Oruh in Oasr Pacl nuhsin Leum
Nga kwacfe nuh suwos mihsenge in lain pwacnlah luhn facluh uh ke kuht oruh in oasr pacl nuhsin Leum ke moul lowos an—ke kais sie lwen ac pengana lwen.
Tamuhlwel ac tahmtahel sacohk luhk, ke lusen lwen luo kuht lutiyuck wo sin mwet kuhlwacnsap luhn Leum suc oaru in suk in etuh lah meac El kena elos in fahk uh.
Utuckuh nuh sesr ma kunacsr nuh ke mahlwem ohnkohsr fahsruh uh. Inge kihsensiyuck uh pa, kuht ac eklac fuhkah ke srihpen ma suc kuht lihpsre ac puhlakihn?
Mas upac sac ahkkahlwemye lah moul uh kuh in sa na eklac, ke kuhtuh pacl ke ohiyac ma wacngihn kuh lasr kac. Tuhsruhktuh, puhs ma kuht kuh in oruh. Kuht akiyac ma yohk srihpac lasr sifacna ac motkolah lah kuht ac orekmakihn fuhkah kuh, pacl, ac ma in kahsruh lasr. Kuht sulaclah lah kuht ac oruh fuhkah nuh sin sie sin sie. Kuht sulwacloslac suc kuht e fah foracng nuh se nuh ke ma pwacye ac kolyuck uh.
Wohwohn ac elyah luhn facluh uh ahklusrohngtwen ac puhslacna. Tuhsruhk puhslac wohwohn ma kikiacp, ahkmuhnahs, ac kuh in ulkuhtlac liki inkacnek luhn wuhlweacng. In kahingkihn inse muhsahl ma e tuhkuh tohkoh an, nga kwacfe nuh suwos mihsenge in lain pwacnlah luhn facluh uh ke kuht oruh in oasr pacl luhn Leum ke moul lowos an—ke kais sie lwen ac pengana lwen.
Fin inkaiyacn sramsram ma kom eis an tuhkuh ke social media kuh kuhtwena ma sahyac, kuh lom in porongo mahmah luhn Nguhn uh e fah srihkeni. Kom fin tiac soklah Leum ke pruhe ac lutlut ke wosasuc ke lwen nuhkwewa, kom e sifacna oruh kom in muhnahs nuh ke sramsram ma sahp eye tuhsruhk tiacna pwacye. Finne Mwet Luhlahlfongi ma oaru emet an kuh in kuhruclac ke wohwohn ma tuhkuh fungul kuht pacl nuhkwewa oacna band luhn Babylon.
Tamuhlwel ac tahmtahel luhk, nga kwacfe suwos in oruh in oasr pacl kowos nuhsin Leum! Sifacna oruh pwelucng in nguhnnguhn lom in fokoko ac in kuh in tu na kuh ke lusen pacl ke kowos oruh ma suc lwelah Nguhn Muhtahl in wi kowos pacl nuhkwewa.
Nimet srihkkihn ma pwacye yohk ma “Nguhn sramsram … ke pwacyeiyacn ma uh, ac ke pwacyeiyacn ma ac fah sikyak.”1 “Ma inge ac fah ahkkahlwemyeyuck nuh suwos ma nuhkwewa ma kowos enenuh in oruh .”2
Wacngihn ma suli Nguhn yohk liki na in siiyac na Jisus Kraist. Sramsramkihn Kraist, kaksak in Kraist, mongo ke kahs luhn Kraist, ac ahkwot nuh met ke luhlahlfongi kuh in Kraist.3 Liyacacng Sabbath lom ke kom alu nuh Sel, ipeis ke kuhfa luhn Leum, ac liyacacng lwen se Lal inge in muhtahl.4
Oacna ke nga ahkyohkye ke lututacng se inge, nuhnakmuhnahs oruh in oasr pacl luhn Leum ke lohm muhtahl Sel. Wacngihn ma e fah ahkfokokoye pwelucng luhn nguhnum oacna mukwikwi tempuhl ac alu tempuhl.
Kuht sang kuloh nuh selos kewa suc orekma ke tempuhl sasuc lasr. Elos muhsahiyuck fin facluh nohfohn. Mihsenge nga engan in ahkkahlwemye plwacn in muhsaheack tempuhl ke acn inge: Kaohsiung, Taiwan; Tacloban, Philippines; Monrovia, Liberia; Kananga, Democratic Republic of the Congo; Antananarivo, Madagascar; Culiacán, Mexico; Vitória, Brazil; La Paz, Bolivia; Santiago West, Chile; Fort Worth, Texas; Cody, Wyoming; Rexburg North, Idaho; Heber Valley, Utah; and reconstruction of the Provo Utah Temple after the Orem Utah Temple is dedicated.
Nga luhngse kowos, tamuhlwel ac tahmtahel sacohk. Leum El etwe kom ac luhngse kom. El pa Mwet Lahngo lom ac Mwet in Molwelah lom. El kol ac pwen Alu Lal. El fah kol ac pwen kom ke moul lom sifacna kom fin oruh in oasr pacl Lal ke moul lom an—ke kais sie lwen ac pengana lwen.
Lwelah tuh God Elan wi kowos ne ke na kuht sifilpac ohsun, nga pruhe ke ine muhtahl luhn Jisus Kraist, amen.