Kor wɔ Christ Mu
M’anyɛnkofo adɔfo wɔ Ewuradze edwuma mu, megye dzi dɛ yebotum ayɛ ma ɔkyɛn dɛm koraa na ɔwɔ dɛ yɛyɛ ma ɔkyɛn dɛm dɛ yɛbɛma anyɛnkofo afofor enya ahomka wɔ Asɔr no mu.
Mo nuanom na nkyerɛbaa, mema hom aha. Dɛ mbrɛ wɔkã no wɔ mara mo kurow mu kãsa Brazilian Portuguese mu, “Boa tarde!’’ Ɔyɛ me adom dɛ menye hom abɔmu aboano wɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo ne wiadze mfɛndzanan ehyiadzi yi wɔ hɛn nkɔnhyɛnyi dɔfo, President Russell M. Nelson no kwankyerɛ ase. Ɔyɛ me ahobow wɔ kwan pa a hɛn mu kor biara enya dɛ ɔnam No nkowaa a wɔwɔ asaase do nda a odzi ekyir yinom a yɛtse mu no, yebetsie Ewuradze ne ndze.
Ɔdomankoma abɔdze ahorow dɔɔ sõ wɔ mo kurow mu, Brazil. No mu kor nye Amazon Esutsen a ɔayɛ atsenkã, esutsen nyantaam na ɔwɔr papaapa no mu kor a ɔwɔ wiadze. Esu asorɔtow, Solimões na Negro na wɔyɛ esutsen yi. Ɔyɛ enyigye dɛ, wɔbɔmu pem akwansin pii ansaana esu no edzi afora, osiandɛ ɔson esutsen no obiara ne fibea, n’ahoɔdzen, ne hyew anaa no nwin, na ndur horow a ɔwɔ mu. Akwansin pii ekyir no, nsu ebien no bɔmu dzi afora koraa, ma ɔyɛ esutsen fofor kyɛn ma nna kor biara tse. Afã afã yinom abɔmu ewie nko no, Amazon Esutsen no nya ahoɔdzen ara ma dɛ sɛ okodur Atlantic Po mu a, opia epo nsu no kɔ ekyir ma wobotum ada ho enya nsupa akwansin pii wɔ po no mu.
Kwan a ɔtse dɛm a ɔma Solimões na Negro Esutsen no bɔmu pem dze yɛ Amazon Esutsen kɛse no, Nyankopɔn ne mba fi ankorankor fibea ahorow, kusum na amambra ahorow bɔbɔ mu yɛ Ahotseweefo wɔ Christ kuw nwanwa mu. Ewiei no, ber a yɛhyɛ kor biara nkuran, yɛboa no, na yɛdɔ no no, yɛbɔmu yɛ ahoɔdzen kɛse ma papayɛ wɔ wiadze no mu. Dɛ Jesus Christ n’edziekyirfo no, yɛrepem dɛ obi a ɔwɔ papayɛ esutsen yi mu no, yebotum dze asɛmpa ne “nsupa’’ no ama wiadze a nsukɔm dze no.
Ewuradze ekenyan No nkɔnhyɛfo dɛ wɔnkyerɛkyerɛ hɛn mbrɛ yebesi botum aboa na yɛadodɔ hɛnho nkorkor ama yeetum aabɛyɛ kor wɔ gyedzi na botae mu wɔ yeridzi Jesus Christ n’ekyir do mu. Dɛ mbrɛ Paul se no, “hɔn a woenuma hɔn akɔ Christ mu no wɔahyɛ Christ … : na hom nyina ayɛ kor wɔ Christ Jesus mu.”1
Sɛ yɛbɔ anohoba wɔ hɛn enuma ber dɛ yebedzi Agyenkwa no n’ekyir a, yedzi dase dze ma Egya no dɛ yeenya pɛ dɛ yɛbɛfa Christ ne dzin ato hɛn do.2 Ber a yɛper dɛ yebenya No su krɔnkrɔn no wɔ hɛn abrabɔ mu no, yɛyɛ soronko kyɛn ma nna yɛtse no, a ɔnam Ewuradze Christ No Werdambɔ do, na hɛn dɔ ma nyimpa nyina nyin ara.3 Yenya nokwar nkãtse dze ma obiara ne yieyɛ na enyigye. Yehu hɛnho nkorkor dɛ enuanom na nkyerɛbaa, dɛ Nyankopɔn ne mba a yɛwɔ fibea, suban, na ndaamba krɔnkrɔn. Yenya pɛ dɛ yɛbɔhwɛ hɛnho nkorkor na yɛasoasoa kor biara n’adzesoadze.4
Iyi nye dza Paul kãa ho asɛm dɛ ɔdɔ.5 Mormon, Mormon Nwoma no nkɔnhyɛnyi kor no, kãa ho asɛm dɛ “Christ no dɔ mapã,’’6 a ɔno nye ɔdɔ no su a ɔyɛ nwanwa, ɔyɛ enyinnyam, na ɔyɛ dzen koraa. Ɔnnkyɛree na hɛn ndɛ nkɔnhyɛnyi, President Russell M. Nelson, kãa Christ no dɔ mapã a ɔda edzi ho asɛm dɛ erosom, a ɔwɔ botae na ɔyɛ kwan krɔnkrɔn mbordo a yɛdze kyerɛ ɔdɔ ma ankorankor binom na yɛhwɛ hɔn tse dɛ mbrɛ Agyenkwa no yɛe no.7
Hom mma yɛnhwɛ ɔdɔ na ɔhwɛ fapem yi, dɛ mbrɛ Agyenkwa no yɛe, wɔ nteasee mu dɛ nsakyereefo a wɔnnkyɛree na hɔn a hɔn enyi ahyɛ ase regye dɛ wɔrokɔ hɛn Asɔr som no yɛrehyɛ hɔn nkuran, yɛroboa, na yɛrema hɔn abamba.
Sɛ anyɛnkofo afofor yinom fi wiadze na wɔgye Jesus Christ n’asɛmpa no to mu, bɛka N’Asɔr ho a, wɔbɛyɛ N’esuafo, a wɔnam No mu awo hɔn bio.8 Wogya wiadze a wonyim no yie wɔ ekyir na wɔsan mu yi dɛ wɔdze hɔn akoma mu botae pa bedzi Jesus Christ n’ekyir, wɔabɔbɔ “esutsen’’ fofor mu tse dɛ Amazon Esutsen kokroko no—esutsen a ɔyɛ papayɛ na tseneneeyɛ ahoɔdzen a osi pi na ɔpem kɔ Nyankopɔn n’enyim. Ɔsomafo Paul kã ho asɛm dɛ “ebusuakuw a wɔasan mu eyi hom, asɔfokuw adehye, ɔman krɔnkrɔn, nkorɔfo a Nyame enya hɔn ayɛ nankasa nedze.’’9 Sɛ anyɛnkofo afofor yinom bɔfora esutsen fofor yi mu a, ebia ahyɛase no hɔn enyiwa bɛyɛ tɔtɔɔtɔ kakra wɔ bea a wonyim hɔ. Anyɛnkofo afofor yinom hu hɔnho dɛ woridzi afora wɔ esutsen a ɔwɔ ɔnoara ne fibea, ne hyew anaa no win, na ndur asorɔtow—esutsen a ɔwɔ ɔnoara ne amambra, nyamesom nhyehyɛɛ, kusum, na kasa. Annyɛ a ɔbɛyɛ dɛ ɔbra fofor wɔ Christ mu no bor hɔn do. Dwen mbrɛ hɔn nkãtse besi ayɛ mber kakra ber a ɔbɛyɛ hɔn ber a odzi kan a wɔbɛtse kasa tse dɛ “FHE,’’ “BYC,’’ “akɔnkye Kwesida,’’ “ewufo hɔn enuma,’’ Relief Society,’’ Melchizedek Asɔfodzi,’’ “kyerɛwsɛm mbɔho ebiasa,’’ na dza ɔkeka ho.
Ɔnnyɛ dzen dɛ yebohu siantsir a ɔbɛyɛ hɔn dɛ ma wɔnnka ho. Gyinabew a ɔtsetse dɛm mu no, annyɛ a wobebisa hɔnho dɛ, “Ana wɔbɛgye me ato mu wɔ ha a? Ana mefata Jesus Christ N’asɔr a ɔwɔ hɔ ma Nda a Odzi Ekyir Ahotseweefo mu a? Ana Asɔr no hia me a? Ana mebenya anyɛnkofo afofor a wobenya pɛ aboa me na wɔama ma abamba a?’’
M’anyɛnkofo adɔfo, mber a ɔtsetse dɛm mu no, otwar dɛ hɛn a yɛwɔ esuafoyɛ n’akwantu tsentsen ne mbea ahorow mu no kyerɛ anyɛnkoyɛ mapã ma hɛn anyɛnkofo afoforfo no, yɛgye hɔn tomu wɔ bea a wɔwɔ, na yɛboa hɔn, yɛdɔ hɔn, na yɛdze hɔn ka hɛn abrabɔ ho. Anyɛnkofo afoforfo yinom nyina yɛ Nyankopɔn ne mbambanyin na mbabaa a wɔsom bo.10 Yennkotum ama hɔn mu kor mpo ayew osiandɛ, tse dɛ Amazon Esutsen no a ɔdan no nkorbata ma wɔnyɛn no no, yehia hɔn dɛmara so dɛ hɔn so wohia hɛn dodow no.
Hɛn anyɛnkofo afofor no dze Nyankopɔn ne talent horow a ɔdze ama hɔn, enyigye,na papayɛ ka hɔnho ba Asɔr. Hɔn ahokekã ma asɛmpa no botum ayɛ nsan, ma dɛm ntsi aboa hɛn dze ekenyan hɛnara hɛn dasegye. Wɔsan so dze nhumu fofor ba hɛn ntseasee wɔ abrabɔ na asɛmpa no ho mu.
Wɔakyerɛ hɛn dadaada mbrɛ yebesi botum aboa hɛn anyɛnkofo afoforfo ma woenya ahomka wɔ Jesus Christ n’Asɔr mu na yɛadɔ hɔn. Wohia ndzɛmba ebiasa ama wɔakɔdo ayɛ dzen na anokwafo wɔ hɔn abrabɔ nyina mu:
Odzi kan, wohia enuanom na nkyerɛbaa wɔ Asɔr no mu a, nokwar mu ara hɔnho hia hɔn, anyɛnkofo nokwafo a aber biara wobotum adan hɔn, a wɔnye hɔn bɛnanatsew, na wobeyi hɔn nsɛmbisa ano. Dɛ yɛyɛ asɔrmba no, ɔwɔ dɛ daa yɛyɛ asokyɛn na yɛhwehwɛ enyim afofor ber a yɛwɔ Asɔr dwumadzi na nhyiamu ahorow mu, a hɛn asodzi na dwumadzi ahorow, anaa hɛn haw a yɛwɔ mmfa ho. Yebotum ayɛ ndzɛmba a ɔnnyɛ dzen dze aboa anyɛnkofo afofor ma wɔatse dɛ wɔagye hɔn ato mu na woenya ahomka wɔ Asɔr no mu, tse dɛ erekyia hɔn, ereyerɛw w’ano nokwar mu akyerɛ hɔn, nye hɔn retsena ma wɔatow ndwom na wɔasɔr, edze hɔn rekyia asɔrmba binom na dza ɔkekã ho. Sɛ yebuei hɛn akoma mu ma anyɛnkofo afoforfo wɔ akwanhorow yinom bi mu a, nna yɛreyɛ erosom no sunsum mu nyɛe. Sɛ yɛsom hɔn tse dɛ ma Agyenkwa no yɛe no a, wɔnnkɛyɛ tse dɛ “ahɔho wɔ asɔr no mu.’’ Wɔbɛtse nkã dɛ wobotum abaka ho na woenya anyɛnkofo afofor, na dza ohia kɛsenara no, ɔnam hɛn nokwar nhwɛe do no wɔbɛtse Agyenkwa no no dɔ nkã.
Otsia ebien, anyɛnkofo afofor hia dwumadzi—kwan a wɔdze bɔsom binom. Som yɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo n’afã ahorow mu kor a odzi mu papa. Ɔyɛ kwan a hɛn gyedzi nam do tum yɛ dzendzen. Nyɛnko fofor biara fata dɛm kwan no. Ber a bishop na ward baguafo na wɔwɔ asodzi dɛ wɔma dwumadzi no, biribiara nnsiw hɛn kwan dɛ yɛbɔto nsa afrɛ hɛn anyɛnkofo afofor no ma wɔboa hɛn ma yɛnam som dwumadzi do yɛasom binom anaa yɛasom wɔ kwan biara do.
Otsĩa ebiasa, otwar dɛ wɔdze “Nyankopɔn n’asɛm no nyɛn hɔn.’’11 Yebotum aboa hɔn ma wɔapɛ na woehu kyerɛwsɛm no yie ber a yɛnye hɔn kenkan na yɛnye hɔn pɛnsapɛnsamu, yɛkã nsɛm no n’enyido na yɛkyerɛkyerɛ nkasafua a ɔyɛ dzen no mu. Yebotum so akyerɛ hɔn mbrɛ wobesi bodua kyerɛwsɛm nsũae do dze enya hɔnankasa hɔn akwankyerɛ. Dza ɔka ho no, yebotum asera hɛn anyɛnkofo afofor wɔ hɔnara hɔn efiefi na yɛato nsa ma wɔaba hɛn efiefi wɔ mber a Asɔr nhyiamu na dwumadzi ahorow nnyi hɔ, dze aboa hɔn ma wɔafora Ahotseweefo kuw esutsen kɛse no mu.
Yeruhu nsesae na taferbanyinmbɔmu a wɔyɛ dɛ wɔbɛyɛ Nyankopɔn n’ebusuamba no, dɛ wɔyɛ hɛn enuanom na nkyerɛbaa no, yebotum aka mbrɛ yesii hyɛɛ taferbanyinmbɔmu a ɔtsetse dɛm wɔ hɛn abrabɔ mu do akyerɛ hɔn. Iyi bɔboa hɔn ma woehu dɛ wɔnnyɛ akonam na Nyankopɔn behyira hɔn ber a wosie gyedzi wɔ N’anohoba mu.12
Sɛ Solimões na Negro Nsutsen no bɔmu dzi afora a, Amazon Esutsen no yɛ kɛse na noho yɛ dzen. Kwan kor yi ara do no, sɛ hɛn na hɛn anyɛnkofo afofor no bɔmu nokwar mu a, Jesus Christ N’Asɔr mpo hyɛ dzen na otsim mbordo. Emi na modɔfo pa, Rosana, da hɔn a wɔboaa hɛn ma yɛfora esutsen fofor yi mu mfe pii a abɛsen kɔ nyina ase papaapa, ber a yɛgyee Jesus Christ n’asɛmpa no too mu wɔ hɛn kurow mu. Mfe pii nyina mu no, nkorɔfo awanwafo no asom hɛn nokwar mu na wɔaboa hɛn ma yɛkɔdo repem kɔ tseneneeyɛ mu Yɛkyerɛ hɛn enyisɔ ma hɔn.
Nkɔnhyɛfo a wɔwɔ Anee Atɔree no nyim mbrɛ wosi nye anyɛnkofo afofor bɔmu pem nokwar mu ara kɔ papayɛ esutsen fofor yi mu dze kɔ onnyiewiei nkwa mu ankasa. Mfatoho, ohun hɛn nda mber yi na onyim dɛ yebehyia tafɛrbanyinmbɔmu a ɔtsetse dɛm no,13 Moroni dze akwanhorow a ohia binom dze kãa ne nkyerɛwee no ho wɔ Mormon Nwoma no mu:
“Na ber a wɔgyee hɔn numaa wiei na Sunsum Krɔnkrɔn no tum no tseew hɔnho no, wɔkaan hɔn foraa Christ n’asɔrmba no; na wɔgyee hɔn edzin, ama wɔaakaa hɔn na wɔdze Nyankopɔn n’asɛmpa no anyɛn hɔn, na wɔahwɛ hɔn ma wɔaafa kwan pa no do, na wɔahwɛ hɔn aber nyinara wɔaweɔn na wɔabɔ mpaa, na wɔdze hɔnho ato Christ ne ndwuma pa nko do, nyia ɔyɛ hɔn gyedzi ne farbaa nye n’ewiei no.
Na asɔrmba no hyiaa mu mpɛn pii faa akɔnkye, na wɔbɔɔ mpaa, na wɔtwetwee nkɔmbɔ a ɔfa hɔn akra ne yieyɛ ho.14
M’anyɛnkofo adɔfo wɔ Ewuradze edwuma mu, megye dzi dɛ yebotum ayɛ ma ɔkyɛn dɛm koraa na ɔwɔ dɛ yɛyɛ ma ɔkyɛn dɛm dɛ yɛbɛma anyɛnkofo afofor enya ahomka wɔ Asɔr no mu. Meserɛ dɛ hom nhwɛ dza yebotum ayɛ ma yɛaka hɔn efua, yɛagye hɔn ato mu, na yɛaboa hɔn mbordo, a yɛrehyɛ ase Kwesida a odzi do yi ara. Hom nhwɛ yie na hom Asɔr dwumadzi ennsiw hom kwan dɛ wɔbɛma anyɛnkofo afofor no enya ahomka wɔ Asɔr nhyiamu na dwumadzi ahorow ase. Dza ohia dodow, akra yinom som bo wɔ Nyankopɔn enyim na hɔnho hia dodooodow kyɛn nhyehyɛɛ na dwumadzi ahorow nyina. Sɛ yɛdze hɛn akoma a Christ mu dɔ mapã ahyɛ mu ma dɛ mbrɛ Agyenkwa no yɛe no dze som hɛn anyɛnkofo afofor a, mobɔ hom anohoba, wɔ Ne dzin mu, dɛ Ɔbɔboa hɛn wɔ hɛn mbɔdzembɔ mu. Sɛ yɛyɛ asomfo anokwafo, dɛ mbrɛ Agyenkwa no yɛe no a, hɛn anyɛnkofo afofor no benya mboa a wohia dze abɛyɛ dzen, woetu hɔnho esi hɔ, na wɔayɛ anokwafo dze akɔ ewiei. Wɔbɛkã hɛnho ber a yɛbɛyɛ Nyankopɔn no dɔm kɛse na wɔbɔboa hɛn ma yɛdze nsupa aba wiadze a wohia Jesus Christ N’asɛmpa ho nhyira no dzendzenndzen no. Nyankopɔn ne mba yinom bɛtse nkã dɛ wɔnnyɛ “ahɔho nye amamforafo bio, hom yɛ ahotsewfo no kuromamfo.’’15 Mobɔ hom anohoba dɛ wobohu Agyenkwa noara wɔ N’Asɔr mu. Wɔbɔkɔdo nye hɛn apem dɛ esutsen akɔ papayɛ nyina nsubura mu kɛpem dɛ Ewuradze Jesus Christ bɛtserɛw n’abasa mu dze agye hɔn, na wɔatse Egya no kã dɛ,”Hom benya onnyiewiei nkwa.’’16
Moto nsa frɛ hom dɛ wɔnhwehwɛ Ewuradze no mboa mfa ndɔ binom dɛ mbrɛ Ɔno adɔ hom no. Hom mma hɛn nyina ndzi Mormon n’afotu a ɔdze mae no do dɛ: ”Dɛm ntsi, m’enuanom adɔfo, hom mfa hom akoma mu ahoɔdzen nyina mbɔ mpaa mma Egya no, ama ɔdze dɛm ɔdɔ yi aahyɛ hom mã, dza ɔdze egu hɔn a wɔyɛ ne Ba Jesus Christ n’akãdofo nokwafo do no.”17 Nokwar yinom no, megye ho dase na meyɛ no wɔ Jesus Christ ne dzin mu, amen.