Hosanna nge Hallelujah Somoel—Yesus Kristus nib Fos: Ni’ir e Gum’ircha’en fare Sulyarmen nge Easter
Ni yaed be yog e hosanna nge hallelujah, niyaed be yon’ e tang ko hallelujah—ni ra par ni’r e Pilung ko gubin e mfen ndabi mus!
Pi walageg: hosanna nge hallelujah, gadaed be ul’ul’ ngaed madnom niged Yesus Kristus nib fos ko ngiyal’ ney nibe ko fare Sulyarmen nge fare Easter. Ko tu’ufeg nib polo’, ke michegnag Yesus Kristus ngodaed: “Kugog e re bugithin ney ngomed ni bochan e nge pagan’med. Bayi gafgow nagmed e fayleng: machane dab mu rusgad; Ya kug gel ko fayleng.”1
Boech e duw kafram, Sister Gong nge gag e kug mada’ nigew reb e tabinaew, nibay buchi tir ni fak row ni bpin ni fithingan i Ivey ni fek tofen e violin rok. Ke chibiy fare bow ko violin, fi’leg nge tay e rosin nga dakaen Me fulweg fare bow nifen fare violin nga tofen, me sminmin, nibe tayfan, me sul nge par nga but’. Fin be fil mornga’agen e violin, make dag e tin ni manang ni mornga’agen fare violin. Chiney, boech e duw nga tomuren, Ivy e ma chubeg fare violin ni rib fel’.
Ko biney e yafos, woed ni gadaed boed Ivy nge fare violin rok. Gadaed be tabab ko gin somm’on. Ni gadaed be gay rogon ma gadaed be ul’ul’, ma gadaed be ilal’ ma gadaed be mon’og. Ma napan nibe yaen e tayim, pi’nen ni be mel’eg u fayleng nge pi’nen nibe buch rodaed era ayuwegdaed ni ngaed boeded e Tathapeg rodaed ni gadaed be un Ngak ni gadaed be murwel ulan farengi mileay’ Rok2 ma gadaed be leak wo’en fapi motochiyel Rok.
Madnom, ko biney nike gaman l’agruw e ra’ay e duw ngay, e ke dag ya’an fare sulyarmen.3 Ni gadaed be madnomnag fare gospel rok Yesus Kristus nike Sulyarmen, ma kagdaed be fal’ag rogondaed ningaed madnom niged fare Easter. Ko gali n’ey, magdaed be falfalaen’ ko fare sul rok Yesus Kristus. Bay nib fos—ni gathi kemus ni kafram, ma chiney; ni gathi kemus ni fan bochi gidii’, machane fan ngak gubin e gidii’. Bugi fane thin nge tin nriyul’ nike buch, gol nag e gidii’ nike kirbaen’, nge pi’in kan kolrad, nge pi’in ni malmit, me chuweg e gafgow ko pi’in yibe gafgow nagrad.4 Ni fan gadad gubin. Fare bayul rok ni micheg ab mu’un e tin ba’aray ngay, demuturug ko mang e kam rrin’ed, fa pi’nen niba rrin’ed, fa mang e gadaed be lemnag ko tin nga mm’on banan.
Ya gubul e rran ko fare Madnom ko Yuwan e Fal’tir Yuwan e fal’tir e kabang ko falfalaen’ ngak Yesus napan ni yib ngalan yu Jerusalem ufithik e gelngin rok, ni irraram e gin “ni pire’ ni pire’ … e th’ab yuwan e fal’tir, ni ngar mada’gad Yesus.”5 (sana gabe’adag ni ngam nanged e sasing rok Harry Anderson nike art nagba paer ulan e office rok President Russell M. Nelson, chuchugur ko desk rok.) Ulan fare babiyor ko Revelation, pi’in ni be liyor ngak Got nge fare Saaf nibe rin napan be tay e “maad ni wechwech, nge ni ba kol e yuwan e fal’tir u pa’raed.”6 Nib mu’un e “ni karon’ed e mad nib wechwech” ma kar “sak’iygad u p’eowchen tagil’ Got,” yuwan e fal’tir e kan uneg ko fare Temple u Kirtland napan nin yibliy.7
Riyul, fare Madnom ko Yuwan e Fal’tir e gathi kemus rogon fan napan nin guy Yesus. Rran ko Madnom ko Yuwan e Fal’tir, ni yib Yesus ngalan yu Jerusalem e dag ni guy e gidii’ miyaed nang nike buch fapi n’en nikan prophecy nag. Woed Zekariah7 nge Psalms nra weliyew, fare pilung ni yib ngalan yu Jerusalem ma ke yib nike af nga daken ba donki kar tul’ul “Hosanna nib lane lang.”9 Hossana be yipfan e “thap ko chiney.”10 Ere, napan ni chiney, ningaed falfalaen’gaed, “Fal’eg Got wa’athan e en ke yib u fithingan Somol.”11
Reb e wiik nga tomuren fare rran ko Madnom ko Yuwan e Fal’tir e fare Madnom ko Easter. President Russell M. Nelson e fil ni Yesus Kristus “e yib ngabi thang ba malfith ni gathi bmalfith rok ni bachane biney e malfith e dabyog pilwon rodaed.”12 Arrogon, u dakean fare Bayul rok Kristus, ma gubin e bitir rok Got ma “rayog ni ngar pateged e yafos, ni yibe fol ko fapi motochiyal nge gam’ing ko fare Gospel.”13 Napan e Easter, ngaed yon’ed e hallelujah. Hallelujah e be yip fan e “falfalaen’ ngak fare Somoel ni Jehovah.”14 Fare Hallelujah Chorus ulane Handel Messiah a ba madnom ko Easter nibe dag ni’ir fare “Pilung ko gubin mit e Pilung, ni’ir e Somoel ko gubin mit e Somoel.”15
N’en nib thothup ko fagli rran ko Madnom ko Yuwan e Fal’tir nge fare Madnom ko Easter e yat ni mornga’agen fare sorok Got nge fare hallelujah. Hosanna ir e sorok ngak Got e irraram ninge thapegdaed. Hallelujah e be dag e falfalaen’ nge magar rok Somoel ko fare athap ko thapeg. Ko sorok Got nge hallelujah gadaed be guy ni Yesus Kristus nib fos e ir fare gum’ircha’en fare Easter nge tin tomur e rran nike sulyarmen.
Tin tomur e rran nike sulyarmen e tabab ko nigyal’—ni yibi m’ug Got ni fare Chitamangiy nge fare Fak, Yesus Kristus, ngak fare profet Joseph Smith. Yoeg fare Profet Joseph, “Rayag ningan sap nga tharmiy ni gonpa’an e laal e minut, ma garam nang bo’or mornga’agen ko bin ba’aray ningam bi’eg babyoren nikan yoloey nga but’.”16 Ni ba ning e winda ko tharmey, gadaed manang mab “michuwaen’daed ngak Got, ni’ir fare Chitamngiy ni Gubinfen, nge fare Fak, ni Yesus Kristus, nga fare Kan ni Thothup”17yaed e lolgen Got.
Napan e Madnom ko Easter, April 3, 1836, napan ni fan gi Sulyarmen fare galasia, Yesus Kristus nib fos e yibi m’ug ko fare Temple u Kirtland tomur ni yibliy. Gidii’ ni guy e rogned ni woed ya’an e nifiy nge ran: “Owchen e woed ram’en e nifiy; ma piyan lolgen e woed e snow nib wechwech; ma ram’en dow e woed nib gel ram’en ko yal’; ma lam rok e woed ba lam ko ran nibe yaen u lul’, ni woed e lam ku Jehovah.”18
Rofen nem, me ga’ar fare Tathapeg, “I gag e somm’on nge tomur; I gag facha’ ni foskoyam’, I gag facha’ nin l’eg; ma I gag e rayag ni nggu non ni pa’med ngak e Chitamangiy.”19 Biyay, ya’an Kristus—I gag e somm’on nge tomur, I gag facha’ nin l’eg. Ir Got ni Gubin ma Rayag Rok, ni ir e bay e chiney, me ir e immoy,20 ni’ir e tabolngin nge yan i mada’ ko tungun e mich rodad.21
Ma migid e yibi m’ug Yesus Kristus, ngak Moses, Elias, nge Elijah kar baed. Dakaen’ e thogthog nib thothup ma be pow’iyraed, pi profet ney ni kakrom era sulweged yarmen fapi gelingin nge fapi priesthood kiy. Arrogon, “fapi kiy ko biney e mfen e kan micheg”22 ulan fare Galasia Rok nikan Sulwegyarmen ninge tawa’ath nag gubin pi fak Got.
Fare wub rok Elijah ko fare Temple nu Kirtland e prophecy nag Malaki ulan fare bin Kakrom e M’ag ni yoeg nra sul Elijah “u m’on ndawori taw e re rran nem rok Somol.”23 Napan ni buch e biney, Elijah e yibi m’ug ntab ngiyal’, ni gathi ke pos me buch, ko fare ngiyal’ ko Paluk’af ko Jewish nib yalen roraed niyaed be soen nag Elijah nra sul.
Bo’or gidii’en nib Jew niyaed ma fal’ag rogon reb u tebel nga biyang nifan Elijah ko napan e Paluk’af. Bo’or e gidii’ nima l’eg e ran ngalan e cap nge mada’ nga mrichlen nifan ngak. Ma boech e gidii’ e, napan ere ngiyal’ ney ko Paluk’af, me pii’ fak ko fare langan e mab, boechi ngiyal’ e yima digey nib mab buchu’uw, ningan guy ko bay Elijah u waen ningan pining ninge yib boech nga na’un.24
Bachane ke fulweg prophecy nga kabang ko fare micheg ko fare sulyarmen ko gubin banan,25 Elijah e yib ni woed rogon nin micheg, ko fare Easter nge fare Passover. Ke fek fare metawon nima m’ag nag e tabinaew nga ta’bang u fayleng nge u tharmiy. Woed nike machibnag Moroni ngak Profet i Joseph, ma Elijah “e bayi yung ngalan gum’ircha’en fapi bitir fapi m’ag nin micheg nag ngak e chitamanginraed, ma gum’ircha’en fapi bitir era sul ngak e chitamanginraed. Ya fa’anra dabi buch ni aray rogon,” ni ul’ul’ Moroni ni yoeg, “ma ga’angin yang fare fayleng ab m’ay fan ko fare wub rok [fare Somoel].”26 Fare thothup rok Elijah, e be yib u dakean fare Kan ni Thothup, nibe chugur nagdaed ko birodaed e mfen—tin kakrom, tin chiney, nge tin nga mm’on—ko rogon fapi chep rodaed, ko tin kakrom, nge pigpig ulane temple.
Ngaed weliyed mornga’agen fare Paluk’af nge n’en nibe yip fan. Paluk’af e fan ngak fapi bitir nu Isreal ni’ur pigpig gaed ulan aningeg i ragag e duw. Ulan fare bayor ko Exodus e weliy mornga’agen e biney ni yib fapi kayru, yochi lal nima kad, lal ni pire’, yam’ ni tay e gamanman, lot, ayis nike el, asmen’ing, nge talumor nib dub’ag. Fare bin tomur e plague ni yib e lii’ gubin e tin ni nganni’ e pagal u dakean farengi but’, ma gathi ulan fare tabinaew rok gidii’ yu Isreal ni fa’anra—ni fa’an pi tabinaew ney e kar thiyed fare racha’ ko fare bin nganni’ e gamanman nga dakean langan e mab roraed.27
Ma fare engel ko yam’ e bayi pag fapi langan e mab nibay e racha’ u dakan.28 Biney ni thumur, fa fare paluk’af, e be yip fan Yesus Kristus ni gel ko fare yam’. Arrogon, fare racha’en fare Fak Got ni’ir fare Saf nib Mangil e bay gelingin ninge kunuy pi gidii’en nga ta’abang nifan ngoraed ninge ayuwegraed ko giney nge barba’ fare veil.
Bay nikan dag, ulan fare Babyor ku Mormon ni weliy fare “gelingin nge fare foskoyam’ rok Kristus”29—ni’ir e fan fare Easter—ni l’agruw fan fare sulyarmen.
Bin somm’on, re fas ko yam’ niba yaen ko gubin i pa’ay nge ayiy nge ‘ul’ul u doewey ma yira sulweg ko kenggin; arragon, ni mus nga bagaf i piyen loelugey ma dabi yaen nga bayang.”30 Biney nin micheg e be pii’ e athapeg ngak e gidii’ nike kireb pa’ nge ay; pi’in ma dakiryag ninge guy banan, fa rung’ag banan, fa yaen; fa bay biyang i dow nike kireb. Ra gaydaed. Ra polo’ nagdaed.
Kan thothupnag, ni fare micheg ko fare Easter nge fare Bayul rok fare Somoel rodaed e “gubin ban’en ma yira sulweg nga yarmen.”31 Ma bin migid fare sulyarmen e biney ko fare sulyarmen nib thothup, nibe yaen u rogon e murwel nge tin ni gadaed be athapeg. Woed e flowa nga dakaen e raen,32 irma sulyarmen “fatin nib fel’,” “mat’aw,” “pufmat’awoy,” nge “murnguy.”33 Aram fan ni yoeg Alma ni fare profet e bugney e thin sulyarmen 22 biyay34 nike yoeg ngodaed ningaed “mu rin’ ngoraed nib mat’aw yalen, mu dugliy u wun’um rograed ngoraed nib mat’aw, mag ‘ul’ul ngay ngam rin’ e tin nib fel’.”35
Ni bachane “Got e pii’ ir ni bayul ni bachan e pi denen ko gidii’ nu fayleng,”36 fare Bayul rok Somoel e gathi kemus nrayag ninge sulweg e tin nike m’ay ma k’ar rogon e tin ni bayki buch. Bechane Irma nang e miith, gagfow, m’ar, “lumel ni gubin mit rodad,“37 rayog Ninge, udakaen e murnguy, golnagdaed, ko mo’owaer rodad.38 Bachan Got e “Got nib mat’aw, Got nib sug ko murnguy,” fare tonom ko murnguy e rayag “ni nge ayliy lungun e justice.”39 Ngaed kalngaen’gaed magdaed rrin’ e tin nrayag rodaed. Irma “ma ke longbiyeg nga lan ngorngoren ko t’ufeg rok’.”40
Daba’ gadad be madnom nagdad nifan fare sulyarmen nge foskoyam’. Gub falfalaen’ ngay ma gube micheg fare Sulyarmen ni kabe ul’ul’ i yaen ko fare gospel rok Yesus Kristus. Woed rogon ni tabab ko 200 e duw kafram, tamilang nge yi’iy e kabe ul’ul’ nibe yib u dakean Somoel nge fapi profet rok nib fos nge fare Galasia Rok ni fithingan e bay riy—Fare Galasia ku Yesus Kristus ni Fan ko Gidii’en Got ko Tin Tomur e Rran—nibe yib u dakean fapi yi’iy nib thothup nge fapi thogthog nibe yib ko fare Kan ni Thothup.
Bay e mich rog ku Got, ni’ir e Chitamangiy ni Gubinfen, nge fare Fak nib Tu’uf Rok, ni’ir fare Yesus Kristus nib fos. Gidii’ nu fayleng e lii’ raed u ralean fare kuruth ma taboech riy min foseg ko yam’. Ma karimus ni Yesus Kristus ni foskoyam’ e kabay fapi fathan e cham ntay ulan pa’, rifrifen’ay, nge barba i pe’yoen. Ma karimus ni’ir e rayag ninge ga’ar, “kug yoloey fithingmed nga lan pa’ag.“41 Ma karimus ni’ir e rayag ninge ga’ar: “I gag facha’ nin chubiyeg ngalang. Ma gag Yesus ni facha’ nikan kuruth nigeg. Ma gag e Fak Got.”42
Woed fachi bpin ni kanoeg i Ivy ngak nge fare violin rok, gadaed e woed ni somm’on riy. Riyul’ ni kanoeg, “n’en dawori guy, arak e rung’ag, n’en dariy’ be’ nike taw e laen rok ngay nra yodorom, e ri ir e ren’en nike fal’eg Got rogon ke tay ni fan ngak e pi’in nib t’uf Got rorad.”43 Nap’an tiney erran, rayog ningad filed marunga’gen e tin fel’ ku Got nge rayog rodad ning thothup ningad gayed e t’ufeg ku Got ufithikdaed ningad piriyeg’ed Ngak ma reb e gidii’. Biney ab ta’awath nrayag ninged rrin’ed magdaed mang, ul’ul’ i rrin’, nge tu’ufeg nga fithik’ e tu’ufeg, gur rom nge gadaed u ta’abang.
Pi walageg u gubin yang, napan ni gadaed be mada’ ma gube fil boech banan rom, ma be sug gum’ircha’eg ko falfalaen’ ko fare gospel ni gadaed be milekag riy. Mich rom nge fare milekag rom ko fare gospel e be gelnag e mich rog nge fare gospel ni gube milekag riy. Tin nibe m’agfan’um ngay nge falfalaen’ rom, tu’ufeg rom ngak e binaew rom ngak gidii’en Got nge gathon fapi tabinaew rok Got, nge rogon ni gabe nangfan e tin riyul’ nikan sulweg nge tamilang e be ga’nang fare gospel nike sulyarmen, ni Yesus Kristus e bay u lukungun. Uta’abang ko pagaen’daed, “udakaen e yaal’ nge maguleng, Somol, mu par rog.”44 Uta’abang gadamanang, bachan pow, rayog ningad matheged urngin e taw’ath.45 Udakaen e ban’en nib moem ni dariy’, rayog ningad guyed fatin gaa’ fan nira yib nga yafas rodad.46
“Ma ra yibi buch ni gubin e gidii’ nib mat’aw era mukun u gubin yang u dakean fapi nam, ma yaedra yib nga Zion, niyaed be yon’ e tang ko falfalaen’ ni manemus.”44 Ni yaed be yog e hosanna nge hallelujah, niyaed be yon’ e tang ko hallelujah—ni ra par ni’r e Pilung ko gubin e mfen ndabi mus! Ni yibe og e hosanna Ngak, fare Saf nge fare Got! U dakean fithingan i Yesus Kristus nib thothup, amen.