Dze Ama No
Yeruhu nyia no na siantsir a yɛrosom binom no boa hɛn ma yɛtse ase dɛ ɔdɔ a ɔkrɔn koraa no nye etuhoakyɛ som ma Nyankopɔn.
Ndɛ anafua ber tsitsir yi, mekyerɛ mo dɔ na m’enyisɔ ma hom mu kor biara, me nkyerɛbaa adɔfo. Ma hɛn mfe, bea a yɛtse, anaa hɛn gyinabew biara tse no, yɛaboa ano anafua wɔ koryɛ, wɔ ahoɔdzen, wɔ botae, na wɔ dasegye mu dɛ hɛn Ɔsor Egya na hɛn Agyenkwa Jesus Christ, na hɛn nkɔnhyɛnyi tseasefo, President Russell M. Nelson, dɔ hɛn na wodzi hɛn enyim kan.
Ber a nna yɛyɛ awarfo kumabaa no, hɛn bishop frɛɛ emi na mo kun dɛ yɛnkɛsera na yɛnsom ebusua bi a nna akyɛr yie a wɔbaa asɔr. Ɔpɛ mu ara yɛgyee dwumadzi no na nda kakra ekyir no yɛkɔɔr hɔn fie. Hɔnara no yehunii no pefee dɛ wɔmmpɛ dɛ obiara fi Asɔr no mu bɛsera hɔn.
Ntsi no hɛn nsera a ɔtɔdo no, yɛdze mpepa anomu prɛtse kor kɔɔr hɔn hɔ, a nna yɛwɔ awerɛhyɛmu dɛ chocolate mpepa anomudze no bɔgoow hɔn akoma. Wɔannyɛ. Awarfo no gyinaa abow n’ekyir nye hɛn kasae, a wɔda no edzi pefee yie kyerɛɛ hɛn dɛ wɔronnhwehwɛ hɛn. Mbom ber a nna yɛresan akɔ fie no, yehunii no pɔtsee dɛ sɛ yɛkɛma hɔn emo tɔfe dworomdworum ara a nkyɛ yetumii dzii konyim.
Sunsum mu enyido-adzehu a nna yennyi no maa hɛn mbɔdzenbɔ biara a ɔtoaa do no yɛɛ nkogu na atseetsee Enyimtsiabu nnyɛ ahomka koraa. Mber kakra guu mu no yɛhyɛɛ ase bisaa hɛnho dɛ, “Ebɛnadze ntsi na yɛreyɛ iyi? Hɛn botae nye ebɛn?’’
Elder Carl B. Cook kãa dɛ: “Erosom wɔ Asɔr no mu … botum ayɛ ɔhaw sɛ wɔse hɛn dɛ yɛnyɛ biribi a ɔhyɛ hɛn akomatu a, sɛ yɛtɔ bitsi wɔ ɔsom ho a, anaa sɛ wɔfrɛ hɛn dɛ yɛnyɛ biribi a ahyɛase no ɔnnyɛ hɛn akɔndɔ a.’’1 Nna yɛrefa Elder Cook no nokwar nsɛm no mu ber a yɛbɔɔ pɔw dɛ yɛbɔhwehwɛ kwankyerɛ efi Obi a ɔwɔ nhumu kɛsenara kyɛn dza hɛnara yɛwɔ no hɔ.
Ntsi, nokwar mpaabɔ na adzesũa ekyir no, yenyaa nyiano maa hɛn som no siantsir. Yenyaa nsesã wɔ hɛn ntseasee mu, akoma nsesã, nyikyerɛ sũahu ankasa.2 Ber a yɛhwehwɛɛ kwankyerɛ fii kyerɛwsɛm mu no, Ewuradze kyerɛkyerɛɛ hɛn mbrɛ yebesi bɛma kwan a yɛdze som binom no ayɛ mberɛw na mfaso aba ho yie. Iyi nye nyiyimu no a ɔsesãa hɛn akoma na kwan a yɛbɛfa do no: “Hom mfa hom akoma nyina, nye hom ahom, nye hom adwen, nye hom ahoɔdzen nyina ndɔ Ewuradze Nyankopɔn, na hom nsom no wɔ Jesus Christ ne dzin mu.’’3 Yenyim nyiyimu yi dadaw dze, naaso ɔkasaa kyerɛɛ hɛn wɔ kwan a soronko fofor bi do.
Yehunii dɛ nokwar mu ara nna yɛreper dɛ yɛbɔsom ebusua yi na yɛbɔsom hɛn bishop, mbom nna ɔwɔ dɛ yebisa hɛnho sɛ ɔyɛ ampaara dɛ yɛdze dɔ na yɛdze rosom Ewuradze a. Ɔhen Benjamin kãa no pefee mber a ɔkãa dɛ, “Hwɛ, mese hom dɛ osiandɛ mesee hom dɛ masom hom mo nkwa nda nyina mu no nnhia dɛ medze tuw moho, osiandɛ mayɛ Nyankopɔn n’edwuma.”4
Ntsi no nna woana na nokwar mu ara Ɔhen Benjamin rosom? Ɔsor Egya na Agyenkwa no a. Yeruhu nyia no na siantsir a yɛrosom binom no boa hɛn ma yɛtse ase dɛ ɔdɔ a ɔkrɔn koraa no nye etuhoakyɛ som ma Nyankopɔn.
Ber a hɛn botae sesãe nkakrankakra no, dɛmara so na hɛn mpaabɔ yɛe. Yɛhyɛɛ ase dɛ hɛn enyi reda kwan dɛ yɛbɛsera hɛn ebusua dɔfo yi osian hɛn dɔ ma Ewuradze ntsi.5 Nna yɛreyɛ dze ama No. Ɔmaa aperdzi no annyɛ aperdzi bio. Abosoom pii a yegyina atwer n’ano no ekyir no, ebusua no hyɛɛ ase dɛ wɔrema yɛrokɔ dan mu. Ekyir no, nna yɛtaa bɔ mu bɔ mpaa na yɛyɛ nkenyan asɛmpa mpɛnsampɛnsamu. Anyɛnkoyɛ mãpa na ɔbae. Nna yɛrosom na yɛrodɔ No ber a yɛrodɔ Ne mba.
Ana ibotum akaa mber bi a ɔdɔ mu ara edze nokwar mbɔdzembɔ kɔr dɛ erokɔboa obi a ohia na itsee nkã dɛ oennhu wo mbɔdzembɔ no anaa enyi annsɔ anaa mpo nna ɔronnhwehwɛ a? Dɛm mber no mu no, ana ibisaa wo som no no bo a ɔsom ho asɛm a? Sɛ ɔtse dɛm a, Ɔhen Benjamin ne nsɛm no hyɛ w’ekyingye na mpo w’ayawdzi no ananmu: “Hom Nyame ara na hom rosom no no.’’6
Mbom kyɛn dɛ yɛbenya ayawdzi no, yebotum edua ɔsom do, yɛnye hɛn Ɔsor Egya akyekyer nkitahodzi a odzi ara yie. Hɛn dɔ na hɛn etuhaokyɛ som ma No no kwetsir nkamfo anaa wɔbɛkyerɛ enyisɔ na ɔma kwan ma No dɔ no pem ba hɛn hɔ na odua hɛn mu.
Ɔtɔfabi a ahyɛse no yɛbɔsom osiandɛ ɔyɛ asodzi anaa ahyɛdze, na mpo dɛm som no botum egya hɛn ma yɛdze adom bi a ɔkrɔn wɔ hɛn mu no dze asom wɔ “kwan papapaa bi mu’’7—dɛ President Nelson no ɔfrɛ se “kwan fofor, a ɔyɛ krɔnkrɔn mbordo a yɛdze bɔhwɛ binom do na yɛdze rosom hɔn.’’8
Sɛ yɛdwen dza Nyankopɔn ayɛ ama hɛn nyina ho a, hɛn som no fi ndaase akoma mu ba. Ber a yɛnndwen ho dɛ hɛn som no bepegya hɛnho no, mbom yehu dɛ hɛn som no botae bɛyɛ dɛ yɛdze Nyankopɔn ridzi kan.9
President M. Russell Ballard kyerɛkyerɛɛ dɛ, “Sɛ yɛdze hɛn akoma, hɛn akra, na hɛn akoma nyina dɔ Nyankopɔn na Christ nko a na yebotum edua ayamuyie na ɔsom ndwuma ahorow do yɛnye hɛn fipamfo akyɛ ɔdɔ yi.’’10
Mbrasɛm Du no dza odzi kan no si nyansa krɔnkrɔn yi do: “Emi nye Ewuradze wo Nyankopɔn. … Mma hom nnya Nyame fofor bi nnkã moho.’’11 Bea a mbrasɛm no hyɛ no boa hɛn ma yɛtse ase dɛ sɛ yehu Nyankopɔn na ɔkrɔn ma hɛn a, biribiara bɛda n’ananmu yie—mpo hɛn som ma binom no. Sɛ yɛdze botae pa bi san mu yi ma Ɔda bea a ohia dodow wɔ hɛn abrabɔ mu a, afei Otum hyira hɛn ndzeyɛe ma hɛn yieyɛ na binom so hɔn yieyɛ.
Ewuradze tuu fo dɛ, “Hom nhwɛ me wɔ hom adwendwen biribiara mu.’’12 Na dapɛn biara yedzi ahyɛmu dɛ yɛbɛyɛ dɛmara—dze “akaa no aber nyina.’’13 Ana nyamesu botae a ɔtse dɛm botum ada edzi wɔ biribiara a yɛbɛyɛ mu a? Mpo sɛ yɛreyɛ fie edwuma biara a obotum ayɛ kwan a yɛdze kyerɛ hɛn dɔ na ɔsom ma No a? Megye dzi dɛ obotum na ɔbɛyɛ.
Yebotum yɛama hɛn edwuma a yɛakyerɛw dɛ yɛbɛyɛ no ayɛ kwan a yɛdze bɛhyɛ Nyankopɔn enyimnyam. Yebotum ehu edwuma kor biara dɛ ɔyɛ adom na kwan dɛ yɛdze som No, mpo sɛ yeedu hɛn dwumadzi a yɛreyɛ ne finimfin o, anaa ntar fĩ no hor.
Dɛ mbrɛ Ammon kãa dɛ, “Nyew minyim dɛ mennsɛ hwee; sɛ mohwɛ m’ahoɔdzen ho a nna meyɛ mberɛw; dɛm ntsi murunntuw moho, na mbom mobotuw wɔ Nyame mu, osiandɛ n’ahoɔdzen mu na mutum meyɛ ndzɛmba nyina.’’14
Sɛ yɛrosom Nyankopɔn bɛyɛ hɛn adze tsitsir wɔ abrabɔ mu a, yɛyew hɛnho, na ewiei no yɛbohu ma hɛnankasa yɛtse.15
Agyenkwa no kyerɛkyerɛɛ fapem yi tsiabaa na tɔɔtsenn: “Dɛm ntsi hom kan nhyirɛn wɔ nkorɔfo yi enyim, ama woeehu hom ndwuma pa na wɔahyɛ hom Egya a ɔwɔ sor no enyimnyam.’’16
Mepɛ dɛ menye hom kyɛ enyansasɛm bi a wohunii wɔ ngyanka tsenabea afasu ho wɔ Calcutta, India: “Sɛ eyɛ yamuyiefo a, nkorɔfo botum ebu wo dɛ eyɛ pɛsɛankomanya, a ewɔ adwenbɔn. Ɔmmfa ho yɛ ayamuyie. Dza edze mfe pii esi no, obi botum asɛɛ no da kor ara. Ɔmmfa ho si. Papa a eyɛ no ndɛ no, ɔbɛtaa dɛ nkorɔfo hɔn werɛ befir no ɔkyena. Ɔmmfa ho yɛ papa. Fa w’adze tsitsir ma wiadze, na ɔnnkɔsõ hɔn ara da. Ɔmmfa ho fa w’adze tsitsir ma wiadze. Ehu, ewiei koraa no, ɔyɛ ɔwo na wo Nyankopɔn ntamu asɛm … ɔfa ho.’’17
Nkyerɛbaa, ɔyɛ hɛn nye Nyankopɔn ntamu asɛm daa. Dɛ mbrɛ President James E. Faust kãa dɛ, “Ebɛn ehiadze kɛsenara na ɔwɔ wiadze mu ndɛ? … ‘Ana ehiadze kɛsenara a ɔwɔ wiadze nyina ma nyimpa biara nnyɛ dɛ nankasa nye Agyenkwa no benya daa daa, nkitahodzi a ɔkɔdo a?’ Yerenya nkitahodzi a ɔtse dɛm no botum ada nyamesu a ɔwɔ hɛn mu no edzi, na adze biara nnyi hɔ a obtum enya nhyɛdo kɛsenara wɔ hɛn abrabɔ mu ber a yehu na yɛtse yɛnye Nyankopɔn nkitahodzi krɔnkrɔn no ase.’’18
Alma kyerɛkyerɛɛ mu kyerɛɛ ne babanyin dɛmara, “Nyew, biribiara a ebɛyɛ biara, yɛ ma Ewuradze, na beebiara a ebɔkɔ biara kɔ wɔ Ewuradze mu; nyew, ma w’adwendwen nyina nkɔ Ewuradze do; nyew, ma w’akoma ndɔ Ewuradze afebɔɔ.’’19
Na President Russell M. Nelson akyerɛkyerɛɛ hɛn dɛmara so dɛ, “Sɛ yɛtse No Werdambɔ no a ɔdze Noho mae no ase a, ndaase a no mu yɛ dzen wɔ adom a yeenya dze rosom No no hyɛ afɔr biara a yɛbɔ dɛ hɛn afamudze no do koraa.’’20
Nkyerɛbaa, megye dase dɛ sɛ Jesus Christ, nam No Werdambɔ no tum do, yɛ hɛn ho na hɛn mu edwuma a, Ɔhyɛ ase dua hɛn mu yɛ edwuma dze hyira binom. Mbom ber a yɛrodɔ na yɛrosom No no na yɛdze som hɔn. Yɛbɛyɛ dza kyerɛwsɛm kã ho asɛm dɛ: “Na obiara repɛ ne nyɛnko ne yieyɛ, na wɔdze enyiwa kor reyɛ adze nyina rehyɛ Nyankopɔn enyimnyam.’’21
Ebia nna hɛn bishop nyim dɛ ɔno nye adzesũa a menye mo kun bosua efi dɛm enyimkan mbɔdzembɔ a onndzi mu mu naaso yɛdze adwenpa no, dɛ yɛbɔsom Nyankopɔn ne mbabanyin na mbabaa adɔfo. Megye mankasa me dasee a osi pi wɔ papayɛ na ɔdɔ a Ɔnye hɛn kyɛ ber a yɛper dɛ yɛsom No mpo no. Jesus Christ ne dzin krɔnkrɔn no mu, amen.