Enenuh nuh ke Alu se
Ma suhmuhslah luti yohk ke oreklac ac enenuh luhn alu se suc kolyuck ke wal luhn Leum lasr, Jisus Kraist.
Pacl loes somlah ah, Elder Mark E. Petersen, mempucr se ke U luhn Mwet Sap Singucul Luo, el muhtwacwacack oruh sramsram se lal ke mwe srihkasrak se inge:
“Kenneth ac muhtwacn kiacl, Lucille, elos mwet na wowo, suwohs ac efahl. Elos tiacna fahsr wi alu, tuhsruhk, elos puhla muh elos wo tena enenuh. Elos luti tuhlihk nahtuhlos ke suwohs ac elah wo ac elos fahk nuh selos sifacna lah pa na ingacn ma Alu uh e oruh nuh selos.
“Ac, ne ohinge, elos ahkweye muh elos enenuh lwen in monglac lalos uh nuh ke srtiacl in sucu … [ac] toeni ke alu ah e ahkfohsyacltahl.”1
Mihsenge, pweng luhk uh som nuh sin mwet wo ac etuh wosasuc suc tui tilac fahsr wi alu.2 Ke nga fahk “alu,” nga oracni kewa lohm in alu, acn in toeni kuh oacna sie inkucl in toeni alu. Kuht akihlen lah mwet fahsr wi alu uh suhpuhseni na, fin facluh nohfohn.3 Fin kuht tulokihnyac yohk srihpen alu lasr uh ke oacna sie srihpac, kuht ahkkolukyelah moul in nguhn lasr uh, ac ma puhkantwen sahyac ma sriluhloslac liki God pwacnwacng srihkeni mwe insewowo Lal nuh sesr.
Fahsr wi alu ac mukwikwi lasr ke alu uh kahsre kuht in wolac liki meet ah ac in akiyac srihkasrak wo nuh sin mwet sahyac. Ke Alu uh kuht luti lah kuht e moulkihn fuhkah ip yohk ke wosasuc. Kuht alutluti. Srihkasrak wowo lasr uh fokoko liki na in tuyak luti. Nuhnak lasr uh fokoko ke kuht wi inmahsrlon mwet oacna kuht uh. Ke kuht fahsr wi alu ac wi mukwikwi orek ke alu uh, insiacsr, oacna ke Bible uh fahk, “akfototoyalos nu sin sie sin sie ke lungse.”4
I.
Ma suhmuhslah ma God El sang nuh sin mwet Christian ke Bible uh ac ma fwackyuck kuht eis ingena lihksreni na luti enenuh nuh ke alu. Kwewana ahkuhtweyac lah Jisus Kraist El akiyac alu se ac motkelah lah alu sacn e us orekma Lal ac fahsr Tohkohl. El pahngon Mwet Sap Singucul Luo ac sang nuh selos wal ac ki in kol. Bible uh luti lah Kraist pa “sifin church”5 ac mwet kac elos ituckyang “in akoelah mwet lun God nukewa nu ke orekma lun mwet Christian in musaeak monin Christ.”6 Pacyena Bible uh fahklah kahlwem ke oreklac luhn alu ac enenuh nuh kac ingena uh.
Kuhtuh fahk muh fahsr wi alu uh tiacna kahsrelos. Kuhtuh fahk muh, “Wacngihn ma nga lotwelah misenge” kuh “Wacngihn mwet lohme nuh sihk” kuh “Nga puhla mwekihnlac.” Ma suhpwacr lasr sifacna uh tiac enenuh in tulokihn kuht liki mwe luti luhn Kraist, suc luti kuht in kuhlwacnsap , ac tiac in kuhlwacnsuhpweyuck.7 Ke ma inge ke nuhnak lasr, siepac mempucr ahkuhtweyac srihpac se el wi Alu:
“Yac puhs somlah ah, nga ekuhllah elah luhk ke nga fahsr wi alu uh. Nga tiac fahsr nuh ke alu ah ke srihpuck, tuhsruhk nga nuhnkuh ke mwet sahyac ah. Nga akihlen mwet muhkwena muhta in pwainguhlos, nga pwaing mwet muhtwacta, … ac sifacna saplak in kahsruh nuh ke kunohkohn se. …
“In ahkfototoye,nga fahsr wi alu ke kais sie wik ke kena se luhk in sifacna liye lah mac nga kuh in oruh ac tiac sano in fwack ma ngacn oruh, ac in oraclah sie eklac na yohk ke moul luhn mwet.”8
Prestuhn Spencer W. Kimball el tuh luti lah kuht tiac som wi toeni in Sacnri in tuh ahkpwacryeyuck kuht kuh in lutiyuck. Kuht som in alu nuh sin Leum. Ma kunacsr kais sie. … Fin kom muh alu ah puhtatlac, kom pa puhtatlac uh. Wacngihn mwet kuh in alu lom; enenuh kom in sifacna oruh sano lom nuh sin Leum.9
Fahsr wi alu lasr uh kuh in ikacslah insiacsr ac ahkmuhtahlye nguhnasr.
Ke alu ah kuht tiacna sifacna oruh kuhlwacnsap uh ke sulaclah lasr sifacna kuh ke kena lasr. Kuht kwacna oruh kuhlwacnsap lasr uh ekihn u se. Ke kuhlwacnsap kuht konwacack inkacnek tuhkuh lucng me suc oruh kuht pihsrlac liki ohiyacn nuhnkuh kac sifacna luhn mwet matwacsr uh. Kunohkohn kuht eis ke alu uh kahsre kuht in kuhtanglah insefuhlwact lasr ma sruokuht in puhla nguhn.
Puhkantwen ma wo kuht kuh in sruhmuhn pac kac, finne fototo. Ke alu ah kuht ohsun nuh sin sie mwet na wowo suc suk in kuhlwacnsuhpuh God. Ma se inge ahkacsmakihnye kuht lah kuht tiacna muhkwena ke mukwikwi lasr ke alu uh. Kuht nohfohna enenuh akacsruhi yurin mwet sahyac, ac toeni ke alu uh pa wo emet in puhla, nuh sesr ac nuh sin kawuck lasr ac tuhlihk nahtuhsr. E fin wacngihn toeni inge, yohkna inmahsrlon tuhlihk ac ninac pahpah, mwet lahlmwetmwet sokwack lah e arulacna upac in tuhfahlah tuhlihk se ke luhlahlfongi lalos.10
II.
Ne ingena, nga sramsram yohkna ke alu. Ingena nga ke akacsruhi ke yohk srihpaciyacn mempucr lasr uh, fahsr wi alu, ac in wi ma orek ke alu fohlohkihnyuckyak luhn Mwet Lahngo ke Alu luhn Jisus Kraist luhn Mwet Luhlahlfongi ke Lwen-sahflah.
Ahok, pwacye kuht, ahkweye lah ma suhmuhslah, omeet ah ac ingena, luti yohk ke oreklac ac enenuh luhn alu se suc kolyuck ke wal luhn Leum lasr, Jisus Kraist. Kuht oacyacpac fahkwack lah Alu fohlohkihnyuckyak luhn Jisus Kraist tuh akwucki in luti ke fohnlah luhn mwe luti Lal ac oruh kunohkohn ke kuh luhn pristut Lal in oruh akwuck ma enenweyuck in ilyak nuh ke tohkohsrahi luhn God.11 Mempucr ma tiacna fahsr wi alu ac luhlahlfongi muh elos wo ac fal sifacna ahkloesye inmahsrlolos liki wosasuc na yohk srihpac se inge: nuh ke kuh ac mwe insewowo ke pristut, ac fohnlah ke fohlohkyak luhn wosasuc, ac kampare kuh ohiyac in orekmakihn mwe luti sacn. Elos tohllah pacl wo lalos in oraclah wo fal in ahkno sucu lalos nuh tok ma pahtpaht.
Sie pac ma wo yohk ke fohlohkyak luhn Alu uh pa el kahsre kuht in kapkapwack in nguhn. Kalmacn kapkapwack pa eklac. Kalmac nuh ke nguhn pa in auliyak ac suk in fototoi nuh yurin Leum. Ke fohlohkihnyuckyak luhn Alu uh oasr mwe luti, inkacnek, ac mwet in kahsruh mokleyuck suc kasre kuht in auliyak. Srihpac lalos uh, finne ke council luhn mempucr, tiacna mwe kai kuht, oacna ke ma e muhta sikyak lohm in nuhnuhnkuh. Mempucr ke Alu uh tuhkweni muhta asramsrami in kahsre kuht in muh kuh in eis pahkomuhta luhn nuhnakmuhnahs ma oreklac ke Iwaclah luhn Jisus Kraist.
Nguhn lasr sifacna uh sukwac use kampare se lasr kuh kena in kahsruh lasr oacna ke kuht eis yurin Alu uh. Sie srihkasrak na wowo kac uh pa mukul fuhsr ac muhtwacn fuhsr ac siyacnyacn mahtuh ma fihliyac lutlut lalos kuh tilac orekma ma oruh kuhlwacnsap lalos ekihn misinacri. Elos luti wosasuc nuh sin mwet ac acn elos tiacna etuh kuh sulaclah. Ma se inge som oacna nuh sin mempucr yohk luhlahlfongi la suc eisaclos nuh ke kunohkohn oal se “orekma ke tempuhl.” Wacngihn sin ma inge kuh in fahlac wo fin wacngihn Alu uh tiacna kahsruh, ahkwoye, kuh kol.
Luhlahlfongi luhn mempucr ac kuhlwacnsap lalos ke Alu uh lotwelos in etuh in orekma in kahsruh pac mura lalos. Kain in orekma ac kapkapwack lalos ingacn tiacna sikyak nuh sin sie sie ac sa na fahsrwelihk nuh ke oruh lasr mihsenge uh. Ke akwucki luhn u srihsrihk ke ward lasr uh, kuht kuhpahsryang ac wi mwet orekma ma kuht tiacna sulaclah, mwet luti kuht ac srihfwekuht.
In kahsre kuht in kuh in kapkapwack in nguhn kain nuh ke luhngse, pahkotwen, eis nuhnakmuhnahs, ac muhtweng, ma inge use inkacnek se in etuh in wi kain in mwet orekma lah elos mwet fuhkah kuh fuhkah ataclos. Ma wowo se inge kahsruh mempucr puhkantwen ac u srihsrihk puhkantwen ahkinsewowoyacltahl ke srihpen wi lalos. Mwet Luhlahlfongi ke Lwen-sahflah elos etweyuck ke ohiyacn kol lalos ac in oracni mwet uh in ma se fana. Facsin se inge sramtweyuckyak sin mwet puhlaik suc suk in akwucki ke inmahsrlon acn Finohl Rohtoh ac akiyac pac facsin mahtuh ke kuhlwacnsap wowo nuh sin nuhkwewa.
Inkaiyen orekma nuh ke kahsrweyacn mwet suhkahsruhp uh enenuh oracniyacn ac orekmakihnyacn mani luhn kais sie mwet ke ohiyac yohk. Alu uh oruh kahsruh na luhlahp se inge nuh sin muhtuhnfacl uh nohfohn. Kahsruh inge som pac nuh ke lutlut ac kuhfwen ono, kihte mwet masrinsrwacl, karihngihn mwet enenuh kahsruh, kahsruh in ekuhllah liyac luhn mwet uh, ac puhs pac ma sahyac. Mempucr ke Alu uh etweyuck ke kahsruh lalos ke project se pahngpahng Helping Hands nuh ke pacl ongaiyac. Mempucrlac lasr ke Alu uh oruh kuht in muh wi puhlakihn ma na yohk srihpac inge. Mempucr an elos oacyacpac sang mwe sang ke lalo in kahsruh elos suc enenuh inmahsrlolos.
In weacng pacna puhla mihs ac engan lasr ke oasr luhn Nguhn uh, mempucr ma fahsr wi Alu uh engankihn pac fukun wosasuc, pa nuh ke mwe insewowo ke moulkihn Kahs in Lahlmwetmwet ac mwe insewowo kuht eis ac tuhfah eis ke kuht ahkos masap ke sie tahfuh singucul. Kuht oacyacpac insewowo in eis kahs in kahsruh yurin mwet kol mokleyuck inge.
Yohk srihpac emet ke ma inge nuhkwewa pa akwuck ke wal luhn pristut ke ma enenweyuck nuh ke moul ma pahtpaht, weacng ipeis kuhfa luhn Leum ke lwen Sacnri. Akwuck yohk se emet ke fohlohkihnyuckyak luhn Alu uh pa macruht ke wuhlweacng ma wacngihn sahflahiyac, ma use engan inmhasrlon sucu ne tok. Prestuhn Russell M. Nelson el luti ip yohk se inge ke ohiyac acsmakihnyuck se. El fahk lah kuht tiac kuh in finsrak muhkwena ke inkacnek lasr nuh ye muhtuhn God. Kuht enenuh in ahkos masap ma [mwe insewowo se] se ingacn akwucki kac uh.12
Sie masap ingacn pa in alu ke lohm in alu ke lwen Sacnri.13 Alu lasr ac inkacnek in eis ip yohk lasr nuh tok ma pahtpaht uh pwenkuht in fototo nuh yurin God ac ahkyohkye ac ahkweye kena lasr in luhngse. Parley P. Pratt, sie sin mwet Tuhma Lutlut ke fihlin pacl se inge, el ahkuhtweyac ma el puhlakihn ke Mwet Pahluh Joseph Smith el ahkuhtweyac ma inge: Nga puhla lah pwacyena God El Pahpah tuhmuhk inkuhsrao; lah Jisus El tamuhlwel se wiyuck, ac muhtwacn kiyuck kuh ninac kiacn tuhlihk nuhtihk el muhtwacn kawihl kiyuck ne tok: sie lipufacn kuhlwacng, kahsruh se, suc utuckuh nuh sihk in ahkmihsyeyuc, ac sie tefuroh nuh tok ma pahtpaht. In ahkfototoye, nga kuh in luhngse ke nguhn ac ke etatwen luhk pac.14
In kaliyac, lwelah nga in ackacsmakihnye kuht kwewa lah kuht tiac luhlahlfongi muh ma wo uh kuh in ahkfahsryeyucklac muhkwena ke alu. In srenglah nuh ke alu, kuht liye mwet pucspucs ke elos kahsruh in wi karihngihn ahkfahsrye orekma wo pucspucs. Kais sie, Mwet Luhlahlfongi ke Lwen-Sahflah wi oruh kain in ma inge. Kuht liye orekma inge lah ahkpwacyei ma pwacye ma pahtpaht ma Nguhn sang kahwelm nuh sin mwet nuhkwewa ma tuhkuh nuh facluh.15
Finne alu uh tiacna wi kuhtuh orekma wo ma ahkfahsryeyucklac uh, fohnlah luhn mwe luti ac akwuck in molwelah ac enganwack uh oasr muhkwena ke Alu fohlohkyak se inge. In weacng, fahsr wi Alu lasr uh use kuh ac ahkyohkye luhlahlfongi lasr uh ke kuht kuhpahsryang nuh sin mwet luhlahlfongi sahyac in weluhlos ahkfuhlwact ac srihke in fahsr ke inkacnek in wuhlweacng ac in kuh in mwet tuhma lutlut luhn Kraist. Nga pruhe tuh kuht nuhkwewa in tu na kuh ke ma kuht puhlakihn ke Alu uh ke kuht suk moul ma pahtpaht, mwe sang yohk se emet luhn God, ke inen Jisus Kraist, amen.