Khetos Txoj Kab Lig Kev Cai
Peb yeej pom zoo rau tej yam zoo ntawm tej kab lig kev cai hauv lub ntiaj teb thiab koom nrog txoj kab lig kev cai mus ib txhis uas los ntawm Yexus Khetos txoj moo zoo.
Peb nyob hauv ib lub ntiaj teb zoo kawg thiab muaj ntau haiv neeg, yam lus, kab ke, thiab keeb kwm—nyob hauv ntau lub teb chaws thiab txhua pawg neeg nyias muaj nyias lawv kab lig kev cai. Tsim nyog uas yuav zoo siab txog lawv tus kheej. Tiam sis txawm yam peb kawm—tej yam uas peb pom los ntawm peb txoj kab lig kev cai—pab tau peb muaj zog hauv peb lub neej, tej lub sij hawm peb txoj kab lig kev cai cuam tshuam peb thiab.
Zoo li kab lig kev cai nyob hauv peb lub siab xav thiab tus yam ntxwv tob tob heev ua rau peb hloov tsis taus. Yog vim hais tias muaj ntau yam nyob hauv peb lub siab uas peb xav tias yog los ntawm peb txoj kab lig kev cai. Nws muaj zog heev ua rau peb tsis pom tej yam tsis zoo nyob hauv peb txoj kab lig kev cai, ua nyuaj rau peb tso tej yam los ntawm peb cov yawg koob tej kab lig kev cai tseg. Yog tias yus tsom ntsoov rau yus tus kheej txoj kab lig kev cai ntshe yuav ua rau yus xyeej tej lub tswv yim thiab tej cuj pwm zoo.
Ob peb xyoos tas los kuv tau paub ib tug txiv neej zoo uas yuav pab qhia lub ntsiab cai txog qhov uas yus pom yus txoj kab lig kev cai li no. Kuv xub ntsib nws nyob hauv Singapore thaum kuv yog nws tsev neeg tus neeg mus qhia tom tse. Nws yog ib tug xib hwb uas qhia Sanskrit thiab Tamil, es nws tuaj India sab qab teb tuaj. Nws tus poj niam thiab nws ob tug tub yog mej zeej hauv lub Koom Txoos, tiam sis nws tsis tau koom thiab tsis tau mloog tej lus qhia ntawm txoj moo zoo ntau. Nws zoo siab uas nws tus poj niam thiab ob tug tub vam meej thiab nws txhawb nqa lawv ua lawv tej hauj lwm hauv lub Koom Txoos.
Thaum kuv hais tias kuv yuav qhia nws txog tej ntsiab cai ntawm txoj moo zoo thiab qhia tej yam uas peb ntseeg rau nws, nws tsis xav ua. Kuv twb siv sij hawm ntev me ntsis kawm yog vim li cas; nws xav tias yog nws kawm ces nws yuav tsum xyeej nws cov neeg thiab nws keeb kwm! Raws li nws xav, nws yuav xyeej txhua yam uas nws tsev neeg tau qhia nws txog nws caj ceg Indian. Ob peb lub hlis tom qab ntawd, wb tau sib tham txog tej teeb meem no. Kuv xav tsis thoob vim Yexus Khetos txoj moo zoo tau pab nws qhib qhov muag pom ib txoj kev uas tsis zoo li qub.
Nyob hauv tej txoj kab lig kev cai uas tib neeg tsim los muaj tej yam zoo thiab tej yam phem, tej uas txhawb nqa thiab tej uas rhuav.
Ntau yam teeb meem hauv lub ntiaj teb yog los ntawm kev tsis sib haum xeeb ntawm cov uas muaj tej kab lig kev cai sib txawv. Tiam sis yuav luag tag nrho tej kev tsis sib raug zoo thiab kev ntxhov siab yuav ploj mus yog tias neeg ntiaj teb lees yuav txoj kab lig kev cai hauv paus uas peb txhua tus coj puag thaum ub. Txoj kab lig kev cai no los muaj nyob hauv peb lub neej ua ntej yug los hauv ntiaj teb. Yog Adas thiab Enauj kab lig kev cai. Yog kab lig kev cai uas nws lub hauv paus yog tus Cawm Seej tej lus qhia nyob hauv lub caij nyoog nruab nrab, thiab txhua tus poj niam thiab txiv neej txais tau niaj hnub no. Yog ib yam tshwj xeeb heev. Yog kab lig kev cai zoo tshaj plaws thiab xwv kom muaj raws li txoj hau kev zoo siab, Vajtswv yog tus uas tau tsim thiab Khetos yog tus uas txhawb nqa. Kab lig kev cai no ua rau txhua tus koom siab. Nws kho peb zoo thiab tsis ua rau peb mob.
Yexus Khetos txoj moo zoo qhia peb tias lub neej no muaj ib lub hom phiaj. Peb tsis nyob no vim lub ntuj raug xwm txheej los sis tau ua yuam kev! Peb muaj ib lub ntsiab uas qhia vim li cas peb nyob no.
Kab lig kev cai no lub hauv paus yog ib zaj lus tim khawv tias Leej Txiv Saum Ntuj Ceeb Tsheej muaj txoj sia nyob thiab Nws hlub peb txhua leej txhua tus. Peb yog Nws “txoj hauj lwm thiab [Nws] lub yeeb koob.” 1 Txoj kab lig kev cai no qhia tias peb muaj nqis zoo ib yam. Yeej tsis pom tej qeb neeg los sis theem neeg. Vim peb txhua tus, yog cov kwv tij thiab cov muam, cov me nyuam ntsuj plig ntawm peb leej txiv thiab leej niam saum ntuj ceeb tsheej tiag tiag. Tsis muaj kev ntxub ntxaug los sis kev xav tias “peb tawm tsam lawv” nyob hauv “kab lig kev cai zoo tshaj plaws.” Peb sawv daws yog “peb.” Peb sawv daws yog “lawv.” Peb ntseeg tias peb lav ris peb tus kheej, lwm tus, lub Koom Txoos, thiab peb lub ntiaj teb. Kev lav ris thiab kev paub tab yog ob yam tseem ceeb rau peb txoj kev loj hlob.
Kev siab hlub, uas yog kev saib xyuas li Khetos, yeej yog lub hauv paus ntawm txoj kab lig kev cai no. Peb txhawj txog peb cov neeg zej zog, tej uas lawv xav tau ntawm sab cev nqaij daim tawv thiab sab ntsuj plig, thiab peb pab lawv. Txoj kab lig kev cai no ua rau kev ntxub ntxaug ploj mus.
Peb muaj kab lig kev cai uas ntseeg tias muaj kev tshwm sim, raws li Vajtswv txoj lus uas cov yaj saub tau txais (thiab peb txhua tus txais tau kev ua pov thawj los ntawm tus Vaj Ntsuj Plig Dawb Huv). Tib neeg tag nrho muaj peev xwm paub Vajtswv lub siab nyiam.
Txoj kab lig kev cai no qhia tias lub ntsiab cai txog kev ywj siab xaiv tseem ceeb heev. Kev ywj siab xaiv yeej tseem ceeb rau peb txoj kev vam meej thiab peb txoj kev zoo siab. Peb yuav tsum xaiv raws li tswv yim.
Yog ib txoj kab lig kev cai ntawm kev kawm ntawv. Peb nrhiav kev txawj ntse thiab laj lim tswv yim thiab tej yam zoo ntawm txhua yam.
Yog ib txoj kab lig kev cai ntawm kev ntseeg thiab kev mloog lus. Kev ntseeg Yexus Khetos yog lub ntsiab cai thib ib ntawm peb txoj kab lig kev cai uas ua rau peb xav ua raws li Nws tej lus qhia thiab tej lus txib. Ua li no ces peb thiaj li tswj hwm peb tus kheej.
Yog txoj kab lig kev cai ntawm kev thov Vajtswv. Peb ntseeg tias Vajtswv yuav hnov peb tej lus thov thiab yuav pab peb.
Yog ib txoj kab lig kev cai ntawm tej kev khi lus thiab kab ke, tej kev cai siab heev, kev txi, kev zam txim thiab kev hloov siab lees txim thiab kev saib xyuas peb lub cev. Tag nrho tej no qhia tias peb tau cog lus rau Vajtswv.
Yog ib txoj kab lig kev cai ntawm lub pov thawj hwj, uas yog txoj cai ua tej yam los ntawm Vajtswv lub npe, Vajtswv lub hwj chim kom foom koob hmoov rau Nws cov me nyuam. Nws pab tib neeg kom lawv txawj ua neeg, cov thawj coj, leej niam, leej txiv, thiab tej khub zoo dua—thiab ua rau peb tej tsev dawb huv.
Muaj tej txuj ci tseem ceeb ntau nyob hauv txoj kab lig kev cai qub tshaj plaws no, los ntawm kev ntseeg Yexus Khetos, lub hwj chim pov thawj hwj, kev thov Vajtswv, kev ua zoo dua, kev hloov siab los ntseeg tiag tiag, thiab kev zam txim.
Yog ib txoj kab lig kev cai ntawm kev cov tub txib txoj hauj lwm. Tib neeg muaj nqis heev.
Nyob hauv Khetos txoj kab lig kev cai, Nws tsa cov poj niam rau lawv qhov chaw uas nyob mus ib txhis. Lawv tsis yog txiv neej cov qhev, raws li muaj hauv ntau txoj kab lig kev cai niaj hnub no, tiam sis yog cov khub nyob hauv lub neej no thiab nyob hauv lub neej tom qab.
Txoj kab lig kev cai no pom zoo tias tej tsev neeg yog tej pawg dawb huv. Tsev neeg nyob tau ua ke mus ib txhis li. Yeej tsim nyog uas peb tso ntau yam tseg kom pab peb tsev neeg vim, tau qhia hais tias, “txawm yus vam meej npaum li cas nyob sab nraud yog yus tsis vam meej nyob hauv tsev ces pab tsis tau dab tsi.” 2 Peb lub tsev yog qhov chaw uas peb ua peb tej hauj lwm zoo tshaj plaws thiab qhov chaw uas peb zoo siab tshaj plaws.
Nyob hauv Khetos txoj kab lig kev cai muaj lub zeem muag—thiab pom tau txoj kev nyob mus ib txhis. Txoj kab lig kev cai no tsom ntsoov rau tej yam uas muaj nqis kav ntev! Txoj kab lig kev cai no yog los ntawm Yexus Khetos txoj moo zoo, uas nyob mus ib txhis, thiab piav vim li cas, ua li cas thiab peb nyob qhov twg. (Nws ua rau tib neeg koom siab, tsis tawg ri niab.) Vim txoj kab lig kev cai no yog tsim los ntawm kev ua raws li tus Cawm Seej tej lus qhia ces nws muab kev kho mob rau neeg ntiaj teb uas lawv xav tau heev.
Yeej yog ib txoj koob hmoov vim peb muaj feem ua neej zoo kawg no! Yog peb xav muaj feem nrog txoj kab lig kev cai zoo tshaj plaws, ces peb yuav tsum hloov siab. Cov yaj saub tau qhia tias peb yuav tsum muab txhua yam ntawm peb txoj kab lig kev cai qub tso tseg yog tias nws tsis sib haum nrog Khetos txoj kab lig kev cai. Tiam sis tsis yog hais tias peb yuav tsum tso txhua yam tseg. Cov yaj saub kuj tau hais tias lawv caw peb, txhua leej txhua tus, coj peb txoj kev ntseeg thiab tej txuj ci thiab kev txawj ntse—txhua yam uas zoo nyob hauv peb lub neej thiab peb tej kab lig kev cai—peb coj tau nrog peb, thiab cia lub Koom Txoos muab “ntxiv” los ntawm txoj moo zoo. 3
Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg tsis yog cov zej tsoom los ntawm Sab Hnub Poob los sis los ntawm Amelikas xwb. Nws yog ib lub koom txoos uas nyob thoob plaws lub ntiaj teb. Tsis yog li ntawd xwb, nws yog ib yam zoo tshaj plaws. Cov mej zeej tshiab nyob thoob plaws lub ntiaj teb ua rau peb muaj yam sib txawv thiab kev zoo siab hauv peb tsev neeg hauv lub Koom Txoos. Tsoom Haiv Neeg Ntseeg hauv Hnub Nyoog Kawg nyob txhua qhov chaw tseem ua koob tsheej thiab hwm lawv caj ceg thiab poj koob yawm txwv, tiam sis tam sim no lawv koom nrog ib pawg loj dua ntxiv. Khetos txoj kab lig kev cai pab peb pom peb tus kheej yog leej twg tiag, thiab thaum peb pom mus ib txhis, thiab ua ncaj ncees, ces ua rau peb txawj coj raws li txoj hau kev zoo siab.
Yog li ntawd kuv tus phooj ywg nev? Peb tau qhia nws thiab nws tau koom lub Koom Txoos. Nws tsev neeg tau ua kev cai sib khi rau lub sij hawm no thiab nyob mus ib txhis nyob hauv lub Tuam Tsev Sydney Australia. Nws tau tso tej yam me tseg—thiab nws txais tau txhua yam. Nws tau kawm tias nws tseem zoo siab txog nws caj ceg, nws poj koob yawm txwv, nws cov nkauj thiab kev seev cev thiab cov ntawv keeb kwm, nws cov zaub mov, nws teb chaws thiab nws cov neeg. Nws tau kawm tias tsis muaj teeb meem muab nws zej zog kab lig kev cai koom ua ke hauv txoj kab lig kev cai zoo tshaj plaws. Nws tau kawm tias qhov uas yus coj tej yam ncaj ncees thiab tej yam tseeb los ntawm yus lub qub neej mus rau yus lub neej tshiab yuav pab yus nrog Haiv Neeg Ntseeg sib raug zoo thiab pab txhua tus koom siab koom ntsws hauv lub koom haum ntuj ceeb tsheej.
Peb yeej pom zoo rau tej yam zoo ntawm tej kab lig kev cai hauv lub ntiaj teb thiab tseem koom nrog txoj kab lig kev cai qub tshaj plaws—lub hauv paus, txoj kab lig kev cai mus ib txhis uas los ntawm Yexus Khetos txoj moo zoo. Peb sawv daws muaj caj ceg zoo kawg nkaus ua ke. Los ntawm Yexus Khetos lub npe, amees.