Nej Puas Xav Zoo Siab?
Cia li ua raws nraim li nej tej kev khi lus. Nej lub neej yuav yooj yim dua, zoo siab dua, thiab muaj kev xyiv fab dua.
Nej puas xav zoo siab? Dab tsi kom nej tsis zoo siab? Thawj Tswj Hwm Russell M. Nelson hais tias: “Yog nej xav nyuaj siab, cia li ua txhaum cov lus txib—thiab tsis txhob hloov siab lees txim. Yog nej xav muaj kev xyiv fab, cia li ua raws nraim li nej tej kev khi lus.”1 Yeej yooj yim kom zoo siab yom? Cia li khi lus thiab ua raws nraim li tej kev khi lus hauv nej lub neej. Cia peb saib xyuas tej yam uas pab tau nej ua raws nraim li nej tej kev khi lus thiab ua rau peb txais kev zoo siab.
1. Txoj Kev Ua Raws Li tej Kev Khi Lus Yog Dab Tsi?
Raws li Txwj Laug Dale G. Renlund hais, “Lo lus txoj kev ua raws li kev khi lus hais txog tej kev khi lus uas peb khi kom peb los cuag Yexus Khetos thiab nrog Nws sib raug zoo. Los ntawm txoj kev sib khi no, peb txais tau Nws lub hwj chim mus ib txhis li. Txoj kev no pib thaum peb ntseeg Yexus Khetos thiab hloov siab lees txim, tom qab ntawd ua kev cai raus dej thiab txais lub txiaj ntsim Vaj Ntsuj Plig Dawb Huv.”2 Peb rov qab khi lus li ntawd txhua zaus peb txais lub cim nco txog.
Pib ntawm txoj kev khi lus thaum ua kev cai raus dej, peb khi lus ntxiv nyob tas mus peb lub neej. Txwj Laug Renlund kuj hais tias: “Txoj kev ua raws li kev khi lus ua rau peb txais tau cov kab ke hauv lub tuam tsev, xws li lub tuam tsev txoj kab ke txais lub vaj txiaj ntsim. Lub vaj txiaj ntsim yog Vajtswv lub txiaj ntsim uas Nws pub tej kev khi lus rau peb kom peb nrog Nws sib raug zoo ntxiv.”3
2. Nej Puas Nyob ntawm txoj Kev Ua Raws Li Nej tej Kev Khi Lus?
Tej lub sij hawm thaum peb khi lus, peb tsis ua raws li tej kev khi lus ntawd. Thaum ua li no, ces yuav ua li cas kom rov qab mus taug txoj kev ua raws li nej tej kev khi lus? Cia kuv hais tej tus zaj lus piv txwv txog kev rov qab mus rau txoj kev ua raws li tej kev khi lus.
Ib lub hlis tas los, kuv tau txais ib zaj lus los ntawm ib tug tub txib uas nrog peb ua hauj lwm. Nws hais tias: “Nyuaj rau kuv rau ib ntus lawm. Qhov uas kuv raug kev txhawj xeeb thiab kev nyuaj siab txhua hnub ua rau kuv tu siab heev thiab nyuaj rau kuv heev. Kuv kho siab thiab tu siab kawg. Kuv tau thov peb Leej Txiv Saum Ntuj Ceeb Tsheej coj kuv kev kom muaj kev kaj siab lug thiab kev nplij siab thiaj tawm tsam tau qhov nyuaj no. … Thaum kuv tab tom thov Vajtswv, kuv txais tus ntsuj plig tej kev tshoov siab qhia kuv tias kuv yuav tsum them ib feem kaum tag nrho. … Kuv hnov tus Ntsuj Plig muaj zog heev thiab kuv xav them tam sim ntawd. Vim kuv xav ua li ntawd kuv txais kev tshoov siab qhia kuv tias ‘Yog koj them ib feem kaum ces txhua yam yuav zoo.’ Tseem nyuaj rau kuv nyob kaj siab lug, tiam sis kuv muaj ib zaj lus tim khawv txog peb tus Cawm Seej thiab los ntawm kuv txoj kev mloog lus kuv yuav hnov thiab nrhiav tau kev zoo siab uas kuv xav muaj hauv kuv lub siab lub ntsws. Kuv twb txiav txim siab rov qab los koom lub Koom Txoos thiab nrhiav kev kom tus Ntsuj Plig txoj kev pab kuv ua txhua yam.”
Tam sim no tus no twb ua zoo. Tej zaum nej yuav thov Leej Txiv Saum Ntuj Ceeb Tsheej kom txais kev kaj siab lug thiab, tiam sis tej lus teb uas nej txais yuav txawv ntawm qhov uas nej xav. Yog nej tsuas nrhiav kom paub txog tus Cawm Seej thiab thov Leej Txiv Saum Ntuj Ceeb Tsheej, Nws yuav teb nej kom tsim nyog rau nej.
Thawj Tswj Hwm Thomas S. Monson qhia hais tias:
“Qhov tseem ceeb uas peb kawm tau nyob hauv lub ntiaj teb no yog qhov uas thaum Vajtswv hais lus thiab Nws cov me nyuam mloog lus, lawv yeej ua qhov yog.”4
“Thaum peb ua raws li tej lus txib, peb lub neej yuav muaj kev zoo siab, kev vam meej, thiab yuav tsis muaj teeb meem ntau. Yuav yooj yim dua rau peb kov yeej peb tej teeb meem, thiab peb yuav tau txais Vajtswv cov koob hmoov uas Nws cog lus rau peb.”5
Thaum cov thawj coj hu kuv ua ib tug npisov, yog thaum kuv muaj lub sij hawm nyuaj heev hauv kuv lub neej. Kuv yog ib tug txiv tsev hluas uas muaj 30 tawm xyoo tiam sis kuv tsis tshua muaj nyiaj txiag vim kuv tsev meej muaj teeb meem. Kuv nrhiav tsis tau ib yam dab tsi kho qhov no, thiab kuv xav tias tej teeb meem no yuav tsis kawg. Kuv tsis muaj zog li ntawm sab nyiaj txiag thiab sab siab ntsws. Kuv pib xav tias kuv tsis muaj zog ntawm sab ntsuj plig thiab. Yog thaum lub sij hawm nyuaj rau kuv uas kuv kuv ceg txheem ntseeg tus thawj tswj hwm hu kuv. Kuv twb txais txoj kev hu ntawd, txawm yog ib yam nyuaj heev.
Kuv tus poj niam kuj xam phaj nrog ceg txheem ntseeg tus thawj tswj hwm, tiam sis kuv tus poj niam tsis muaj cuab kav hais tias nws kam kuv ua qhov no, thiab nws tsis tau hais tias nws tsis kam, nws tsuas los kua muag ntau xwb. Nws quaj tas ib lub lim tiam, thov Leej Txiv Saum Ntuj Ceeb Tsheej tias, “Vim li cas yog tam sim no?” thiab “Koj puas paub txhua tus neeg tiag?” Nws tsis txais kev teb, tiam sis lawv muab kuv txhawb nqa pom zoo ua tus npisov hnub Sunday tom qab ntawd. Nws tsis tau thov Leej Txiv Saum Ntuj Ceeb Tsheej txog tej lus nug no ntxiv tiam sis nws txhawb nqa kuv ua kuv txoj kev hu rau rau xyoo.
Hnub Sunday thaum lawv tso kuv tawm, kuv tus poj niam hnov ib lub suab thaum nws txais lub cim nco txog. Lub suab ntxhi lus rau nws tias, “Rau qhov nyuaj rau koj taug kev mus, kuv tau hu nws ua ib tug npisov kom tuav koj tes thiab taug txoj kev mus rau koj.” Thaum saib rau xyoo tas los ntawd, nws pom tias ntau yam teeb meem uas wb xav tias yuav tsis dim li los twb kho thaum kuv ua tus npisov.
Wb kawm tias thaum wb xav tias tsis yog lub sij hawm zoo rau wb txais ib txoj kev hu, tej zaum yog lub sij hawm uas wb yuav tsum muaj txoj kev hu ntawd tshaj lwm lub sij hawm. Thaum twg tus Tswv hu peb los ua hauj lwm, tsis hais yog ib txoj hauj lwm loj los yog txoj hauj lwm me los yog, Nws paub tias peb xav tau dab tsi. Nws muab zog txaus rau peb thiab muab cov koob hmoov ntau nplua mias rau peb thaum peb rau siab ntseeg ua hauj lwm.
Muaj ntau yam ntxiv uas ua rau peb ua yuam kev tsis taug raws nraim li txoj kev ua raws li peb tej kev khi lus. Txawm yog li cas los xij, yeej tsis lig dhau kom muab peb lub siab tig mus rau Leej Txiv Saum Ntuj Ceeb Tsheej thov Nws pab peb. Txwj Laug Paul V. Johnson qhia peb tias: “Thaum peb coj raws li Dab Ntxwg Nyoog, peb muab hwj chim rau nws. Thaum peb coj raws li Vajtswv, Nws muab hwj chim rau peb.”6
Vaj Ntxwv Npeyamis nyob hauv Phau Ntawv Maumoos ua tim khawv hais tias: “Kuv thov kom nej xav txog qhov uas cov uas ua raws li Vajtswv tej lus txib tau koob hmoov thiab zoo siab. Vim saib seb, lawv tau koob hmoov rau txhua txhia yam, tsis hais sab cev nqaij daim tawv los sis sab ntsuj plig; thiab yog lawv rau siab ntseeg mus kom txog thaum kawg Vajtswv yuav txais lawv mus rau hauv ceeb tsheej, xwv kom lawv thiaj yuav nrog Vajtswv nyob hauv qhov chaw uas muaj kev zoo siab tsis txawj kawg.”7
3. Qhov uas Nej Ua Raws Li tej Kev Khi Lus Nrog Vajtswv Yuav Ua Li Cas Kom Nej Zoo Siab?
Kuv tus poj niam hais tias wb txoj kev sib yuav ua rau wb sib khi ua ke, thiab vim li ntawd nws ua taus tej yam uas nws ua tsis taus ua ntej. Piv txwv hais tias, txij thaum nws yog ib tug ntxhais hluas, nyuaj rau nws tawm mus thaum tsaus ntuj, tiam sis tsis nyuaj tam sim no vim kuv nrog nws mus. Nws qis taub thiab ncav tsis cuag tej txee siab tsuas yog nws siv ib lub rooj zaum los yog tus ntaiv xwb, tiam sis kuv ncav cuag tej yam saum tej txee siab kom pab nws vim kuv siab dua nws. Kev kwv tus Cawm Seej tus quab yeej zoo li ntawd. Thaum peb khi peb tus kheej rau Nws, peb ua taus tej yam uas peb ua tsis taus peb tus kheej vim Nws ua taus tej yam uas peb ua tsis taus.
Txwj Laug David A. Bednar hais tias: “Qhov uas peb ua thiab ua raws li tej kev khi lus dawb huv ua rau peb kwv tus quab nrog tus Tswv Yexus Khetos. Zoo li tus Cawm Seej thov peb cia siab rau nws thiab rub peb lub nra nrog Nws, txawm yog peb tsis muaj zog npaum li Nws thiab peb lub zog yeej piv tsis tau rau Nws lub zog. Thaum peb tso siab thiab rub peb lub nra nrog Nws nyob hauv lub neej no, ces nws tus quab yooj yim kwv, thiab Nws lub nra yeej sib.”8
Thawj Tswj Hwm Russell M. Nelson kuj qhia hais tias:
“Qhov uas nej kwv tus Cawm Seej tus quab txhais tias nej txais tau Nws lub dag zog thiab lub hwj chim txhiv dim.”9
Lub nqi zog rau kev ua raws li Vajtswv tej kev khi lus yog lub hwj chim saum ntuj ceeb tsheej—lub hwj chim uas txhawb peb lub zog kom nyiaj dhau peb tej kev sim siab, kev ntxias, thiab kev mob lub siab. Lub hwj chim ua rau peb txoj kev ua neej yooj yim dua. Cov uas ua raws li Yexus Khetos tej kev cai siab dua txais tau Nws lub hwj chim siab dua.”10
“Kev ua raws li lawv tej kev khi lus ua rau lawv lub neej yooj yim dua! Txhua tus uas khi lus thaum lawv ua kev cai raus dej thiab nyob hauv lub tuam tsev—thiab ua raws li tej kev khi lus ntawd—txais tau Yexus Khetos lub hwj chim ntxiv.”11
Kuv cov kwv tij thiab cov muam, nej puas xav zoo siab? Cia li ua raws nraim li nej tej kev khi lus. Nej lub neej yuav yooj yim dua, zoo siab dua, thiab muaj kev xyiv fab dua. Peb tus Cawm Seej caw peb, “Los cuag kuv, nej sawv daws uas ris nra hnyav, thiab kuv yuav muab ib qhov chaw so rau nej.”12 Nws yog tus Khetos uas muaj txoj sia nyob. Nws ris peb tej nra thiab ua rau peb ua tau neej yooj yim dua. Los ntawm Yexus Khetos lub npe, amees.