Lub Hwj Chim Ua Kev Sib Khi
Lub hwj chim ua kev sib khi ua rau Vajtswv cov me nyuam txais tau txoj kev cawm seej thiab ua rau lawv tsev neeg txais txoj kev tsa nto.
Txij thaum Yaxayas lub caij nyoog1 los cov yaj saub tau qhia tias nyob hauv hnub nyoog kawg, tus Tswv cov neeg khi lus puag thaum ub, tsev neeg Ixayees, “tom qab ntau xyoo uas lawv tau tawg khiav ri niab yuav muab lawv sau los ua ke, sau ntawm tej koog pov txwv ntawm tej dej hiav txwv los, thiab sau ntawm plaub ceg kaum ntuj los”2“thaj av uas yog lawv qub txeeg qub teg.”3 Thawj Tswj Hwm Russell M. Nelson tau sib zog hais ntau zaus txog kev muab neeg sau los ua ke no hais tias, “yog qhov tseem ceeb tshaj plaws uas ua hauv lub ntiaj teb no.”4
Lub hom phiaj ntawm kev muab neeg sau los ua ke no yog dab tsi?
Los ntawm kev tshwm sim rau tus Yaj Saub Joseph Smith, tus Tswv tau qhia tias ib lub hom phiaj yog kev pov hwm cov neeg khi lus. Nws hais tias, “Txoj kev sib sau los ua ke rau hauv thaj av Xi-oos, thiab rau hauv nws tej ceg txheem ntseeg, yuav tiv thaiv, thiab ua ib qho chaw nkaum ntawm kob cua daj cua dub, thiab ntawm txoj kev npau taws thaum yuav muab nchuav tawm los tsis tseg hlo li rau hauv lub ntiaj teb tag nrho.”5 “Txoj kev npau taws” hauv nqe no los peb to taub tias yog tej xwm txheej uas yuav los thaum tib neeg tsis ua raws li Vajtswv tej kev cai thiab cov lus txib.
Qhov tseem ceeb tshaj, lub hom phiaj ntawm kev muab neeg sau los ua ke yog kom ua rau tib neeg txais tau cov koob hmoov ntawm kev cawm seej thiab kev tsa nto, tag nrho cov uas kam txais tau. Los ntawm qhov no thiaj muaj raws li tej kev khi lus uas cog lus rau Anplaham. Tus Tswv tau qhia Anplaham tias dhau los ntawm nws cov tub ki thiab lub pov thawj hwj “tag nrho tej tsev neeg hauv ntiaj teb yuav tau koob hmoov, twb yog tej koob hmoov ntawm txoj Moo Zoo, uas yog tej koob hmoov ntawm txoj kev cawm seej, uas yog txoj sia nyob mus ib txhis.”6 Thawj Tswj Hwm Nelson hais li no tias: “Thaum peb lees yuav txoj moo zoo thiab ua kev cai raus dej, peb ris Yexus Khetos lub npe dawb ceev. Kev cai raus dej yog lub qhov rooj uas cia peb nkag hauv ib txoj kev rau peb txais tag nrho cov lus cog tseg uas tus Tswv cog lus rau Anplaham, Ixaj, Yakhauj, thiab lawv cov xeeb leej xeeb ntxwv puag thaum ub.”7
Nyob rau xyoo 1836, Mauxes tau tshwm sim rau tus Yaj Saub Joseph Smith pom nyob hauv lub Tuam Tsev Kirtland thiab “muab cov yawm sij rau txoj kev muab Ixayees sau los ua ke los ntawm plaub ceg qaum ntuj.”8 Tib lub sij hawm ntawd, Eli-as txawm tshwm sim los, thiab “tau muab lub caij nyoog ntawm Anplaham txoj moo zoo rau wb, hais tias los ntawm wb thiab wb cov noob txhua tiam neeg tom qab wb yuav tau koob hmoov.”9 Nrog txoj cai no, peb tshaj tawm Yexus Khetos txoj moo zoo—txoj moo zoo txog kev txhiv dim uas Nws muab rau peb—rau txhua tus neeg thoob plaws lub ntiaj teb thiab muab cov uas txaus siab khi lus sau los ua ke. Lawv hloov los ua “Anplaham cov tub ki, thiab ua lub koom txoos thiab lub nceeg vaj, thiab ua cov neeg uas Vajtswv tau xaiv tseg lawm.”10
Thaum ntawd nyob hauv lub Tuam Tsev Kirtland muaj ib tug tim tswv thib peb uas tshwm sim rau Joseph Smith thiab Oliver Cowdery pom. Kuv hais txog tus yaj saub Eliyas, thiab kuv xav hais txog txoj cai thiab cov yawm sij uas nws muab txum tim rov qab los.11 Lub hwj chim kom ua tag nrho cov kab ke pov thawj hwj raws li txoj cai thiab muab khi hauv lub ntiaj teb thiab nyob saum ntuj—lub hwj chim ua kev sib khi—yeej tseem ceeb kom npaj ib cov neeg khi lus kom sib sau ua ke nyob ob sab ntawm daim ntaub thaiv.
Ntau xyoo ua ntej, Maulaunais twb qhia meej rau Joseph Smith tias Eliyas yuav los muab txoj cai pov thawj hwj tseem ceeb: “Kuv yuav muab lub Pov Thawj Hwj tshwm sim qhia rau nej pom, dhau los ntawm tus yaj saub Eliyas txhais tes.”12 Joseph Smith piav hais tias: “Ua cas thiaj txib Eliyas? Rau qhov nws yog tus uas tuav cov yawm sij uas muaj txoj cai saib xyuas txhua kab ke hauv lub Pov Thawj Hwj; thiab [yog tsis] muab txoj cai no, ces yuav ua tsis tau tej kab ke no hauv txhua yam kev ncaj ncees”13—los yog hais tias, cov kab ke yuav tsis muaj nqis nyob no thiab nyob mus ib txhis li.14
Nyob hauv ib nqe vaj lug kub hauv phau Lus Qhuab Qhia thiab Kev Khi Lus, tus Yaj Saub hais tias: “Tej zaum ib txhia xav tias qhov peb hais txog no yog cov lus qhuab qhia tawv heev—ib lub hwj chim uas muab sau cia los yog muab khi ua ke nyob hauv ntiaj teb thiab khi ua ke nyob saum ntuj ceeb tsheej. Txawm li ntawd los, nyob rau txhua lub caij nyoog tso txoj cai, thaum twg tus Tswv tau muab lub pov thawj hwj los ntawm kev tshwm sim tseeb los rau ib tug txiv neej los yog ib pab txiv neej twg nyob hauv ib lub caij nyoog, ces yeej ib txwm muab lub hwj chim no. Yog li ntawd, txhua yam uas cov txiv neej ntawd tau ua los ntawm txoj cai, los ntawm tus Tswv lub npe, thiab tau ua raws li txoj cai thiab raws nraim li kev cai, thiab tau ceev ib zaj ceev xwm txheej zoo thiab meej pem txog tej ntawd, ces yam ntawv tau hloov los ua ib txoj kev cai nyob hauv ntiaj teb thiab nyob saum ntuj ceeb tsheej, thiab muab tshem tsis tau, raws li tus tswv Yehauvas tej lus tshaj tawm.”15
Peb pheej xav tias peb tsuas siv txoj cai ua kev sib khi thaum ua cov kab ke hauv lub tuam tsev xwb, tiam sis yuav tsum muaj txoj cai no kom cov kab ke muaj tseeb tom qab peb tuag.16 Piv txwv hais tias, lub hwj chim ua kev sib khi yeej yog kev pom zoo rau koj txoj kev cai raus dej thiaj li yuav pom tias twb raug cai nyob no thiab nyob saum ntuj ceeb tsheej. Tag nrho cov kab ke pov thawj hwj yog ua los ntawm tus Thawj Tswj Hwm ntawm lub Koom Txoos cov yawm sij, thiab ib yam li Thawj Tswj Hwm Joseph Fielding Smith piav tias, “Nws [lub Koom Txoos tus Thawj Tswj Hwm[ tau muab txoj cai rau peb, nws tau muab lub hwj chim ua kev sib khi rau peb lub pov thawj hwj, vim nws tuav cov yawm sij ntawd.”17
Muaj lwm lub hom phiaj ntawm kev muab Ixayees sau los ua ke uas muaj ib lub ntsiab tshwj xeeb thaum peb hais txog kev muab neeg khi hauv lub ntiaj teb thiab nyob saum ntuj ceeb tsheej—uas yog kev ua thiab kev khiav cov tuam tsev. Tus Yaj Saub Joseph Smith piav hais tias: “Lub ntsiab rau txoj kev sib sau ua ke yog dab tsi … txoj kev muab Vajtswv haiv neeg sau los ua ke hauv ib tiam neeg twg hauv ntiaj teb no? … Lub ntsiab twb yog kom ua ib lub tsev rau tus Tswv uas nyob hauv Nws yuav qhia tau Nws haiv neeg txog tej kab ke ntawm Nws lub tsev thiab tej yeeb koob ntawm Nws lub nceeg vaj, thiab yuav qhia haiv neeg ntawd txog txoj kev cawm seej; vim muaj tej yam kab ke thiab tej ntsiab cai uas, thaum yuav qhia tawm thiab ua, yuav tsum ua hauv ib qho chaw los sis ib lub tsev uas tau ua kom thiaj ua tau raws li lub ntsiab ntawd nkaus xwb.”18
Qhov uas lub hwj chim ua kev sib khi ua rau peb muaj txoj cai ua cov kab ke pov thawj hwj, los suav cov kab ke uas cov sawv cev ua nyob hauv qhov chaw uas tus Tswv tau teem tseg—Nws lub tuam tsev. Nyob haud peb pom tau qhov dawb huv thiab lub yeeb koob ntawm lub hwj chim ua kev sib khi—ua rau Vajtswv cov me nyuam txais tau txoj kev cawm seej thiab txoj kev tsa nto txa txawm lawv nyob thaum twg thiab nyob qhov twg hauv lub ntiaj teb no los xij. Tsis muaj lwm txoj kev teev ntuj los yog laj lim tswv yim los yog txoj cai uas ua kom neeg sib koom ua ke coob npaum li no. Lub hwj chim ua kev sib khi yeej yog qhov uas qhia tias Vajtswv muaj kev txim lij thiab kev hlub tshua npaum li cas.
Vim muaj lub hwj chim ua kev sib khi, ua rau peb muaj siab xav txog cov uas tau tas sim neej. Kev muab neeg sau los ua ke hauv hnub nyoog kawg kom khi lus yeej hla daim ntaub thaiv. Nyob hauv Vajtswv tus txheej txheem zoo tag nrho, cov ciaj yuav tsis muaj txoj sia nyob mus ib txhis puv npo yog tsis muaj tej kev txuas uas kav ntev rau peb cov poj koob yawm txwv. Ib yam li ntawd, cov uas tsis tau ua kev cai sib khi, tsis hais cov uas tseem yuav hla daim ntaub thaiv tom qab lawv tuag los yog cov uas twb nyob sab tid lawm, cov no yuav nce tsis taus ntxiv mus txog thaum peb, uas yog lawv cov xeeb ntxwv, sawv lawv cev ua kab ke kom muab lawv khi rau peb, thiab muab peb khi rau lawv raws li Vajtswv tus txheej txheem.19 Kev cog lus tias cov neeg yuav pab cov uas nyob sab tid ntawm daim ntaub yog ib txoj kev khi lus, ib feem ntawm txoj kev khi lus tshiab thiab kav ib txhis. Raws li Joseph Smith hais, peb xav “muab peb cov neeg tuag khi tseg [rau peb kom] yuav sawv rov qab los hauv thawj txoj kev sawv rov qab los.”20
Qhov uas siab thiab dawb huv tshaj ntawm lub hwj chim ua kev sib khi yog kev sib yuav ntawm ib tug txiv neej thiab ib tug poj niam thiab kev muab noob neej sib txuas ua ke nyob hauv txhua tiam neeg. Vim txoj cai coj cov kab ke no dawb ceev heev, lub Koom Txoos tus Thawj Tswj Hwm yog tus uas saib xyuas kev muab rau lwm tus. Muaj ib zaug Thawj Tswj Hwm Gordon B. Hinckley hais tias, “Kuv twb hais ntau zaus yog tias tsis muaj dab tsi uas tau los ntawm kev tu siab nyuaj siab thiab kev mob kev nkeeg thaum muab txoj moo zoo txum tim rov qab los, tsuas muaj lub hwj chim pov thawj hwj dawb huv kom muab tsev neeg khi ua ke tas mus li xwb, ces yeej tsim nyog uas peb tau them tus nqi ntawd.”21
Yog tsis muaj tej kev sib khi uas tsim tej tsev neeg mus ib txhis li thiab muab tej tiam neeg txuas ua ke thiab tom qab ntawd, peb yuav tsis muaj cag tsis muaj ceg nyob mus ib txhis li—los yog hais tias, tsis muaj poj koob yawm txwv tsis muaj xeeb leej xeeb ntxwv. Yog pawg neeg no uas tsis muaj qhov txuas lawv rau lwm tus, los yog tej neeg uas muaj kev sib txuas tsis raws li kev sib yuav thiab tsev neeg uas Vajtswv tau pom zoo,22 uas yuav ua kom Vajtswv lub hom phiaj ntawm kev tsim lub ntiaj teb tsis muaj nqis dab tsi. Yog tias tib neeg coob ua li ntawd, ces yuav ua rau neeg ntiaj teb raug foom tsis zoo los yog “raug puas tsuaj” thaum tus Tswv rov qab los.23
Peb pom vim li cas “txoj kev ua txij ua nkawm ntawm ib tug txiv neej thiab ib tug poj niam yog Vajtswv tsa los thiab hais tias tsev neeg yog lub ntsiab ntawm Leej Tsim txoj hau kev rau Nws cov me nyuam txoj hmoov nyob mus ib txhis li.”24 Tiam sis peb paub tias nyob hauv lub neej uas tsis zoo tag nrho no, ib txhia tsis tau sib yuav thiab ib txhia ua tsis taus hauv lub neej no. Tiam sis peb cia siab rau Yexus Khetos. Thaum peb tos ntsoov tus Tswv, Thawj Tswj Hwm M. Russell Ballard qhia peb tias “cov vaj lug kub thiab cov yaj saub hauv hnub nyoog kawg no qhia tias txhua tus uas rau siab ntseeg ua raws li txoj moo zoo tej kev khi lus yuav muaj cib fim txais kev tsa nto.”25
Ib txhia muaj tej tsev neeg uas tsis zoo siab thiab tsis tshua zoo ua rau lawv tsis xav nyob nrog lawv tsev neeg mus ib txhis li. Txwj Laug David A. Bednar tau hais li no tias: “Rau nej cov uas muaj kev sib nrauj hauv nej tsev neeg los yog muaj neeg uas ua txhaum kom tsis tso siab rau nws, thov nco ntsoov [tias Vajtswv tus txheej txhem rau tsev neeg] rov qab pib ntawm nej tus kheej! Tej zaum ib qho txuas ntawm txoj saw hlau ntawm nej tiam neeg los twb dam lawm, tiam sis tej qhov txuas ncaj ncees thiab txoj saw hlau uas tseem muaj los yeej tseem ceeb mus ib txhis li. Nej yuav ntxiv dag zog rau nej txoj saw hlau thiab tej zaum yuav pab kom rov muaj tej qhov txuas. Txoj hauj lwm ntawd los yuav ua tau ib qho mus rau ib qho.”26
Thaum ua kab ke pam tuag rau Muam Pat Holland, Txwj Laug Jeffrey R. Holland tus poj niam, thaum lub Xya Hli ntuj, Thawj Tswj Hwm Russell M. Nelson qhia tias: “Yuav muaj ib lub sij hawm thaum Patricia thiab Jeffrey yuav rov qab koom ua ke. Tom qab ntawd nkawd cov me nyuam yuav nrog nkawd koom ua ke thiab cov xeeb ntxwv uas ua raws li lawv tej kev khi lus kom muaj kev xyiv fab puv npo uas Vajtswv tau npaj tseg rau Nws cov me nyuam uas rau siab ntseeg. Li ntawd ces, peb to taub tias hnub tseem ceeb tshaj plaws nyob hauv Patricia lub neej tsis yog nws hnub yug los yog hnub tuag. Hnub tseem ceeb kawg nkaus yog lub Rau Hli Ntuj hnub tim 7, 1963, thaum nws thiab Jeff ua kev cai sib khi nyob hauv lub Tuam Tsev St. George. … Vim li cas qhov no tseem ceeb ua luaj? Vim twb tsim lub ntiaj teb kom muaj tej tsev neeg thiab muab lawv sib khi ua ke. Kev cawm seej yog ib yam uas nyob ntawm ib tug neeg, kev tsa nto yog ib yam uas nyob ntawm ib tsev neeg. Tsis muaj leej twg uas yuav txais kev tsa nto nws ib leeg xwb.”
Tsis ntev tas los, kuv tus poj niam thiab kuv tau koom ib tug phooj ywg hauv ib chav ua kev cai sib khi hauv lub Tuam Tsev Bountiful Utah. Kuv tau ntsib tus phooj ywg no thaum nws yog ib tug me ntxhais nyob hauv Córdoba, Argentina. Kuv tus khub thiab kuv wb ua tub txib thiab wb khob tej qhov rooj nyob hauv ib lub zej zog uas tsis deb ntawm qhov chaw tshaj tawm txoj moo zoo hoob kas, thiab tus me nyuam no tau qhib qhov rooj thaum wb khob. Nws thiab nws niam thiab cov nus thiab viv ncaus tau koom lub Koom Txoos, thiab lawv yog cov mej zeej rau siab ntseeg. Tam sim no tus me ntxhais no yog ib tug poj niam zoo nkauj, thiab hnub ntawd peb nyob hauv lub tuam tsev kom muab nws niam nws txiv uas tau tas sim neej lawm sib khi ua ke ces muab nws khi rau nkawd.
Ib nkawm niam txiv uas yog ob tug phooj ywg zoo tau sawv cev rau nws niam nws txiv rau ntawm thaj av. Yog ib lub sij hawm uas ua rau peb zoo siab kawg nkaus thaum kuv muab peb tus phooj ywg Argentine khi rau nws niam nws txiv. Tsuas muaj rau tus neeg nyob hauv lub tuam tsev thaum tav su ntsiag to ntawd, tiam sis yog ib yam tseem ceeb tshaj plaws uas ua tau hauv lub ntiaj teb. Kuv zoo siab kawg uas kuv txoj hauj lwm thiab kev ua phooj ywg twb tau pib thaum kuv yog ib tug tub txib hluas uas khob qhov rooj mus txog thaum kuv ua tau txoj kab ke sib khi uas muab nws txuas rau nws niam nws txiv thiab tej tiam neeg dhau los.
Nyov yog ib yam uas peb ua tsis tu tsis tseg nyob thoob plaws lub ntiaj teb nyob hauv lub tuam tsev. Nov yog qhov kaw ntawm kev muab cov neeg khi lus sau los ua ke. Yog lub cib fim siab tshaj plaws ntawm cov mej zeej hauv Yexus Khetos lub Koom Txoos. Kuv cog lus rau nej tias thaum nej rau siab nrhiav lub cib fim ntawd, hauv lub neej no los yog lub neej nyob mus ib txhis, ces nej yeej yuav tau.
Kuv ua tim khawv tias lub hwj chim thiab txoj cai ua kev sib khi uas Joseph Smith tau muab txum tim rov qab los muaj tseeb, thiab tej yam uas muab khi hauv lub ntiaj teb tseem yuav khi saum ntuj ceeb tsheej. Kuv ua tim khawv tias Thawj Tswj Hwm Russell M. Nelson, uas yog tus Thawj Tswj Hwm ntawm lub Koom Txoos, yog tib tug txiv neej hauv lub ntiaj teb no uas coj kev siv lub hwj chim zoo tshaj plaws no. Kuv ua tim khawv tias Yexus Khetos txoj Kev Theej Txhoj tau ua kom tib neeg tsis txawj tuag thiab qhib kev rau peb nrog peb tsev neeg txais kev tsa nto. Los ntawm Yexus Khetos lub npe, amees.