Ebuana Ndito-eka Iban ke Ndibok Israel
Ami nte prophet nno mbufo iban Ufok Abasi emi ebenge kiet, nte emum ini iso ekama ke ndinwam mbok Israel emi ekesuanade.
Ndima ye nsong-urua ndito-eka mi iban, enem ndidu kiet ye mbufo. Ndusuk ifiok-ukpeb eke mmi-mmi emi eyenam mbufo efiok se ami nkere mbanga mbufo ye ukeme edinam-nkpo emi ekenode mbufo.
Usen kiet kini ntingde-iko nno otuowo kiet ke South America, ami nkabare nkop inemesit mbanga ibuot-iko oro, ndien ke ata nde kiet, ami ndoho nte, “Nteeka ndito Duop, ami mmekeme ndidoho mbufo ete …” Ndien ami nkaiso nno etop mi oro nkure.
Ami nketihi ke ami mmedoho iko oro eka. Andikabare iko mi, edikere ke ami mmedue, okpuho iko oro eka okot ete, ntem otuowo ikefioke ke ami nditing mbanga idem mi nte eka. Edi nnwan mi Wendy ama okop iko oro, onyung enyime ndudue mi nte owo.
Ke idaha ini oro, ata udong mi ke ndinam ufon ke ererimbot—nte eka kpot esinamde—oduk ke esit mi. Ke mme isua eke ebede, ini ekededi eke ebupde ntak eke ami nkemekde ndidi medical doctor, kpukpru ini iboro mi esidi ukem-ukem: “Koro ami mkpemekke ndidi eka ndito.”
Mbok efiok ete ini ekededi ami ndohode iko emi eka, ami ntingke kpot mbanga iban emi emande ndito mme eke edepde-ndito-enyene ke uwem emi. Ami nsiting mbanga ofuri ikpo ndito-iban eke Ete ye Eka Heaven nnyin. Ofuri iban edi eka ke adaha edisana nsinsi uduot-obot esie.
Ke okoneyo emi, nte ete ndito Duop—iban usukkiet ye eyeneren kiet—ye nte President eke Ufok Abasi, ami mbenge yak mbufo efiok se ami nkerede mbanga mbufo—kabanga se mbufo edide ye ofuri nkpo-mfon emi mbufo enamde. Owo ndomokiet ikemeke ndinam se edinen nnwan ekemeke ndinam. Owo ndomokiet ikemeke ndino ufon nte eka.
Irenowo ndien ekeme ke ediwak ini nditing mbanga ima eke Ete eke Heaven ye eke Andinynaga eno mbon efen. Edi iban enyene sanga-sanga eno oro—edisana eno. Mbufo emenyene ukeme ndifiok se idi unana owo—ye ke ini mmo eyomde nkpo oro. Mbufo emekeme ndinwam, eno ndongesit, ekpeb, enyung esongo mbon efen kini unana mmo.
Iban ye iren ekut nkpo ke nsio-nsio usung, ndien sese, nnyin imoyom ekikere mbufo! Uduot-obot mbufo anam mbufo ekere-nkpo akpa, ebanga mbon efen man efiok se edinam oro edinamde ye mbon efen.
Nte President Eyring okowutde, ekedi eti Eka nnyin Eve—ye nkukut esie eke uduak Ete ke Heaven—okotongo se nnyin ikoot ‘‘Iduo.” Eti ye osongo mbumek esie ye ubiere osongo Adam akanam uduak inemesit Abasi akaiso. Mmo ekenam emem ono nnyin owo kiet-kiet ndidi isong, mbo ikpokidem, nnyung nnyime ke nnyin iyemek ndida-nno Jesus Christ idahaemi, ukem nte nnyin ikanamde ke ererimbot spirit.
Ndima ndito-eka mi iban, mbufo emenyene sanga-sanga eno ye udong eke spirit. Okoneyo emi ami mbenge mbufo, ye ofuri idorenyin eke esit mi, nte ebenge man efiok eno spirit mbufo—ebok mmo, enam nkpo, enyung enam okori, akan se mbufo ekenyene. Mbufo eyekpuho ererimbot ke nte mbufo enamde ntre
Nte iban, mbufo emesongo mbon efen idem enyung eno eti uwutnkpo emi ekpenamade. Yak ami nno mbufo ekpri ifiok ke ikpo ntot iba emi ekenamde ke akwa mbono nnyin andikibe. Mbufo, ndito-eka iban mi, ekedi ntak etop mbiba oro.
Akpa, unwam. Mkpon-nkan ndaha eke unwam abanga Andinyanga nnyin, Jesus Christ. Ofuri-ofuri, iban edi, ndien kpukpru ini esidi, ekpere ndaha oro eken irenowo. Ke ini mbufo enehede enwam, mbufo emetiene ekikere mbufo man enwam owo efen ofiok ima eke Andinyanga. Udong ndinwam odu ke ido ndinen iban. Ami mmediongo iban emi ebongde-akam ke kpukpru usen ete, “Anie ke Afo oyom ete ami nnwam mfin emi?”
Mbemiso ekenam ntot eke April 2018 kabanga eti ye edisana usung ke ndikpeme mbon efen, ekikere ubak irenowo ekedi ndi-mark utom home teaching mmo nte ke “enam” nnyung mbe nkenam ubiong efen.
Edi ke ini mbufo ekutde ete ke eyeneka-nnwan emi mbufo ekesede oyom unwam, mbufo esosop enwam ndien enam oro ke ofuri ofiong oro. Ntem, ekedi nte mbufo esikesede anam ekpuho esin ke ndino-unwam
Udiana, ke akwa mbono andikibe, nnyin nko ima ikpuho Melchizedek Priesthood quorums. Ke ini nnyin iyomde nte ikpenwamde irenowo ke Ufok Abasi man enam utom mmo ofon, nnyin inehede ikere-ibanga uwutnkpo eke Relief Society.
Ke Relief Society, iban ke nsio-nsio isua ye idaha uwem esobo otokiet. Ndaha isua kiet-kiet enyene mfina esie, ke ntre, do mbufo enam, udua ke udua, ebuaha otokiet, ekori enyung ekpeb iko Abasi otokiet, enam ata ukpuhore ke ererimbot.
Idahaemi, ke nditiene uwutnkpo mbufo, mme andikama Itie-oku Melchizedek Priesthood edi mbon elders quorum. Isua irenowo emi otongo ke 18 ekesim 98 (mme akande oro), ye ukem itie-oku ye ifiok-ukpeb Ufok Abasi. Idahaemi ndito-ete emi ekeme ndinam eboho, osongo, ebo-ukpeb otokiet, enyung enehede enwam mbon efen.
Ke June emi ekebede, Sister Nelson ye ami ima iting-iko ino mme iwaad Ufok Abasi. Nnyin ikoot mmo ete eduk nka-ekong iwaad eke Abasi man enwam ndibok Israel ke nkang veil mbiba. Edibok emi edi mkpon-nkan ubiong, mkpon-nkanntak, yemkpon-nkan utom k’isong mfin emi!1
Edi utom emi enehede oyom iban, koro iban esikpeme ini iso. Ntre okoneyo emi ami nte prophet nno mbufo iban Ufok Abasi emi ebenge kiet, nte emum ini iso ekama ke ndinwam mbok Israel emi ekesuanade.
Mmong ke mbufo ekeme nditongo?
Ami nnousung inang:
Akpa, ami nyom mbufo ebuana ke nditre unam-nkpo social media ye media efen emi ekpedade idiok ye mbat ekikere esin ke esit mbufo ke usen-Duop. Ebong-akam man ediongo ewe nkpo ke ekpetre ke ini oro. Mbufo eyekut ufon editre ke usen-Duop oro. Nso ke mbufo ekut ke etrede ndikere nkpo ererimbot emi esibiatde spirit mbufo? Nte ukpuhore odu ke ebiet emi mbufo idahaemi eyomde ndisin ini ye odudu mbufo? Ndi akpan-nkpo mbufo okpuho—ekpedi edi esisit? Ami mbenge yak ewet enyung enam ekikere oro kiet-kiet.
Udiana, ami nyom mbufo ekot ofuri Nwed Mormon idahaemi tutu isua emi ebe. Nte oro ekpesong ye ofuri mbufo emi enwanade ndiyo uwem mbufo, edieke mbufo enamde item emi ke ofuri esit, Jehovah eyenwam mbufo man enam oro. Ndien, nte mbufo enehede ekot, ami nnwongo nte ke heaven eyebere ono mbufo. Jehovah eyeno mbufo akakan ifiok-spirit ye eriyarare.
Nte mbufo ekotde, ami nyom mbufo edebi ufang kiet-kiet emi etingde iko abanga Andinyanga. Ekem, esongo eting ebanga Christ, edara ke Christ, enyung ekworo Christ eno ufokemana ye ufan mbufo.2 Mbufo ye mmo eyekpere oto ke usung emi. Ndien ukpuhore, utibe-nkpo, eyetongo nditibe.
Eno ntot ke usenubok emi ebanga obufa nwed-edinam usen-Ederi emi abangade ufok. Mbufo, ndima ndito-eka iban mi, edi ntongo unen eke obufa, oyoho, ukeme edikpeb iko Abasi emi. Mbok ekpeb mbon ima mbufo se mbufo ekpebde eto nwed Abasi. Ekpeb mmo nte ekpetienede Andinyanga ebo odudu edikok ye ediyet Esie kini mmo enamde idioknkpo. Ndien ekpeb mmo nte ekpebode osongo odudu Esie ke ofuri usen uwem mmo.
Oyoho Ita, esiak usung man eka temple kpukpru ini. Emi eyeyom esisit nwaidem ke uwem mbufo. Ndiwak edika temple eyenam Abasi ekpeb mbufo nte ekpebode odudu itie-oku Esie emi ekenode mbufo ke temple Esie. Eke mbon emi midungke ikpere temple, ami nyom mbufo ekot ofon ebanga temple ke nwed Abasi ye ke iko eke mme odu uwem prophet. Eyom man ediongo awak, man efiok awak, man ekop awak ebanga temple akan nte ekenamde akpa.
Ke worldwide youth devotional nnyin eke June andikibe, ami mma nting mbanga akparawa kiet emi uwemesie ekekpuhode ke ini ete ye eka esie ebode smartphone esie eno enye flip phone. Eka esie edi nnwan uko. Enye okut nte eyen oyomde ndinam mbumek emi midiyakke enye aka mission. Enye ada mkpeubok esie aka temple man enehede odiongo nte edinwamde eyen esie. Ndien enye anam nte spirit eketemede.
Enye ete: “Ami nkop nte spirit etemede mi ete nse phone esie ke mme ini man nkut sanga-sanga nkpo. Ami mfiokke nte edungore smartphone, edi Spirit anwam mi ada aka ofuri social media eke ami minyeneke! Ami mmediongo ke Spirit esinwam ete ye eka eke eyomde ndausung man ekpeme ndito mmo. [Ke akpa] enye ama ayat esit ye ami. … Edi ke usen ita ebede, enye edikom mi! Enye ekeme ndikop ukpuhore.”
Edu ye ido eyeneren esie ama enehede okpuho. Enye otongo ndinehede nnwam ke ufok, asak imam, onyung ono mkpang-utong ke Ufok Abasi. Enye ama ndinwam esisit ini ke temple baptistery onyung ebenge-idem ndika mission esie.
Oyoho ikoot mi inang, eke mbufo emi esimde isua, edi ndinehede mbuana ke Relief Society. Ami nyom mbufo ekot ntak uduak Relief Society eke idahaemi. Enye ofon. Oro ekeme ndinwam mbufo ke ndinyene ntak nno uwem mbufo. Ami nko mbenge mbufo nte etabi mme akpaniko eke item Relief Society emi ekewetde ke isua Edip emi ekebede.3} Nwed item emi okongo ke ibibene ubet eke First Presidency. Enem mi kpukpru ini eke ami nkotde enye. Enye owut owo emi nnyin idide ye se Abasi oyom mbufo ndidi ke ata ini emi nte mbufo enamde ubiong mbufo man enwam ndibok Israel emi akasuanade.
Ndima ndito-eka mi iban, nnyin imoyom mbufo! Nnyin “imoyom osongo mbufo, nkabare esitmbufo, ekikerembufo, ukemembufo ke ndida usung, ifiokmbufo, ye uyo mbufo.”4 Nnyin idikemeke ndibok Israel ke mbufo miduhe.
Ami mmema nnyung nkom mbufo ndien idahaemi ndiong mbufo ye ukeme ndisin ererimbot emi ke nte mbufo enwamde ke akpan ye usop-usop utom emi. Otokiet nnyin iyenam ofuri se Ete ke Heaven oyom inam man ibenge ererimbot inim ino Edidi Edima Eyen Esie Oyoho Ikaba.
Jesus edi Christ. Ufok Abasi Esie edi emi. K’emi ke ami nting-iko ntiense ke enying Jesus Christ, amen.