Tautinoga Mausali ia Iesu Keriso
Ua valaaulia i tatou e le Atua ia lafoaiese atoa o tatou ala tuai ia le toe oo i ai ma amata se olaga fou ia Keriso.
Ia Aperila ua te’a, sa ou maua ai le avanoa e faapaia ai le Malumalu o Kinshasa Temokalasi Ripapelika o Congo.1 E le mafai e upu ona faamatalaina le olioli sa ou lagonaina ma tagata faatuatua o Congo i le vaai atu i se malumalu ua faapaiaina i lo latou laueleele.
O tagata taitoatasi na ulufale atu i le Malumalu o Kinshasa sa vaaia se uluai atavali ua faaulutalaina O Afu i Congo.2 Ua faamanatu faapitoa ai i tagata e o i le malumalu e uiga i le tautinoga mausali e manaomia e taula ai i latou lava ia Iesu Keriso ma ia mulimuli ai i le ala o feagaiga o le fuafuaga a lo tatou Tama Faalelagi. O afu ua faaali mai i le atavali ua oo mai ai i le mafaufau se faatinoga lea sa taatele i le silia ma se seneturi talu ai i uluai tagata liliu mai i le FaaKerisiano i Congo.
A o lumanai ai lo latou liliu mai, sa latou tapuai atu i tupua faitino e leai ni ola, na talitonu o ia mea o loo i ai ni mana faalelagi.3 I le mavae o le liliu mai, e toatele sa faia se malaga i se tasi o afu o le mau afu le mafaitaulia i le Vaitafe o Congo, e pei o le Afu o Nzongo.4 Sa tau’ai e nei tagata liliu mai o latou tupua faitino sa i ai i totonu o le afu o se faailoga i le Atua ma isi ua latou lafoai a latou tu masani tuai ma taliaina ia Iesu Keriso. Latou te lei tau’ai atua ma le loto i ai a latou tupua faitino i totonu o se vai to’a ma papa’u; sa latou tau’ai atua i totonu o vai tatafe o se afu tele, ia sa le mafai ai ona toe maua ia mea. O nei faatinoga o se faailoga lea o se tautinoga fou ae mausali ia Iesu Keriso.
O tagata i isi nofoaga ma vaitausaga ua faaalia lo latou tautinoga ia Iesu Keriso i ni auala talitutusa faapea.5 O tagata o le Tusi a Mamona sa igoa ia Aneti-Nifae-Liae sa “tuu i lalo auupega o lo latou fouvale,” ma tanumia “loloto i latou i le eleele” e avea o “se molimau i le Atua … o le a latou le toe faaaogaina [a latou] auupega.”6 I le faia o lea mea, sa latou folafola atu ai e mulimuli i aoaoga a le Atua ma ia le toe fulitua lava i lo latou tautinoga. O lenei faatinoga o le amataga lea o le “faaliliuina i le Alii” ma le toe pauu ese ai.7
O le “faaliliuina i le Alii” o lona uiga o le tuua o se tasi ala o amioga, sa taitaiina e se faatulagaga tuai o talitonuga, ma vaetamaina i se faatulagaga fou e fua i le faatuatua i le fuafuaga a le Tama Faalelagi ma ia Iesu Keriso ma Lana Togiola. O lenei suiga e sili atu nai lo o se taliaina faaleatamai o aoaoga o le talalelei. Na te mamanuina lo tatou faasinomaga, liuaina lo tatou malamalamaaga i le uiga o le olaga, ma taitai atu i se faamaoni a’ia’i lēmāsuia i le Atua. O manaoga patino e feteenai ina ia taula ai i le Faaola ma mulimuli ai i le ala o feagaiga, e mouese lava ma e suitulagaina e se naunautaiga ia usitai i le finagalo o le Tama Faalelagi.
O le faaliliuina i le Alii e amata i se tautinoga mausali i le Atua, e sosoo ma le faia o lena tautinoga o se vaega ua avea ai i tatou lava. O le faapatinoina o se tautinoga faapena o se faagasologa i le olaga atoa ma e manaomia ai le onosai ma le salamo faifai pea. Ma le mea mulimuli, o lenei tautinoga e avea ma se vaega o le tagata o tatou i ai, faaaofiaina i o tatou lagona faaletagata lava ia, ma e i ai pea i o tatou olaga. E pei lava o le le galo ia i tatou o o tatou lava igoa e tusa lava po o a mea o loo tatou mafaufau i ai, ia le galo foi ia i tatou se tautinoga ua tāmau i o tatou loto.8
Ua valaaulia i tatou e le Atua ia lafoaiese atoa o tatou ala tuai ia le toe oo i ai ma amata se olaga fou ia Keriso. E tupu lenei mea ao tatou atiae le faatuatua i le Faaola, lea e amata i le faalogo atu i le molimau a i latou ua i ai le faatuatua.9 A mavae lena, o le a faateleina le faatuatua ao tatou galulue i ni auala lea e taulaina mausali atili i tatou ia te Ia.10
Ia, e manaia pe afai e faapepesiina le faatuatua faateleina e pei o le fulū po o se ma’i masani. O “sina mafatua faaleagaga” la o le a atiae ai le faatuatua i isi. Ae e le tupu faapena. E na o le pau le auala e tupu ai le faatuatua e mo se tagata e faatino i le faatuatua. O nei faatinoga e masani ona uunaia e ni valaaulia e tuuina mai e isi, ae e le mafai ona tatou “faatupuina” le faatuatua o se isi po o le faalagolago faapitoa atu i isi e uunaia lo tatou foi [faatuatua]. Mo lo tatou faatuatua ina ia tuputupu ae, e tatau ona tatou filifili i faatinoga faatupu-faatuatua, e pei o le tatalo, suesueina o tusitusiga paia, ‘ai ma inu i le faamanatuga, tausia ia poloaiga, ma le auauna atu i isi.
A o tuputupu ae lo tatou faatuatua ia Iesu Keriso, e valaaulia i tatou e le Atua ia faia ni folafolaga faatasi ma Ia. O nei feagaiga, e pei ona iloga ai folafolaga, o ni faailoaga ia o lo tatou liua. O feagaiga e fatuina foi se faavae mautu mo le alualu i luma faaleagaga. Pe a tatou filifili ia papatiso, tatou te amata i le ave i o tatou luga o le suafa o Iesu Keriso11 ma filifili e faailoa i tatou lava faatasi ma Ia. Tatou te tautino atu ia avea faapei o Ia ma ia atiinae Ona uiga paia.
O feagaiga e taulaina i tatou i le Faaola ma faamalosia i tatou i le aluga o le ala lea e tau atu i lo tatou aiga faalelagi. O le mana o feagaiga e fesoasoani ia i tatou ina ia tumau i le suiga tele o le loto, faateleina lo tatou liua i le Alii, ma maua atoatoa fofoga o Keriso i o tatou mata.12 Ae peitai o se tautinoga faalotolotolua ia tatou feagaiga o le a le maua ai e i tatou se mea.13 Atonu o le a faaosoosoina i tatou ia fafoliga, tau’ai a tatou ala tuai i totonu o vai toafilemu, po o le tatanu o a tatou auupega o le fouvale ma ‘au o loo lala mai i luga. Peitai o se tautinoga le mautonu ia tatou feagaiga o le a le tatalaina le faitotoa i le mana faamama a le Tama Faalelagi ma Iesu Keriso.
O lo tatou tautinoga e tausia a tatou feagaiga e le tatau ona faatapulaa pe fetuunai i suiga o tulaga i o tatou olaga. O lo tatou faalagolago i le Atua e tatau ona pei o le faalagolago i le Vaitafe o Congo lea e tafe latalata ane i le Malumalu o Kinshasa. O lenei vaitafe, e le pei o le tele o vaitafe i le lalolagi, e tafe pea i le tausaga atoa14 ma sasaa atua le latalata i le 11 miliona kalone (41.5 miliona L) o vai i le sekone e tasi i le Vasa Atalani.
Na valaaulia e le Faaola Ona soo ina ia faapea ona faatuatuaina ma tumau. Sa Ia fetalai, “O le mea lea, ia faamautu lenei mea i o outou loto, o le a outou faia mea o le a ou aoao atu ia te outou, ma poloaiina ai outou.”15 O se naunautaiga “mausali” e tausi a tatou feagaiga e faatagaina ai le mauaina atoa o folafolaga a le Atua ina ia mafai ona tatou mauaina le olioli tumau.16
E toatele le Au Paia o Aso e Gata Ai ua faaalia lo latou “mausali” i le tausiga o a latou feagaiga ma le Atua ma o loo suia pea i latou i taimi uma. Se’i o’u faamatala atua ni tagata se toatolu faapena—o Uso Banza Mucioko, Tuafafine Banza Régine, ma Uso Mbuyi Nkitabungi.
I le 1977 sa nonofo ai le au Banzas i Kinshasa i le atunuu o Zaire, lea ua igoa nei i le Temokalasi Ripapelika o Congo. Sa matua faaaloalogiaina i latou i lo latou nuu faalelotu Porotesano. Ona o a la taleni, sa saunia ai e le latou lotu mo lo latou aiga talavou e o i Suitiselani e aooga ai ma tuuina atu se sikolasipi faaleiunivesite.
A o i ai i Sineva, i le malaga a le pasi e agai atu i le a’oga, sa vaai soo ai lava Uso Banza i se tamai falelotu o loo i ai le igoa “O Le Ekalesia a Iesu Keriso o le Au Paia o Aso e Gata Ai.” Sa ia tuufesili, “Ua i ai ea ia Iesu Keriso ni Au Paia i le taimi nei, i aso e gata ai?” Sa i’u ina filifili o ia e alu e vaai.
Sa faafeiloaia ma le mafanafana Uso ma Tuafafine Banza i le paranesi. Sa la fesiligia nisi o fesili faifai pea sa ia i latou e uiga i le natura o le Atua, e pei o le, “Afai o le Atua o se agaga, e pei o se savili, na faapefea la ona foafoaina i tatou i Ona foliga? E mafai faapefea ona afio o Ia i Lona nofoalii? La te lei maua lava se tali faamalieloto pe ana le faamalamalama atua e faifeautalai aoaoga faavae toefuataiina i se lesona puupuu. Ina ua o ese atu faifeautalai, sa fetepaā’i le au Banzas i le tasi ma le isi ma faapea, “E le o le upumoni ea lenei ua ta faalogo i ai?” Sa faaauau ona latou o mai i le lotu ma sauniga faatasi ma faifeautalai. Sa latou iloa o le papatisoina i le Ekalesia toefuataiina a Iesu Keriso o le a i ai ni taunuuga. O le a aveese le la sikolasipi, o le a faaleaogaina a latou visa, ma o le a manaomia ona latou tuua ma le la fanau Suitiselani. Sa latou filifili ina ia papatisoina ma faamauina ia Oketopa 1979.
I le lua vaiaso talu ona mavae la latou papatisoga, sa toefoi atu ai Uso ma Tuafafine Banza i Kinshasa, o i laua o le tagata muamua ma le lona lua lea o le Ekalesia i lo latou atunuu. Sa tumau fesootaiga a tagata o le Paranesi o Sineva ma i latou ma fesoasoani ia fesootai i latou ma taitai o le Ekalesia. Sa uunaia le au Banzas ia faatalitali ma le faatuatua i le taimi folafolaina o le a faatu ai e le Atua Lana Ekalesia i Zaire.
O le taimi lea, o se isi tamaitiiti aoga mai Zaire i le polokalama faafesuiai, o Uso Mbuyi, o loo ‘aoga i Peleseuma. Sa papatisoina o ia i le 1980 i le Uarota a Brussels. Ina ua mavae lena, sa ia auauna atu i se misiona i Egelani. Ma sa galue le Atua i Ana vavega. Sa toefoi atu Uso Mbuyi i Zaire o le tagata lona tolu o le Ekalesia i lona atunuu. Faatasi ai ma le faatagana a ona matua, sa faia sauniga a le Ekalesia i le fale o lo latou aiga. Ia Fepuari 1986 na faia se talosaga mo le faailoaina aloaia atu e le malo o le Ekalesia. Sa manaomia ai saini a tagatanuu e toatolu o Zaire. O tagata e toatolu na sainia ma le fiafia le talosaga o Uso Banza, Tuafafine Banza, ma Uso MBuyi.
O nei tagata faatuatua sa iloaina le upumoni ina ua latou faalogo i ai; sa latou osia se feagaiga i le papatisoga lea na taula ai i latou i le Faaola. I se tulaga faafaatusa, sa latou lafoai ai o latou ala tuai i totonu o se afu tatafe e aunoa ma se faamoemoe e toe maua mai. Sa le’i faigofie le ala o le feagaiga. O le vāvāō faaupufai, o fesootaiga motusia ma taitai o le Ekalesia, ma luitau ia e masani ai a o fausiaina se nuu o le Au Paia atonu e faalotovaivaia ai ni tagata e faalētuuto. Peitai sa tumau pea Uso ma Tuafafine Banza ma Uso Mbuyi i lo latou faatuatua. Sa latou auai i le faapaiaga o le Malumalu o Kinshasa, i le mavae ai o le 33 tausaga talu ona latou sainia le talosaga lea na taitai atu ai i le faamamaluga aloaia o le Ekalesia i Zaire.
O loo i ai iinei i le asō le au Banzas i le Nofoaga Autu o Konafesi. O loo latou faatasi ai ma le la fanau tama e toalua, o Junior ma Phil, ma afafine faaletulatono, o Annie ma Youyou. I le 1986, o Junior ma Phil o uluai tagata e toalua ia na papatisoina i le Ekalesia i Zaire. O loo maimoa mai Uso Mbuyi ma lona faletua, o Maguy, ma le la fanau e toalima i nei taualumaga mai Kinshasa.
Ua malamalama nei paionia i le uiga ma taunuuga o feagaiga ia sa aumaia i latou “i le malamalama o le Alii lo latou Atua, ma ia olioli ia Iesu Keriso lo latou Togiola.”17
E faapefea ona tatou taulaina i tatou lava i le Faaola ma tumau ma le faatuatua e pei o nei tagata ma le toatele o le fia sefulu o afe o Au Paia i Congo na mulimuli ia i latou ma le fia miliona o isi i le lalolagi atoa? Sa aoaoina i tatou e le Faaola i le ala e faia ai. O vaiaso taitasi tatou te aai ma feinu ai i le faamanatuga ma osia se feagaiga ma lo tatou Tama Faalelagi. Tatou te folafola atu e fesootai o tatou faasinomaga ma le Faaola e ala i le tautino atu o lo tatou naunau ia ave i o tatou luga Lona suafa, ia manatua pea o Ia, ma tausi Ana poloaiga.18 O le saunia ma le filiga ma le osia ma le agavaa o nei feagaiga i vaiaso taitasi e taula ai i tatou i le faavae mausali a le Faaola, ma fesoasoani ia i tatou e faapatinoina a tatou tautinoga,19 ma tuleia ai ma le malosi i tatou i luga o le ala o feagaiga.
Ou te valaaulia outou ia tuuto atu i se faagasologa i le olaga atoa o le avea ma soo. Osia ma tausia feagaiga. Tau’ai a outou auala tuai i afu loloto ma tatafe. Ia tatanu atoa tou auupega o le fouvale e aunoa ma le lala mai i luga o ‘au. Ona o le Togiola a Iesu Keriso, o le osia o feagaiga i se faamoemoega moni ia faamamalu i ai ma le tumau o le a faamanuia ai lou olaga e faavavau. O le a e avea atili e pei o le Faaola pe a e manatua pea o Ia, mulimuli ia te Ia, ma faamemelo ia te ia. Ou te molimau atu o Ia o le faavae mautu. E faamoemoeina o Ia, ma o Ana folafolaga e mautinoa. I le suafa o Iesu Keriso, amene.