Fuhkah Luhpan Engan Lowos
Ingena nga suli kowos in us “etuh-fuhkah” lowos, wi luhlahlfongi lowos, ac som nuh ke misin.
Tamuhlwel ac tahmtahel sacohk wiyuck, nuhnak luhk misenge uh oasr ke fahsrweni luhn Israel, ma Prestuhn Russell M. Nelson el pahngon “ma yohk srihpac se emet ahkfahsryeyuck facluh misenge. Wacngihn kuhtwena ma yohk oacna, wacngihn kuhtwena ma yohk srihpac oacna, wacngihn kuhtwena ma wolacna oacna.”1
Fahsrweni se inge pa mwe ahkkahlwemye sahflah se lah kais sie mwet yohk srihpac ye muhtuhn God.2 Fihsrwacsr oacna ngacn. Kuht oracni tuhlihk nuhtin God ke lwen sahflah inge tuh elos in eis “mwe insewowo yohk kahklah nuh fin sifaclos”3 ac olwelah ke mwe kahsruhp ne tok.4 Ukweyuck lah in oracni Israel kuht enenuh kuhtuh pac misineri—puhs liki elos suc kuhlwacnsap ingena.5 Misenge nga sramsram nuh suwos mwet mahtuh puhs ke Alu uh ma kuh in kuhlwacnsap. Leum El enenwekowos. Kuht enenwekowos nuh New York ac Chicago, Australia ac Africa, Thailand ac Mexico, ac yen nuhkwewa inmahsrlo.
Lwelah ngan us kom fohlohk nuh ke yac 2015. Nga tuhfahna in pahng nuh ke mempucr ke U luhn Mwet Sap Singucul Luo. Sie kunohkohn na wowo kuht oruh ekihn Mwet Sap pa in kunweyac misineri nuh ke acn elos e orekma kac. Nga wi oruh ke nga oasr ke Itngucul ah,6 tuh ingena, ekihn Mwet Sap, nga puhla toasriyacn kunohkohn se ingacn. Nga muhtwacwacack pruhe in fihliyac mukul ac muhtwacn fuhsr puhs, sie-nuh-sie, ke misin fin facluh. Na, nga foracng nuh ke siyacnyacn mahtuh. Ke list sac oasr mwet na singucul. Suhpuhs. Ke lut luhk, nga siyuck sin mwet kahsruh se luhk ke Missionary Department, “Mwet ekahsr kuht enenuh ke wik se inge in nwacklah nguhsr se inge?”
El topuk, “300.”
Pacl ahsor se ngacn oan wi yuc: siyacnyacn 10 in nwacklah nguhsr 300.
Prestuhn Russell M. Nelson el ahkkweye siyacnyacn “in sikuck muhtuhnte ac siyuck Pahpah Inkuhsrao fin pacl uh fal nuh selos in tuhkweni kuhlwacnsap ke misin.”7 Ke ma enenweyuck nuhkwewa, el fahk, “in oasr kena se pa yohk srihpac emet.”8
Oacna ke ma suhmuhslah fahk, fin oasr kena lowos in kuhlwacnsuhpuh God kowos pahngonyuck in orekma.9 Ma nuhkwewa ke orekma se ingacn ma ke masap ke kosracni. Kuht riti ke John, “El su yukwiya ac el su sifani fah tukeni engan.”10
Nga liye masap ke kosracni fohnlah ke sucu luhk sifacna.
Yac ekahsr somlah ah, nga muhtwacta yurin sucu ac pisrap el ngihsre nga in kaliyac toeni in sacramacn.11 Ke nga fani ah, muhtwacn se sunyuc wi tuhlihk itkohsr nahtuhl ac ahkuhtwelyac lah el pa Tahmtahel Rebecca Guzman.
El siyuck, “Elder Rasband, kom etacl Rulon ac Verda Rasband?”
Nga isracsrwelihk ac fahk, “Elos pa pahpah ninac kiyuck tuhmuhk uh.”
Kom kuh in liye lah e som nuh oyac ma se inge. Ke lwelah lal Rebecca, suc wi Toeni luhlahp se inge wi sucu lal, nga akacsruhi sramsram ke sucu lal.12
Pahpah tuhmuhk ac ninac kiyuck, Elder Rulon ac Sister Verda Rasband, elos kuhlwacnsap ekihn siyacnyacn mahtuh ke Fort Lauderdale Florida Mission.13 Elos forfor luti ac ke kolyuck elos tongtong ke sruhnguhl ke lohm sel Rebecca. El tuhlihk fuhsr se ac el luhngse lohng on lal Osmonds, suc, kawuck se luhk Donny—oasr pac inge misenge.14 El muhta lohng lohlngohk orek nuh selos ke tv ac lotwelah lah elos mempucr ke Alu luhn Jisus Kraist luhn Mwet Luhlahlfongi ke Lwen-sahflah. El puhla muh oasr ma se siena kaclos, ac nuhnkuh muh sahp alu lalos, Rebecca el sislah yac luo in suk etuh ke Alu uh ke laepracri se ke lutlut lal ah. Na, ke siyacnyacn kuhlwacng se tongtong ke sruhnguhl ke lohm sel ah ac fahk lah elos misineri luhn Mwet Luhlahlfongi ke Lwen-sahflah, el lut.
“Ninac kiyuck ah fahk nga in sap elos in som,” Rebecca el suhmuhslah tok, “tuhsruhk insiyuck fahk muh ‘Moh.’ Nga ngwetwacng liye muhtahlos ac puhla wo ac luhngse. Ma nga esam ingacn srackna oruh kahk sronin muhtuhk ac nuhnak loal nuh ke insiyuck.”15
Rebecca el solwaclos in utyak, ac pahpah ninac akacsruhi pweng se nuh sel, nuh sin tuhlihk muhtwacn srihsrihk luo wiyacl, ac, finne ninac kiacl ah, sruhnga.
Rebecca el ahkuhtweyac nuh sihk, “Kwewana pahpah tomom ac ninac kiom ah wona pwacye ke topuk oacna sie kihsen siyuck lasr ah. Nga kuh in srackna liye muhtahlos oacna in muh oasr kahlwem se raunwelah. Kuht kwacna muhta hugiyac ninac kiom ah ke eltahl e som uh ac el kwacna oruh in kahlwem kahsruh lal nuh sel ninac uh elan puhla mwesahs ac suhnakihnyuck. Kwacna oasr sahromrom se ke muhtuhn pahpah tomom ah ke elac luti kuht kacl Jisus Kraist. El kampare in sang pahpah tuhmuhk ah nuh ke lutlut lal ac el esaclwacng. Pahpah el mwet in orek mongo se ke club se ke acn sesr ah ac el muhtwacwacack orek mongo nacn pahpah tomom ninac kiom, el oruh pacna kuhiyacn pahpah tomom ah, pie key laim.”16
Ke Elder ac Sister Rasban siyuck sel Rebecca ac sucu lal ah in riti Puk luhn Mormon, Rebecca el ritwelah ke lwen na limekohsr. El luhngse sa pacptaislac, tuhsruhk kuhtuh mwet ke sucu lal ah sona ahkolah. Tukun mahlwem ahkosr, Rebecca el otwelah muh elac pacptaislac ac welah Alu pwacye se. El fahk lah, “Acn nuhkwewa ke nguhnihk etuh lah pwacye.”17 Ke Eprel 5, 1979, misineris elos pacptaiselah Rebecca matwac-yac-19, ninac kiacl, ac tahmtahel luo wiyacl. Pahpah tuhmuhk ah wi mwet loh ke pacptais ah.
Ke nga ohsun nuh sel Rebecca ac sucu lal ah ke alu ah, kuht eislah petsac se wi sucu se lal ah. Nga us ne lohm ah sang sin ninac kiyuck ah suc mahtuhoh ac el apihsyac nuh inisacl. Na el fahk nuh sihk, “Ronnie, sie pa inge lwen in engan ke moul luhk.”
Top luhn ninac kiyuck pihrakwack kihsensiyuck se nuh sin mwet mahtuh lasr, “Meac kowos oruh ke matwac se lowos ke moul se inge?” Oasr ohiyac puhkantwen misineri mahtuh kuh in oruh ma wacngihn mwet kuh in oruh. Kowos fihliyucki nuh ke ma wo se, yohk kahlwem lowos ke Alu uh, ac ahkolah in ahkkweye ac molwelah tuhlihk nuhtin God.
Kuhtuh suwos sahp e nuhnkuh, “Na meac kuht e tohllah tuhlihk nuhtin nahtuhsr? Kuht e tiac wi liye ma eklac ke sucu lasr, puhte, kawuck, ac finne ma orahkrahk nahtuhsr.” Fin nga siyuck sin ninac kiyuck ah lah efuh el pahpah som misin, nga etuh lah elac fahk muh, “Oasr tuhlihk nuhtin tuhlihk nuhtihk. Nga ke elos in etuh lah nga ac pahpah tomom kuhlwacnsap ke misin lasr, kuht ke akiyac srihkasrak nuh sin fihl nahtuhsr, ac ahkinsewowoyeyuck kuht, arulacna kuht ahkinsewowoyeyuck.”
Ke nga muhtwacta liye misin fin facluh, nga liye kuhlwacnsap na utuftuf ahkfahsryeyuck sin misineri mahtuh lasr. Kahlwem lah elos engan in “oruh kena luhn Leum” ac ahkfahsryelah “plwacn luhn Leum.”18
Nuh sin kuhtuh, ac kuht finsrak i in tausin suwos, kuhlwacnsap ke misineri yac luo ke sie sroasrihk fin facluh ma e pa kowos fal nuh kac.19 Nuh selos sahyac, kuhlwacnsap ke misin ke Alu uh in lohm suwos kuh pac. Ke srihpen muhnahs in mahno kuh ohiyac sahyac, oasr kuhtuh selos suc ma tiac kuh in kuhlwacnsap. Kuht kahlwem ke ohiyac inge, ac finsrak se luhk tuh kowos in kuh in sokwack inkacnek in kahsrelos suc ma kuhlwacnsap. Ukwe kahs in kahsruh luhn mwet pahluh ac pruhe in etuh lah mac Leum el kena kom in oruh.
Acn in orekma ke misin fin facluh elos ngihsre kahsruh lowos. Prestuhn Nelson el fahk ke misineri mahtuh lasr inge, “Elos fuhsr in nuhnak, lahlmwetmwet, ac kena in orekma.”20
Ke acn kowos pahng in orekma kac an, puhs sulaclah lowos; kowos kuh in kuhlwacnsap ke ohfuhs luhn misin kuh tempuhl, ahkkweye misineri fuhsr, tahpuhk pracns srihsrihk, orekma ke acn in tahk sucu kuh acn in ma mahtuh, luti institute, kahsruh wi sang kahsruh nuh sin mwet enenuh, orekma wi mwet mahtuh fuhsr, kahsruh ke acn in sukok orekma kuh ke imac luhn Alu uh. Kain in inkacnek in kuhlwacnsap, ma kom puhla kom wo kac, acn enenweyuck kom nuh kac, ac kom e ahkolah fuhkah in som oasr ke website se “Senior Missionary.”21 Kowos kuh pac in sramsram kac nuh sin pisrap ac pracn prestuhn.
Nga pahngon siyacnyacn puhs in kuhlwacnsap ac liye ke Kahlwem lal Kraist nwacklah insiaclos.22 Ke fohlohk lalos, elos ahkuhtweyac fototoeni lalos nuh sin Leum ac fototoeni nuh sin sie sin sie, puhla Nguhn luhn Leum kahklah nuh faclos, ac etuh lah oasr ma elos ekuhllah.23 Suc tiac luhngse ma ingacn?
Misin se kuh in pacl na wowo se emet ke moul luhn siyacnyacn se. Sifac wowo se nuh kac uh kuh in “Oasr Enenuh luhn Leum Luhk nuh Sihk.”24 Kom e tiac etuh acn kom oasr kac ingacn; tuhsruhktuh, ke kuh luhn Nguhn kom e puhla muh kom oasr lohm sum.
Pahpah ninac, ac singucul sin tausin siyacnyacn ma fohlohk ke misin lalos elos fahkwack engan elos sokwack ke orekma luhn misineri. Leum el fahk ke ma suhmuhslah nahtuhsr misenge inge lah kowos fin orekma ke lwen lowos nohfohn in luti auliyak nuh sin mwet sahyac uh ac use mwet se na nuh Yohrohl, ac fah oasr engan yohk lowos wi mwet sacn ke tohkohsrahi luhn Pahpah!25
Isaiah el use nuh sesr atacn pohloh kahs se ke kalmeyacn kuhlwacnsap ke “imac” ke misin. Ma suhmuhslah fahk nuh sesr lah “ima sac pa faclu.”26 Mwet pahluh mahtuh wowo se meet suhmuhslah, “Kowos ac fah som liki acn Babylon ke engan lulap; Ac fah kokola kowos liki siti uh in misla. Eol u ac inging uh fah wowoyak ke on, Ac sak uh fah sasa ke engan.”27 iFinohl, inging, imac, ac sahk uh kuh in oacna misin prestuhn, pisap, mwet kol ke tistrik, mempucrs, ac ac elos suc ma suk ke ma pwacye tushruhk “elos tiac etuh in sokwack oyac.”28 Elos e fahkwack lah siyacnyacn misineri inge ekuhlah yohk atacn acn sacn ke luhlahlfongi lalos kacn Mwet Lahngo ac Mwet in Molwelah, Jisus Kraist.
Ekihn Mwet Sap luhn Leum Jisus Kraist, nga ngihsre kowos in kuhlwacnsap ekihn misineri in oracni Israel ac fin kuh sifwilpac kuhlwacnsap. Kuht enenwekowos—kuht enenwekowos. Kuht tarilac suwos mwet mahtuh lasr an, ke moul kowos moulkihn ac srihkasrak lowos in lohm suwos, wards, ac stek. Ingena nga suli kowos siyacnyacn in us “etuh-fuhkah,” lowos ke luhlahlfongi lowos, ac som nuh ke misin. Nga pruhe tuh pacl se tok nga e ahkolah in kunweyac siyacnyacn mahtuh lasr e oasr ke foko suwos ahkolah tuhpan pahng lowos.
Nga oacyacpac olwelah lah ke kowos kuhlwacnsap uh kowos e puhla luhngse luhn Leum in moul lowos, kowos e Etacl, Elac etwekowos, ac e fuhkah luhpan engan lowos.29 Kihsackuhnlah lowos in kuhlwacnsuhpuh Jisus Kraist e moklweack ac ahkinsewowoye sucu lom, tuhlihk nuhtin nuhtum, ac nuhtin nuhtin nuhtum. “Mislac, ac lungse [e fah] yokyokelik”30 ke moul puhs ma e tuhkuh lalos. Nga olwelah. Ke inen Jisus Kraist, amen.