Eboho-ikang Mbuotidem Nnyin
Eke mbon emi eyomde, enyimede, enyung edude eno oro, osongo mbuotidem, ke ubakini eyedi, sung-sung onyung afiak edi.
Ndima ndito-eka iren ye iban, nte idige utibe-nkpo ke ndika iso mbo eriyarare heaven nto President Russell M. Nelson ye mme adausung Ufok Abasi nnyin emi anamde nnyin idu ke mbufa ye ndisana usung,1 ke ufok ye ke Ufok Abasi, ke ofuri esit, ekikere ye odudu nnyin?
Akananam nte mbufo emenyene ufang ndinam nkpo emi mbufo mikebengeke idem mme udukemeke ndinam edi ediong mbufo ke ndidomo ndinam nkpo oro?
Ami mmenyene. Ese uwutnkpo kiet mi.
Ediwak isua emi ekebede, Elder Richard G. Scott, owo Eboho mme Apostle Duopeba kiet, okot mi ete, , “Gerrit, nte afo akpama ndinam afia-edidebi ye ami?”
Elder Scott odoho ete ke edidebi esinwam enye ndikut nnyung mbot nkpo. Enye ama ewet ete: “Domo ndinam nkpo, ekpededi nte miditimke ifon-ima. … Edinam nkpo ekeme ndiwut ekikere esit-ekom nno uwem ye eno emi Jehovah okonode mbufo. … Edieke mbufo emekde sifon, inaha nte edinam oro ada okposong ini.”2
President Henry B. Eyring emen ekikere unamnkpo esie owut emi “ke ekikere ima,” edide “ima eke Andibot emi oyomde ndito Esie ekabare etie nte Enye—ndibot nnyung mbop.”3 Utom edibot eke President Eyring ono “sanga-sanga, edikut ke enyin-spirit oto iko ntiense ye mbuotidem.”4
Utom-uso eke President Boyd K. Packer owut ndaha etop iko Abasi kiet ete: “Abasi edi Andibot enyong ye isong ye kpukpru se idude ke esit, ke ofuri nkpo edi ntiense eno edisana ndausung obot oro, ndien ke oyoho edidiana-kiet odu ke ufot uduot-obot, mbufiok, ye iko Abasi eke Jesus Christ.”5
Alma odoho ete, “Kpukpru nkpo ewut ke Abasi mmodo.”6 Ndito Primary nnyin ekwo ete, “Kini ami nkopde ikwo eke inuen mme ke nsede obubit ikpa-enyong, … ami ndara koro ami ndung ke ediye ererimbot emi Ete ke Enyong okobotde ono mi.”7 Ewet-nwed Victor Hugo emen “utibe ebuana ke ufot owo ye mme nkpo; ke ekondo owut, tongo ke utin kesim mkpri unam. … Kpukpru inuen emi efede enyene ubak mbiet Abasi ke idem mmo. …Ntukube edi akwa obot ono ntanta-ofiong.”8
Ndien iko oro afiak ada nnyin aka ikoot Elder Richard G. Scott.
Ami mboro “Elder Scott,” nte “Ami mkpama ndise ofon nnyung nam, enem mi ndikere nte Ete ke Enyong edebide ye ntong enyong ye ofuri mbuwet eke ikpa-enyong ye mmong. Edi”— ami ndop ke anyan ini— ndien ndoho “Elder Scott” nte, “Ami nnyeneke ifiok ndinam afia edidebi. Ami nkere ke eyefina fi ke ndinwana ndikpeb mi.”
Elder Scott asak onyung enim ini man nnyin isobo. Ke usen oro, enye ebenge babru, benti, ye mme ifiet enim. Enye anam ubak adanga onim ndien anwam anam babru ebit ono mi.
Nnyin ikada mbiet ediye afia-mbuwet kiet emi ibuot-iko edide Eboho-ikang ke Utin osopde. Nte nnyin idebide, nnyin ineme ibanga mbuotidem—ke nte nnyin isede unwana ye ufiop eboho-ikang, nnyin ifinake ibanga ekim ye se ikebede nnyin—didie,ke ubak anyan, ndobo okoneyo, eboho-ikang mbuotidem nnyin ekeme ndino idorenyin ye osongo. Ndien ini ukut nnyin edisim utit. Idorenyin mbuotidem nnyin edidi—nkpo editi, ifiok-ukpeb ye inyene mbuotidem ke mfon ye ediwak mbom Abasi ke uwem nnyin—emi okodude ye nnyin ke ini ukut.
Iko ntiense mi edi—kabanga mmo emi eyomde, enyimede, edude eno oro—osongo mbuotidem, ke ubakini esitongo sung-sung, eyedi onyung afiak edi. Unwana eyedi, kini nnyin inyeneke udong inyung iyomde enye, kini nnyin inyeneke ime inyung inim mbet Abasi, kini nnyin ibengeke idem ndibo mfon, edidong ye ediomo Abasi.
Nte nnyin itongoke ndidebi, Elder Scott ete, “Gerrit, kpa ye ukpeb akang kiet kpot afo eyedebi nkpo emi afo edidade nte nkpo editi.” Enye ama enen. Ami mmema afia-edidebi eboho-ikang nnyin emi Elder Scott akanwamde mi ndidebi. Ukeme unamnkpo ekedi ndien osuk edi esisit, edi nditi ke eboho-ikang mbuotidem nnyin oro ekeme ndisongo nnyin idem ke usung ition.
Akpa, eboho-ikang mbuotidem nnyin ekeme ndinam nnyin ikut idara ke ofuri edinam.
Idara odu ke ndikekere, ndikpeb, nnam nti mbufa nkpo. Emi edi ata akpaniko. Ke nte nnyin iwukde mbuotidem ye idorenyin ke Ete ke Enyong ye Eyen Esie, Jesus Christ. Nnyin ikemeke ndima idem nkesim ndinyanga idem nnyin. Edi Ete ke Enyong amama nnyin akan onyung odiongo nnyin ofon akan nte nnyin imade inyung ifiokde idem nnyin. Ana nnyin ibuot idem ye Jehovah ke ofuri esit ndien itre ndiberi idem ke asian nnyin.9
Ndi akananam afo emedi nkokure owo eke owo mikotke ete edi usoro usen emana owo efen?
Ndi akananam esin fi nte akpatre owo, mme etre ndisisin fi kini emekde mbon nka mbre?
Ndi afo emebenge idem ono udomo ufoknwed, ndungore utom, ufang kiet emi afo enehede oyom—ndien afo ekere ete ke oro okpu mbufo?
Ndi mbufo emebong akam eyom ebuana emi, ke suto ntak ekededi, emi mikeworoke isu?
Ndi mbufo emeyo anyan-ini udongo, ebe mme nnwan mbufo esinde mbufo, ebo ufen ke ntak ufokemana mbufo?
Andinyanga odiongo ndaha nnyin. Kini idade unen edimek emi Abasi okonode inam nkpo inyung isin ofuri ukeme nnyin ke nsuhoreidem ye mbuotidem, Andinyanga nnyin, Jesus Christ, ekeme ndinwam nnyin ndiyo ke mfina ye idara eke uwem. Mbuotidem esine udong ye mbumek ndinim ke akpaniko.Mbuotidem nko oto ndinim mbet Abasi, emi ekenode man odiong nnyin, ke nte nnyin itienede usung ediomo Esie.
Ke ini nnyin ikopde, mme ndikere ke, idorenyin okure, idi-ikpong, imebiara, iyat esit, emesin, imekpu, mme edidiangare mkpong Abasi ye mfiak-nda-ndi Ufok Abasi Esie, ekeme ndida ukeme ye mbuotidem efen mbemiso afiak ediduk usung ediomo Esie. Edi oro odot ntre! Mbok di, fiak di, tiene Obong Jesus Christ1 Ima Abasi osongo akan uruk eke mkpa—eke ikpokidem ye eke ukpong.10 Uwa Erisio-isop eke Andinyanga nnyin inyeneke adanga ndien edi ke nsinsi. Nnyin kiet-kiet imeyik inyung idue. Nnyin imekeme, ke ini kiet, iduok usung nnyin. Abasi odoho nnyin ete, ke suto ebiet emi nnyin idude mme se ikanamde, iyefiak itiene Enye kini ekededi. Enye ke ebebet ndibo nnyin.11
Udiana, eboho-ikang mbuotidem nnyin ekeme ndinam nnyin ino unwam ke obufa, ndaha ifiok, emi ofonde onyung odotde ke usung emi Spirit etemede.
Oruk unwam oro eyeda utibe-nkpo ye edidiong ke ediomo edi—emi nnyin ikopke ima Abasi inyung iyom ndinwam mbon efen ke spirit oro.
Ibighike, ami ye Sister Gong ima imehe ye ete ye ufokemana emi enyenede eti enyene itie-oku eyeneka eren emi ekedikutde bishop mmo onyung obup mme enye ekeme ndidi nsanga home teaching ye ete esie. Ete esie ekedi owo mfiak-edem inyung inyeneke udong ke utom oro. Edi, kini ete esie okpuhode esit, enye ye edima eyeneka eren emi etongo ndika ufokemana emi ekenode “mmo” ete ekenwam. Ke ekurede edika eke usen kiet, nnwan esie—emi misikaha Ufok Abasi ke ini oro—obup ebe esie nte nkpo eketiede. Ete oboro ete, “Etie nte odu se nkopde”—edikem aka ufok-udia man okonwong beer.12
Edi ifiok-ukpeb efen ama etiene efen: nti ifiok-ukpeb, utom unwam edikpuho esit, eduk-class ndika temple, ndika Ufok Abasi, ndidiana-otokiet nte ufokemana, ke edisana temple. Kere nte ndito ye ndito-ndito ekenemde esit eno ete ye eka mmo ye nsanga ono-unwam eyeneka eren emi ekedide nte ufan ye nsanga ono ete mmo man ama onyung anwam mbon efen.
Eboho-ikang oyoho Ita eke edisongo mbuotidem: ntippe idara iko Abasi ye edidiong edi ke ini nnyin iyomde ndima Jehovah ye mbon efen ke ofuri esit ye ukpong nnyin.
Nwed Abasi eteme nnyin ete isin ofuri ukeme nnyin ke ntak ima ye utom unwam. Ke Akani Testament, Nwed Deuteronomy eteme ete “ma ndien Abasi fo ke ofuri esit fo, ye ke ofuri ukpong fo, ye ke ofuri odudu fo.13 Joshua eteme ete, “Ema Jehovah Abasi mbufo, … esanga ke kpukpru usung esie, … enim mbet esie,… eyire ye enye, enyung, … enam nkpo esie ke ofuri esit mbufo ye ke ofuri ukpong mbufo.”14
Ke Obufa Testament, Andinyanga nnyin okono akamba mbet iba: “Ma Jehovah Abasi fo ke ofuri esit fo, ye ke ofuri ukpong fo, ye ke ofuri odudu fo; … yung ma mbohidung fo nte idem fo.”15
Ke Nwed Mormon: Testament Jesus Christ Efen, King Benjamin akanam utom “ke ofuri ukeme idem ye ofuri ifiok ukpong esie” man emem odu ke obio.16 Ke Nwed Doctrine ye Covenants, nte ofuri missionary efiokde, Jehovah odoho ete nnyin inam utom Esie ke ofuri “esit, ukeme, ekikere ye odudu nnyin.”17 Ini emi ikot Abasi edukde Jackson County, Jehovah owuk mmo ete enim Sabbath ke edisana, ke ndima “Jehovah Abasi fo ke ofuri esit fo, ye ke ofuri ukeme, ekikere ye odudu fo; ndien ke enying Jesus Christ enam nkpo eno Enye.” 18
Nnyin imedara ke ikoot man isin ofuri ukpong nnyin ke ndiyom nti ye ndisana usung man ima Abasi ye mbohidung nnyin inyung isongo mbuotidem nnyin ke Ete ke Enyong ye Jesus Christ ke esit ye ke ufok nnyin ye ke Ufok Abasi.
Oyoho Inang, eboho-ikang mbuotidem nnyin anwam nnyin ndisiak eti usung ke ndidu uwem edinen ido emi osongoke mbuotidem ye nkpo Abasi.
Mme ndisana ido emi, edu edinen ido emi, mme usung ebenge ekeme ndisine akam, edikot Nwed Abasi, utre-udia, nditi Andinyanga nnyin ye ediomo kini edinam udia-Obong, ndibuana edidiong iko Abasi ke ukworo-iko, temple ye family history, ye utom unwam efen, ndinim journal eke nti ekikere nkpo Abasi nnyin, ye nkpo efen.
Ini emi usung edinen ido ye udong spirit edide kiet, ini ye nsinsi edi otokiet. Unwana spirit ye uwem edi kini edinim ido edu ukpono adade nnyin ekpere Ete nnyin ke Enyong ye Andinyanga nnyin Jesus Christ. Kini nnyin imade mbet ye edinam iko Abasi, nkpo nsinsi ekeme ndifioro ukpong nte mbara emi otode heaven.19 Ndikop item ofuri usen nnyung nnwong odu-uwem mmong, nnyin iyekut iboro, mbuotidem, ye odudu ndiyo ofuri mfina ye ufang ke ime, idorenyin ye idara iko Abasi.
Oyohp Ition, kini nnyin inimde nti usung emi ikutde kini iyomde mbufa ye nti usung ndima Abasi nnyung nwam nnyin ye mbon efen ibenge idem ndisobo ye Enye, eboho-ikang mbuotidem nnyin eyenam nnyin iti ndinen nkpo emi odude ke Jesus Christ, idige eke idem nnyin mme eke ererimbot eyomde.
Ikoot Abasi oyoho ye ima ye ukeme koro Jesus Christ edi “usung, ye akpaniko, ye uwem.” 20 Eke mbon emi ekpade mba, Enye kokot ete, “Etiene mi,” ndien kpukpru mmo emi etienede Enye, Enye onwongo ete, “Ami nyeno mbufo nduok-odudu.”21 “Eteiene Christ, enyung edi edisana ke enye, … ma Abasi ke ofuri ukeme, ekikere ye odudu mbufo, ke ntre mfon esie oyoho ono mbufo, ke mfon esie, mbufo emekeme ndidi edisana ke Christ.”22
Ke osongo emi, “ke mfon esie mbufo emekeme ndidi edisana ke Christ” odu ndongesit, emem, ye enwongo ke nnyin imekeme ndika iso ke mbuotidem ye uko ke Jehovah kpa kini nkpo midige nte nnyin iyomde, kere yung dot, sia iditoho ndudue eke nnyin, kpa nte nnyin ima inam ofuri ukeme nnyin.
Ke nsio-nsio ini ye usung, kpukpru nnyin ikere ke inamke-ofon, inana idorenyin, ndusuk ke idotke. Edi, ke nti ukeme nnyin man ima Abasi inyung inwam mbohidung, nnyin imekeme ndikop ima Abasi ye ifiok-spirit emi iyomde ino mmo ye uwem nnyin ke mbufa ye ndisana usung.
K’esit-mbon, Andinyanga nnyin osongo onyung onwongo ke nnyin iyekeme “ndika iso ye nsongonda ke Christ, inyung inyene oyoho idorenyin, ye ima emi otode Abasi ye mme owo.” 23 Ukpebnkpo Christ, Erisio-isop eke Andinyanga nnyin, ye oyoho nkopitem nnyin eke usung ediomo Esie eyenwam nnyin ndifiok akpaniko Esie inyung iworo ufin.24
Ami nno iko ntiense ke ema efiak eno enyung ekpeb oyoho iko Abasi Esie ye uduak inemesit Esie ke Ufok Abasi Jesus Christ eke Latter-day Saints, ke edisana nwed Abasi, oto mme prophet tongo ke Prophet Joseph Smith edisim President Russell M. Nelson mfin emi. Ami nno iko ntiense ke usung ediomo Esie ada ekesim mkpon-nkan eno emi edima Ete nnyin ke Enyong okonwongode ete: “Mbufo eyenyene nsinsi uwem.”25
Yak edidiong Esie ye nsinsi idara edi eke nnyin ke ini nnyin iwukde esit, idorenyin ye nsin-ifik nnyin ke eboho-ikang mbuotidem nnyin. Ami mbenge ke eti ye edisana enying Jesus Christ, amen.