Doadoahk en Papah
Kitail sawas oh ehu ong koaros duwehte Sounkomour o, ahpw mehlel irail akan me kitail poakohng oh pwukoahkier en papah.
Maing Riei ko, kompokepahi kan koaros, I kasamwoh kumwail ong ni kapokon lap wet!
Mwurin tiepene lap en Oaktohpe, Ngehi oh Sister Gong aluseli nan Imwen Tiepene lap wet pwehn rahnmwahui aramas akan oh rong arail ire kan en rongamwahuo.
Towe kan en Mexico kin nda, “Hoy es el tiempo de Mexico.”
Se tuhwong Gary oh ienge Mary, mehn England. Ahnsou me Mary iangala Mwomwohdisoht, solahr ah wasahn kousoan. Gilly lukehng Mary en kodohng mihmi reh. Ni pwoson laud, Gilly nda “Sohte pahk I peikasalki me Kauno ketiket rehi.” Ni tiepeneo, Gilly pil perenki ah kasaing misineri me pepdaisih Gilly sounpar pahisek isuh samwalahro.
Jeff oh ah pwoud, ede Melissa, ih ehd en ara iang tiepene lap. Jeff kin wi souniakiu (e kin daper) a met e wia toahkte men. E ndahiongie, “I pwuriamweiki me, I kohkohlahng pepdais pwe I kehn me ih keieu mwomw sansal oh memehlel en momour.“
Ekis mwowe, Melissa me pekimahkehng sounpapah me pwukoahki Jeff, dene “Jeff sohte mwahuki seht pwetepwet nan imwaht.“ Sounpapaho ahpw sapeng, “I pahn diar mwomwe.“ Met e iengehla Jeff. Ni en Jeff ah pepdais, I tuhwong pwihn en Mwomwohdiso ieu me Jeff, Melissa, oh neira serepein Charlotte kin poakepoake.
Nin duwen atail kin idawehn Sises Krais, kitail kin men papah mehteikan rasehng Ih pwehki mour kan awiawi ansou en wekidekla.
Ahnsou me Peggy ndahiongie me ah pwoud, Sohn, mwurin sounpar 31 en ara pwopwoud, pahn pepdaisla, I idek reh dahme wikila.
Peggy sapeng me “Sohn oh Ngehi wadawadek Kohdo, Idaweniehdo me pid Kadehde Kapw, oh Sohn idek reh duwenpadahngkan en Mwomwohdisowet.”
Peggy sapeng, ”Kita en lukehdo misinerikan.”
Sohn nda, ”Sohte misineri—ihte ma iengei kak iang kohdo.” Erein sounpar eisek, sounpapah en Sohn wiahla emen kempoakepah. (I medewe, Iaduwen ma sounpapah en Sohn o sohla kohdo mwurin sounpar ehu, riau, de duwau?)
Sohn rong. E wadekala Pwuhk en Mormon, ni ineng mehlel. Ahnsou me misineriko lukehng Sohn en pepdaisla, e sapeng ei. Peggy kosoia, ”ih pwupwidihsang pohn ahi sehro oh ngehi sengiseng.”
Sohn nda, ”I wiliakahpwala ni ahi karanihla Kauno.” Mwurih, Sohn oh Peggy katengtengpene nan tehnpas sarawi. Tihsempe me nekiehro, Sohn mehla ni ah sounpar duweisek-riau [92]. Peggy me nda, ”Ahnsou koaros Sohn wia aramas mwahu men, ahpw e wikila ni mwohmw kaselel ieu mwurin ah pepdaisla.”
Sister Gong oh ngehi pil tuhwong Meb oh Jenny sang ni video erein soumwahu doar en COVID. (Se tuhwong diren pwopwoud oh aramas kan sang nan video erein COVID, arail stake president kapehse emen emen irail.)
Meb oh Jenny nda ni karakarahk me ekei kahpwal kan nan ara mour kin kahrehda ara medewe ma ara kapwopwoud kak mwahula, oh ma ehng, ia mwomwe. Ira kamehlele me Tomwpen Sises Krais oh ara inou saraw kan kak sawas.
Uwen ahi popohl ni Meb oh Jenny alehdi doaropwehn tehnpas sarawi oh pwurehng tehnpas en Kauno. Mwurih Meb kereniong mehla. E wia kapai laud me Meb oh Jenny kapwurehdo ara inou sarawi kan ong Kauno oh pil ong ira, oh ira kakehr kehn limpoak en papah sang mehteikan.
Wasa koaros me I kin kohla, I kin kalahnganki ahi kak esehla sang irail me kin rasehng Sounkomouro ni arail kin papah.
Nan Peru, Sister Gong oh ngehi tuhwong Salvador oh rieh kan.1 Salvador oh rieh kan sopwoupwou. Rahno wia rahn en ipwidi en Salvador. Aramasako me kin papah ong peneinei en Salvador, sounkaweid en Mwomwohdiso kei oh mehmpe kan, kin kamarainihie. ”Pwoson pwuhng oh sohte kasamin … iei met, En pwarek me sopwoupwou oh liohdi kan,”2 “kamwenge me luwet kan, pwokada peh kan me mwotoudi, … kakehlailih me luwet akan.”4
Nan Hong Kong, ehu presiden en Elder kan ehuki mwomwen arail quorum katanga percent-100 en kapeidek soun papah kan. ”Se kin kapakap oh koasonehdi ieng akan pwe koaros en kak apwalih emen oh pil epwelda,” ih me e nda. ”Se kin kalapw idek rehn sounpapah kan duwen irail me re kin papah. Se sohte kin tehk koakon kan; se kin papah irail akan me kin sewese nait aramas akan.”
Nan Kinshasa, Democratic Republic of the Congo, Presiden Bokolo ehukihda duwen ih oh ah peneinei iangala Mwomwohdisowet nan France. Nin rahng ehu, ni ah wadek ah Kapai sang Patriark, Ngehn Saraw kapehmada Brother Bokolo en wahda ah peneinei pwuralahng DR Congo. Brother Bokolo ese me irail pahn ale dir en kahpwal kan me re pwur. Oh arail Mwohmwohdiso, iei Mwomwohdiso en Sises Krais en Souleng en Imwin Rahn-akan, saikinte kokouda nan Kinshasa.
Ahpw, ni pwoson, duwehte me tohto, peneinei en Bokolo idawehn Ngehn en Kauno. Nan Kinshasa, irail papah oh kapaiada dir en mehteikan, dadaur kahpwal, oh alehdi kapai me pid ngehn oh mour en sampah. Rahnwet, re peren pwe mie tehnpas en Kauno nan arail wehi.4
Emen me iang pepdais pil epwel sang karasaras en mehteikan. Ni ah wia mwanakapw men, e kosoia me e kin mwemweit pohn pihk o. Rahn ehu, e nda, ”I kilangada serepein masamwahu men me likawi likou en pampap me sohte suwed. Ni pwuriamwei, e kohla reh oh idek ia duwen serepein masamwahu pahn sohte likawi likou suwed. E wia mehmpe en Mwomwohdiso en Sises Krais en Souleng en Imwin Rahn-akan oh idek, ”Ke men iang kohla sarawi Rahnsarawi?” Mwanakapwo sapengki ehi.
Sounpar kei samwalahro, Elder L. Tom Perry ehuki mwomwen ih oh ah companiono kin papah lih emen me kin kelekelehpw nan wasa me ekis keper nan Boston. Ni Elder Perry oh ah companion kohla wasao, liho nda, ”Menlau kihdi noumwa doaropwe en tehnpas sarawi pahn wenihm.” Ihte mwurin ah kilang doaropweko me e mweidehng ira en pedilong.5 Ni mehlel, I sohte ndinda me koaros companionships anahne doaropwe en tehnpas sarawi. Ahpw I linganiki madamadau me kosoia me koaros me kin wauneki arail inou kan en papah, aramas akan kin kasamwo irail long nan arail wasahn kouson akan oh pil ritingada arail mongiong kan.
Elder Perry pil kihda kamantik me kin sawas. E masanih, ”Kihong iongomw kan pwukoah kan, kapakapki mehnia, koairoakidi ni keneinei wasa me konehng pwe ansou en dodohk en kak mwahu.” E pahn kaweidki, ”Tepida rehn irail kan me anahnepen pwarek laud. Kokouda rehn irail me pahn keieu en kasamwo oh kalahnganki.” E kanengkihla, ”Pwoson en nannantih kin kahrehda manaman.”
Papah me ileile oh sarawi6 kin kohdo ni atail kapakapki ”limpoak mehlel en Krais”7 oh kin idawehn Ngehn Sarawi. E pil kohdo ni presidensei en kwohram en elder kan oh Pwihn en Lih akan kin kaweidih papah sang kaweid en Pisop, iangahki kapwukoahki mehteikan oh kahrehda companion kan. Menlau kihong neitail penakapw oh mwanakapw akan ahnsou mwahu enn iang oh esehla sang rietail ophl oh lih sounpapah me ekis mahlahr. Oh menlau mweidehng irail me pwulopwul kan en kamarainih rietail.
Wasa kei nan Mwomwohdiso, mie mehkot salongala. Dir me kin nda me re papah, ahpw malaulau me kin nda me re ale epwel. Kitail sohte mwahuki soangen kahpwalo. Ahpw ekei pahk, kitail kin anahne mehkot me laud sang rahnmwahu de ”I kak sawas?” wasahkis. Dir en wasa, kitail kak luhkehng, wehwehki, oh papah ni atail kalapw pwarek aramas nan imwarail. Luhk sarawi kin kawikila mourkan. Ni ahnsou me luhk kan kin sawas en wiahda oh kolokol inou sarawi kan, kitail kin karanihla Kauno oh mehteikan.
Dene me irail me kin wehwehki Ngehn en papah kin kalaudehla arail papah, ahpw irail me sohte wehwehki kin katikitikala. Kitail en kalaudehla, rasehng Sounkomouro. Duwehte koul sarawio, e wia ”kapai en pwukoah oh limpoak.”8
Sounsawas en ward kan, quorum en elder, oh Pwihn en Lih, menlau rong Silepen Sihpw Mwahuo oh sewese Ih oh ”rapahki irail me salongala kan, … kapwurehdo irail me dolahr kan, … kamwahwihla dahme ohla kan, … kakehlailih me soumwahu kan.”9 Kitail kak kaperenih “mehn likih kan”10 ni ansou me kitail wiewiahda pere nan Tehnpese ong koaros.11
Papah kapehm kan kapaiada peneinei kan oh aramas koaros; e pil kakehlailih ward oh prans kan. Medewe ahmw ward de prans sang ni ngilen ngehno. Nan Pwuken Mormon me sang ni karasaras en tuhkehn olihp, sapwellimen Kauno mwetuwelo oh sapwellime tohn doadoahk kan wahdo wahntuhke kaselel oh kin kakehlailih ehu ehu tuhke sang ah kin kadokepene me momour kan oh me pahn mengila kan.12 Kaun en mwetuwelo oh sapwellime tohn doadoahk kan kin idihdek, “Dahme ih pahn kak pil wia?”13 Patpene koaros, re kin kapaiada mohngiong kan oh ihmw kan, ward oh prans kan, sang ni papah kapehm kan.14
Papah—sounsilepe—kin wiahda atail mwetuwelo en “wiahla ehu”15—en kin sarawihla. Ehu ehu tuhke wia atail poadoad en peneinei. Kalewehkan oh Rah kan Papah kin kapaiada dih kan. Ansou me sawas kin mie anahnepe, pisop kan, kaun en quorum en elder oh kaun en Pwihn en Sawas en Lih kan kosoia, “Isime wia pwukoah en papah kan?” Kaunsel en ward kan oh kansenohn soun papah sohte kin idekte dahme kin apwal ahpw re pil kin kilangki meserail kan oh kapinga sapwellimen Kauno kalahngan kan nan arail mour sang arail kin papah rasehng Ih.
Atail Sounkomouro wia karasaras wadawad men.16 Pwehki E mwahu, E kak ketiket seli wiewia me mwahu kan.17 E kapaiada mehmen o oh meh 99. E kin papah nin duwen me emen anahne. Kitail kin duwehla Sises Krais ansou me kitail kin sewese “emen … rie me tikitik pwukat” rasehng dahme kitail pahn wiahng Ih,18 ansou me kitail kin poakehng mehn impatail kan rasehng pein kitail,19 ansou me kitail “poakpene; rasehng Ai poakehnguhk,”20 oh ansou “me emen kin mwahuienguhk, mweidehng en wia noumw soun papah.”21
Sises Krais ieias. Tohnleng kan wie papah.22 Iengen Sises Krais kan “doadoahngki ong ni kamwahupen mehteikan,”23 “kumwail iang peren rehn me kin pereperen kan, oh pil iang sengiseng rehn me kin sengiseng kan,”24 “sinsile [oh] … apwalihkin [irail] ni mehkoaros me pwung,,”25 “taman … me semwehmwe oh me anahn kan, me soumwahu oh ahniki kahpwal,”26 mweidehng Mware en sansal ni atail kin wie papah.27 Ni atail kin papah duwehte Ih, kitail kin kadehde Sapwellime kapai, oh manaman kan.28 Kitail alehdi “doadoahk en samworo ehu.”29
Kitail kak kehlailda. Ahpw sang atail kin papah rasehng Ih “kitail dehr pwangahki atail wiewia mwahu kan.”30 Kitail nantiheng wia wen atail kak, dehr tang marahra sang dahme kitail kakehng,31 ahpw likih, rasehng Wahnpoaron Pohl ah padahngki, me “Koht kin ketin poakohng me kin perenki me kin perenki kihwei mehkot.”32 Pwe Koht “me kin ketikihong soumwet akan kisin werentuhke oh pilawa mehn tungoal, oh katohtowela werentuhke koaros me kumwail padokedier.”33 Me wehwehki, Koht pahn ketin “kupwurehda pwe kumwail en kepwehpwe ni uwe ehu me itar ahnsou koaros.”34 Irail “ me kin kamwarak werentuhke tohto, eh pahn dolung wa tohto.”35
Sohte lipilipil was kitail mihe nan Ihster wet, kitail pwarek oh kesempwalki rasehng atail Sounkomouro, mehlel ohng irail me kitail poakehng oh pwukoahki en papah. Ni atail wia met, kitail sohpeilahng Sises Krais oh ong emen emen kitail, duwehla Ih oh irail akan me kin idahwen Sises Krais nin me E ketin kupwurki. Ni Mwar sarawi, iei Sises Krais, amen.