Ia Fiafia Lou Loto ma Olioli
Ua tatou fananau mai i lenei taimi mo se faamoemoega paia, o le faapotopotoina o Isaraelu.
A o talanoa atu ia Thomas B. March, o se tagata faatoa liliu mai, na fetalai mai ai ma le faamalosiau le Alii, “Ia fiafia lou loto ma olioli, ona ua oo mai le itula o lau misiona” (Mataupu Faaavae ma Feagaiga 31:3).
Ou te talitonu o lenei valaaulia e mafai ona avea o se musumusuga mo tagata uma o le Ekalesia. Aua e moni lava, ua tofu maua uma e i tatou mai lo tatou Tama Faalelagi le misiona o le faapotopotoina o Isaraelu i itu uma e lua o le veli.
Na ta’ua e Peresitene Russell M. Nelson, “o lena faapotopotoina o le mea aupito sili ona taua o loo faia i le lalolagi i aso nei. E leai se isi mea e faatusalia i lona maoae, e leai se isi mea e faatusalia i le taua, e leai se isi mea e faatusalia i le malualii.”1
E mautinoa lava, e tele faamoemoega taua i le lalolagi. E le mafai ona faailoa uma atu. Ae pe e te le fia auai ea i se faamoemoega sili e mafai ona e gafatia ma faia ai e lou sao se eseesega taua? O le faapotopotoina e faia ai se eseesega e faavavau i tagata uma. E mafai e tagata o soo se vaitausaga ona auai i lenei galuega, po o a lava o latou tulaga ma pe o fea foi o latou aumau ai. E leai se isi faamoemoega i le lalolagi e sili ona faaaofia uma ai.
O le talanoa faapitoa atu i le autalavou, na saunoa ai Peresitene Nelson faapea “sa faapolopolo e lo tatou Tama Faalelagi Ana agaga aupito sili ona tamalii—atonu … o Lana ‘au aupito lelei—mo le toe laasaga lenei. O na agaga tamalii—na tagata taaalo silisili ona lelei, na toamanumanu—o outou!”2
Ioe, na saunia outou ao le’i o mai i lenei olaga ma fananau mai i le taimi nei ina ia auai i le galuega sili o le faapotopotoina o Isaraelu i itu uma e lua o le veli i nei aso e gata ai (tagai i le Mataupu Faavae ma Feagaiga 138:53–56).
Aisea ua matuā taua tele ai lenei faamoemoega? Aua “ua tele lava le taua o agaga i le silafaga a le Atua” (Mataupu Faavae ma Feagaiga 18:10). Ma ona “o soo se tasi e talitonu mai ia [Iesu Keriso], ma papatisoina, o ia lava lea o le a faaolaina; ma … o le a mautofi i le malo o le Atua” (3 Nifae 11:33). E le gata i lea, “o mea uma ua i ai [i le] Tamā o le a tuu atu ia” i latou o e mauaina Ana sauniga ma tausia Ana feagaiga (Mataupu Faavae ma Feagaiga 84:38). Ma le isi, “o le au faigaluega e toaitiiti ia” (Luka 10:2).
Ua na o Le Ekalesia a Iesu Keriso o le Au Paia o Aso e Gata Ai tatou te maua ai le mana, le pule, ma le auala e ofoina atu ai se faamanuiaga i isi, pe o soifua pe ua maliliu.
E pei ona saunoa mai Peresitene Nelson: “Soo se taimi e te faia ai soo se mea e fesoasoani ai i soo se tasi—i itu uma o le veli—fai se laasaga agai i luma i le osia o feagaiga ma le Atua ma maua o latou sauniga e tatau ai o le papatisoga ma le malumalu, ua e fesoasoani e faapotopoto Isaraelu. E faigofie lava.”3
E ui e tele auala e fesoasoani ai i le faapotopotoina, ae ou te fia talanoa i se ala faapitoa e tasi: auauna atu o se faifeautalai faamisiona. Mo le toatele o outou, o le uiga o lenei mea o le avea ma faifeautalai faiaoga. Mo le toatele o isi, o lona uiga o le avea ma faifeautalai auauna atu. Ae ua taumafai le lalolagi e tata’iese le autalavou mai lenei tiutetauave sili ona paia e faaaoga ai le fefe ma le lē mautonu.
O nisi mea faalavefau atonu o le aafia i se faama’i oti, tuua o se galuega lelei, tolopo o le aotauina, po o le naunau alofa faapitoa atu i se tasi. E tofu tagata uma ma a latou lava seti o luitau. O ia faalavefau e mafai ona tulai mai i le taimi tonu lava e amata ai i le galuega a le Alii, ma o filifiliga e foliga matilatila mulimuli ane e le faigofie pea i le taimi nei.
Ua ou iloa mai aafiaga le mafaufau fesouaiina o se tagata talavou. A o ou sauniuni e alu i la’u misiona, sa taumafai nisi o malosiaga e faalotovaivaia a’u. O se tasi o lo’u foma’i nifo. Ina ua ia iloa na fai lo’u avanoa e vaai o ia, ina ia ou avea ma se faifeautalai, sa ia taumafai e taofia a’u mai le auauna atu. E le’i i ai sina o’u manatu itiiti sa tetee lo’u foma’i nifo i le Ekalesia.
Sa faigata foi le motusia o la’u aoga. Ina ua ou talosaga mo se malologa e lua tausaga mai la’u polokalama i le iunivesite, sa faailoa mai ia te a’u e le mafai. O le a aveese lo’u avanoa i le iunivesite pe a ou le toe foi mai i le mavae ai o le tasi tausaga. I Pasila, o se mea matautia lenei mea ona talu ai na o le pau le tulaga mo le taliaina i se polokalama faaleiunivesite o se suega matua faigata tele ma tautavā.
I le mavae ai o le faatauanau pea, sa ta’u mai ai ia te a’u ma le musuā e faapea a mavae lo’u toesea mo le tasi tausaga, e mafai ona ou talosaga mo se tuusaunoaga i ni mafuaaga tulaga ese. Atonu o le a faamaonia pe leai foi. Na ou fefe i le manatu o le toe sueina o lena suega ulufale faigata i le mavae ai o le toesea mai a’u suesuega mo le lua tausaga.
Sa ou fiafia faapitoa foi i se tamaitai talavou. Na i ai foi i nisi o aʻu uo lena lava fiafia. Sa ou mafaufau ia te a’u lava ia, “Afai ou te alu i se misiona, ua ou tu’ua a’u i se tulaga lamatia.”
Peitai sa avea le Alii o Iesu Keriso ma a’u uunaiga sili e aua le fefe i le lumanai a’o ou taumafai malosi e auauna atu ia te Ia ma lo’u loto atoa.
Sa i ai foi Lana misiona e faataunuu. I Ana lava upu, sa Ia fetalai mai ai, “Aua ou te le’i alu ifo mai le lagi e fai lo’u lava loto, ao le finagalo o Le ua auina mai a’u” (Ioane 6:38). Ma pe na faigofie ea Lana misiona? E leai. O Lona mafatia, o se vaega taua lea o Lana misiona, na oo ai ia te Ia, “o le Atua lava lea, o lē ua silisili i tagata uma, le gatete ona o le tiga, ma tafe toto ai i pu afu uma, ma mafatia ai i le tino atoa ma le agaga—ma manao ai ia [Ona] lē inuina le ipu oona, ma maʼeʼeʼe—
“A e ui i lea, ia i le Tama le viiga, ma na [Ia] inu ma faaumaina ai [Ana] tapenapenaga mo le fanauga a tagata” (Mataupu Faavae ma Feagaiga 19:18–19).
O le auauna atu i se misiona tala’i e ono foliga faigata mo i tatou. Atonu e manaomia ai lo tatou tuua o ni mea taua mo sina taimi. E silafia moni lava e le Alii lenei mea, ma o le a Ia i ai pea i o tatou autafa.
O le mea moni, i la latou savali i faifeautalai i le Tala’i La’u Talalelei, ua folafola mai ai e le Au Peresitene Sili, “O le a tauia ma matuai faamanuiaina oe e le Alii, a o e auauna atu ma le faamaulalo ma le agaga tatalo ia te Ia.”4 E moni e faamanuiaina fanau uma a le Atua, i soo se itu po o se isi, ae o loo i ai se eseesega i le va o le faamanuiaina ma le matuai faamanuiaina i Lana galuega.
Manatua ia luitau ia sa ou manatu na feagai ma a’u ao le’i alu la’u misiona? O lo’u foma’i nifo? Na ou mauaina se isi. O la’u iunivesite? Sa latou faia se tuusaunoaga mo a’u. Manatua lena tamaitai talavou? Sa ia faaipoipo i se tasi o a’u uo mamae.
Peitai sa matuā faamanuiaina moni a’u e le Atua. Ma sa ou aoaoina o faamanuiaga a le Alii e ala eseese mai nai lo le mea tatou te faamoemoeina. O le iuga lava, o Ona manatu e le o o tatou manatu ia (tagai i le Isaia 55:8–9).
Faatasi ai ma le tele o faamanuiaga silisili ua Ia tuuina mai ia te a’u mo le auauna atu ia te Ia o se faifeautalai faamisiona, o se faatuatua sili atu ia Iesu Keriso mo Lana Togiola ma se malamalama malosi atu ma se molimau i Ana aoaoga, ina ia ou le tosina gofie atu i “matagi uma lava o mataupu” (Efeso 4:14). Sa mouese atu lo’u fefe e aoao atu. Ua faateleina lo’u gafatia e faafetaia’ia ai luitau ma se faamoemoega lelei. O le matauina o tagata taitoatasi ma aiga sa ou feiloai i ai pe na aoaoina o se faifeautalai, sa ou aoao ai e moni aoaoga a le Atua ina ua Ia fetalai mai o le agasala e lē aumaia le fiafia moni ma o le usiusitai i poloaiga a le Atua e fesoasoani ia i tatou e manuia ai faaletino ma faaleagaga (tagai i le Mosaea 2:41; Alema 41:10). Ma sa ou aoaoina mo a’u lava ia o le Atua o le Atua o vavega (tagai i le Mamona 9).
O nei mea uma sa fesoasoani i la’u sauniuniga mo le olaga faatagata matua, e aofia ai le mafai ona faaipoipo ma tulaga faamatua, auaunaga i le Ekalesia, ma le olaga faalegaluega ma i le afioaga.
Ina ua uma la’u misiona, sa faamanuiaina a’u mai le faateleina o lo’u lototoa e tuuina atu lo’u tagata o se soo faamaoni a Iesu Keriso ma Lana Ekalesia i tulaga uma ma tagata uma, e oo lava i le faasoaina atu o le talalelei i se tamaitai lalelei lea o le a avea ma a’u soa faavavau e amio mama, poto, malie, ma faapelepele, o le la susulu o lo’u olaga.
Ioe, na matuā faamanuiaina a’u e le Atua, i le mea e sili atu nai lo mea sa ou mafaufauina, e pei foi o le a Ia faia mo i latou uma o e “auauna atu ia te Ia ma le lotomaualalo ma le agaga tatalo.” Ou te faafetai e faavavau i le Atua mo Lona agalelei.
Na mamanuina atoa e la’u misiona lo’u olaga. Sa ou aoaoina na aoga taumafaiga e faalagolago i le Atua, faalagolago i Lona poto ma le alofa mutimutivale ma i Ana folafolaga. Aua o le mea moni lava, o Ia o lo tatou Tama, ma e aunoa ma se masalosalo, e finagalo o Ia mo le mea sili mo i tatou.
Le autalavou pele i le lalolagi atoa, ou te tuuina atu lena lava valaaulia lea na tuuina atu e lo tatou perofeta, o Peresitene Nelson ia te outou uma ina “ia auai i le ‘autau talavou a le Alii e fesoasoani e faapotopoto mai Isaraelu.” Na saunoa mai Peresitene Nelson:
“E leai seisi mea e sli atu lona taunuuga. E matua leailava.
“O lenei faapotopotoina e tatau ona avea o mea uma ia te oe. O le misiona lenei na auina mai ai oe i le lalolagi.”5
Ua tatou fananau mai i lenei taimi mo se faamoemoega paia, o le faapotopotoina o Isaraelu. Pe a tatou auauna atu o ni faifeautalai faamisiona, o le a luitauina i tatou i nisi o taimi, ae o le Alii lava Ia o lo tatou faataitaiga ma taiala sili i ia tulaga. Na te malamalama i le mea e ta’u o le misiona faigata. O Lana fesoasoani, e mafai ai ona tatou faia mea faigata. O le a i ai o Ia i o tatou autafa (tagai i le Mataupu Faavae ma Feagaiga 84:88), ma o le a Ia faamanuiaina tele i tatou a o tatou auauna atu ia te Ia ma le lotomaulalo.
Mo nei mafuaaga uma, e le o se mea e faate’ia ai a’u i le fetalai mai o le Alii ia Thomas B. March ma i tatou uma, “Ia fiafia lou loto ma olioli, ona ua oo mai le itula o lau misiona.” I le suafa o Iesu Keriso, amene.