Ɔkpɔnɔ Esie Ememem Mbiomo Esie Onyuŋ Efefere
Yak nnyin iti ke owo kiet-kiet ke isɔŋ emi edi eyen Abasi ndien ke Abasi ama ofuri owo.
Eting mbuk eke erenowo ekotde Jack emi ekenyenede edima ebua ebin-inuen ekotde Cassie. Jack ama enehede adara Cassie ndien esiwak ndinam-inua kabanga oruk ikikke ebua emi enye edide. Man owut emi, Jack ama okot usuk ufan esie ete edise nte Cassie anamde-nkpo. Ke ema ekedisim ebiet ubin-ikot, Jack okpok Cassie osuk ete efehe akanare nte enye odukde ufok man enehede nkpo eniom.
Kini ekemde nditongo, Jack okoyom ndiwut utibe ikikke eke Cassie. Nte ededi, Cassie akanam nkpo ke esen-esen usung. Enye ikinamke item eke uyo Jack ndomokiet nte enye esiwakde ndinam ke idemesie. Kpukpru se enye okoyomde edi-nam ekedi ndidu ke nkang esie.
Jack ama edikpu ye esuene ye iyatesit ye Cassie; ibighike enye edibiere ete yak mmo enyɔŋɔ. Cassie ikifroke kpak iduk edem truck, ntre ke Jack ye unana-ime emen enye onyung otop esin ke ufok-ebua. Enye editɔhɔ nte mbon ekedude ye enye esakde edu-uwem eke ebua esie ke usung unyong ufok mmo. Jack ikikemeke ndifiok ntak emi Jack akanamde ndisime. Ema ekpep enye nkpo ofon, ndien ofuri udong esie kini edem esidi ndinem eneye esit nnyung nam-nkpo nno enye.
Ke edismde ufok, Jack otongo ndidungore idem Cassie nyom unan, nkukim, mme ndang nte enye esinamde. Nte enye esinde ubok esie ke ikpanesit esie, enye otuk mbit-mbit nkpo, ndie okut ubok esie oyohode ye iyip. Ke obut ye ndik edimum enye, enye okut ke Cassie ama enyene anyan, akwa-unan emi okponde ekesim ɔkpɔ ikpanesit esie. Enye okut akwa-unan efen ke ukot udom esie, efen do ke ɔkpɔ.
Jack emen Cassie akama ke ubok esie onyung otongo nditua. Obut esie ke nte enye ekebiomde onyung esuene ebua oro ama okpon. Cassie ekebe-iso anam se misidige ido esie ke usen oro koro enye ama enyene unan. Ido esie okoto ke ntak ubiak, ufen, ye unan esie. Ikinyeneke nkpo edi-nam ye unana udong ke edikop item Jack mme edinana ima nno enye.1
Ami nkekop mbuk emi ke ediwak isua ko ke edem ndien nkefreke mbuk oro. Ibat owo emi enyenede unan ke nnyin inyene kotu nnyin? Esiwak didie nnyin edise mbon efen ke ndaha eke ikutde ye utom mmo, mme unana utom, ini emi, edieke nnyin itimde ifiok, nnyin iyenam nkpo ke esit-mbom ye udong man anwam ke nde emi ikpedade idiok-ubiere idian ke mbiomo mmo?
Ami mmedue kemi ke ediwak ini ke uwem mi, edi Abasi ke ime edikpep mi oto ke ifiok-ukpep eke idem mi ndien ke nte ami mkpangde-utong nno ifiok-ukpep eke uwem eke ediwak mbon efen. Ami mmenem esit oyoho-oyoho ye uwutnkpo eke edima Andinyanga nnyin nte Enye abiatde ini Esie ndinwam mbon efen ye ima.
Ifiok-ukpep eke mkpri-nkan eyen-anwan mi edisine mfina udongo ekikere tongo kini emi enye ekedide ekpri nkaiferi. Ama odu ediwak ini ke ofuri uwem esie emi enye ekesikerede ke imo ikemeke ndika-iso aba. Ke nsinsi nnyin iyekom mme angel eke isong emi ekenwamde kini oro ke: editie ye enye, edikpaŋ-utɔŋ nnɔ enye, editua ye enye, ukem nko ke edibuana otokiet nsio-nsio eno, ifiok-nkpo Abasi, ye ebuana ima. Ke oruk ndaha ima oro, esiwak ndidibe-de mbiomo ke nkang mbiba .
Elder Joesph B. Wirthlin, okotde Akpa Nwed Mbon Corinth ke ibuot, ete, “Mkpesem usem mme owo ye eke mmwe angel, ndien nnyeneke ima, mmakabare myomo uyom nte akpaŋ-mkpaŋ, nnyuŋ nsioro uyo nte ekpri nkanika”2
Enye aka-iso eting ete:
“Etop eke Paul nno obufa eboho Ikot Abasi emi ekedi ndimem ye akpaniko. Iduhe se afo anamde eke edinamde akamba ukpuhore edieke afo munyeneke ata-ima. Afo emekeme editing ke mme edeme, enyene eno prophecy, ofiok ofuri ndibe-nkpo, onyung enyene ofuri ifiok; kpa edieke afo enyenede mbuotidem ndinam mme ikpo-obot edaha, ata-ima miduhe oro idorike fi nkpo ndomokiet.
‘Ata-ima edi edisana ima Christ’ [Moroni 7:47]. Andinyaŋa ama emen ima oro owut.”3
Ke John nnyin ikoot ete, “Mbufo ema ema kiet eken, kpukpru owo eyeda oro efiok ete mbufo edi mbet Mi.”4
Mme adausung ke Ufok Abasi nnyin eting ediwak iko ebanga ata-ima, edidiana-kiet, ima, mfonido, esit-mbom, erifen-nno, ye mbom. Ami mmenim ke Andinyanga okot nnyin ete idu ke edikɔŋ, edisana usuŋ5—ukem usuŋ imaEsie emi kpukpru owo ekemede ndinehede ndu enyung eda mmo nte owo.
Eteme nnyin ete ima kiet eken,6 ikunyuŋ ibiere-ikpe mmo.7 Yak nnyin iyak edidobi mbiomo oro inim, mmo idige ke nnyin ndibiom.8 Edi, nnyin imikemem edimen okpono ima ye esit-mbom eke Andinyanga.
“Etiene mi, kpukpru mbufo emi ekpade mba enyung ebiomde edidobi mbiomo, ndien Ami nyeno mbufo nduok odudu.
“Emen okpono Mi ekongo ke itong mbufo, enyung ekpebe Mi; …
“Koro okpono mi ememem, mbiomo mi onyung efefere.”9
Andinyanga inyimeke idioknkpo edi ono nnyin ima Esie ndien adian erifen-nno kini nnyin ikabakede esit. Eke nnwan emi ekemumde ke efibe, Enye ete,“ Ami nnyung ntipke fi ikpe; nyɔŋ okuo; kunam aba idioknkpo.”10 Mbon emi Enye okotukde ema ekop imaEsie, ndien ima oro ama ɔkɔk onyung okpuhɔ mmɔ. Ima Esie ama ono mmo ukeme ndi yom edikpuhɔ uwem mmɔ. Ndidu ke usung Esie ada idara ye emem edi, ndien Enye ama okotmbon efen esin ke usung edidu ke ifure-ifure ido, mfonido, ye ima.
Elder Gary E. Stevenson ete: “Kini nnyin inwanade ye oyobio ye edim-itiat, udɔŋɔ ye mme unan eke uwem, Jehovah—Andibɔk nnyin, Andikpeme nnyin—eyebɔk nnyin ke ima ye mfɔnido. Enye eyekɔk esit nnyin onyuŋ afiak emen ukpɔŋ nnyin edi.”11 Nte mme anditiene Jesus Christ, ndi nnyin ikpinamke ukem oro?
Andinyaŋa odoho ete nnyin ikpebe Enye12 inyuŋ inam mme nkpo emi nnyin ikutde nte Enye anamde.13 Enye ɔkɔyɔhɔ ye ata-ima, ke edisana ima. Nte nnyin iwakde ndikpep man inam se Enye ɔdɔhɔ ete nnyin inam—idige nte ubiong mme ke edidiong emi nnyin ikpibɔde edi oto ke ima emi nnyin inyenede inɔ Enye ye Ete nnyin ke Heaven14—ima Esie eyefiɔrɔ oto nnyin onyung anam kpukpru se Enye oyomde okuwɔrɔ osu kpɔt edi ke akpatre enehede emem onyung efefere15 ye ɔyɔhɔ idara akan nte nnyin ikpikerede. Oro eyeyom utom, oro eyeda mme isua, nte ekedide ɔnɔ mi, edi nte nnyin inyenede udong ndiyak ima anam utom ke idem nnyin, Enye ekeme edi-da udong oro,16 mkpasip oro, ke akpatre eyekabare edi ediye eto, emi ɔyɔhɔde ye inem mfri.17
Nnyin imikwɔ ke ndinem ikwɔ nnyin kiet ete: “Ami ndi anie edikpe-ikpe owo efen kini ami minanake mfɔn-ma? Ke ndobo esit oro edi-be mfuhɔ emi enyin mikwe.”18 Anie kotu nnyin ekpenyene ndedibe mfuhɔ? Osong-ibuot ekpri-eyen mme iwaad, nditɔ emi ete ye eka ekewɔrɔde-ke-ndɔ, eka mme ete edide ikpɔŋ, mbon enyenede mfina ke ikpɔhidem mme mfre, mbon emi eyikde mbuɔtidem mmɔ, mbon emi esuade uduot mme eke etukde mmɔ, mbon ekopde ndobo-ikpɔŋ, mbon emi eyomde ndidɔ-ndɔ, mbon edude ye udɔŋ emi mmɔ miyomke, ye ata ediwak mbon efen enwanade ye akpakip nsio-nsio mfina eke uwem—awakde kpa ye mbon eke uwem mmɔ ɔfɔn-ama ke odoro-idem.
Iduhe owo nnyin andinyene mfɔn-ma uwem mme mfɔn-ma ufokemana; ami nnyeneke. Kini nnyin iyomde ndiyire-ntiŋ ye mbon efen nko emi ekutde mme mfina ye unana-mfɔn-ma, oro ekeme edinwam nnyin ikop ete ke mmimɔ idige ikpɔŋ ke nsiŋe uwem mmɔ . Ofuri-owo eyom ndikop ke mmɔ enehede ekam edu ndien ke eyom mmɔ ke ndido-idem eke Christ.19 Akwa udɔŋ eke Satan edi ndibahare ndito Abasi, ndien enye ke okut unen, edi odu akamba odudu ke nnyin edidiana-kiet.20 Ye nte anade nnyin isanga ubɔk ye ubɔk ye kiet eken ke oyobio usung-isang eke uwem isong emi!
Prophet nnyin, President Russell M. Nelson, ete: Esuene mme utuk “ekededi enamde ye owo efen ke ntak idut-owo-otode, uduot, ndaha eren mme nnwan, degree ebɔde ke ufɔknwed, ido, mme idiɔŋɔ efen eke efiɔkde edi emiom ɔnɔ Andibot nnyin. Oruk idiɔk-ido ntre anam nnyin iduŋ isuhɔde ikan ndaha nnyin nte nditɔ iren ye iban ediomi Esie!”21
Kini President Nelson ama okokot kpukpru owo ete eduk enyuŋ edu ke usuŋ ediomo emi edifiakde ida nnyin ibine Ete nnyin ke Heaven, enye nko ama ɔnɔ item emi ete: “Edieke mme ufan mme ufɔkemana … ewɔrɔde ekpɔŋ Ufɔk Abasi, suk ka-ka iso ndima mmo. Idige utom fo ke ndibiere-ikpe eke mbumek owo efen aba akan nte afo odotde ke ndisua nnɔ fi ke edinyene mbuɔtidem.”22
Mme ufan mi, yak nnyin iti ke owo kiet-kiet ke isɔŋ emi edi eyen Abasi23 ndien ke Enye ama kpukpru owo.24 Odu mme owo ke usuŋ fo emi afo ekerede ndibiom-ikpe? Ekpedi ntre, ti ke emi edi mme edifɔn eti-ifet emi edi man nnyin ikpep edima-ima ukem nte Andinyaŋa akamade.25 Nte nnyin itienede uwutnkpɔ Esie , ekeme edidian nnyin ye Enye enyuŋ etɔŋɔ ekikere ima ye edidu ke esit eke ofuri nditɔ eke Ete nnyin.
“Nnyin imima enye, koro enye ekebem-iso ama nnyin.”26 Kini nnyin iyɔhɔde ye ima Andinyaŋa, ke akpanikɔ ɔkpɔnɔ Esie ekeme edimem, ndien mbiomo Esie ekeme edifere.27 K’emi ke ami ntiŋ-ikɔ ntiense ke enyiŋ Jesus Christ, amen.