Ruyul’ nge fare Tonom
Nap’a ni gadad ra gay e tin nib ruyul’ ni mornga’agen e tiliw, ba tu’uf ni ngad yus niged e tin nib thothup ninge ayuwegdad ko biney ni gadad be gay.
Yi’iy ko daba’ney e rran era yog ni ruyul’ e woed e “lowan’ ko tin chiney ban’en, nge tin kafram, nge tini bayi yib” (Doctrine and Covenants 93:24). Iraray e bin mornga’agen nib puluw ko fare tanom nra thapeg nge fare “The Family: A Proclamation to the World.”
Chiney e gadad be par ko ngiyal’ ni bo’or mit e numon ni yima tay nge tin ni yibe fil. Machane gadi gubin fapi n’en ni yibe fil ab ruyul’. Bachan rogon ni nib mich u wan’dad e tin nib ruyul’, ba tu’uf ni ngad salukgad ko pin’en ni gadad be gay nib ruyul’ nge tin ni gadad be taga’ ngay nib ruyul’. Dabda mathuk niged e tin nu fayleng ban’en ko tin nib ruyul’. Dabda taga’gad ngak’ e thin ku be’ ndariy bobyoren e skuul rok ni woed gidii’en e kachido, gidii’ ni bo’or e gidii’ nib manang, fa be’ ko internent ni danmu nang. Gidii’ nib cheg ko boech ban’en e dabda feked e thin rorad ko boech ban’en ndan raned riy ko skuul.
Ma thingar da sapgad ko pi n’en nge fan ko facha’ nibe pii’ e tiney e thin ngodad. Arayfan ni tay chiylen e thin nib thothup ngodad ndab da uned ko tiney e ngongol (mu guy ko 2 Nephi 26:29).Fa’an ndan nag ko ngan e ke yib riy, ma tinem e rayag nib ban fa de ruyul’.
Tin ni gadad be muruwliy e thingri yib u bang nibe m’ug nruyul’ nike buch ni nge yag ni dabidag ni gadad be langlang ngalang ko tirodad e lowan’.
I.
Nap’an ni gadad ra gay mornga’agen e tin nib ruyul’ ko taliw, ba tu’uf ni ngad yus niged wo’en nib mat’aw ni ngan sapnag: meybil, fare michan’ ko fare Kan ni Thothup, fil fare thin nib thothup nge fapi thin rok e profet ko daba’ney e rran. Ma kirban’ug ngay ni gara matal ma bay e gidii’ nike digey e galasia ni bachan fapi machib riy. Pi cha’ ni’i moy fare thothup rorad era gel e gafgow rorad nib momaw’ ni ngar guyed e tin nib thothup ban’en. Woed President Henry B. Eyring ni yog, “Biney e togan e dar puluw ko n’en ni yadbe tafney nag nge tin ni yadbe guy; yake yan u rogon e tin ndarayag ni ngar guyed.”1
Yalen e science ema fekdad ko tin ba’aray ban’en ni kanoeg e ruyul’ ngay ni gidii’ e ke fal’agin rogon. Machane ran’ey ni “gidii’ e ke fil mornga’agen” e gathi ga’angin fare yafos. Picha’en ndarma fil “ni fil nge fithik e mich (Doctrine nge Covenants 88:118) e dabi nang e tin nib ruyul’ nike mus ni fa’an be sap ko lowan’ ko gidii’. Biney e be saga’alnag e tin nib ruyul’ ban’en.
President James E. Faust e ga’ar: “Picha’en ni kar [tawfe] gad e yadra ban nagrad ni fa’an yad ra sap nga biyang ko lowan’. Mich u wun’mad ni Fare Galasia ku Yesus Kristus ni fan ko gidii’en Got ko Tin Tomur e Rran e bay ga’angin fare gospel ku Kristus rorad, ni’ir fare gospel nibay urngin e tin nib ruyul’ riy ni manemus.”2
Gadad ra piri’eg e tin nib ruyul’ nap’an gadad ra yib ni ngad rin’ed rogon e tiney nib ruyul’ ko gadad mini’, fan e biney e yafos, nge ngan e gadad ray yan ngay nap’an ni kad m’ad. Tiney nib ruyul’ e dabiyag ni ngan fil ni woed e science.
II.
Chiney e ngu weliy mornga’agen fare gospel nib ruyul’ nikan fulweg ni’ir e deg ko fare m’ag ko Fare Galasia ku Yesus Kristus ni fan ko gidii’en Got ko Tin Tomur e Rran. Wenig mu fal’eg e motoyil mag matal. Be weliy mornga’agen e tin ni gadad ma rin’, nge ku boech ban’en sna daw rda nangedfan.
Ba i Got, ni’ir fare Chitamangin ko fapi ya’el ni tin ni’i moy nge tin ni bayi yib e gidii’ nif tu’uf rok.
Dogor rom ab manemus. U m’on ni kan gergel nigem u dakaen ere fayleng ney, kad pared rok Got ni woed e ya’el rodad nib ppin fa mo’on.
Kad rungandad Fare Tabernacle Choir u Temple Square kar yon’ed “I Will Follow God’s Plan.”3. Ke yarmiy e tanom ney rok Got ere rayog ni ngad mon’og ko manimus. Tanom ney ir ga’ fan nifan gubin dad.
U tan pa’ e biney e tonom, Got e ke ngonliy ere fayleng ney ni fan ngak pifak nib ya’el ni ngar bad ngay ngar feked e dogor ni fan dowrad mayag mel’eg e tin nib mat’aw ban’en.
Ni woed, tin ni yibe mel’eg e chiney ab tu’uf ni ngan mel’eg u thilin e tin nib ruyul’ fa tin nib togon ban’en, Dariy thilin, ni I’ir fare moniyan’, nin chuweg ni bachan fapi togopluw rok, nge ni gay rogon ni nge pii’ keru’ pifak Got ko fare tonom rok Got.
Fan e tonom rok Got e nge ayuweg pifak ni ngar mel’eg niged fare yafos ni manemus. Nike mus ni biney e rayag ni ngan ngongliy u roy u fayleng, tomran e yam’, nge fare fayleng ko ya’el.
Ulan e biney e yafos, nibay e denen rodad ni bachan fare moniyan’ nge gadad ra yim’ ma gadad gubin. Gadad ra fanay fare tonom rok Got ni’ir e Chitmangadad nra pii’ ngodad fare Tathapeg, ni’ir fare Fak ni Karimus, ni’ir e ra ayuwegdad ngad fos gad biyay ko yam’. Fare Tathapeg ere pii’ ngodad bayul ni nge thang pilwon gubin fapi denen ni woed rogon ni yog. Ni pin’ey ab tu’uf e mich riy ngak Kristus, kalngan’uy, tawfe, fare tawa’ath ko fare Kan ni Thotup, nge ku boech e m’ag ni ma rin’ be’ nibay gelngin fare priesthood rok.
Tonom rok Got nib sug ko fal’falan’ e ma pii’ ni ta’areb gelngin u thilin fare yafos ko justice nge fare murnguy rok nrayag ngodad u dakaen fare Bayul rok Yesus Kristus. Ma ku rayag ni nge thilyegdad ngad be’echgad ngak Kristus.
Ba Got nima ayuwegdad ni gubin. Ma gadad manang ni u dakaen nge bachan fare Bayul rok Fak ni Kari Mus, “gubin e gidii’ nra thapeg e yafos, ni be yan u rogon fapi fol ko fapi motochiyel ko pi Gospel [Rok]” (Articles of Faith 1:3; kan uneg ngay).
Fare Galasia ku Yesus Kristus ko Gidii’en Got ko Tin Tomur e Rran e bo’or e gidii’ ni manang ni’ir fare Galasia nifan e tabinaew. Machane n’en nib ga’ ni yim nangfan e chongin e tabinaew rodad e be sap ko biney e tha’ make mus rogon aray. Ni biney e tha’ e bay e def riy ni gadad manang. “Got e sunmiy e tabinaew.”4 U tan pa’ far tonom rok Got ni sunmiy e fayleng, fan fare Galasia rok nikan fulweg nga fayleng e nge ayuweg pifak Got ni ngar thapegned fapi tawa’ath ko yafos ko gil’ilungun, ni’ir e rayag ni fa’an nra mabgol e pumo’on nge ppin (muguy Doctrine nge Covenants 131:1–3). Gamad be micheg e pi machibney rok Somoel ni “dogor rom e kab ban’en ni buch u m’on ni ngam mub nga fayleng, nge chiney u roy u fayleng, nge tin ni tomran e yafos rom” ne “mabgol u thilin e pomo’on nge ppin ab tu’uf ko fare tonom rok ni manemus.”5
Aragon, tu’ufeg rok Got ab gel, make mus ni ra chuw ko gidii’ ni dabunrad ni ngar laked Somoel, ke pi’ kanawo’en ngak gubin pifak fare wo’en e fal’afalan’.Gubin e pifak” nit ay e bu’un pi’in ni kar m’aed. Gadad ba rin’ed e pi gam’ing nifan rad ulan fapi temple rodad.” Fan fare Galasai ku Yesus Kristus e nge gay rogon pi fak ni ngar pared ko bin ga’ i gil’ilungun. Fan e gidii dar ba’adag fa dabiyog ni ngar thap tin’ey, Got ni ke fal’eg reg, nib chigchig e gil’ilingun ni fel’ngin.
Be’ nra nangfan e tiney nib ruyul’ era nangfan ko mang fan ni gidii’en Fare Galasia ku Yesus Kristus ko Tin Tomur e Rran e gadad ma leam ma gadad ma rin’ e tin ni gadad be rin’ ban’en.
III.
Chiney e ngu weliy mornga’agen boech e pi n’ey nib ruyul’ ni manemus, nrayag ni ngan nangfan u dakaen ni kamus fare tamilang ku tonom rok Got.
Bin Somm’on, gadad ma tayfan e tin nike mel’eg be’. Oren e manang mornga’agen fare Galasia nikan fulweg bayay nga dakan e fayleng u dakan fare Nam nu Mariken u dakan ga’angin yang u fayleng. Tiney ni buch e gathi kemus ni fan ngodad machane, fan ko fare tonom Rok, ni nge ayuweg pifak Got ni ngar mel’egned e tin ni yad ba’adag.
Bin l’agruw, gadad gidii’en e pigpig. Bo’or yay ni yima fithdad ko mangfan ni gadad ma pi’ e missionary ko boech e naa nike pigpig, nga ku yuyang nibay gidii’en Kristus riy. Ni ku ta’areb rogon ni yima fith dad ko mangfan ni gadad ma pii’ buyu’ e salpiy ninge ayuweg e gidii’ nibe gafgow ni gathi gidii’en chongin e Galasia nge fan ni darda pi’ed e biney e salpiy ngak fapi missionary nifan fapi murwel rorad. Gadad ma rin’ e biney ni bachan gadad gubin ma pifak Got—pi walagdad ni mo’on nge ppin—ma gadad ba’dadag ni ngad pi’ed boech e pin’ey nib thothup ngak gubin e gidii’.
Bin dalip, yafos u feyleng ab thothup ngodad. Pi gum’ing rodad ko tonom rok Got e be talagdad ko mili’ bitir fan thang e pogofan ku be’ ni kiri gel e m’ar rog ni dabkiyag ni nge gol.
Bin aningeg, bo’or e gidii’ ni dar fel’ rogon e par rok bi bachane Galasia rodad ko rogon e mabgol nge bitir. Lowan’ rodad ko tonon rok Got ko fare thapeg ab tu’uf ni dabda uned fan rin’ e tini be buchbuch e chiney u fayleng ma dabda uned ko tin ba’aray e yalen e mabgol ko pumo’on nge pumo’on fa ppin nge ppin. Ya gadad manang ni tha’, ko rogon e pi’in ni mo’on nge ppin, ab tu’uf ko fare tonom rok Got ni ngad ngongliyed.
Bin lal’, ba thil rogon ni gadad ma sap ko bitir. Gadad ma sap ko bin ba’aray ni ngan gergelnag min chugluy e bitir ni’ir bang fare tonom rok Got nge biney ni’ir e fal’falan’ nge bin nib thothup nikan pi’ ngak e pi gidii’ ni ngar ngongliyed. Rogon ni gadad ma sap ngay, e bin th’abi ga’ e tawa’ath u roy u fayleng nge tharmiy e pi fakdad nge pi fakfakdad. Ere, thingar da filed gubin fapi machib nge yalen ngak fapi bitir rodad nifan e fal’falan’ rorad—nifan ngak gubin e bitir.
Bin tomur, gadad e bitir rok e Chitamangdad nibay u Tharmiy ni gadad ba tu’uf rok, nike fil ngodad ni gubin e pumo’on bge pi’in nib ppin, mabgol u thil e pumo’on nge ppin, min fakay min chugluy e bitir e gubin ni’ir bang fare tonon Rok’ ko fal’falan’. Fa’an nra dabundad ma ran chuwegdad ko gare Galasia. Biney e dabyag ni ngan thilyeg wo’en. Gidii’ ni dabun e kubayang ko fare tonon, ma Satan ni’ir e ba’dag ni nge rin’ ni woed e biney ninge togonnag fare tonom rok Got. Be gay rogon ni nge gathay e muruwel rok Got. Pingin e murwel rogk e be gay rogon ni nge ban nag e gidii’ ni fare Bayul rok Yesus Kristus e de ruyul’, me luffan’ e gidii’ ko kalngan’, ni dariy e yi’iy, miyad gathay nagrad. Ma kube l’igin ni nge baliyang nag e tafney ko gidii’ ko mornga’agen dowrad, ni ngar dubuyed e mabgol, ma dabin fakay e bitir—ni rib ga’ ni galibthir ni ra chugliy e bitir ko tin nib ruyul’ ban’en.
IV.
Fare murwel rok Somoel e ra yan nga m’on ni demtrug rogon e pi gidii’ fa n’en nibe yib nga powchandad nap’an ni gadad be gay rogon ngad pared ko fapi machib rok Fare Galasia ku Yesus Kristus ni fan ko Gidii’en Got ni tin Tomur e Rran. Ma tin nibe marwar e tafney rok, ba’aray boech ban’en ni gube pi’ nifan ngomed.
Mu tafneynag fare yalen e kalngan’ ni bay nrayag nike yib u dakan gelngin fare Bayul rok Yesus Kristus. Ni woed Elder Neal A. Maxwell ni yog, dam mpar u fithik e “pi gidii’ ni yad be gay rogon ni ngar thilyeged e Galasia ma dar thiliyegned pinginrad.”6
Woed Elder Jeffrey R. Holland ni yog:
“Mu chichi’iy pa’am ko tin ni gamnang ban’en mag sak’iy ngam par nib gel mag son nag boch e lowan’ ni bayi yib. …
“… Ulan ere Galasia ney, tin ni gadad manang ban’en ere gelnag e tin ni danda nanged.”7
Mu mon’og nag e mich rom ngak Somoel Yesus Kristus, ni’ir fare bin somm’on e yalen ko fare gospel.
Bin tomur, mu gay e ayuw. Tiyogang’ ko Galasia rodad ab tu’uf rom ma be gay rogon ni nge ayuwegnem. Bo’or e ayuw nrayag ni ngam peri’eg ko fare LDS.org nge reb e ayuweg ngodad ni fan e fil ko machib u lan e na’un. Ma bay walagdad ni pumo’on nge ppin ni kan piningrad ni ngar pi’ed e ayuw. Mu gayrad. Mag motoyil ngorad. Mag taga’ ngorad.
Chitamangdad nibay u Tharmiy nib tu’uf rodad e ba’dag ni nge fal’falan’ pifak ni iraray fan ni ke sunmiydad. Ni ra wo’en ere fal’falan’ ney e ir fare yafos ni manechbog, ni rayag ngodad ni fa’an gadad ra san nga m’on ni gadad be leak fare profet rodad, President, ni Russell M. Nelson yima yog fare “kanawo’en e m’ag” ngay. Ba’aray e n’en ni yog ko bin somm’on e mulwol ni mang fare President ko Galasia: “Mu ul’ul’gad ulan fare pi’i kanawo’ ko m’ag. Rogon ni gabe fol ni ngam leak wo’en fare Tathapeg ere bing fare maab ko urngin e pi tawa’ath nib thothup nibay nifan ngak gubin e pumo’on, ppin, nge bitir ni gubin yang.”8
Rug be micheg ni pin’ey ni gube weliy mornga’agen ab ruyul’, ma bay nikan pi’ u dakan fare machib nge fare Bayul rok Yesus Kristus, ni’ir e rayag ni nge rin’ gubin ban’en u tangin pa’ fare tonon rok Got, ni’ir e Chitmangdad nib Machalbog. U dakan fithngan Yesus Kristus, amen.