Chiney I’ir e Ngiyal’
Fa’anra bay a n’en u lane yafas rom nib tu’uf ni ngam lem nag, chiney i’ir e ngiyal’.
Boech e duw kafaram, nap’an kug ta’ermedliy nifan e milekag ko muruwel, mug tabab i thamiy e amith u ngorongreg. Ufithik e magar, me ppin rog e leam nag ninge un ngog. Nap’an e bin somm’on e yang ko sikoki romow, ma fare amith e almarin ni dabkiyog ninggu pogfan. Nap’an ni gu aw gaed nga but, mug chuw gow ko sikoejoe nggu warow nga aspital, ni gin, ni tomuren boech e sikeng, ma fare togta e yoeg ngomow ni rayog ni nggu ulul gow ko milekag romow.
gu sulew nga sikoejoe mug warow u sukuki ni yibe sar ko gin ni nggu warow ngay. Nap’an ni gomow be yaen nga buut’, me yib e pilot nge yoeg udakaen fare intercom me fith ni nggog fithingag. Fare attendant ko sikuki ke yib ngomow, me weliy’ kar thapeged e call nib emergency, me yoeg ni bay e ambulance nibe soen u sikoejoe ninge fekeg nga hospital.
Kug warow ko ambulance mug warow nib papay ko aspital ko emergency room. Aram, kug mada’ew la’agruwi togta kar weliy’ew ke oloboech fare hospital ma ke tal e racha’ u woruum, nib t’uf ninge fi’leg nib papay. Fapi togta ke weliy’ bo’or e gidii’ dar fasgaed ko m’ar ney. Kug nangew fan ni kug palog gow ko tabinaew ma dag nangew fan fa’an kug taermedliyew ko e magowen ney, fapi togta kar ogew fa’an bay e ban’en ningad lem nigew, chiney i’ir e ngiyal’.
Kugu manang nib fal’ rogon ko ngiyal’ nem ni Karin rus, me thil lanin’ug E tin kug lemnog e ba gaa’fan u faram chiney ni dariy’ fan. Ke chuweg e laniyaen’ ko tin nib fel’ ko yafas ney mug lemnog marunga’agen e tin ko manemus—bayi laem ko tabinaew, bitir, le’engig, nge e sikeng ko yafas rog.
Kug ngongoliyed nib fel’ ko tabinaew romow? Kug pirew nib mataw’ mug folgow e michmicheg kug tayew nge tin ba’adag Somoel, fa kug oloboech kug wagaey e tin ko fayleng ninge fekdaed ko e tin ni thabi ga’fan?
Gube pinning med ningam lem nog marunga’agen e mafil nib ga’fan kug fil ko pin’ney: ningam chuweg ko fayleng nge lemnog marunga’gaen e yafas rom. Woed rogon ke yoeg fare togta, fa’an bay ban’en u yafas rom ningam lemnag riy’, chiney i’ir e ngiyal’.
Sikeng nag e Yafas Rodad
Gamadba paer u fayleng ni bay bo’or e ganop, bay bo’or e ban’nen nibe wagay nag daed ninge yoeg nib mom’aw ningad chuweg ko e tin mom’aw ko yafas mag puluw gaed ko e tin nib gaa’ puluwon ko manemus. Ma yib bo’or e ban’en ninge pining tiyaen’daed urngin e ngiyal’, nibe yib udakaen e technology nima thilyeg nib papay.
Fa’anra gadad ra ngongoliyed nignad lem gad, dad nanged fan e tin kireb nira yib udakaen e yaleng ney nira buch ngodaed urngin e rran nge me’leg rodad. Ran sug e yafas rodad ko boech mornga’agen udakaen pi meme, kachido, nge headline nib ga’. Arragon i’ir e falfalean’, machane dabki un e tin manemus rodad, ma gathi fi’leg e laniyaen’daed ko yafas.
Fapi n’ey nib balyang ni woed rogon e tin u lik’ay ku Lehi. Nap’an ngad dared ko kanawo’ ko michmicheg ngad koelgaed nib fel’ fare layi wasey, gadad ba rung’ag mag guyed fapi “ma yaed be yip’ pa’raed” ko fare na’un nib gaa’(1 Nephi 8:27). Sana dabda lemniged ningad rrin’ed, machane boech e ngiyal’ ngad soen gaed mag sap gaed ngak fare lingan’ riy’. Sana ningam pag fare layi wasey ningam chuw ngaram ningam sap riy’. Reb e gidii’ ra chuwgaed “ni bachan fa pi’in ni yaed be moning ngoraed”(1 Nephi 8:28).
En Somoel ke ning e chilyen ngodad “Mu ayuwgad … ya richey mi gimed … da’da’ ko re Rran nem nike taw ngomed” (Luke 21:34). Thogthog ko tiney e rran ba pugurrandaed ningad bo’or ni kan pinning, machane buchuw kan me’leg. Dabki me’leg raed bachan kar fi’leg gum’racha’raed … ko tin nu fayleng mar n’ag e liyoer ko mo’on(Doctrine and Covenants 121:35; kumguy ko verse 34). E nang fan ko yafas rodad ma bing e wo’en ngodaed ningad chuw gaed ko fayleng, ngad suloed nga dakaen e michmicheg rodad u kanawo’, ma, fa’an nib t’uf, thilyeg boech e ban’en ngad koeled nib gel mag sap gaed nga somm’on.
Boech e ngiyal’ u faram, nap’an e mo’olung ko gidii’ ni fel’ yangren ulongob e fayleng, President Russell M. Nelson ke pinning fapi youth ningar chuwgaed ko fayleng, mar taleged social media ko medlip-erran. Ma fare balayal’, me non ngak e ppin ni bang ko mo’olung ko ppin ko conference. Ma arame fith ngoraed ningar “suloed nga dakaen e yafas rodad ko Somoel … ningar nanged kar sak’iy gaed nib duwgil u buut’ ko kanawo’ ko michmicheg.” Ke pinning fel’ laniyaen’ raed fa’an bayi ban’en u yafas thingar ningar thilyeged, “daba’ i’ir e ngiyal’ nib fel’ ningam thilyeg.”1
Nap’an ngad suloed nga dakaen e yafas rodad ningad thilyeged riy’, sana ningad fithed ngodad e duwer ney: urrogon ningad chuwgaed ko e tin balyang ko fayleng ngad puluwgaed ko e lik’ay ko tharmiy u somm’on?
Nap’an e welthin ko conference u 2007 ni kanoeg “Fel’, Bin Fel’, Thabi Fel’,” President Dallin H. Oaks ke fil urrogon ningad me’leged e tin fel’ ko fayleng. Ke yoeg, “Thingar ningad paged boech e ban’en nib fel’ ningge yoeg ningad me’leged reb e ban’en nib fel’ fa thabi fel’ bachan yaed ba gay e michaen’ ngak Somoel ni Yesus Kristus me gel e tabinaew rodad.”2
Gube yoeg ni tin tha’abi fel’ u yafas ney e yaed ba dayif ko Yesus Kristus nge nang fan e tin riyul’ ko manemus Rok nge tha’ rodad Ngak.
Gay e Tin Riyul’
Nap’an ngad gayed rogon ningad nanged en Tathapeg, dad dariy’ fan e dayif ko tin riyul’ marunga’gen e rogdad nge fan ni kad baed ngaray. Amulek ke pinningdaed ni “biney e yafos e ireray e re ngiyal’ … ni ngar mugu’uliyed yaed ni ngar mada’’gaed Got,” fare ngiyal’ “ni fan ko gidii’ ni ngar ngongoliyed e pi muruwel roraed.”3 (Alma 34:32–33). Wod nibe yoeg e fanathin, “Dad e gidii’ fayleng ufithik e tin nu tharmiy. Gadad e gidii’ nu tharmiy u fithik e tin nu fayleng.”3
E nang fan marunga’agen e tabinaew rodad u tharmiy nib t’uf ni fan e milekag rodad nga manemus ninge puf rogdaed ko e tin balyang ku tharmiy. Fare Tathapeg e ke fil ni:
Fa’an gimed ra fol ko thin ni gube machibnag ngomed ma aram e kari muduwgil ni kam manged pi gachalpeg;
“Ma bay mu nanged e tin riyul’, ma tin riyul’ e ir e bayi ayuwegmed nge dab kum pired ni gimed e sib” (John 8:31–32).
President Joseph F. Smith ke yoeg, “Fa bin thabi gaa’ e muruwel ko gidii’ u fayleng ningar nanged e tin riyul’ ko tharmiy, nib polo’, nib machalbog, ni dariy e ngongol ko reb e gidii’ u fayleng ningar pii’ed keru’raed ko e lowaen’raed kar thapeged.”4
Lane fayleng e daba’, bayi tugthin ko tin riyul’ nib almarin, ni bay bo’or e gidii’ ba yoeg e tin riyul’ ni dariy’ fan ko laniyaen’ e gidii’. Fare pagal Joseph Smith ma nang ni “ba gaa’ e balyangaen’ nge tugthin” u yafas rok ni “dabiyag ninge … nang nib yul’yul’ fa’an mini’ ke mat’aw nge mini’ a ba oloboech” (Joseph Smith—History 1:8).Ni “ufithik biney e cham ko thin nge cham ko laniyaen’” nike pinning e ayuw ko tharmiy ninge thapeg e tin riyul’ (Joseph Smith—History 1:10).
Nap’an e mo’olung ko April, President Nelson ke fil, “Fa’an ningad gayed e thap udakaen bo’or e laem nib tolul nge mafil ko gidii’ u fayleng ba chamgaed ko tin riyul’, thinar ningad filed urrogon ningad thapeged e thogthog.”5 Thingar di filed rogon ningad thapeged fare Kan ni Thothup ko tin Riyul’, ni “ma girdi’ u fayleng e dabiyog ni nge yag ngorad, ya dabiyog ni ngar guyed ara ra nanged ir” (John 14:17).
Nap’an e fayleng ney ma yaen nib papay nga reb e bangi kanawo’, thingar ningad leam niged fapi thin ku Jacob ni “ya fare Kan ni Thothup e mayoeg e tin riyul’ ma darmabaen. Ere, ma weliy mornga’agen bogi ban’en ni rogon ni bay, nge mornga’agen bogi ban’en ni rogon ni bay yib; ere pinn’ey e kan dag ngodaed ni chirogon, ni fan ko thap rodaed ni polo’.” (Jacob 4:13).
Nap’an soennag ko fayleng mag lemniged ko yafas rodad, chiney i’ir ngiyal’ ningad nang fan e tin thingar thilyeg. Rayog ningad thapeged e thap ko lowaen’ ni en Tapowiy’ rodad Yesus Kristus ba yaen nga somm’on ninge powi’iy nag daed. Um’on nike yim’ nge Fas Ko Yam’, napan ke muruwel ngak e girdi’ ningar nanged fan e muruwel Rok, Ke pugurran ngoraed “Kugog e re bugithin ney ngomed ni bochan e nge pagan’med ni fan e kad ta’ab girdi’gad. Bayi gafgow nagmed e fayleng. Machane dab mu rus gad; Ya kug gel ko fayleng” (John 16:33). Marunga’agen ni gube micheg u dakaen e fithingan ku Yesus Kristus, amen.