр ойн төгөлд Иосеф Смитэд үзэгдсэн. Бошиглогч Иосеф Смит Мормоны Номыг Бурханы хүч ба бэлгээр орчуулсан.
Тэнгэрлэг элч нар санваарын түлхүүрүүдийг сэргээсэн. Ерөнхийлөгч Рассэлл М.Нэлсон бол бүх дэлхийд өгөгдсөн Бурханы бошиглогч мөн.
Есүс Христийн гэрчийн хувьд би Түүнийг амьд, Сүмээ удирддаг гэдгийг гэрчилж байна. Ариун Сүнсийг байнгын хамтрагчаа болгож, Аврагчийг санаж, хайрлаж, наманчилж, зүрх сэтгэлдээ Түүний хайрыг агуулахыг хүсэн гуйх аваас тэдгээрийн үнэнийг баттай мэдэх боломж та бидэнд бий. Бид өнөөдөр мөн амьдралынхаа өдөр бүр энэ адислалыг хүртэж, Ариун Сүнсний нөхөрлөлтэй байх болтугай хэмээн би залбирч байна. Би та нарт хайртай. Есүс Христийн ариун нэрээр, амен.