“ສະໜິດຢູ່ໃນເຮົາ, ແລະ ເຮົາຈະແນບສະໜິດຢູ່ໃນເຈົ້າ; ສະນັ້ນຈົ່ງເດີນໄປກັບເຮົາ”
ຄຳສັນຍາຂອງພຣະຜູ້ຊ່ວຍໃຫ້ລອດທີ່ຈະແນບສະໜິດຢູ່ໃນເຮົານັ້ນເປັນຄວາມຈິງ ແລະ ມີໃຫ້ສຳລັບສະມາຊິກທຸກຄົນ ຂອງສາດສະໜາຈັກທີ່ຖືກຟື້ນຟູຂອງພຣະອົງ ທີ່ຮັກສາພັນທະສັນຍາ.
ສາດສະດາເອນົກໃນສະໄໝບູຮານ, ທີ່ບັນຍາຍໄວ້ໃນພຣະຄຳພີເດີມ, ຄຳສອນ ແລະ ພັນທະສັນຍາ, ແລະ ໄຂ່ມຸກອັນລ້ຳຄ່າ,1 ເປັນເຄື່ອງມືສຳຄັນໃນການສ້າງຕັ້ງເມືອງຊີໂອນ.
ເລື່ອງລາວກ່ຽວກັບການເອີ້ນເອນົກໃຫ້ຮັບໃຊ້ບອກວ່າ “ລາວໄດ້ຍິນສຸລະສຽງຈາກສະຫວັນ, ກ່າວວ່າ: ເອນົກ, ບຸດຂອງເຮົາ, ຈົ່ງທຳນາຍແກ່ຜູ້ຄົນພວກນີ້, ແລະ ກ່າວກັບພວກເຂົາວ່າ—ຈົ່ງກັບໃຈ, … ເພາະວ່າໃຈຂອງພວກເຂົາແຂງກະດ້າງ, ແລະ ຫູຂອງພວກເຂົາດັບຕໍ່ການໄດ້ຍິນ, ແລະ ຕາຂອງພວກເຂົາຫລຽວເຫັນໄດ້ບໍ່ໄກ.”2
“ແລະ ເມື່ອເອນົກໄດ້ຍິນຖ້ອຍຄຳເຫລົ່ານີ້ແລ້ວ, ລາວໄດ້ກົ້ມຂາບລົງຢູ່ກັບພື້ນດິນ … ແລະ ໄດ້ທູນຕໍ່ພຣະຜູ້ເປັນເຈົ້າ, ໂດຍກ່າວວ່າ: ເປັນດ້ວຍເຫດໃດຂ້າພຣະອົງຈຶ່ງໄດ້ຮັບຄວາມໂປດປານໃນສາຍພຣະເນດຂອງພຣະອົງ, ແລະ ຂ້າພຣະອົງເປັນພຽງຄົນໜຸ່ມ, ແລະ ທຸກຄົນກຽດຊັງຂ້າພຣະອົງ; ເພາະວ່າຂ້າພຣະອົງ ເວົ້າຜ່ຳ; ດັ່ງນັ້ນເປັນໄດ້ຈັ່ງໃດທີ່ຂ້າພຣະອົງໄດ້ເປັນຜູ້ຮັບໃຊ້ຂອງພຣະອົງ?”3
ໃຫ້ສັງເກດເບິ່ງວ່າ ໃນເວລາທີ່ເອນົກໄດ້ຮັບການເອີ້ນໃຫ້ຮັບໃຊ້, ເພິ່ນຮູ້ຈັກເປັນຢ່າງດີກ່ຽວກັບຄວາມບໍ່ພຽບພ້ອມ ແລະ ຄວາມຈຳກັດຂອງເພິ່ນ. ແລະ ຂ້າພະເຈົ້າສົງໄສວ່າ ເຮົາທຸກຄົນ ໃນເວລາໃດເວລາໜຶ່ງ ໃນການຮັບໃຊ້ໃນສາດສະໜາຈັກ ກໍຮູ້ສຶກຄືກັນກັບເອນົກ. ແຕ່ຂ້າພະເຈົ້າເຊື່ອວ່າຄຳຕອບຂອງພຣະຜູ້ເປັນເຈົ້າຕໍ່ຄຳຖາມທີ່ອ້ອນວອນຂອງເອນົກ ເປັນຄຳແນະນຳ ແລະ ໃຊ້ໄດ້ກັບເຮົາແຕ່ລະຄົນໃນທຸກວັນນີ້.
“ແລະ ພຣະຜູ້ເປັນເຈົ້າໄດ້ກ່າວກັບເອນົກວ່າ: ຈົ່ງອອກໄປ ແລະ ເຮັດດັ່ງທີ່ເຮົາບັນຊາເຈົ້າ, ແລະ ບໍ່ມີມະນຸດຄົນໃດຈະສຽບແທງເຈົ້າ. ຈົ່ງເປີດປາກຂອງເຈົ້າ, ແລະ ມັນຈະຖືກເຮັດໃຫ້ເຕັມ, ແລະ ເຮົາຈະໃຫ້ເຈົ້າເອີ່ຍປາກ. …
“ຈົ່ງເບິ່ງ ພຣະວິນຍານຂອງເຮົາຢູ່ກັບເຈົ້າ, ດັ່ງນັ້ນ ຖ້ອຍຄຳຂອງເຈົ້າທັງໝົດເຮົາຈະຮັບຮອງ; ແລະ ພູເຂົາຈະຫລົບໜີໄປຕໍ່ໜ້າເຈົ້າ, ແລະ ແມ່ນ້ຳຈະໄຫລຫັນໜີຈາກເສັ້ນທາງຂອງມັນ; ແລະ ເຈົ້າຈະ ສະໜິດຢູ່ໃນເຮົາ, ແລະ ເຮົາຈະແນບສະໜິດຢູ່ໃນເຈົ້າ; ສະນັ້ນຈົ່ງເດີນໄປກັບເຮົາ.”4
ໃນທີ່ສຸດເອນົກກໍໄດ້ກາຍເປັນສາດສະດາທີ່ຍິ່ງໃຫຍ່ ແລະ ເປັນເຄື່ອງມືໃນພຣະຫັດຂອງພຣະເຈົ້າ ເພື່ອເຮັດວຽກງານອັນຍິ່ງໃຫຍ່ໃຫ້ສຳເລັດ, ແຕ່ເພິ່ນບໍ່ໄດ້ເລີ່ມຕົ້ນການປະຕິບັດສາດສະໜາກິດຂອງເພິ່ນດ້ວຍວິທີນັ້ນ! ກົງກັນຂ້າມ, ຄວາມສາມາດຂອງເພິ່ນໄດ້ຂະຫຍາຍຂຶ້ນເມື່ອເວລາຜ່ານໄປ ເມື່ອເພິ່ນຮຽນຮູ້ທີ່ຈະສະໜິດຢູ່ໃນ ແລະ ເດີນໄປກັບພຣະບຸດຂອງພຣະເຈົ້າ.
ຂ້າພະເຈົ້າອະທິຖານຢ່າງຈິງຈັງເພື່ອຂໍຄວາມຊ່ວຍເຫລືອຈາກພຣະວິນຍານບໍລິສຸດ ຂະນະທີ່ເຮົາພິຈາລະນານຳກັນເຖິງຄຳແນະນຳທີ່ພຣະຜູ້ເປັນເຈົ້າໄດ້ມອບໃຫ້ເອນົກ ແລະ ສິ່ງນີ້ມີຄວາມໝາຍຕໍ່ທ່ານ ແລະ ຂ້າພະເຈົ້າໃນປະຈຸບັນແນວໃດ.
ເຈົ້າຈະສະໜິດຢູ່ໃນເຮົາ
ອົງພຣະເຢຊູຄຣິດເຈົ້າເຊື້ອເຊີນເຮົາແຕ່ລະຄົນໃຫ້ສະໜິດຢູ່ໃນພຣະອົງ.5 ແຕ່ເຮົາຈະຮຽນຮູ້ ແລະ ເຂົ້າມາສະໜິດຢູ່ໃນພຣະອົງໄດ້ແນວໃດ?
ຄຳວ່າ ສະໜິດ ໝາຍເຖິງຄົງທີ່ ຫລື ອົດທົນໂດຍບໍ່ຍອມແພ້. ແອວເດີ ແຈັບຟະຣີ ອາ ຮໍແລນ ໄດ້ອະທິບາຍວ່າ “ການສະໜິດ” ເປັນການກະທຳ ໝາຍເຖິງ “‘[ຈະ] ຢູ່—ແຕ່ [ຈະ] ຢູ່ ຕະຫລອດໄປ.’ ນັ້ນຄືການຮຽກຮ້ອງຂອງຂ່າວສານພຣະກິດຕິຄຸນເຖິງ … ທຸກຄົນ … ໃນໂລກ. ມາ, ແຕ່ມາຄົງຢູ່. ມາດ້ວຍຄວາມເຊື່ອໝັ້ນ ແລະ ຄວາມອົດທົນ. ມາຢ່າງຖາວອນ, ເພາະເຫັນແກ່ທ່ານ ແລະ ເຫັນແກ່ຄົນທຸກລຸ້ນທີ່ຕ້ອງຕິດຕາມທ່ານ.”6 ດັ່ງນັ້ນ, ເຮົາສະໜິດຢູ່ໃນພຣະຄຣິດເມື່ອເຮົາຍຶດໝັ້ນ ແລະ ບໍ່ຫວັ່ນໄຫວໃນການອຸທິດຕົນຂອງເຮົາຕໍ່ພຣະຜູ້ໄຖ່ ແລະ ຈຸດປະສົງອັນສັກສິດຂອງພຣະອົງ, ໃນບາງຄັ້ງທັງດີ ແລະ ບໍ່ດີ.7
ເຮົາເລີ່ມຕົ້ນສະໜິດຢູ່ໃນພຣະຜູ້ເປັນເຈົ້າ ໂດຍການໃຊ້ອຳເພີໃຈທາງສິນທຳຂອງເຮົາ ເພື່ອຮັບເອົາແອກຂອງພຣະອົງ8 ຜ່ານທາງພັນທະສັນຍາ ແລະ ພິທີການຂອງພຣະກິດຕິຄຸນທີ່ຖືກຟື້ນຟູ. ການເຊື່ອມໂຍງໃນພັນທະສັນຍາທີ່ເຮົາມີກັບພຣະບິດາເທິງສະຫວັນຂອງເຮົາ ແລະ ກັບພຣະບຸດທີ່ຟື້ນຄືນພຣະຊົນແລ້ວ ແລະ ຊົງພຣະຊົນຢູ່ ເປັນແຫລ່ງທີ່ມາຂອງມຸມມອງ, ຄວາມຫວັງ, ພະລັງ, ສັນຕິສຸກ, ແລະ ຄວາມຊື່ນຊົມອັນຍືນຍົງ; ມັນຍັງເປັນຮາກຖານທີ່ໝັ້ນຄົງນຳອີກ9 ຊຶ່ງເຮົາຄວນສ້າງຊີວິດຂອງເຮົາເທິງນັ້ນ.
ເຮົາສະໜິດຢູ່ໃນພຣະອົງ ໂດຍການພະຍາຍາມຢ່າງຕໍ່ເນື່ອງ ເພື່ອເສີມສ້າງພັນທະສັນຍາສ່ວນຕົວຂອງເຮົາກັບພຣະບິດາ ແລະ ພຣະບຸດ. ຍົກຕົວຢ່າງ, ການອະທິຖານຢ່າງຈິງໃຈເຖິງພຣະບິດາຜູ້ສະຖິດນິລັນດອນໃນພຣະນາມຂອງພຣະບຸດທີ່ຮັກຂອງພຣະອົງ ເຮັດໃຫ້ການເຊື່ອມໂຍງໃນພັນທະສັນຍາຂອງເຮົາກັບພຣະອົງແໜ້ນແຟ້ນຫລາຍຂຶ້ນ.
ເຮົາສະໜິດຢູ່ໃນພຣະອົງ ໂດຍການຊື່ນຊົມຢູ່ດ້ວຍພຣະຄຳຂອງພຣະຄຣິດ. ຄຳສອນຂອງພຣະຜູ້ຊ່ວຍໃຫ້ລອດດຶງເຮົາ, ໃນຖານະລູກໆແຫ່ງພັນທະສັນຍາ, ໃຫ້ເຂົ້າໃກ້ພຣະອົງຫລາຍຂຶ້ນ10 ແລະ ຈະບອກເຮົາທຸກຢ່າງທີ່ເຮົາຄວນເຮັດ.11
ເຮົາສະໜິດຢູ່ໃນພຣະອົງ ໂດຍການກະກຽມຢ່າງຈິງຈັງ ເພື່ອມີສ່ວນຮ່ວມໃນພິທີສິນລະລຶກ, ທົບທວນ ແລະ ສະທ້ອນຄິດກ່ຽວກັບຄຳສັນຍາໃນພັນທະສັນຍາຂອງເຮົາ, ແລະ ກັບໃຈຢ່າງຈິງໃຈ. ການຮັບສ່ວນສິນລະລຶກຢ່າງມີຄ່າຄວນ ເປັນພະຍານຕໍ່ພຣະເຈົ້າ ວ່າເຮົາເຕັມໃຈທີ່ຈະຮັບເອົາພຣະນາມຂອງພຣະເຢຊູຄຣິດ ແລະ ພະຍາຍາມທີ່ຈະ “ລະນຶກເຖິງພຣະອົງຕະຫລອດເວລາ”12 ຫລັງຈາກຊ່ວງເວລາສັ້ນໆ ທີ່ຮຽກຮ້ອງໃຫ້ມີສ່ວນຮ່ວມໃນພິທີການສັກສິດນັ້ນ.
ແລະ ເຮົາສະໜິດຢູ່ໃນພຣະອົງ ໂດຍການຮັບໃຊ້ພຣະເຈົ້າ ເມື່ອເຮົາຮັບໃຊ້ລູກໆຂອງພຣະອົງ ແລະ ປະຕິບັດສາດສະໜາກິດຕໍ່ອ້າຍເອື້ອຍນ້ອງຂອງເຮົາ.13
ພຣະຜູ້ຊ່ວຍໃຫ້ລອດໄດ້ກ່າວວ່າ, “ຖ້າພວກເຈົ້າເຊື່ອຟັງບັນຍັດຂອງເຮົາ, ພວກເຈົ້າກໍຈະຕັ້ງຢູ່ໃນຄວາມຮັກຂອງເຮົາ ເໝືອນດັ່ງເຮົາໄດ້ເຊື່ອຟັງບັນຍັດຂອງພຣະບິດາຂອງເຮົາ ແລະ ຕັ້ງຢູ່ໃນຄວາມຮັກຂອງພຣະອົງ.”14
ຂ້າພະເຈົ້າໄດ້ບັນຍາຍຫລາຍວິທີທີ່ເຮົາສາມາດແນບສະໜິດຢູ່ໃນພຣະຜູ້ຊ່ວຍໃຫ້ລອດ. ແລະ ບັດນີ້ຂ້າພະເຈົ້າຂໍເຊື້ອເຊີນໃຫ້ເຮົາແຕ່ລະຄົນ ໃນຖານະສານຸສິດຂອງພຣະອົງ ໃຫ້ທູນຂໍ, ສະແຫວງຫາ, ແລະ ຮຽນຮູ້ດ້ວຍຕົວເອງ ໂດຍທາງອຳນາດຂອງພຣະວິນຍານບໍລິສຸດ ກ່ຽວກັບວິທີອື່ນໆທີ່ມີຄວາມໝາຍ ຊຶ່ງຈະເຮັດໃຫ້ພຣະຄຣິດເປັນສູນກາງຂອງຊີວິດເຮົາ ໃນທຸກສິ່ງທີ່ເຮົາເຮັດ.
ແລະ ເຮົາຈະແນບສະໜິດຢູ່ໃນເຈົ້າ
ຄຳສັນຍາຂອງພຣະຜູ້ຊ່ວຍໃຫ້ລອດຕໍ່ຜູ້ຕິດຕາມຂອງພຣະອົງມີສອງເທົ່າ: ຖ້າຫາກເຮົາສະໜິດຢູ່ໃນພຣະອົງ, ພຣະອົງຈະແນບສະໜິດຢູ່ໃນເຮົາ. ແຕ່ເປັນໄປໄດ້ແທ້ໆບໍ ທີ່ພຣະຄຣິດຈະແນບສະໜິດຢູ່ໃນທ່ານ ແລະ ຂ້າພະເຈົ້າ—ເປັນສ່ວນບຸກຄົນ ແລະ ເປັນສ່ວນຕົວ? ຄຳຕອບຕໍ່ຄຳຖາມນີ້ຄື ເປັນໄປໄດ້ແນ່ນອນ!
ໃນພຣະຄຳພີມໍມອນ, ເຮົາຮຽນຮູ້ກ່ຽວກັບຄຳສອນ ແລະ ການເປັນພະຍານຂອງແອວມາຕໍ່ຄົນຍາກຈົນ ທີ່ຄວາມທຸກຍາກບີບບັງຄັບໃຫ້ພວກເຂົາຖ່ອມຕົວ. ໃນຄຳແນະນຳຂອງເພິ່ນ, ເພິ່ນໄດ້ປຽບທຽບພຣະຄຳໃສ່ກັບເມັດພືດທີ່ຕ້ອງປູກ ແລະ ບຳລຸງລ້ຽງ, ແລະ ເພິ່ນໄດ້ບັນຍາຍ “ພຣະຄຳ” ວ່າເປັນພຣະຊົນຊີບ, ພາລະກິດ, ແລະ ການເສຍສະລະຊົດໃຊ້ຂອງພຣະເຢຊູຄຣິດ.
ແອວມາໄດ້ກ່າວວ່າ, “ເລີ່ມເຊື່ອຖືໃນພຣະບຸດຂອງພຣະເຈົ້າ, ວ່າພຣະອົງຈະສະເດັດມາໄຖ່ຜູ້ຄົນຂອງພຣະອົງ, ແລະ ວ່າພຣະອົງຈະຮັບເອົາຄວາມເຈັບປວດ ແລະ ສິ້ນພຣະຊົນເພື່ອຊົດໃຊ້ແທນບາບຂອງພວກເຂົາ, ແລະ ວ່າພຣະອົງຈະລຸກຂຶ້ນຈາກຄວາມຕາຍອີກ, ຊຶ່ງຈະເຮັດໃຫ້ເກີດການຟື້ນຄືນຊີວິດ, ເພື່ອຄົນທັງປວງຈະໄດ້ຢືນຢູ່ຕໍ່ພຣະພັກຂອງພຣະອົງ, ເພື່ອຮັບການພິພາກສາໃນມື້ສຸດທ້າຍ ແລະ ເປັນມື້ພິພາກສາ, ຕາມວຽກງານຂອງພວກເຂົາ.”15
ຈາກຄຳອະທິບາຍນີ້ກ່ຽວກັບ “ພຣະຄຳ” ໂດຍແອວມາ, ກະລຸນາພິຈາລະນາຄວາມເຊື່ອມໂຍງທີ່ດົນໃຈ ທີ່ເພິ່ນໄດ້ລະບຸຈາກນັ້ນ.
“ແລະ ບັດນີ້ … ຂ້າພະເຈົ້າຂໍໃຫ້ພວກທ່ານ ປູກພຣະຄຳນີ້ໄວ້ໃນໃຈຂອງພວກທ່ານ, ເພື່ອມັນຈະໄດ້ງອກງາມຂຶ້ນມາ ແລະ ຈົ່ງບຳລຸງມັນດ້ວຍສັດທາຂອງພວກທ່ານ. ແລະ ຈົ່ງເບິ່ງ ມັນຈະກັບກາຍເປັນຕົ້ນ, ທີ່ງອກງາມຂຶ້ນ ໃນພວກທ່ານ ຈົນເຖິງຊີວິດອັນເປັນນິດ. ແລະ ເມື່ອນັ້ນ ຂໍໃຫ້ພຣະເຈົ້າຈົ່ງໂປດປະທານໃຫ້ພາລະຂອງທ່ານເບົາບາງລົງ, ໂດຍທາງຄວາມສຸກຂອງພຣະບຸດຂອງພຣະອົງ. ແລະ ພວກທ່ານຈະສາມາດເຮັດສິ່ງທັງໝົດນີ້ໄດ້ຖ້າຫາກພວກທ່ານຕັ້ງໃຈຈະເຮັດມັນ.”16
ເມັດພືດທີ່ເຮົາຄວນພະຍາຍາມປູກໃນໃຈຂອງເຮົາແມ່ນພຣະຄຳ—ແມ່ນແຕ່ພຣະຊົນຊີບ, ພາລະກິດ, ແລະ ຄຳສອນຂອງພຣະເຢຊູຄຣິດ. ແລະ ເມື່ອພຣະຄຳໄດ້ຮັບການບຳລຸງລ້ຽງດ້ວຍສັດທາ, ມັນສາມາດກາຍເປັນຕົ້ນທີ່ງອກງາມຂຶ້ນ ໃນພວກເຮົາ ຈົນເຖິງຊີວິດນິລັນດອນ.17
ແມ່ນຫຍັງຄືສັນຍາລັກຂອງຕົ້ນໄມ້ໃນພາບນິມິດຂອງລີໄຮ? ຕົ້ນໄມ້ສາມາດຖືໄດ້ວ່າເປັນຕົວແທນຂອງພຣະເຢຊູຄຣິດ.18
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ພຣະຄຳຢູ່ໃນເຮົາຫລືບໍ່? ຄວາມຈິງຂອງພຣະກິດຕິຄຸນຂອງພຣະຜູ້ຊ່ວຍໃຫ້ລອດຖືກຂຽນໄວ້ຢູ່ໃນຕາຕະລາງເນື້ອໜັງຂອງໃຈເຮົາຫລືບໍ່?19 ເຮົາມາຫາ ແລະ ຄ່ອຍໆກາຍເປັນເໝືອນດັ່ງພຣະອົງຫລືບໍ່? ຕົ້ນໄມ້ຂອງພຣະຄຣິດກຳລັງເຕີບໂຕຢູ່ໃນເຮົາຫລືບໍ່? ເຮົາພະຍາຍາມກາຍເປັນ “[ຄົນ] ໃໝ່”20 ຢູ່ໃນພຣະອົງຫລືບໍ່?21
ບາງທີສັກກະຍະພາບອັນໜ້າອັດສະຈັນນີ້ອາດດົນໃຈໃຫ້ແອວມາຖາມວ່າ: “ພວກທ່ານໄດ້ເກີດຈາກພຣະເຈົ້າທາງວິນຍານແລ້ວບໍ? ທ່ານໄດ້ຮັບເງົາຂອງພຣະອົງໄວ້ໃນໃບໜ້າຂອງທ່ານແລ້ວບໍ? ພວກທ່ານເຄີຍປະສົບການປ່ຽນແປງອັນຍິ່ງໃຫຍ່ນີ້ໃນໃຈຂອງພວກທ່ານແລ້ວບໍ?”22
ເຮົາຄວນຈື່ຈຳຄຳແນະນຳຂອງພຣະຜູ້ເປັນເຈົ້າຕໍ່ເອນົກຕະຫລອດເວລາ ທີ່ວ່າ: “ເຈົ້າຈະສະໜິດຢູ່ໃນເຮົາ, ແລະ ເຮົາຈະແນບສະໜິດຢູ່ໃນເຈົ້າ.”23 ແລະ ຂ້າພະເຈົ້າເປັນພະຍານເຖິງຄຳສັນຍາຂອງພຣະຜູ້ຊ່ວຍໃຫ້ລອດທີ່ຈະແນບສະໜິດຢູ່ໃນເຮົາວ່າເປັນຄວາມຈິງ ແລະ ມີໃຫ້ສຳລັບສະມາຊິກທຸກຄົນ ຂອງສາດສະໜາຈັກທີ່ຖືກຟື້ນຟູຂອງພຣະອົງ ທີ່ຮັກສາພັນທະສັນຍາ.
ສະນັ້ນຈົ່ງເດີນໄປກັບເຮົາ
ອັກຄະສາວົກໂປໂລໄດ້ຕັກເຕືອນຜູ້ທີ່ເຊື່ອ ທີ່ໄດ້ຮັບເອົາພຣະຜູ້ເປັນເຈົ້າວ່າ: “ຈົ່ງດຳເນີນຊີວິດຢູ່ໃນພຣະອົງ.”24
ການເດີນໄປໃນ ແລະ ກັບພຣະຜູ້ຊ່ວຍໃຫ້ລອດເນັ້ນສອງດ້ານທີ່ສຳຄັນຂອງການເປັນສານຸສິດ: (1) ການເຊື່ອຟັງພຣະບັນຍັດຂອງພຣະເຈົ້າ, ແລະ (2) ການຈື່ຈຳ ແລະ ການໃຫ້ກຽດແກ່ພັນທະສັນຍາສັກສິດ ທີ່ເຊື່ອມໂຍງເຮົາເຂົ້າກັບພຣະບິດາ ແລະ ພຣະບຸດ.
ໂຢຮັນໄດ້ປະກາດວ່າ:
“ໃນຂໍ້ເຫລົ່ານີ້ແຫລະ ເຮົາທັງຫລາຍຄົງສັງເກດໄດ້ວ່າ ພວກເຮົາຮູ້ຈັກກັບພຣະອົງ, ຄືວ່າຖ້າພວກເຮົາຖືຮັກສາບັນດາກົດບັນຍັດຂອງພຣະອົງ.
“ຖ້າຄົນໃດເວົ້າວ່າ, ຕົນຮູ້ຈັກພຣະອົງ, ແຕ່ບໍ່ຖືຮັກສາກົດບັນຍັດຂອງພຣະອົງ, ຄົນນັ້ນກໍເວົ້າຕົວະ ແລະ ຄວາມຈິງກໍບໍ່ມີຢູ່ໃນຜູ້ນັ້ນ.
“ແຕ່ຜູ້ໃດກໍຕາມ ທີ່ຖືຮັກສາພຣະທຳຂອງພຣະອົງ, ຢູ່ໃນພຣະອົງ ຜູ້ນັ້ນແຫລະທີ່ຮັກພຣະເຈົ້າຢ່າງຄົບຖ້ວນບໍລິບູນໂດຍແທ້: ດ້ວຍເຫດນີ້ ເຮົາທັງຫລາຍຈຶ່ງຮູ້ຈັກວ່າພວກເຮົາ ຢູ່ໃນພຣະອົງ.
“ຜູ້ໃດທີ່ເວົ້າວ່າ ຕົນຢູ່ໃນພຣະອົງ ຜູ້ນັ້ນກໍຄວນ ດຳເນີນຊີວິດຕາມທາງທີ່ພຣະອົງຊົງດຳເນີນນັ້ນເໝືອນກັນ.”25
ພຣະເຢຊູໄດ້ກວັກເອີ້ນເຮົາແຕ່ລະຄົນວ່າ, “ຈົ່ງມາຫາເຮົາ”26 ແລະ “ເດີນໄປກັບເຮົາ.”27
ຂ້າພະເຈົ້າເປັນພະຍານວ່າ ເມື່ອເຮົາມຸ້ງໜ້າດ້ວຍສັດທາ ແລະ ເດີນໄປໃນຄວາມອ່ອນໂຍນແຫ່ງພຣະວິນຍານຂອງພຣະຜູ້ເປັນເຈົ້າ,28 ເຮົາຈະໄດ້ຮັບພອນດ້ວຍພະລັງ, ການນຳພາ, ການປົກປ້ອງ, ແລະ ສັນຕິສຸກ.
ປະຈັກພະຍານ ແລະ ຄຳສັນຍາ
ແອວມາບັນຍາຍເຖິງຄຳວິງວອນດ້ວຍຄວາມຮັກຈາກພຣະຜູ້ເປັນເຈົ້າຕໍ່ທຸກຈິດວິນຍານທີ່ມີຊີວິດຢູ່:
“ຈົ່ງເບິ່ງ, ພຣະອົງໄດ້ສົ່ງຄຳເຊີນມາຫາ ມະນຸດທັງປວງ, ເພາະພຣະພາຫາແຫ່ງຄວາມເມດຕາຂອງພຣະອົງໄດ້ເດ່ອອກມາຫາພວກເຂົາ, ແລະ ພຣະອົງໄດ້ກ່າວວ່າ: ຈົ່ງກັບໃຈເຖີດ, ແລະ ເຮົາຈະຮັບເຈົ້າໄວ້.
“… ຈົ່ງມາຫາເຮົາ ແລະ ເຈົ້າຈະຮັບໝາກໄມ້ຈາກຕົ້ນໄມ້ແຫ່ງຊີວິດ; ແທ້ຈິງແລ້ວ, ເຈົ້າຈະກິນເຂົ້າ ແລະ ດື່ມນ້ຳແຫ່ງຊີວິດຢ່າງມີອິດສະລະ.”29
ຂ້າພະເຈົ້າເນັ້ນຄວາມຄົບຖ້ວນສົມບູນຂອງຄຳວິງວອນຂອງພຣະຜູ້ຊ່ວຍໃຫ້ລອດ. ພຣະອົງປະສົງທີ່ຈະອວຍພອນດ້ວຍພຣະຄຸນ ແລະ ຄວາມເມດຕາຂອງພຣະອົງແກ່ທຸກຄົນທີ່ມີຊີວິດຢູ່ໃນເວລານີ້, ທີ່ເຄີຍມີຊີວິດຢູ່, ແລະ ທີ່ຍັງບໍ່ໄດ້ມາສູ່ໂລກເທື່ອ.
ສະມາຊິກຂອງສາດສະໜາຈັກບາງຄົນຍອມຮັບວ່າ ຄຳສອນ, ຫລັກທຳ, ແລະ ປະຈັກພະຍານ ທີ່ປະກາດຊ້ຳແລ້ວຊ້ຳອີກ ຈາກແທ່ນປາໄສໃນສູນກາງປະຊຸມໃຫຍ່ ແລະ ໃນບ່ອນຊຸມນຸມໃນທ້ອງຖິ່ນທົ່ວໂລກເປັນຄວາມຈິງ—ແຕ່ອາດຍັງມີບັນຫາກັບການເຊື່ອວ່າ ຄວາມຈິງນິລັນດອນເຫລົ່ານີ້ໃຊ້ໄດ້ກັບຊີວິດສ່ວນຕົວ ແລະ ກັບສະຖານະການຂອງເຂົາເຈົ້າເອງໂດຍສະເພາະ. ເຂົາເຈົ້າເຊື່ອຢ່າງຈິງໃຈ ແລະ ຮັບໃຊ້ຢ່າງພາກພຽນ, ແຕ່ພັນທະສັນຍາທີ່ເຊື່ອມໂຍງເຂົ້າກັບພຣະບິດາ ແລະ ພຣະບຸດທີ່ໄຖ່ຂອງພຣະອົງ ຍັງບໍ່ກາຍເປັນຄວາມເປັນຈິງທີ່ມີຊີວິດ ແລະ ປ່ຽນແປງໃນຊີວິດຂອງເຂົາເຈົ້າເທື່ອ.
ຂ້າພະເຈົ້າສັນຍາວ່າ ໂດຍທາງອຳນາດຂອງພຣະວິນຍານບໍລິສຸດ, ທ່ານຈະສາມາດຮູ້ຈັກ ແລະ ຮູ້ສຶກວ່າຄວາມຈິງຂອງພຣະກິດຕິຄຸນ ທີ່ຂ້າພະເຈົ້າພະຍາຍາມບັນຍາຍນັ້ນ ມີໄວ້ໃຫ້ທ່ານ—ໃຫ້ທ່ານເປັນສ່ວນບຸກຄົນ ແລະ ເປັນສ່ວນຕົວ.
ຂ້າພະເຈົ້າເປັນພະຍານຢ່າງຊື່ນຊົມວ່າ ພຣະເຢຊູຄຣິດ ເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ທີ່ຊົງຮັກ ແລະ ຊົງພຣະຊົນຢູ່ຂອງເຮົາ. ຖ້າເຮົາສະໜິດຢູ່ໃນພຣະອົງ, ພຣະອົງຈະແນບສະໜິດຢູ່ໃນເຮົາ.30 ແລະ ເມື່ອເຮົາເດີນໄປໃນ ແລະ ກັບພຣະອົງ, ເຮົາຈະໄດ້ຮັບພອນເພື່ອນຳໝາກຜົນຢ່າງຫລວງຫລາຍອອກມາ. ຂ້າພະເຈົ້າເປັນພະຍານໃນພຣະນາມອັນສັກສິດຂອງອົງພຣະເຢຊູຄຣິດເຈົ້າ, ອາແມນ.