Loaleie koledi madmadau wet me pid Sises Krais
Ni amwail pahn nantiengete medemedewe laud duwen Sises Krais, I inoukiheng kumwail me kaidehnte kaweid sang nanleng ahpw pil manaman sang nanleng.
Nan sounpwong en ihster kaselel wet, I men kapwurehieng iren koul kaselel me masanih, “Kaweid kiht, Aht Kaun lapalap.“1
Soai keselel pwoat nan pwuken Mormon koasoaiahda duwen mwahnakapw emen me sang nan peneinei ndand ehu. Ede iei Alma oh pwuhk sarawihkan mahsanih me ih aramas soupwoson men me kin pwongih dikadiken eni.2 E kin koahiek en koasoakoasoai oh maieng koasoane ah lokaia ni ah kin pain aramas en idawehn ih. Ih me kapwuriamweio, tohnleng men pwarehng Alma oh iengehko. Alma ahpw pwupwidieng nanpwelo oh luwetala, iengehko ahpw walahng ni imwen ah pahpao. E sohla kehn wasahki rahn siluh.3 Mwuhr, e kawehwehda me ni aramas me kapkapelko ahr kilkilang, e mwomen sohte kehn wasa apw ni ansouohte, loale, e wie pepehd oh palingene pahtoula mehlel, ni eh medemedewe duwen ah sohte kin kapwaiada kosonned akan. E koasoaia me palingeni “lokolongki nsensuwed kowahlap mehlel oh toutoukilahr [dipehkan] koaros”4oh “toutoukihla lokolok soutuk.”5
Nan eilepen eh pahtou laud, e tamanda padahk me e alehdi ni eh tikitik me pid duwen “ketidohn Sises Krais, Sapwellimen Koht Iehros, pwe en tomwkihla dipen sampah.”6 Mwuhri e uhd koasoiahda mehkot ieu me kamwakidada: “Ni ahi medewehda madamadau wet, nan mohngiongi sengiseng: Maing Sises, Sapwellimen Koht, menlau mahkohngie.“7 Ni ansou me e peki manaman en Sounkomouro, mehkot kapwuriamwei ehu wiawi: “Ansou me I medewehda met,” e nda, “I sohla kak taman ei medek kan.”8 Ni ansouohte e kehnda meleilei oh marain. “Sohte mehkot [me] idipek oh kansenamwahu duwehte ei pereno.”9
Alma “koledi“ mehlel en Sises Krais. Ma kitail pahn doadoangki mahsen me nda “koledi“ ni kekehn en palinwar, kitail kak nda, “e koledi kehlo ni ah pahn pwupwidio,“ me wehwehki e poaralahte koledi mehkot ieu me kehlail uhsangete ni poahsoan tengo.
Dahme wiawi ong Alma, ah madmadau me koledi oh katengediong manaman mehlel en Sapwellimen Sises Krais tomwo. Eh ahpw pitsang nan pahtou laud oh audaudkihda koapwoaropwoar, sang manaman oh kalahngan en Koht, pwehki ah mwekmwekidki mehlel me eh koledio.
Dahme kitail kin lel ong sohte duwehte dahme wiawihong Almao, ahpw e pil kesempwal ong nan mour poatopot. Loaletail pil “koledier madmadau wet“ me pid duwen Sises Krais oh Sapwellime tohnmetei en mahk, oh palingenetail kehnehr marain oh popohl me kin iangodo.
Doandoare atail madamadau kan duwen Sises Krais.
Ei kapakap nan ansoun Ihster wet kitail en wekid kitaila, kakehlailiala, oh doandoare kesempwal en medemedewe Sises Krais nan perehn atail mour,10pwe en kak kerelong nan atail madamadau, oh kahluwa atail madamadau oh wiewia, oh kihong kitail popohl en Sapwellimen Sounkomouro limpoak.11
Audehki atail madmadau manaman en Sises Krais sohte wehweki me Ih kelepw me kitail pahn kin medmedewe. Ahpw eh wehwehki me atail madmadau kan koaros pahn audaudki Sapwellime limpoak, Sapwellime mour oh padahk kan, oh Sapwellime tomwo oh Sapwellime iasada kapuwriamweio. Kitail sohte manokehla Sises nan keinwo, pwehki atail madamadau kan duwen Ih ansou koaros kin mihmi rehtail oh “soahng koaros me kin mihmi [loaletail kin wauneki] Ih!“12 Kitail kapakapki oh tamataman dahme kin lelong kitail me kahreda kitail kin karanihala Ih. Kitail kin kasamwoh ong nan atail madmadau kilel sarawi kan, iren pwuhk sarawi kan, oh koul sarawi kan pwehn apwaliahla madmadau kan me kin kohkohdo nan atail mour nan ehu ehu rahn. Atail poakong Ih sohte kin perehsang kitail nsensuwed oh patou nan mour wet, ahpw e kin sewese kitail en powedi katoutou kan ni uwen kehail laudsang pein atail kehlail.
Sises, poahsoan en madamadau
Ihme kansenamwahupen loaloiet;
Kansenamwahu sang wen me kitail kak kilang
Oh iei wasahn koamoal Remwi.13
Tamataman me komwi Sapwellimen Samatail Nanleng seri. Duwehte Wahnpoaron Paul ah kaweweh, me kitail wia “Sapwellimen Koht seri.”14 Kumwail wie momourki udahn ihs kumwail, sangete mwohn amwail kohdo sampah. Samatailo wiadahr plahn unseko pwehn elehiong kitail en kak kohdo sampah, kaskuhlda, oh pwuralahng Reh. Eh ketin kadarado Sapwellime Ieroso pwe sang ni manamana en Sapwellime Tomo oh Iasadahu, kitail en kak pwurehng mourda; oh ni atail pahn mommourki pwoson oh koluhkihla dipatail kan,15kitail kak alehda mahk oh koapwoaropwoar en mour soutuk.16
Atail Madamadau oh Pali Ngenitail en kak alehda Mehkot kesempwal soh Kesikpeh kan.
Nan mour wet, kitail anahne apwali mwahu atail madamadau oh palingenatail.17 Palingenatail kin kahrehieng kitail atail kin kak mour, wiahda pilipil, oh ese dahme mwahu oh dahme suwed.18 Palingenatail kin alehdi kadehde me Koht iei Samatail, me Sises Krais iei Sapwellimen Koht Iehros, oh me Sapwellimara padahk kin wia kaweidpatail ong nan mour wet oh mour soutuk mwurin mehla.
Alma koledi iren madamadau wet nan ah madamadau me pid Sises Krais. E wekidala ah mour. Kapokon Lap iei ansou en atail esehla dahme Kauno kupwurki kitail en wia oh wiahla. E pil wia ansou en medemedewe atail mwekid kan. Kapwukoah kan me I kin kokohkiseli nan sampa, I kin kilangada keirdahn pali ngehn oh pwungilahn towe limpoak kan en Mwomwohdiso wet.
Sounpar limau samalahro, kitail alehdi pekipek ehu me kitail en kalaudehla atail kin kasalehda Sounkomouro nan soahng koaros me kitail kin wia ni atail pahn doadoahngki udahn eden Mwomwohdiso en Sises Krais en Souleng en Imwin Rahn-akan.19 Kitail en kin kalapw koasokosoia Mwarehu.
Sounpar pahieu samwalahro, atail sarawi en kamadipw sarawi malaulaula, atail men ale kamadipw sarawi laudla. Atail medemedewe Sises Krais laudla oh kaulaudehla atail men kolokol atail en tamataman Ih ansou koaros.20
Pwehki ikipar peseng en soumwahu nan sampah ah katohreikitail peseng sawas en Come Follow Me, me iei padahk en atail Sounkomouro wiahla mehkot kesempwal nan imwatail kan, sewsewese atail kaudokiong Sounkomouro nan ehu ehu wihk kan.
Sang ni atail pahn idawehn sapwellimen Presiden Russell M. Nelson kaweido me en “rong Ih,“21Kitail kin kamwkamwahuiala koahiek en kak rongada mwenginigin kan en Nghen Sarawio oh kilang limen Kauno nan atail mour.
Pakairpen tehnpas sarawi oh kokoudahn tehnpas sarawi kan, elehieng atail kalapw pidelong nan tehnpas en Kauno oh alehda Sapwellime inou kapai kan. Kitail kin pehmada laud kehlail oh lingan en atail Sounkomour oh Soundoaro.
Presiden Nelson masanih: “Sohte wiepe mengei de kitail en audahte wiahla [emen] Sapwellime [werek] idipek. Kitail anahnehte katengetengdi ong Sounkomouro oh Sapwellime rongamwahuo. E wia mehkot apwal kitail en kin medemedewe Ih nan atail madamadaukoaros.“22
Ni atail pahn kauheng atail madamadau ong Sises Krais, soahng koaros me kapkapel kitail—me pil wihwiawi—duduwehte e pahn ekis wekila nan mesetailkat pwehki atail limpoak ong Ih. Kediropw kan me sohte nohn kesempwal pahn sohrala, oh kitail pahn kin kesehla soahng kan me sohte ahneki Sapwellime marain oh sohte duwehte Mwomwe. Ni amwail pahn kin pwersekieng daperedi iren madamadau wet me pid Sises Krais, koapwoaroapwoarki Ih, oh kapwaiada Sapwellime kosonned akan, kumwail pahn alehdi kapai en Sapwellime kaweid oh manaman en nanleng—manaman me pahn kakehlaka amwail inou sarawihkan, kiheng kumwail meleilei nan ansoun amwail kahpwal kan, oh perepereniki kapai kan me kumwail alehdi.
Tamataman Sises Krais
Wihk kei samwalahro, Ngehi oh Kathy se pwarala nimwen Matt oh Sarah Johnson. Kilel kei tentenek ni didin imwarailo; kilelen arail peninein kaselel, kilelen Sounkomouro, oh mahlen en tehnpas sarawio.
Neira serepein pahmeno, Maddy, Ruby, Claire, oh June koasoaiahda wen arail poakoahng arail nohnohu.
E sipele sounpar ehu Sarah ah kin wiahda arail apppointment Rahnkaunop koaros pwe arail peneinei en kin ehupene oh kohla ni tehnpas sarawi pwe serepeinko en iang wia pepdais ong arail peneinei me melahr akan.
Nan Nohpempe en pahr teio, Sarah wiahda arail appoinment ni tehnpas sarawio ong ni imwilahn week en Tihsempe, ni Niepeng ehu, kaidehn Rahnkaunop. “I koapworopworki me met pahn mwahu ong uhk,” e ndahlahng Matt.
Toaktehko diarada me Sarah soumwahu cancer ahpw toahktehko kasik me e pahn momourki sounpar riau de siluh sang ansouo. Nan keioun wihk en Tihsempe, nan sarawihn kamadipw sarawio, Sarah wia ah kadehde kehlail ehu, oh nda me sohte lipilipil dahme pahn wiawihong, e poakoahng Sounkomouro loale unsek, oh me E ketin “powehdier soahng koaros.“ Ni rahn akan nan Tihsempe, Sarah wiakintehieu luwetedi, ih eri kapidolong nan imwen wini. Nisohrahn en Niepeng, Tihsempe 29, E kaimsakala ah seilok en mour wet. Matt mihmihki mpen Sarah pwohngo pwon.
Ah mohniongen medeklahr, paliwere oh ah pepehm koaros lokehr, Ih oh nah serepein kan mweselahngehr nimwairailo ni arail pahtou mehlele. Matt ahpw kilang nah cell phone o, e kilangada mehn ketemen ieu ong appointment en Niepeng me Sarah wiahdao ong nan tehnpas sarawio rahno. Matt nda, “Ni ai tepin kilango, I mur ekis medewe me se sohte pahn kak lella.”
Apw loalen Matt koledi iren madamadau wet: “Sounkomouro ieias. Sohte ehu wasa tohrohr me se men mih ie likin Tehnpese me sarawio.”
Matt, Maddy, Ruby, Clair, oh June lella ni tehnpas sarawio ong kapwukoah me Sarah wiahda ong irailo. Ni pilenmeserail wia kereker, Matt oh nah serepeinko wiahla pepdaisko. Irail ienen kehnda mehlel arail limpoak oh arail katengteng ong Saraho, oh irail pil kehnda limpoak lap oh meleilei sang Sounkomouro. Matt ndahiengkit, “Mendahte ai mih nan ai pahtou koaros, I ahniki te polpohl, pwehki ahi ese pilahn en koumour kaselel en Semeio.”
Nan ansoun Ihster wet, I kadehdehda duwen unsek oh mehlel en Sapwellimen Sounkomouro tohnmetei en tomwo oh Sapwellime Iasada lingano. Ni amwail koledier tengeteng oh poatoapoat iren madamadau wet, oh ni amwail kauhweng amwail mour Sises Krais, I inoukiheng kumwail me kumwail pahn kehn Sapwellime koapwoaroapwoar, meleilei, oh limpoak. Ni mwaren Sises Krais, amen.