Ave Lo Tatou Satauro
O le aveina i o outou luga o a outou satauro ma mulimuli i le Faaola o lona uiga o le faaauau pea i le faatuatua i luga o le ala a le Alii ma ia lē gauai atu i mausa faalelalolagi.
Uso e ma tuafafine pele, ua tatou maua aoaoga matagofie mai o tatou taitai i nei aso e lua ua mavae. Ou te molimau atu ia te outou afai tatou te taumafai e faaaoga nei aoaoga musuia ma talafeagai i o tatou olaga, o le a fesoasoani le Alii ia i tatou taitoatasi e ala i Lona alofa tunoa, e tauave o tatou satauro ma faamamā a tatou avega.1
A o i ai i le aai o Kaisareia Filipi, na faaali atu e le Faaola i Ona soo le mea o le a Ia mafatia ai i lima o toeaina, faitaulaga sili, ma le au tusiupu i Ierusalema. Sa Ia aoaoina faapitoa i latou e uiga i Lona maliu ma le Toetu mamalu.2 I lena lava taimi, sa le’i malamalama atoatoa Ona so’o i Lana misiona paia i le fogaeleele. Ina ua faalogo Peteru lava ia, i le fetalaiga a le Faaola, na Ia ave o Ia ma aoai o Ia, ua faapea atu, “Le Alii e, ia mamao ia te oe lea mea: e le oo lena mea ia te oe.”3
Ina ia fesoasoani i Ona soo ia malamalama o le tuuto i Lana galuega e aofia ai le gauai atu ma mafatia, sa tautino malosi atu ai le Faaola:
“Ai se tasi e fia mulimuli mai ia te au, aua ne’i usiusitai o ia ia te ia, a ia ave e ia lona satauro, i le mulimuli mai ai ia te au.”
“Aua ai se fia faasaogalemuina lona ola, e maumau ai ia te ia; a o le faamaumau lona ola ona o a’u, e maua ai e ia.
“Aua se a le aoga i le tagata, pe afai na te maua le lalolagi uma, ae maumau lona ola? se a foi se mea e avatu e le tagata e togiola a’i lona ola?”4
E ala i lenei folafolaga, sa faamamafa mai ai e le Faaola, o i latou uma e loto e mulimuli ia te Ia e manaomia ona faafiti e i latou i latou lava ma pulea o latou manaoga, tuinanauga, ma faananauga, ositaulagaina mea uma, e oo lava i le ola pe a tatau ai, i le gauai ma le atoatoa atu i le finagalo o le Tama—e pei ona Ia faia.5 O le mea moni, o le tau lenei e totogi mo le faaolataga o se agaga. Sa faaaoga ma le iloaina ma faafaatusa e Iesu le faatusa o le satauro e fesoasoani ai i Ona soo ina ia malamalama atili i le uiga moni o le ositaulaga ma le tuuto i le galuega a le Alii. O le faatusa o se satauro na lauiloa i totonu o Ona soʻo ma tagata o le Malo Roma ona sa fai faamalosi e Roma tagata e faasatauroina e amo a latou lava satauro po o laau faalava o le satauro i le nofoaga o le a fasiotia ai i latou.6
Ae i le mavae ai o le Toetu o le Faaola faato’a tatala ai iina mafaufau o le au soo ma malamalama ai i mea uma na tusia e uiga ia te Ia7 ma mea o le a manaomia mai ia i latou mai lena taimi agai i luma.8
I le tulaga lava e tasi, o i tatou uma lava, o uso ma tuafafine, e tatau ona tatala o tatou mafaufau ma o tatou loto ina ia malamalama atoatoa i le taua o le aveina i o tatou luga o ō tatou satauro ma mulimuli atu ia te Ia. Tatou te aoao e ala i tusitusiga paia, o i latou o e mananao e ave i o latou luga o latou satauro e alolofa ia Iesu Keriso i se auala latou te faafitia ai i latou lava mai mea uma e lē faaleatua ma tu’inanau faalelalolagi uma ma tausi Ana poloaiga.9
O lo tatou naunautaiga e lafoai ese mea uma e feteenai ma le finagalo o le Atua ma ositaulaga mea uma ua poloaiina ai i tatou e tuuina atu ma tauivi e mulimuli i Ana aoaoga o le a fesoasoani ia i tatou e tumau ai i le ala o le talalelei a Iesu Keriso—e oo lava i fetaia’iga ma faigata, vaivaiga o o tatou agaga, po o faatosinaga faaagafesootai ma filosofia faalelalolagi ia e tetee i Ana aoaoga.
Mo se faataitaiga, mo i latou e lei mauaina lava se soa e faavavau ma e ono lagona le tuuatoatasi ma leai se faamoemoe, pe mo i latou ua tatala faaipoipoga ma lagona ua tuulafoaiina ma faagaloina, ou te faamautinoa atu ia te outou o le taliaina o le valaaulia a le Faaola o le ave i o outou luga o satauro ma mulimuli ia te Ia, o lona uiga o le faaauau pea ma le faatuatua i le ala a le Alii, tausisia o se mamanu o le mamalu, ma ‘aua le gauai atu i mausa faalelalolagi ia o le a iu lava ina aveesea ai lo tatou faamoemoe i le alofa ma le alofa mutimutivale o le Atua.
O mataupu faavae lava ia e tasi e faatatau ia te outou o loo aafia i le tosina atu i le itupa e tasi ma lagona ai le lotovaivai ma le leai o se faamoemoe. Ma e masalo ona o lenei mafuaaga, o loo lagona ai e nisi o outou ua lē toe aoga le talalelei a Iesu Keriso mo oe. Afai o le tulaga lena, ou te faamautinoa atu ia te oe o loo i ai pea le faamoemoe i le Atua le Tama ma i Lana fuafuaga o le fiafia, ia Iesu Keriso ma Lana taulaga togiola, ma i le ola ai i a Laua poloaiga alofa. I Lona poto atoatoa, mana, faamasinotonu, ma le alofa mutimutivale, e mafai ai e le Alii ona faamauina i tatou e fai Mona, ina ia mafai ona avatu i tatou i Lona afioaga ma maua le faaolataga e faavavau, pe afai tatou te mausali ma lē masi’i’ese i le tausiga o poloaiga10 ma o loo faatumulia pea i galuega lelei.11
Ia i latou o e ua soli ni agasala matuiā, o le taliaina o lenei lava valaaulia o lona uiga, faatasi ai ma isi mea, ina ia faalotomaualaloina oe lava i luma o le Atua, ia fefautuaai ma taitai talafeagai o le Ekalesia, ma ia salamo ma lafoai au agasala. O lenei faagasologa o le a faamanuiaina ai i latou uma o e faasagatau atu i vaisu matautia, e aofia ai heroini (opioids), fualaau faasaina, ava malosi, ma ponokalafi. O le faia o nei laasaga e faalatalata atili atu ai oe i le Faaola, o Lē e mafai ona faasaolotoina oe mai le tausalaina, faanoanoa, ma le pologa faaleagaga ma faaletino. Ma le isi, atonu foi e te manao e saili atu i le lagolago a lou aiga, uo, ma fomai atamamai ma faufautua faapolofesa.
Faamolemole ‘aua lava ne’i e fiu pe a mavae ni toilalo faifai pea, ma mafaufau ia te oe lava ia, e le mafai ona lafoaia agasala ma faatoilaloina le vaisu. E le tatau ona tuu lou taumafai ma faaauau pea i vaivaiga ma le agasala! Taumafai pea lava pea e fai le mea sili e te mafaia, ma faaali atu i au galuega le manao e faamamā totonu o le ipu, e pei ona aoao mai e le Faaola.12 O nisi taimi o tali i ni luitau patino e oo mai pe a mavae le tele o masina o taumafaiga faifai pea. O le folafolaga o loo maua i le Tusi a Mamona e faapea “e faaolaina i tatou i le alofa tunoa, pe a uma mea uma e mafai ona tatou faia,”13 e faatatau i nei tulaga. Faamolemole ia manatua o le meaalofa o le alofa tunoa o le Faaola e le faapea ua faatapulaaina i se taimi “pe a uma” mea uma e mafai ona tatou faia. E mafai ona tatou maua Lona alofa tunoa a o lei faia, a o faagasolo, ma le mavae ai o le taimi tatou te faia ai a tatou lava taumafaiga.”14
Ou te molimau atu a o tatou taumafai pea e foia o tatou luitau, o le a faamanuiaina i tatou e le Atua i meaalofa o le faatuatua ina ia faamaloloina ma e ala i galuega o vavega.15 O le a Ia faia mo i tatou mea e le mafai ona tatou faia mo i tatou lava.
E le gata i lea, mo i latou e lagona le inoino, ita, lototiga, pe sa saisaitia i faanoanoaga ona o se mea e te lagona e le talafeagai, o le ave o le satauro ma mulimuli i le Faaola o lona uiga o le taumafai e tuuese nei lagona ae liliu atu i le Alii ina ia mafai ona Ia faasaolotoina i tatou mai lenei tulaga faalemafaufau ma fesoasoani ia i tatou ia maua le filemu. Ae paga lea, afai tatou te taofimau i lagona ma manatu le lelei, atonu tatou te iloaina o loo tatou ola e aunoa ma le faatosinaga a le Agaga o le Alii i o tatou olaga. E le mafai ona tatou salamo mo isi tagata, ae e mafai ona tatou faamagaloina i latou—e ala i lo tatou mumusu ina ia saisaitia e i latou na faatiga ia i tatou.16
Ua aoao mai e tusitusiga paia e faapea e i ai se auala e o ese ai mai nei tulaga—e ala i le valaauliaina o lo tatou Faaola e fesoasoani ia i tatou e suia o tatou loto ma’a’a i loto fou.17 Ina ia tupu lenei mea, e tatau ona tatou o mai i le Alii ma o tatou vaivaiga18 ma talosagaina Lana fesoasoani ma le faamagaloga,19 aemaise lava i le taimi paia pe a tatou aai ma feinu i le faamanatuga i Aso Sa taitasi. Tau ina ia tatou filifili e saili atu i Lana fesoasoani, ma faia se laasaga taua ma le faigata e ala i le faamagalo atu o i latou ua faatiga mai ia i tatou ina ia mafai ona amata faamaloloina o tatou manu’a. Ou te folafola atu ia te outou o le tou faia o lea mea, o le a faatumulia ai o outou po i le toomaga lea e sau mai se mafaufau e filemu i le Alii.
A o i ai i le falepuipui o Liperate i le 1839, na tusia ai e le Perofeta o Iosefa Samita se tusi i tagata o le Ekalesia o loo i ai valoaga e matua talafeagai lava i nei tulaga. Sa ia tusia, “O nofoalii ma malo, itumalo ma mana uma, o le a faaali ma tuu mai i luga o i latou uma o e na tumau ma le lototoa mo le talalelei a Iesu Keriso.”20 O le mea lea, ou uso e ma tuafafine pele, o i latou e ave i o latou luga le suafa o le Faaola, faalagolago i Ana folafolaga ma tumau e oo i le iuga, o le a faaolaina21 ma o le a mau faatasi ma le Atua i se tulaga o le fiafia e lē gata.22
Tatou te feagai uma lava ma tulaga faigata i o tatou olaga lea tatou te lagona ai le faanoanoa, leai se fesoasoani, leai se faamoemoe, ma o nisi taimi e faavaivaia ai. O nisi o nei lagona atonu e taitai atu ai i tatou e fesiligia le Alii: “Aisea ua ou oo ai i nei tulaga?” po o le “Aisea ua le faataunuu ai o’u faamoemoega? E le gata i lea, o loo ou faia mea uma i lo’u mana e ave la’u satauro ma mulimuli i le Faaola!”
A’u uo pele, e tatau ona tatou manatua o le aveina o ō tatou satauro i o tatou luga e aofia ai le lotomaualalo ma faalagolago i le Atua ma Lona poto e lē iu. E tatau ona tatou faamamaluina o loo Ia silafia i tatou taitoatasi ma o tatou manaoga. E manaomia foi le taliaina o le mea moni e faapea, o le taimi a le Alii e ese mai ia tatou taimi. O nisi taimi tatou te saili ai mo se faamanuiaga ma faatulaga se taimi faatapulaa mo le Alii e faataunuu ai. E le mafai ona tatou faia ni tuutuuga i lo tatou faamaoni ia te Ia e ala i le tuu atu ia te Ia o se aso e faagata ai tali i o tatou manaoga. A tatou faia lenei mea, ua tatou pei ai o sa Nifae masalosalo, mai anamua, o e sa tauemuina o latou uso ma tuafafine e ala i le faapea mai, ua mavae le taimi mo le faataunuuina o upu na tautalagia e Samuelu le sa Lamana, ma faatupuina ai le fenumiai ia i latou o e na talitonu.23 E ao ona lava lo tatou faalagolago i le Alii ina ia filemu ma iloa o Ia o le Atua, Na te silafia mea uma, ma e silafia e Ia i tatou taitoatasi.24
Talu ai nei sa ou maua ai le avanoa e auauna atu ai i se tuafafine ua oti lana tane e igoa ia Franca Calamassi, o loo mafatia mai se faama’i o le pe o le tino. O Tuafafine Calamassi o le tagata muamua lea o lona aiga na auai i le Ekalesia toefuataiina a Iesu Keriso. E ui sa lei papatisoina lona toalua, ae na malie o ia e feiloai ma faifeautalai ma e masani ona auai i sauniga a le Ekalesia. E ui i nei tulaga, sa tumau pea le faamaoni o Tuafafine Calamassi ma tausia lana fanau e toafa i le talalelei a Iesu Keriso. O le tausaga ina ua mavae le maliu o lona toalua, na ave ai e Tuafafine Calamassi lana fanau i le malumalu, ma latou auai ai i sauniga paia ma faamau faatasi ai o se aiga. O folafolaga e o faatasi ma nei sauniga na aumaia ia te ia le faamoemoe, olioli, ma le fiafia na fesoasoani ia te ia e faaauau ai i le olaga.
Ina ua amata ona vaaia uluaʻi āūga o le faama’i, sa tuuina atu e lona epikopo ia te ia se faamanuiaga. I le taimi lena na ia taʻu atu ai i lona epikopo ua saunia o ia e talia le finagalo o le Alii, ma faailoa atu lona faatuatua ina ia faamaloloina ai faapea foi ma lona faatuatua e onosaia ai lona gasegase seia oo i le iuga.
I le taimi o laʻu asiasiga, a o uuina le lima o Tuafafine Calamassi ma tilotilo atu i ona fofoga, sa ou vaaia se agelu susulu na sau mai ona fofoga—e atagia ai lona talitonuga i le fuafuaga a le Atua ma lona susulu atoatoa o le faamoemoe i le alofa ma le fuafuaga a le Tama mo ia.25 Na ou lagonaina lona naunautai mausali e tumau i lona faatuatua seia oo i le iuga e ala i le aveina o lona satauro, e ui lava i luitau sa feagai ma ia. O le olaga o lenei tuafafine o se molimau ia Keriso, o se faamatalaga o lona faatuatua ma le tuuto ia te Ia.
Uso e ma tuafafine, ou te molimau atu ia te outou o le aveina i o tatou luga o lo tatou satauro ma mulimuli i le Faaola e manaomia ai i tatou ia mulimuli i Ana faataitaiga ma tauivi ia avea e faapei o Ia,26 ia feagai ma le onosai i tulaga o le olaga, faafitia ma le inoino i tu’inanau o le tagata natura, ma faatalitali i le Alii. Sa tusia e le Fai Salamo:
“Ina faatalitali atu ia ia Ieova, ina loto tele ia, e faamalosia foi e ia lou loto; ina faatalitali lava ia ia Ieova.”27
“O Ia lava lo tatou fesoasoani ma lo tatou talita.”28
Ou te molimau atu ia te outou o le mulimuli i tulagaaao o lo tatou Matai ma faatalitali ia te Ia, o Ia o le faamalologa sili o ō tatou olaga o le a maua ai le malologa i o tatou agaga ma faafaigofie ma māmā ai a tatou avega.29 Ou te molimau atu ai i nei mea i le suafa paia o Iesu Keriso, amene.