Lub Tuam Rooj Sab Laj
Cia Vajtswv Yeej
Kaum Hli Ntuj xyoo 2020 lub Tuam Rooj Sab Laj

Cia Vajtswv Yeej

Los ntawm Thawj Tswj Hwm Russell M. Nelson

Thawj Tswj Hwm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg

Nej puas txaus siab cia Vajtswv yeej hauv nej lub neej? Nej puas txaus siab cia Vajtswv ua tus tseem ceeb tshaj plaws hauv nej lub neej?

Kuv cov kwv tij thiab cov muam, kuv zoo siab heev rau tej zaj lus zoo kawg uas hais hauv lub rooj sab laj no thiab zoo siab uas kuv yuav hais lus rau nej tam sim no.

Rau 36 xyoo uas kuv yog ib tug Thwj Tim, kuv nyiam kawm txog cov lus qhuab qhia txog kev muab Ixayees sau los ua ke.1 Txhua yam txog qhov no los kuv yeej xav paub, tsis hais tej hauj lwm qhuab qhia thiab tej npe ntawm2 Anplaham, Ixaj, thiab Yakhauj; lawv lub neej thiab cov poj niam; txoj kev khi lus uas Vajtswv tau ua rau lawv thiab muab rau lawv cov xeeb leej xeeb ntxwv;3 kaum ob xeem neeg txoj kev tawg rau ub rau no; thiab cov yaj saub tej lus txog qhov uas yuav muab lawv sau los ua ke nyob hauv peb lub caij nyoog.

Kuv tau kawm txog txoj kev sau los no, tau thov Vajtswv, nyeem txhua nqe vaj lug kub, thiab thov tus Tswv kom pab kuv to taub ntxiv.

Yog li ntawd kuv zoo siab kawg thaum kuv tau kawm ib yam tshiab. Nrog ob tug kws kawm txuj Henplais txoj kev pab, kuv tau kawm tias ib lub ntsiab ntawm lo lus Ixayees yog “cia Vajtswv yeej.”4 Yog li ntawd lub npe Ixayees hais txog ib tug neeg uas txaus siab cia Vajtswv yeej nyob hauv nws lub neej. Lub ntsiab no tshoov kuv lub siab heev!

Lo lus txaus siab yeej tseem ceeb rau lub ntsiab ntawm Ixayees no.5 Peb txhua tus muaj kev ywj siab xaiv. Peb muaj peev xwm xaiv koom nrog Ixayees, los sis tsis koom nrog lawv. Peb muaj peev xwm xaiv cia Vajtswv yeej hauv peb lub neej, los sis tsis xaiv cia Nws ua li ntawd. Peb muaj peev xwm xaiv cia Vajtswv muaj hwj huam hauv peb lub neej, los sis tsis xaiv ua li ntawd.

Rau ib me pliag, cia peb nco txog ib lub sij hawm tseem ceeb nyob hauv Yakhauj, Anplaham tus xeeb ntxwv, lub neej. Nyob hauv ib qho chaw uas Yakhauj hu ua Peniyees (uas txhais hais tias “Vajtswv lub ntsej muag”),6 Yakhauj muaj ib qho teeb meem loj heev. Nws txoj kev ywj siab xaiv raug sim. Los ntawm kev sim siab no, Yakhauj qhia tias qhov twg yog qhov tseem ceeb rau nws. Nws qhia tias nws txaus siab cia Vajtswv yeej hauv nws lub neej. Yog li ntawd, Vajtswv tau hloov Yakhauj lub npe los ua Ixayees,7 uas txhais tias “cia Vajtswv yeej.” Ces Vajtswv tau cog lus rau Ixayees tias tag nrho cov koob hmoov uas Nws foom rau saum Anplaham lub taub hau los Ixayees kuj yuav txais.8

Tu siab uas Ixayees cov xeeb leej xeeb ntxwv tau rhuav lawv txoj kev khi lus nrog Vajtswv. Lawv txawb pob zeb rau cov yaj saub tsis txaus siab cia Vajtswv yeej hauv lawv lub neej. Yog li ntawd, Vajtswv tau muab lawv tawg rau plaub ceg kaum ntuj.9 Nws muaj siab hlub lawv, Nws thiaj li cog lus tias Nws yuav muab lawv sau los ua ke, raws li Yaxayas tau qhia hais tias: “Kuv tau tso koj tseg ib nyuag pliag xwb, tiam sis nrog txoj kev hlub tshua heev kuv yuav sau koj rov qab.”10

Thaum yus xav txog lub ntsiab ntawm lo lus Henplais Ixayees, ces peb kawm tias kev muab Ixayees sau los ua ke muaj ib lub ntsiab ntxiv. Tus Tswv muab cov uas txaus siab cia Vajtswv yeej hauv lawv lub neej sau los ua ke. Tus Tswv sau cov uas yuav xaiv cia Vajtswv ua tus tseem ceeb hauv lawv lub neej.

Rau ntau xyoo, cov yaj saub tau hais txog txoj kev sib sau ua ke no,11 thiab muaj li lawv hais tam sim no! Vim qhov no yog ib qho uas yuav tsum muaj ua ntej tus Tswv txoj Kev Los Zaum Ob, txoj hauj lwm no yog txoj hauj lwm tseem ceeb tshaj plaws hauv lub ntiaj teb tam sim no!

Txoj kev sau los ua ke ua ntej lub caij milenias yeej yog los ntawm tib neeg txoj kev ntseeg uas loj tuaj zuj zus thiab txhiab txhiab tus neeg txoj kev ua siab loj. Thiab vim peb yog cov mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, los yog “Ixayees uas tau khi lus hauv hnub nyoog kawg,”12 tus Tswv tau txib peb pab nws ua txoj hauj lwm tseem ceeb no.13

Thaum peb hais txog kev muab Ixayees sau los ua ke nyob ob sab ntawm daim ntaub thaiv, peb hais txog tej hauj lwm ua tub txib ntxhais txib, tej hauj lwm hauv lub tuam tsev, thiab kev nrhiav tsev neeg zaj keeb kwm. Peb kuj hais txog kev txhawb kev ntseeg thiab tej zaj lus tim khawv hauv cov neeg lub siab, cov uas nrog peb ua hauj lwm thiab peb pab lawv. Txhua lub sij hawm peb ua ib yam dab tsi pab lwm tus kom ua raws li lawv tej kev khi lus rau Vajtswv—tsis hais nyob sab twg ntawm daim ntaub thaiv los yog—peb pab muab Ixayees sau los ua ke.

Tsis ntev tas los, tus poj niam ntawm peb ib tug tub xeeb ntxwv nyuaj siab heev. Kuv yuav hu nws ua “Jill.” Txawm yog cov neeg tau yoo mov, thov Vajtswv thiab foom koob hmoov pov thawj hwj rau nws los, Jill txiv tab tom yuav tso lub ntiaj teb no tseg. Nws ntshai ntshai hais tias nws yuav xiam nws txiv thiab nws zaj lus tim khawv ib yam.

Muaj ib hmo, kuv tus poj niam, Muam Wendy Nelson, tau qhia kuv txog Jill. Tag kis thaum sawv ntxov Wendy tau txais kev tshoov siab qhia rau Jill tias kuv tau teb ib lo lus xwb thaum kuv hnov txog nws txoj kev nyuaj siab. Lo lus ntawd yog myopic los yog tsis txawj pom yav tom ntej.

Jill lees rau Wendy thaum xub thawj nws poob siab nthav vim kuv teb li ntawd. Nws hais tias, “Kuv xav kom Txiv Yawg cog lus rau kuv tias yuav muaj ib qho txuj ci tseem ceeb los rau kuv txiv. Kuv xav xav paub seb vim li cas myopic yog lo lus uas nws hais xwb.”

Tom qab Jill txiv tas sim neej no, lo lus myopic pheej los nkag hauv nws lub siab. Nws qhib nws lub siab kom to taub ntxiv hais tias myopic txhais tias “pom qhov ze xwb.” Ces nws txoj kev xav pib hloov. Ces Jill hais tias, “Myopic ua rau kuv nres, xav xav, thiab txais kev kho mob. Tam sim no lo lu ntawd ua rau kuv nyob kaj siab lug. Kuv nco qab tias kuv yuav tsum pom qhov dav dua thiab nrhiav tej uas nyob mus ib txhis. Ua rau kuv paub tias muaj ib txoj hau kev thiab kuv txiv tseem muaj txoj sia nyob thiab hlub kuv thiab saib xyuas kuv.. Myopic ua rau kuv paub txog Vajtswv.”

Kuv yeej zoo siab rau peb tus ntxhais xeeb ntxwv uas muaj nqis heev. Thaum lub sij hawm ntxhov siab heev, Jill tab tom kawm muab siab npuab Vajtswv lub siab nyiam rau nws txiv, thiab muaj ib lub zeem muag pom mus ib txhis rau nws lub neej. Thaum nws xaiv cia Vajtswv yeej, nws nrhiav tau kev kaj siab lug.

Yog peb yuav cia muaj li no, muaj ntau yam uas txoj kev txhais lo lus Henplais Ixayees yuav pab peb. Cia li xav seb peb tej lus thov Vajtswv pab peb cov tub txib ntxhais txib—thiab peb txoj kev siv zog muab Ixayees sau los ua ke—yuav hloov li cas thaum peb xav txog lub ntsiab no. Peb yeej thov Vajtswv kom coj peb thiab cov tub txib ntxhais txib mus rau cov uas npaj siab txais tej yam tseeb ntawm Yexus Khetos txoj moo zoo. Kuv xav seb Nws yuav coj peb mus rau leej twg thaum peb thov kom nrhiav cov uas txaus siab cia Vajtswv yeej hauv lawv lub neej?

Tej zaum Nws yuav coj peb mus rau ib txhia uas tsis ntseeg Vajtswv los sis Yexus Khetos tiam sis tam sim no xav kawm txog Nkawd thiab Nkawd txoj hau kev zoo siab. Tej zaum lwm tus tau “yug los ntawm txoj kev khi lus”14 tiam sis lawv tau tawm hauv txoj kev khi lus lawm. Tej zaum yuav tsum hloov siab lees txim, rov qab los, thiab cia Vajtswv yeej. Peb yuav pab lawv thaum peb qhib siab tos txais lawv. Thiab tej zaum Vajtswv yuav coj peb mus rau cov uas yeej xav tias muaj dab tsi uas lawv tsis muaj hauv lawv lub neej. Lawv kuj xav tau kev xyiv fab uas los rau cov uas txaus siab cia Vajtswv yeej hauv lawv lub neej.

Txoj moo zoo lub vas uas ntaus kom muab Ixayees sau los ua ke yog ib lub vas loj heev. Muaj chaw rau txhua tus neeg uas yuav muab siab npuab Yexus Khetos txoj moo zoo. Txhua tus neeg hloov siab los ntseeg yeej los ua Vajtswv cov me nyuam khi lus,15 tsis hais los ntawm txoj kev yug los sis txoj kev txais yuav. Txhua tus yuav txais tag nrho tej uas Vajtswv tau cog lus rau Ixayees cov me nyuam rau siab ntseeg los ua lawv tug!16

Peb txhua tus muaj peev xwm los ua neeg zoo li Vajtswv vim txhua tus yog Vajtswv tus me nyuam. Nws saib txhua tus muaj nqis ib yam. Lub ntsiab ntawm qhov tseeb no yeej tseem ceeb kawg. Cov kwv tij thiab cov muam, thov ua tib zoo mloog tej uas kuv yuav hais. Vajtswv tsis hlub ib haiv neeg ntau dua li Nws hlub lwm haiv neeg. Nws cov lus qhuab qhia yeej meej. Nws caw txhua tus kom los cuag Nws, “cov neeg dub [thiab] cov neeg dawb, cov neeg ua qhev [thiab] cov neeg ywj pheej, … poj niam [thiab] txiv neej.”17

Kuv qhia kom nej paub tias Vajtswv tsis txiav txim rau nej raws li nej daim tawv nqaij yog xim dab tsi. Qhov uas Vajtswv pom zoo rau yus yeej nyob ntawm nej txoj kev hawm Vajtswv thiab kev ua raws li Nws cov lus txib tsis yog vim nej daim tawv nqaij yog xim dab tsi.

Kuv tu siab heev uas peb cov kwv tij thiab cov muam uas muaj daim tawv dub nyob thoob plaws lub ntiaj teb no tau raug kev ntxub ntxaug vim lawv yog lwm haiv neeg. Hnub no kuv hais kom peb cov mej zeej nyob txhua qhov chaw coj kev rau txhua tus kom muab lawv tej kev xav thiab tej yam lawv ua los ntawm kev xaiv ntsej muag tso tseg. Kuv thov kom nej txhua tus siab txhua tus ntawm Vajtswv cov me nyuam rau nqi.

Qhov uas peb txhua tus yuav tsum nug, tsis hais peb yog haiv neeg twg, los yeej zoo ib yam. Nej puas txaus siab cia Vajtswv yeej hauv nej lub neej? Nej puas txaus siab cia Vajtswv ua tus tseem ceeb tshaj plaws hauv nej lub neej? Nej puas yuav cia Nws cov lus, Nws cov lus txib, thiab Nws tej kev khi lus hloov tej yam nej ua txhua hnub? Nej puas yuav cia Nws lub suab nrov dua li lwm lub suab? Nej puas txaus siab ua tej yam twg uas Nws xav kom ne ua ua ntej nej ua lwm yam? Nej puas txaus siab cia nej lub siab nyiam ywj rau Nws li?18

Cia li xav seb txoj kev txaus siab li no yuav foom koob hmoov rau nej li cas? Yog tias nej tsis tau yuav txiv los yuav poj niam thiab nej nrhiav ib tug khub mus ib txhis, nej txoj kev xav koom nrog Ixayees yuav pab nej txiav txim siab yuav tham leej twg.

Yog tias nej twb yuav txiv los yuav poj niam lawm es nej tus khub tau rhuav nws tej kev khi lus, nej txoj kev txaus siab cia Vajtswv yeej hauv nej lub neej yuav pab nej tseem ua raws li nej tej kev khi lus rau Vajtswv. Tus Cawm Seej yuav kho nej lub siab puas tas. Tej rooj ntug yuav qhib thaum nej nrhiav kev paub mus tom ntej. Nej tsis tau ua loj leeb los sis xav paub yuav tsum ua dab tsi.

Yog tias nej muaj lus nug txog txoj moo zoo los sis lub Koom Txoos, thaum nej xaiv cia Vajtswv yeej, Nws yuav coj nej kom to taub tej yam tseeb tiag uas yuav coj nej mus thiab pab nej taug raws nraim li nej tej kev khi lus.

Thaum nej raug ntxias—tsis hais kev ntxias uas los thaum nej nkees tas los sis nej kho siab los yog tsis muaj leej twg to taub nej—cia li xav seb nej yuav ua siab loj npaum li cas yog nej xaiv cia Vajtswv yeej hauv nej lub neej thaum nej thov Nws kom txhawb nej lub dag zog.

Thaum twg nej xav cia Vajtswv yeej xwb, xav koom nrog Ixayees, ces tej kev txiav txim feem ntau haj yam yooj yim txiav. Tej teeb meem ntau heev ploj mus xwb! Yus paub tu yus tus kheej. Yus paub saib thiab nyeem dab tsi, siv sij hawm li cas, thiab ua phooj ywg nrog leej twg. Yus paub tias yus xav ua dab tsi. Yus paub tias yus xav ua ib tug neeg zoo li cas.

Kuv cov kwv tij thiab cov muam, yuav tsum muaj kev ntseeg thiab ua siab loj kom cia Vajtswv yeej. Yuav tsum siv zog rau siab ua hauj lwm ntawm sab ntsuj plig kom hloov siab lees txim thiab tso tus neeg ntawm sab cev nqaij daim tawv tseg dhau los ntawm Yexus Khetos txoj Kev Theej Txhoj.19 Yuav tsum niaj hnub rau siab kawm txoj moo zoo, kom kawm ntxiv txog Leej Txiv Saum Ntuj Ceeb Tsheej thiab Yexus Khetos, thiab nrhiav thiab ua li cas thaum txais kev tshwm sim.

Nyob hauv lub caij nyoog txaus ntshai no uas tus Thwj Tim Povlauj tau qhia txog,20 Dab Ntxwg Nyoog tsis sim npog nws txoj kev tawm tsam Vajtswv txoj hau kev. Kev phem uas muaj zog nyob txhua qhov chaw. Yog li ntawd, tib txoj kev uas nej sab ntsuj plig tiv taus yog kev txiav txim siab cia Vajtswv yeej hauv peb lub neej, kawm mloog Nws lub suab, thiab siv zog pab muab Ixayees sau los ua ke.

Nim no, tus Tswv xav li cas txog cov neeg uas yuav cia Vajtswv yeej? Nifais tau hais li no: “[Tus Tswv] hlub cov uas xav tau nws los ua lawv tus Vajtswv. Saib seb, nws hlub peb cov poj koob yawm txwv, thiab nws khi lus rau lawv, muaj tseeb tiag, twb tau khi lus rau Anplaham, Ixaj, thiab Yakhauj; thiab nws nco ntsoov cov lus uas nws tau khi tseg; yog li ntawd, nws thiaj tau coj lawv tawm ntawm lub teb chaws Iyiv.”21

Thiab tus Tswv txaus siab ua dab tsi rau Ixayees? Tus Tswv tau cog lus tias Nws yuav “ntaus [peb] tej pluav rog, thiab [peb] cov me nyuam tej pluav rog, thiab cov me nyuam ntawm [peb] cov me nyuam tej [pluav rog], … mus rau tiam neeg thib peb thiab thib plaub”!22

Thaum nej kawm nej cov vaj lug kub rau lub hlis tom ntej no, kuv xav kom nej sau ntawv txog tag nrho tej yam uas tus Tswv tau cog lus tias Nws yuav ua rau Nws cov neeg khi lus Ixayees. Kuv xav tias nej yuav xav tsis thoob! Cia li xav txog tej lus cog tseg no. Sib tham txog tej lus no nrog nej tsev neeg thiab phooj ywg. Ces saib thaum muaj raws li tej lus cog tseg no nyob hauv nej lub neej.

Kuv cov kwv tij thiab cov muam, thaum nej xaiv cia Vajtswv yeej nyob hauv nej lub neej, nej yuav paub nej tus kheej hais tias peb tus Vajtswv yog “b tug Vajtswv ua txuj ci tseem ceeb.”23 Peb yog Nws cov me nyuam khi lus, thiab peb yuav ris Nws lub npe. Kuv ua tim khawv txog qhov no los ntawm Yexus Khetos lub npe dawb ceev, amees.

Lus Cim

  1. Kuv tau hais txog Ixayees nyob hauv kwv yees li 378 zaj lus ntawm 800 zaj lus uas kuv tau hais txij thaum kuv pib ua ib tug Thwj Tim 36 xyoo tas los.

  2. Nyob hauv lus Henplais, Anplas yog ib lub npe zoo txhais tias “leej txiv uas tsa nto.” Tiam sis thaum Vajtswv muab lub npe ntawd hloov los ua Anplaham, ces lub npe ntawd yeej tseem ceeb dua, txhais hais tias “leej txiv rau neeg coob.” Muaj tseeb tiag, Anplaham yuav los ua “leej txiv rau ntau haiv neeg.” (Saib Chiv Keeb 17:5; Nehemis 9:7.)

  3. Tus Tswv Vajtswv Yehauvas tau khi lus nrog Anplaham hais tias tus Cawm Seej ntawm lub ntiaj teb yuav yug los ntawm Anplaham cov xeeb ntxwv, yuav muab tej thaj av los ua nws tug, thiab txhua haiv neeg yuav tau koob hmoov los ntawm Anplaham cov xeeb leej xeeb ntxwv (saib Bible Dictionary, “Abraham, covenant of”).

  4. Saib Bible Dictionary, “Israel.”

  5. Lo lus Ixayees los muaj ntau tshaj ib txhiab zaug nyob hauv cov vaj lug kub. Lo lus no hais txog Yakhauj (Ixayees) tsev neeg uas muaj 12 tug tub, thiab cov ntxhais (saib Chiv Keeb 35:23–26; 46:7). Hnub no lo lus no yog ib qhov chaw nyob hauv lub Ntiaj Teb no. Tiam sis hauv cov lus qhuab qhia Ixayees yog ib haiv neeg uas txaus siab cia Vajtswv yeej hauv lawv lub neej.

  6. Saib Chiv Keeb 32:30; kuj sau li no tias Penuyees nyob hauv Chiv Keeb 32:31.

  7. Saib Chiv Keeb 32:28.

  8. Saib Chiv Keeb 35:11–12.

  9. Yog xav kawm ntxiv, saib Topical Guide, “Israel, Scattering of.”

  10. Yaxayas 54:7.

  11. Saib Yaxayas 11:11–12; 2 Nifais 21:11–12; Mauxiyas 15:11.

  12. Saib Encyclopedia of Mormonism (1992), “Covenant Israel, Latter-Day,” 1:330–31.

  13. Thaum peb koom tes pab muab Ixayees sau los uake, tus Tswv muaj ib txoj kev zoo kawg piav txog cov uas Nws muab sau los. Nws hais txog peb tias peb yog Nws “tug” (Khiav Dim 19:5; Phau Ntawv Nkauj 135:4), peb yog Nws cov “nyiaj kub” (Malakis 3:17; Lus Qhuab Qhia thiab Kev Khi Lus 101:3), thiab yog ib “haiv neeg dawb huv” (Khiav Dim 19:6; kuj saib 2 Kev Cai 14:2; 26:18).

  14. Cov lus no hais txog txoj kev khi lus uas Vajtswv khi nrog Anplahas hais tias, “Kuv yuav foom koob hmoov ntawm koj tus xeeb ntxwv mus rau txhua haiv neeg hauv qab ntuj no” (3 Nifais 20:27). “Yug los ntawm kev khi lus” txhais hais tias ua ntej ib tug neeg yug los, nws niam thiab txiv tau ua kev cai sib khi hauv lub tuam tsev.

  15. Ib txoj lus cog tseg li no los Vajtswv qhia rau Anplaham hais tias: “Tag nrho cov uas yuav txais Txoj Moo Zoo no ces tus Tswv yuav hu lawv raws koj lub npe, thiab yuav suav lawv ua koj cov tub ki, thiab lawv yuav sawv ntsug thiab qhuas koj, ua lawv txiv” (Anplaham 2:10; kuj saib Loos 8:14–17; Kalatias 3:26–29).

  16. Txhua tus mej zeej rau siab ntseeg thov tau kom yawg suab foom koob hmoov rau nws. Los ntawm tus Vaj Ntsuj Plig Dawb Huv txoj kev tshoov siab, tus yawg suab hais tus neeg caj ceg nyob hauv tsev neeg Ixayees. Kev hais li no tsis yog ib txoj kev tshaj tawm tias nws yog ib haiv neeg, los ntawm teb chaws twg tuaj, los sis muaj roj ntshav keeb kwm li cas. Tiam sis, caj ceg no qhia tias nws yuav txais koob hmoov los ntawm xeem neeg Ixayees twg.

  17. 2 Nifais 26:33.

  18. Saib Mauxiyas 15:7. Kev koom nrog Ixayees tsis yog rau cov uas ntshai yooj yim. Xwv kom txais tag nrho cov koob hmoov uas Vajtswv tau tseg cia rau Anplaham noob neej, peb yeej yuav tsum xav tias peb nyias yuav raug nyias “txoj kev sim siab li Anplaham.” Vajtswv yuav sim peb lub siab, ib yam li tus Yaj Saub Joseph Smith qhia, thaum nws ntswj peb lub siab ntsws. (Saib John Taylor txoj kev nco txog nyob hauv Teachings of Presidents of the Church: Joseph Smith [2007], 231.)

  19. Saib Mauxiyas 3:19.

  20. Saib 2 Timautes 3:1–13.

  21. 1 Nifais 17:40; ntxiv qhov uas ntawv qaij.

  22. Lus Qhuab Qhia thiab Kev Khi Lus 98:37; kuj saib Phau Ntawv Nkauj 31:23; Yaxayas 49:25; Lus Qhuab Qhia thiab Kev Khi Lus 105:14.

  23. Maumoos 9:11.