Tin nibay ko Tafney nra Ayuwegney nib Thothup
Ma napan nra mo’maw’ fa kirbaen’ nibe lumor nag lan fare pi’i kanawo’ rodaed, ma tin nibe buch e chiney e be karang e murus ngodaed ko mang e bayi buch nga mm’on, ma fapi tafney nib thothup nibay ko man’aey rodaed ere ayuwegdaed ko pin’ey.
Ragag nge meruk e duw nga tomuren fare bin Somm’on e Yi’iy, me yoloey Joseph Smith mornga’agen e n’en ni’i buch rok. I yib ngak fapi lumel, gafgow, gafgow nibe tay e gidii’ ngak, nge cham ni gubin mit.1 Ya ni ke machib nag marunga’agen bin Somm’on e Yi’iy rok: “Ya kuguy fare tamilang, ma fithik e rangi tamilang ney mugguy l’agruw Ni’, mi yow non ngog; ma arram rogon ndubin e gidii’ dakeanag ma yibe gafgow nigeg ni kug guy fare yi’iy, gube micheg ni rib riyul’. … Gu manang, magu manang ni Got e manang, ma dabiyag ni nggu siyeg e biney.”2
Ulan fapi awa nibe gafgow riy, tin imoy ko tafney rok Joseph nike gaman ril’iw’ e duw ngay ko fare michaen’ rok nge tu’ufeg rok Got ngak nge fapi n’en nra buch ni ku’un weliy ko mornga’agen fare Sulyarmen. Sap ko biney e milekag nitay nib thothup, me yoeg Joseph: “Dabgu tay kireb nga dakean bee’ ni dani michuwean’ nga mornga’ageg. Fa’anra dani buch rog e n’en ni buch rog, ma woed ni dabi michuwun’ug ngay.”3
Machane tin ni buch rok e rib riyul’, ma dariy bi’id ni pagtalin fa siyeg, ni micheg fare mich rok ko napan ni chuw nge yani par nga Carthage. “Nggu wean ni woed ba saf ko gin ningan lii’ riy,” me ga’ar, “machane bay e gapas rog ni woed ma kadbul ni rib fel’; ya dariy e kireb ni kug rrin’ u mit Got, fa ngak bee’.”4
Tin nike Buch nra Ayuwegney nib Thothup
Bay e fanow nifan ngodaed ko re wo’ ney ni yib rok fare Profet Joseph. Nib mu’un fare gapas ko powi’iy nibe yib rok fare Kan ni Thothup, nibe yib ni bo’or yay, ma Got e be michegnag daed nib gel ni manangdaed ma gadaed btu’uf rok ma be yibliydaed ko tin nib tu’uf rodaed. Ma, napan e ngiyal’ nib gel e mo’maw’ riy nogdaed, ma fare Tathapeg e bayi fek boech e pin’ey nike mu’ i buch rodaed nge fulweg ko tafney rodaed.
Mu tafneynag e birom e yafos. Bukun e duw nike thumur, nikug motoyil ngak e gidii’ nibe weliy e n’en nike boech roraed nib thothup nike yib rok Gidii’en Got ko tin Tomur e Rran u dakean ga’nginyang u fayleng, niyaed be micheg ngog ni Got e manang ma gadaedba tu’uf rok ma ri ba’adag ni ngabi m’ug ngodaed. Tiney nike mu’ i buch e rayib ko ngiyal’ nib tu’uf riy ulane yafos rodaed fa bayi yib ko ngiyal’ ni woed ndani tu’uf, machane gubin ngiyal’ nima yib nibay e pow riy nib gel ko fare tu’ufeg rok Got.
Ra yib ngan’uy e pin’ey nike buch nib thothup mara fekdaed ngaed garbuggaed riy nga but’, ni woed rogon ni yoeg Profet Joseph: “pi’nen nikug thapeg e ke yib u tharmiy. Magu manang, ma gumanang ni Got e manang nigu gumanang.”5
Aningeg e Susun
Sul ngam sap ko tin nibay ko tafney rom nra ayuwegnem nib thothup ma baykug weliy boech wo’en nike buch rok e gidii’.
Buch e duw kafram, bay mo’on nib pilibthir ko stake nib patriarch nike kireb biyang u gum’richa’en ni wenig nag ngak-Dr. Russell M. Nelson ninge taflaynag, machane binem e ngiyal’ e dariy e mitney e taflay. Dr. Nelson e magaraen’ ngay nra taflaynag. Ba’aray e thin rok President Nelson:
“Tomuren ni kug fal’ag e gin somm’on nib kireb, muy waen ko bin migid. Ku pir’eged ni fare m’ar rok e rib kireb ndabkiyag ninge rrin’ fare murwel nifan. Napan ni kug sap ko re m’ar ney, ke yib bugithin ngalan e tafney rog: Achignag ga’angin fare lulbuy. Kug gog ere bugithin ney ngak facha’ nike ayuwegneg. ‘Fagli lulbuy nibay ko fare gum’ircha’ era fal’ rogon ni fa’an nran achignag nge mada’ ninge puluw ko ga’ngin nib fel’.’
“Machane uw rogon? … Me yib ya’an ngalan lolgeg ni rib tamilang ya’an, nibe dag rogon ningan nip’—ningan ta’ar u roy min non’ nga tangin aram. … Ri ku gumnang ya’an e ran’em—ya’an nib polo’ nibay ya’an e gin ningan nip’ nge gin ningan tay ngay. Min fal’ag rogon ni woed ya’an nibay ku man’aey rog. Magmaed sikengnag fagli lulbuy nibay ko fare gum’ircha’ magmow pir’eg ni fagin nibe lul’ul’ riy e tal ni rib papay. Me ga’ar facha’ nibe ayuwegneg, ‘ba ma’ang’ang.’”6 Chan’ey nib patriarch e par nib bo’or e duw nib fos.
Kan fanow nag i Dr. Nelson. Make nang ni manang Got ni manang nikan fanownang.
I gag nge Kathy e kug mada’ nigew Beatrice Magré u France ko dalip e ragag e duw kafram. Yoeg Beatrice ngog banan ni buch rok nib thothup ni ayuweg e yafos rok u tomuren nikan tawfe nag ko napan nikab fal’yangren. Ba’aray e thin rok:
“Fapi fal’yangren ko branch romaed e kug milekaggaed e tiyugang’ romaed nga Dap’eyaen’ ni Lacanau, ni reb e awa ngay nge buch u Bordeaux.
“U mm’onkug suled nga tabinaew, reb fapi tiyugang’ e lamneg ninge noeng ta’abiy ni un fare tilgiy u owchen ngay. Napan ni yibi m’ug ngalang, make mul fare tilgiy nga biyang. … Ke mul ngalan farengi day.
“Re tilgiy rok ney nike yaen nga biyang e dabiyag ninge fek e yap ko fare karo. Ma gamaedra par u roey nib palag u tabinaew.
“Bay reb e bpin ni yoeg ni nggu meybilgaed.
“Mug nonon ngalan langag ni meybil e dariy banan nra rrin’ ngay, mug un ko fare ulung ni nggu meybilgaed u mit e gidii’ u fithik farengi day.
“Napan nigu mu’gaed ko fare meybil, mug pithig pa’ag ni nggu toy e rran ninge aw ngak gubin e gidii’. Ma napan kug choy e day ngalan pa’ag, me yibi aw fare tilgiy rok ngalan pa’ag. Me yib ma thamtham ngalan gum’ircha’eg ni rib alamrin mug nang ni Got e ma motoyil nge fulweg ko meybil rodaed.”7
Aningeg ragag nge lal’ e duw nga tomuren, me yoeg ni woed nike buch e biney ni woed fawap. Beatrice e kan tawa’athnag, ma manang ni Got e manang ni manang nikan tawa’athnag.
N’en nike buch rok President Nelson nge Sister Magré e rib thil, machane yow l’agruw, ni tin nibay ko tafney rorow nib thothup rok e tu’ufeg rok Got e ke par ulan gum’ircha’en row.
Pin’ey nibe buch e baga’ nima yib u napan ni kan yibe fil mornga’agen fare gospel nike sulyarem fa napan ni yibe fil gare gospel ngak e gidii’.
Biney e sasing e kan fek ya’an u São Paulo, Brazil, ko 2004. Floripes Luzia Damasio ni’ir bee’ ko fare Stake u Ipatinga Brazil napan ni 114 e duw rok. Weliy rogon ni michean’, Sister Damasio e yog ngog mornga’agen fapi missionaries ni imoy ulane fare binaew rok nike pi’ed fare meybil ko priesthood ngak bitir ni kari m’ar ma rib ma’ang’ang rogon e gol nitay. Ma ri ba’adag ninge nang boech mornga’agen. Napan nike meybil nag mornga’agen fare mulwol rorow, ke yib fare Thothup ngak nge micheg ni Joseph Smith e riyul’ ni profet rok Got. Napan ni 103 e duw rok, min tawfe nag, ma napan ni gaman e 104 e duw rok, min endow nag. Gubin e duw, ma yan u bus ni 14 e awa ninge yani murwel u temple nifan ta’areb e wiik. Sister Damasio e thapeg fare mich nike yib u tharmiy, ni manang ni Got e manang ni manang nire michney ab riyul’.
Ba’aray e n’en nibay ko tafney rog nib thothup ko fare bin somm’on e mission rog nga France 48 e duw kafram.
Napan ni gamow be gay e gidii’, companion rog nge gag e kug digeyew bakan fare ke Babyor ku Mormon rok ban nib bpin nib plibthir. Napan kug sulew nga na’un rok fare bpin ni ta’areb e wiik riy nga tomur, me bing fare mab. U mm’on ningar noned, kug thamiy fare thothup ni rib gel. Me gel fare thamtham ni gamaed be thamiy u napan ni pining mow Madame Alice Audubert nga na’un me yog ngomow nike be’eg fare Babyor ku Mormon make nang ni rib riyul’. Gu chuwgow ko na’un rok e rofenem, mug meybil, “Chitamangig ni gabay u Tharmiy, wenig ngom mu ayuwegneg nri dabgu pagtilin e n’en ni kug thamiy.” Ma ri dawrug pagtilin.
Bo’or yay ni woed e biney, ko boech fapi na’un nug warow ngay nigu michib nigew e gidii’ riy, kug thamiy fare gelngin nibe yib u tharmiy. Ma kugnang ni manang Got ni manang nigu manang nibay ba winda u tharmiy nikan bing.
Thilthil rogon nifandad nge Dabi Baen
Pin’ey nibay ko tafney nib thothup e ma yib nib thilthil ngiyal’, mab thilthil rogon ngodaed ni gubin.
Mu tafneynag e bin nri ga’abadag e wo’en nibay ulane fapi thin nib thothup. Pi gidii’ ni’i motoyil ngak Apostle Peter “me ri “yib e marus ngora[d].”8 Fare bpin nib Lamanite ni kanoeg i Abish ngak ni michuwean’ fare “piliyeg changar ni tay e chitamangin.”9 Lam ni ke yib ko tafney rok Enos.10
Fager rog Clayton Christensen e weliy banan ni buch rok ko napan nibe meybil ma be be’eg fare Babyor ku Mormon ni ba’aray rogon: “Ba thamtham nib mangil, mab guwel, tu’ufeg ko fare Ya’el … e yilegneg me suguy lan gum’ircha’eg, ni liyegneg ko ba tu’ufeg ni dariy bi’id maku lemnag nima buch, [ma pi thamtham ney i yib ni gubin e nap’ nge reb e nap’].”11
Bay boechi ngiyal’ ni thamtham ko thothup e ma yib ngalan gum’ircha’ey ni woed e nifey, nibe sugnag lan gum’richa’ey. Joseph Smith e weliy ni boechi ngiyal’ ma gadaed ma thapeg e “tafney nibe yib ngodaed” ma orani ngiyal’ ma fare llowaen’ nibe ul’ul’ nibe yib.12
President Dallin H. Oaks, nu fulweg lungun ba mo’on ni yoeg ndariy bi’ied nike buch e tiney rok, me fanownag ni ga’ar ngak, “Sana kan fulweg e meybil rom ni biyay nge biyay, machane bachan ni gabe son nag e pow fa ba lam nib ga’ langan aram fan ni gabe lemnag ni dawrin fulweg tabab e meybil rom.”13 Fare Tathapeg e weliy morna’agen fare mich ko gidii’ ni woed e “[tawa’ath] ko nifiy nge fare Kan ni Thothup, [machane] ma dar nanged.”14
Urrogon ningam Rungan En?
Kug rung’ag nike yoeg President Russell M. Nelson: “Gube piningmed ningam tafney niged e biney e duwer: Uw rogon ni gabe rung’ag laman? Ma kugbe piningmed ni ngam bad ningam rung’aged laman ni bukun yay.”15 Nike yog e pinning ney be’ie biney e kakadabul’.
Gadaed ma rung’ag laman ulane meybil rodaed, ulane tabinaew rodaed, ulan fapi thin nib thothup, ulan fapi tang ko galasia, nge napan ni gadaed ma kay fare sarcrament, napan ni gadaed be weliy mornga’agen e mich rodaed, napan ni gadaed be pigpig ngak boech e gidii’, nge napan ni gadaed be yaen nga temple ni gadaed fapi gidii’ nib michuwean’daed. Tin nibay ko tafney nra ayuwegney nib thothup e ra yib u napan ni gadaed be motoyil ko fare general conference ma gadaed be fol ko fapi motochiyel. Bitir, tiney nima buch e kabay fan ngom. Mu tay u wun’um, Jesus “ni machib me pigpig ngak’ e pi bitir … me pithig balowthraed [fapi bitir], mar weliyed bogi ban’en nib fel’ mab polo’ fal’ngin.”16 Fare Somoel e ga’ar:
“[Tiney e llowaen’] e ke yib rok fare Thothup ngom, … ya fa’anra dani yib u gelngig ma dabiyag [ngom];
“Arrogon, rayag ningam michegnag nikam rung’ag lamag, ma gamanang e thin rog.”17
Rayag ningaed “rung’aged laman” ni bachan fare Bayul rok fare Tathapeg ndariy banan nta’ab rogon ngay.
Dabiyag ningaed mel’egned e nigyal’ ningaed thapeged e pin’ey nib thothup, President Henry B. Eyring e pii’ e biney e mulwol ngodaed ninge fal’ag rogondaed: “Re blayal’ ney, nge gubin e mithigyal’, bay ni gara meybil mag tafneynag, ni gabe fith e biney: Ke pii’ Got ba mulwol ngog nikemus nifan ngog? Kug guy pa’ ulane yafos rog fa ulane yafos ko [tabinaew rog]?”18 Mich, fol, mudung, nge gumi’rcha’ nib polo’ e ma bing fapi winda u tharmiy.19
Sasing
Bay ni garam sap ko tiney nib thothup nibay ko tafney rom ni aray rogon. Meybil ni gubin ngiyal’, athamgil ni yibe gay rogon ningan tayfan fapi motochiyel, nge fare tawa’ath ko fare Kan ni Thothup, ma gadaed be yaen ulane yafos rodaed. Ma napan nra mo’maw’, fa marwar e tafney rodaed, fa kirbaen’ nibe lumor nag lan fare pi’i kanawo’ rodaed, ma tin nibe buch e chiney e be karang e murus ngodaed ko mang e bayi buch nga mm’on, ma fapi tafney nib thothup nibay ko man’aey rodaed ere ayuwegdaed ko pin’ey, me michegnag ngodaed ni manang Got, ma gadaed ba tu’uf rok, make pii’ Fak, Yesus Kristus, ninge ayuwegdaed ningaed suled nga tabinaew. Ma napan nra tay bee’ e pin’ey ko tafney rok nib thothup nga biyang nike malog ma danki nang rogon, magdaed fulwegraed ngak fare Tathapeg ni gadaed be weliy e mich rodaed ko tin nike par ko tafney rodaed nib thothup ninge ayuwegraed, min ayuwegraed ningar pir’egned e tiney nib thothup ni imoy roraed.
Boech banan nima buch rodaed nib thothup e gadaed ma tay ko tafney rodaed machane ma dayma weliy monrnga’agen.20
“Pi angel e manon u dakean gelingin fare Kan ni Thothup; ere, yaed mayoeg e thin rokʼ Kristus.”21
“Fapi angel ni [dawra talgaed] i machib nag e gidiiʼ.
“Ya musap gaed, yaed ba mʼing ngakʼ [Kristus], ni ngar machib gaed u rogon ni ke … chiyliy, ni ngar mʼug gaed ngakʼ e piʼin ni bay e mich roraed nib gel mab miyuluy e tafnaey roraed ko urngin e pinʼen nib yalen rokʼ Got.”22
Ma “fare Kan Nthothup ni en ni Chitamangiy, … ma bayi fil urngin ban’en ngomed, me ayuwegmed nge mit ngomed urngin e tin kug weliy ngomed.”23
Mu ayuweg e tafney rom nib thothup. Me michuwaen’um ngay. Mag yoloey mornga’agen nga but’. Mag weliy ngak e tabinaew rom. Me pagan’um ngay nike yib rok e Chitamangim nibay u Tharmiy nge fare Fak ni kari Maagirag Rok.24 Mag pag nge yibi pii’ e gapas ko tafney rom nibe marwar nge tin nibe mo’mow’ rogon ngom ningan nangfan.25 Gube michegnag ngom ni fa’an gara nang e pin’ey nib thothup nibe buch ulane yafos rom, ma kara yib boch ngom nib bo’or. Chitamangiy nibay u Tharmiy e manngem ma gab tu’uf rok!
Yesus e ir fare Kristus, ma fare gospel rok e ke sulyarmen, ma napan ni gadaedra par ni gadaed ba yul’yul’, ma gube micheg ni gadaedra par Rok ni gubinfen, u dakean fithingan Yesus Kristus, amen.