Motoyil Ngak
Chitamangdaed e manang nib yilegdaed e tin ba’aray banan ndan nang nge murus, ma n’en nra ayuwegdaed nib gel e fare Fak ningan motoyil Ngak.
Brothers nge sisters, ri gube og nag e magar, ko technology, nike ayuwegdaed kad mada’gaed nga ta’abang ninged ted fan ere Madnom ney ni kadbul. Kan tawa’ath nagdaed ni gadaed manang ni fare gospel rok Yesus Kristus e kan sulweg yarmen nga fayleng!
Tin ba’aray e wiik nike thumur, orani gadaed e ke wagagay rogon e tin nima rrin’. Duru’, nifiy, mathrow dakean e but’, m’ar, nge tin nike wagaynag e tin ni gadaed ma rrin’ nge ggan nike buch’uw, tin nib tu’uf ndakriy, nge salpiy ni yima cha’riy nike buch’uw.
Ko tiney nibe buch, gamaed be pining e magar ngomed nikam mel’eged ningam uned ngomaed ngaed motoyilgaed ko thin rok Somoel ko re general conference ney. Tiney e lumor nibe ga’ iyaen e be ga’nag rama’en fare tamilang rok Yesus Kristus. Mu tafneynag fapi n’en nib mangil nrayag ni gadaedra rrin’ u fayleng ko biney e ngiyal’. Tu’ufeg rom nge mich rom ngak fare Tathapeg e bay nra ayuweg bee’ ninge pir’eg fare ga’ngin fare Sulyarmen ko fare gospel rok Yesus Kristus.
Ke gaman l’agruw e duw nike thumur ngay, ni ku mada’ nigew Sister Nelson boechi gimed u dakean e nam. Ku mada’ nigewmed u langane maab fa ulane hotel ko gin ni yima mo’olung ngay. Ko gubin yang e yungi n’ey, makug thamiy ni gubay i mit Somoel ko fare ngiyal’ nibe mel’eg ma gube guy fapi mukun rok pi u Isreal nibe buch u powcheg.
Gadaed be par ko rran ni irraray fapi rran ni “i weliy e chitamangdaed mornga’agen niyaed be soen nag.”1 Gadaed e tin nsomm’on e gidii ni gadaed be guy nga owchendaed e n’en ni guy profet Nephi nikemus ni guy ko lik’ay rok, ni “fare gelngin fare Saaf ku Got” ni yibi aw nga “dakean fapi gidii’ nbay e m’ag roraed ngak Somoel, dakean fapi gidii’ rok’ Somoel ni fal’eg ba m’ag nga thilraed, ni pi’in ni kar garar gaed u fayleng; ni kar longbiyed yaed ko fel’ u gelingin Got u fithik’ e rir.”2
I gur, e pi brothers nge sisters rog, e gamaed bay u fithik e pi gidii’ ney ni pumo’on, pi’in ni bpin, nge bitir ni irraray e pin’en ni guy Nephi. Mu lemniged e binem!
Demuturug ko gin ni gabay riy fa tin nibe buch rom, fare Somoel ni Yesus Kristus e ir fare Tathapeg rom nge profet rok Got, Joseph Smith, e ir fare profet rom. Ni mel’eg ninge mang profet ko re fayleng nay u mm’on nin ngongliy talbulean nifan ko biney e mfen, ko napan “ndakuriy banan ni dawrin pii’ riy”3 ngak pi gidii’en Got. Yi’iy e kabe ul’ul’ nibe yib rok Somoel ko biney e ngiyal’ nibe buch fare Sulyarmen.
Mang e gabe nang fan riy ni fare gospel ku Yesus Kristus e kan sulweg yarmen nga dakean e faylng?
Be yipfan ni gur nge tabinaew rom e rayag ningan seal nagmed nga ta’abang ni manemus! Be yipfan ni bachan nike tawfe nigem bee’ nibay fare gelngin ku Yesus Kristus rok makan micheg nigem nikam mang gidii’en e Galasia Rok, rayag ninge ul’ul’ nge par fare Kan ni Thothup rom. Ra powi’iyem me ayuwegnem. Be yipfan ni dariy bi’id ni dabin pigem ni dabin ayuwegnem fa gara yaen ndariy gelngin Got ninge ayuwegnem. Be yipfan ni fare gelngin e priesthood era yibliyem ko ngiyal’ ni garam thapeg fapi m’ag nge yalen ku Got mag cha’ariy nib fel’ rogon. N’en nibe yuluynag e yafos rodaed e pi thin ney nib riyul’, ni rib ga’ ko ngiyal’ ney nibe gel e gafgow nge mo’war.
Fare Babyor ku Mormon e weliy mornga’agen l’agruw i nam nra yib u but’ ngalang makra mul u lang nga but’. Chippin ni mornga’agenraed ni kakrom e weliy rogon ni fani mom ngak oran fapi gidii’ nra pagtilined Got, me siyeg fapi ta’amagaran ni’i weliy fapi profet rok Somoel, miyaed be sap ko gelnginraed, rogon fani bo’or e gidii’ ni manangraed, nge fla’ab nu fayleng ko dowef.4 Gathi ta’abiyay, ni fapi profet nike thumur e be yoeg “bay gudag ko fayleng, ni mich e bogi ban’en ni yibe athapeg ma danur guy.”5
Rran rodaed e dani thil ko biney. Bo’or e duw nike thumur, ni bo’or banan nikan rung’ag ko fapi thin ni yibe weliy u dakean ga’ang yang u fayleng. Machane bo’or e gidii ndar sap ko tiney nib riyul’—nibay ni bachane darnanged ko gin ningar pir’eged riy,6 fa bachane yaedbe motoyil ko tin ba’aray e gidii’ nde nang e tin nib riyul’ nib polo’ fa bachane kar siyegned ni bachane yaedbe sap ko tin nu fayleng banan.
Fare mo’oniyan’ ab llowaen’. Bukun e millennia nibe yog e kireb ko manigil ma be yog e manigil ko kireb.7 Murwel rok e baga’ nib ga’langan, ma bagel marrin, mab ’uf ngalang.
Machane, mulwol rok e Chitamangdaed nibay u Tharmiy ab thil ko biney. Ya ma non nib achig, mab munguy, nib tamilang ngak’ e gidii’ rog ni ngeyog ni ngar nanged.8
Woed ni, demuturug ko ngiyal’ nrabi m’ug ko gidii’ nga fayleng me yoeg nibay Fak ni kari Maagirag Rok, make rrin’ e biney ni karimus ni buchu’uw e thin nibe yoeg. U taban fare burey ni yibe m’ug ngak Peter, James, nge John, me ga’ar Got, “Ireray Fakag nrib t’uf rog: ere mu telmed ngak.”9 Fapi thin rok ngak fapi Nephites ni urmed ko fagi n’em ni kakrom u Bountiful “Muguyed Fakag nib T’uf rog, ni’ir e rib falan’ug ngak’, ni’ir e ke rir nag fithingag u dakean—mmotoyil gaed ngak’.”10 Ngak Joseph Smith, ni aram gelngin nib gel nikan bing wo’en fare mulwol ko biney e mfen, makemus ni ga’ar Got, “Ireray Fakag nrib t’uf rog. Ere mu telmed Ngak!”11
Ere chiney, o pi brothers nge sisters rog, ere mu tafney niged e pin’ey ni fan gin mu’ i weliy, u mm’on riy ninge yoeg e Chitamangiy Fak, ma fapi gidii’ nibay u roy e kar suggead ko murus, ma boech, e woed nibe gafgow.
Fapi Apostle e rusgaed napan nriguyed Yesus Kristus nib yileg bangi maguleng u taban farengi Burey.
Ma fapi Nephites e rusgaed ni bachan fan gi yib e yiko’ nge lumor ngoraed nike yaen in e rran ngay.
Joseph Smith e bay u fithik fare lumor u mm’on ninge mab fare tharmiy.
Chitamangdaed e manang nib yilegdaed e tin ba’aray banan ndan nang nge murus, ma n’en nra ayuwegdaed nib gel e fare Fak ningan motoyil Ngak.
Ni bachane gadaed ra gay rogon ningaed motoyilgaed ngak—nri woed ningaed rung’aged laman—fare Fak, ma ran powi’iydaed ningaed nanged ko mang e ngaed rrin’ed ko tin nibe buch banan.
Bin tha’abi somm’on e thin ulan fare Doctrine and Covenants e telmed.12 be yipfan ningan “motoyil nib fel’ rogon min fol riy.”13 Telmed e be yipfan ningan “motoyil Ngak”—ningan rung’ag e n’en ninge yoeg fare Tathapeg min rrin’ fapi machib Rok. Ko gali thin ney— “motoyil Ngak”—Got e ke pii’ ngodaed kanawo’en e mon’og, falfalaen’, nge falfalaen’ ulane biney e yafos. Ngaed motoyilgaed ko fapi thin rok Somoel, telmed ko pin’ey, magmed rrin’ e n’en nike yoeg ngodaed!
Gadaed gachalpen Yesus Kristus, rogon ni gadaedbe gay rogon ningan motoyil Ngak e kari tu’uf ningan rrin’ nibay e gum’ircha’ey riy. Rib tu’uf ni gubin ngiyal’ ningaed gayed rogon ni ngaed suguyed lane yafos rodaed ko fapi thin Rok, fapi machib Rok, nge tin nib riyul’ Rok.
Dabiyag nikemus ningaed taga’gaed ko n’en ni gadaed be guy ko social media. Gathi bilich e thin nibay u online nib sug ko tin nib ga’ lingan, ni bugi murwel rok e mo’oniyan’, ere ngan e rayag ningaed darod ngay ni ngaed rung’aged laman?
Rayag ningad darod ko fapi thin nib thothup. Be fil ngogdaed mornga’agen Yesus Kristus nge fare gospel Rok, nge ga’angin fare Bayul Rok, nge fare tonom rok e Chitamangdaed ko wo’en e falfalaen’ nge thapag. Be’eg e thin rok Got ni gubin e rran e kari tu’uf ko thothup, ninge par nib fos ni rib ga’fan ko ngiyal’ ney nibe yo’or e denen u fayleng. Napan ni gadaedra be’eg fapi thin rok Kristus ni gubin ngiyal’, ma fare thin rok Kristus ere yoeg ngodaed rogon ningaed rrin’ed e tiney nibe buch rodaed nib mo’maw’.
Ma krayag ningan motoyil Ngak ulan fare temple. Fare na’un rok Somoel e ba na’un nifan e fanow. U rom ma Somoel e ma fanow ko Rogon kanawo’en. U rom ma gubin fapi m’ag ma be fil mornga’agen fare Tathapeg. U rom makan fanow nagdaed ko rogon ningan bing fare veil min non nga barba’ riy nga tharmiy. U rom makan fanow nagdaed ko rogon ningan chuweg mo’oniyan’ magdaed fek nga dakeadaed gelngin fare pristhood rok Somoel ninge pii’ gelngindaed nge gidii’ nib tu’uf rodaed. Gadaed gubin ma ngaed sapgaed ko giney ni’r e na’un rodaed.
Napan ni bayi chuw e biney e m’ar ko COVID-19, wenig mu sul nga temple ngam pigpig. Gubin e ngiyal’ ni garam man ma ran tawa’ath nigem nge tabinaew rom ndariy biyang nrayag ninge rrin’ ni array rogon. Motoyil ko n’en ni gabe rung’ag nge tin ni gabe tharmiy u napan ni gabay u rom. Fith ngak Somoel ko rogon nrayag ninge bing fare tharmiy ninge tawa’athnag e yafos rom nge gidii’ nib tu’uf rom nge tin ni gabe pigpig ngak.
Woed e ngiyal’ ney e dabyag ningan yaen nga temple, ere gube piningmed ningam rrin’ed e murwel ko chippin e tabinaew, nib mu’un e murwel ko chippin e tabinaew ni yibe gay mornga’agen nge indexing. Gube micheg ngom napan garam yo’or nag fare ngiyal’ ni gabe yaen nga temple ma gabe rrin’ e murwel ko chippin e tabinaew, ma garam mon’ognag rogon ningam motoyil Ngak.
Ma kagdaed be motoyil Ngak nib tamilang ko napan ni gadaed be gay rogon ningaed motoyilgaed ko fare Kan ni Thothup. Kan mom nag ngom i weliy ko rogon nrayag ninge non fare Thothup ngom e chiney. Ku Got, ma fare Kan ni Thothup ni’ir e ma afweg e thin. Ra afweg e thin ko tafney rom ko tin ba’adag e Chitamangiy nge fare Fak ningam thapeg. I ir fare Kan ni Thothup. Ra pii’ e thamtham ko gapas ngalan gum’ircha’em. Ma micheg e tin nib riyul’ ma kuma micheg ko mang ab riyul’ ko napan ni gabe be’eg ma gabe rung’ag fapi thin rok Somoel.
Gube wenig nag biyay ngomed ningam rrin’ gubin banan nrayag rom ningam mon’ognag e thothup rom ningan thapeg fapi yi’iy nifan ngom.
Garam rrin’ e biney ma garam nang rogon ningam mon’og nga mm’on ulane yafos rom, nge n’en ningam rrin’ ko ngiyal’ nib gel e gafgow, nge rogon ningam pag e lumel nge tin nib baen rok mo’oniyan’.
Ma bin, tomur ngay, gadaed ra motoyil Ngak u napan ni gadaed be teldaed ko fapi thin rok fapi profet, nge fapi yi’iy, nge fapi tathapeg. Fapi Apostle nike mel’egraed Yesus Kristus e gubin ngiyal’ ma yaed be micheg Rok. Yaed be powi’iydaed ko tin nibe buch rodaed ulane yafos rodaed.
Mang era buch ko napan ni garam rung’ag, mag telim, mag motoyil ko n’en nibe yeog fare Tathapeg nge mang e Be yoeg e chiney ngak fapi profet Rok? Gube michegnag ngom ni ran tawa’ath nigem ngan pii’ gelngim ngam gel ko lumel, tin ni gabe gafgow riy, nge tin ni gabe mo’war riy. Gube michegnag nra yib e ma’ang’ang ko mabgol rom, tha’ rom ko tabinaew rom, nge murwel rom ni gubin e rran. Ma gube micheg ni gara thamiy e falfalaen’ nra gel ndariy fan ni bo’or e gafgow nibe yib ulane yafos rom.
Biney e general conference ko April 2020 e ngiyal’ ningaed madnom niged banan ninge thilyeg e fayleng. Napan e biney e 200th anniversary ko fare bin Somm’on e Yi’iy rok Joseph Smith, ma fare bin Somm’on e Presidency nge fare Counsil ko fare Ragag nge L’agruwi Apostles era tafney niged e n’en ningaed rrin’ed ningan tayfan ere rran ney.
Biney ni buch e tabab nag fare Sulyarmen nge fare ga’ngin fare gospel rok Yesus Kristus nib polo’ nifan e biney mfen.
Kug tafney niged ko mang e ngan ngongliy nifen e ran’ey. Machane napan ni gamaed be tafney nag e ran’ey nge rogon ni buch fare bin Somm’on e Yi’iy, kug thamiyed nib tu’uf ningan fal’ag rogon banan ni gathi ngan ngongliy ko malang fa simen machane bugithin—bugithin nib ga’fan mab thothup—nikan yoloey, ma da ni yoloy nga daken e “malang ni tafel” machane ni yoloy nga “laniyan’ e girdi’”.14
Napan nin yarmiy fare Galasia, kemus ni laal fapi proclamation e kan pii’, ni bin tomur ngay e fare “The Family: A Proclamation to the World,” ni pii’ President Gordon B. Hinckley ko 1995.
Napan ni gamaed be tafney nag e ran’ey nike buch ko biney e chippin e fayleng ma fare Somoel e be yoeg rogon ningan kunuy pi u Isreal nifan fare bin Migid e Wub rok Yesus Kristus, gamaed, gidii’en e bin Somm’on e Presidency nge fare Counsil ko fare Ragag nge L’agruwi Apostles, e ku pii’ed e bin ba’aray e proclamation. Fithingan e kanoeg fare “The Restoration of the Fulness of the Gospel of Jesus Christ: A Bicentennial Proclamation to the World.” Fare bin Somm’on e Presidency nge fare Counsil ko fare Ragag nge L’agruwi Apostles ko Fare Galasia ku Yesus Kristus ni Fan ko Gidii’en Got ko Tin Tomur e Rran e ke yoloey e biney. Ma rofen nikan yoloey e April 2020. Fal’ag rogog nifan e daba’, kug yoloey mornga’agen ere proclamation ney ulan farengi Luway nib Thothup, ko fa gin nsomm’on ni guy Joseph Smith e Chitamangiy nge fare Fak riy.
Gamaed be micheg ni Got e btu’uf pi fak Rok ni gubin yang u dakean e fayleng nge nam. Got ni Chitamangiy e ke pii’ ngodaed fare yafos nib thothup, ndariy reb nib ta’areb rogon ngay, nge fare bayul ni miligach ni tay Fak nib Tu’uf Rok, Yesus Kristus. U dakean gelngin e Chitamangiy, Yesus e fos biyay ko yam’. I Ir e Tabiyul rodaed, Tagol rodaed, nge Tathapeg rodaed.
L’agruw mira’ay e duw kafram, ko reb e kadbul riy ko 1820, Joseph Smith, e be gay ko bin ngan e galasia e nge un ngay, me yaen nga fithik e gek’iy ninge meybil ko biyang nib chuchgur ko tabinaew rok u New York, USA. Bay e duwer rok ko rogon nrayag ninge thap e yafos rok mab pagan’ ngay nibay Got nra powi’iy.
U fithik e sobut’aen, gamaed be micheg nikan fulweg taban e meybil rok, Got ni Chitamangiy nge fare Fak, Yesus Kristus, e yibi m’ug ngak Joseph min ndag ngak “urngin ban’en riy nge be’echnag” ni woed rogon nikan noeg ulan fare Bible. Ko biney e yi’iy, kad filed ni tomuren e yam’ ni tay fa tin nsomm’on e Apostles, Galasia rok Kristus nib be’ech e mathmit u fayleng. Ma Joseph era mruweliy ninge fulweg rogon.
Gamaed be micheg nike yib u tan pa’ e Chitamangiy nge fare Fak, nge gidii’ nima awfeg e thin e yib u tharmiy ninge yoeg rogon ngak Joseph ninge sulweg biyay fare Galasia rok Yesus Kristus. John nima Tawfe ni foskoyam’ e sulweg yarmen fare tawfe ko ran ninge chuweg e denen. Dalip nii’ ko fapi ragag nge l’agruwi Apostles—Peter, James, nge John—e sulweg yarmen wo’en e apostle nge fapi kiy ko gelngin e priesthood. Boech e ki yib, nib mu’un Elijah ngay, ni sulweg yarmen e tabinaew ninge par u ta’abang ni manemus ko bin migid e yafos ni gubinfen.
Ma kagmaed be micheg ni Joseph Smith e ni pii’ ngak fare tawa’ath nge fare gelngin ni yib rok Got ninge pilyeg fapi chep ni kakrom—fare Babyor ku Mormon: Kureb e M’ag Rok’ Yesus Kristus. Babyoren e biney e babyor e bay mornga’agen e michib rok Yesus Kristus riy ngak e gidii’ ko nam nu Mariken u tomuren ni Foskoyam’. Biney e be weliy fan e biney e yafos nge rogon e yalen rok Kristus, ni’ir e bay u lukungun e pin’ey nib ga’fan. Ni’ir e bchagil nga ta’abang ko fare Bible, fare Babyor ku Mormon e micheg ni gubin e gidii’ ma fak e Chitamangiy nibay u Tharmiy, nibay nike ngongliy ba tonom nifan ngodaed, ma fare Fak, Yesus Kristus, e kama non e daba’ ni woed ni kakrom.
Gamaed be yoeg ni Fare Galasia ku Yesus Kristus ni Fan ko Gidii’en Got ko Tin Tomur e Rran, e ni yarmiy ko April 6, 1830, ni’ir fare Galasia Rok Kristus nib Be’ech nike sulyarmen. Biney e Galasia e kan yuluy nag nib fel’ rogon nibay e en nib ga’ riy, ni’ir Yesus Kristus, nge fare Bayul Rok nge fare Foskoyam’ ni tay. Yesus Kristus e ke yarmiy biyay fapi Apostles rok ma ke pii’ ngoraed gelngin e priesthood. Be piningdaed ni gubin ningaed bad Ngak nge Galasia Rok, ningan thapeg e Kan ni Thothup, nge fapi gam’ing ko thap, nge falfalaen’ ni manemus.
La’gruw mira’ay e duw ngay e chiney nike Sulyarmen ere Galasia ney nike pii’ Got ni’ir e Chitamangiy nge far Fak nib Tu’uf Rok, Yesus Kristus. Bo’or e gidii’ u dakean e fayleng nike michuwean’ ngay ko tiney e llowaen’ nge tin ni un prophecy nag.
Ma kagmaed be micheg ni fare Sulyarmen nikan micheg e kube ul’ul’ iyean nga mm’on u dakean e yi’iy ni kabe yib. Dabki sul fare fayleng ninge woed ni ta’ab rogon ko somm’on, napan Got nibe “kunuy nga ta’abang urngin banan ngak Kristus.”
Fithik e falfalaen’ nge tayfan, gamaed gidii’en e Apostles Rok e gamaed be yoeg ngak gubin e gidii’ ningan nang—ni woed rogon ni gamaed manang—ni fare tharmiy e kan bing. Ma gamaed be micheg ni Got e be dag rogon e murwel Rok ngak pi fak nib tu’uf Rok. Gamaed be micheg fapi thin ni “pi gidii’ nira meybil me fil mornga’agen fapi mulwol ko fare Sulyarmen me rrin’ ni woed rogon fare mich e ran tawa’ath nagraed ni ngeyag ngoraed e biroraed e mich mafan e biney e nge fal’agin rogon fare fayleng ko fare bin Migid e Wub ni micheg fare Somoel nge fare Tathapeg, Yesus Kristus.”15
Pi walageg nib tu’uf rog, irraray fare proclamation nifan ko fayleng nibe weliy mornga’agen fare Sulyarmen ko fare gospel rok Yesus Kristus nike polo’ ga’ngin. Ke gaman ragag nge l’agruw e thin nikan pilyeg riy. Ma bay ni pilyeg ko boch e thin nib thil. Ma bay ntay ko fare website nifen e Galasia, nrayag ningam fek bang ya’an ningam fanay. Mu fil ngom nge gathon e tabinaew rom nge tafagar rom. Mu tafneynag e pin’ey nib riyul’ mag lemnag ko rogon e pi n’ey nib riyul’ nra ayuweg e yafos rom ni fa’an gara motoyil ngay, mag telim ngay, mag rrin’ ni woed rogon fapi motochiyel nge m’ag nibay riy.
Gu manang ni Joseph Smith e ir fare profet ni mel’eg Somoel ninge bing e biney e mfen ni tomur. Bachan ir ma fare Galasia rok Somoel e ke sulyarmen nga fayleng. Joseph e seal nag e michaen’ rok ko racha’ rok. Gube tayfan mab tu’uf rog!
Got ab fos! Yesus e ir fare Kristus! Ma fare Galasia Rok e ke sulyarmen! Ir nge Chitamangin, ni’ir e Chitamangindaed nibay u Tharmiy, e yow be gafaliydaed. Gube micheg u dakean fithngan Yesus Kristus nib thothup, amen.