Gye Dzi, Dɔ, Yɛ
Yenya nkwa mbordo ber a yɛreyɛ Jesus Christ esuafo anokwafo—yɛrefa N’akwan do na yɛreyɛ N’edwuma.
Mo nuanom na nkyerɛbaa adɔfo, ɔyɛ ahomkã mber, dɛ menye hom wɔ wiadze mfɛndzanan ehyiadzi ase ndɛ: dɛ yɛrebetsie nkenyan nsɛm, etsie asɛmpasomafo adwontokuw nwanwa a wogyina hɔ ma asɛmpasomafo mpempem a wɔwɔ wiadze nyina mu—hɛn mbabaa, hɛn mbabanyin—na nkankara dɛ yɛabɔmu wɔ gyedzi mu ndɛ, na yɛrema hɛn President na nkɔnhyɛnyi dɔfo, President Russell M. Nelson, Presidency a Wodzi Kan, na Wiadze Mfɛndzanan Asɔr Edzibewdzifo no tsipia. Ɔyɛ enyigye da dɛ menye hom wɔ ha ndɛ.
Tsetse Ɔhen Solomon yɛ nyimpa kor a abakɔsɛm mu no ɔdaa edzi dɛ ɔyɛɛ yie papaapa.1 Nna ɔyɛ dɛ ɔwɔ biribiara—sika, tum, nkamfo, enyidzi. Mbom mfe pii ekyir a ɔmee wɔ ahonyadze apɛdze mu no, Solomon sii dɛn twaa n’abrabɔ mu nsɛm tsia?
Ɔsee dɛ, “Ne nyinara egyangyandze a.”2
Ɔbarimba yi a, onyaa adze nyina, owiei no abagura, ekyingye mu, na oennya ahomkã, a nna biribiara rokɔ do yie ama no mpo no.3
German kasafua bi wɔ hɔ, Weltschmerz. N’asekyerɛ ara nye awerɛhow a ɔba ber a erodwendwen dzi yaw dɛ wiadze yi resɛɛ kyɛn dza nkyɛ ɔwɔ dɛ ɔyɛ ho.
Bia hɛn mu biara wɔ Weltschmerz kakra wɔ no mu.
Ber a awerɛhow wɛawɛa ba hɛn abrabɔ mu. Ber a mbubuwdzi hyɛ hɛn adzekyee mu mã na ɔtow bun nwinwin gu hɛn adzesaa do. Ber a esian na atsɛnkyew ba hɛn wiadze, ma ɔkã hɔn a yɛdɔ hɔn hɔn abrabɔ no. Ber a hɛnankasa hɛn ankorankor akwantu na ankonam mbusu anamɔn kwan, na yaw fura hɛn kommyɛ na ɔsɛɛ hɛn asomdwee no—ɔbɛyɛ dzen dɛ yɛnnye Solomon nnkɛyɛ adwen dɛ abrabɔ yɛ egyangyandze na ntseasee biara nnyi mu.
Enyidado Kɛse no
Asɛmpa no nye dɛ, enyidado wɔ hɔ. Nyiano wɔ hɔ ma abrabɔ a ɔatɔ pan, ɔayɛ gyan, na abrabɔ mu Weltschmerz. Enyidado a ayew na abagura no bun biara mu mpo a hom bɛtse no wɔ nyiano pa.
Enyidado yi wobohu no wɔ Jesus Christ asɛmpa no tum a otum sakyer na Agyenkwa no ɔpon tum a otum sã hɛn akra mu yarba mu.
Jesus see dɛ, “Emidze mebae ma woeenya nkwa, na woeenya no mbordo.”4
Yennstim wɔ hɛnankasa hɛn ehiadze anaa hɛn mbɔdzembɔ do mmfa nnya nkwa mbordo mbom ber a yɛreyɛ Jesus Christ esuafo anokwafo—yɛrefa N’akwan do na yɛreyɛ N’edwuma. Yenya nkwa mbordo ber a hɛn werɛ fir hɛnho na yɛdze hɛnho hyɛ Christ no botae kɛse no mu.
Jesus Christ no botae nye ebɛnadze? Ɔno nye yɛbɛgye No edzi, yɛdɔ No dɛ mbrɛ Ɔdɔe, na yɛbɛyɛ dza Ɔyɛe no bi.
Jesus “kyinii yɛɛ yie.”5 Ɔnantseew ehiafo mu, hɔn a wɔapow hɔn, ayarfo, nye hɔn a wɔfɛr. Ɔsoom hɔn a wonyi tum, abɔbɔfo, na hɔn a wonnyi anyɛnkofo. Ɔhweer ne mber wɔ hɔn nkyɛn, Ɔnye hɔn kasae. “Na ɔsaa hɔn nyina yarba.”6
Beebiara a Ɔkɔree no, Agyenkwa no kyerɛkyerɛɛ asɛmpa ho “asɛm pa”7 no. Ɔkyɛɛ onnyiewiei nokwar a ɔma nyimpa nya sunsum mu nye honandua mu ahotɔ no.
Hɔn a wotu hɔnho si hɔ ma Christ N’edwuma no bohu nokwar a ɔwɔ Agyenkwa no n’anohoba no mu: “Na obiara a emi ntsi ɔbɛyew no nkwa no, obohu.”8
Solomon fomee, mo nuanom na nkyerɛbaa adɔfo—abrabɔ nnyɛ “egyangyandze.” Mbom dze, botae, ntseasee, na asomdwee botum ahyɛ mu mã.
Jesus Christ N’ayarsa nsa no sõ hɔn a wɔhwehwɛ No nyina do. Meebohu a ekyingye biara nnyi mu dɛ yɛregye Nyankopɔn edzi na yɛrodɔ No na yɛreper akã Christ do no bɛsesã hɛn akoma,9 adwedwe hɛn yaw, na ɔdze “enyigye kɛse” ahyɛ hɛn akra mu mã.10
Gye Dzi, Dɔ, Yɛ
Nyew, otwar dɛ yɛyɛ ma ɔbor kyɛn dɛ yebenya honandua mu nyansa ntseasee wɔ asɛmpa no ho ama oenya ayarsã nhyɛdo wɔ hɛn abrabɔ mu. Otwar dɛ yɛdze kã hɛn abrabɔ ho—yɛma ɔyɛ hɛn nyimpa ban na ndzeyɛɛ ne kyɛfa.
Hom ma munsusu dɛ nkasafua ebiasa ara na wɔdze hyɛ osuanyiyɛ ase:
Gye Dzi, Dɔ, na Yɛ.
Yeregye Nyankopɔn edzi no gya hɛn ma yenya gyedzi wɔ No mu na yenya awerɛhyɛmu wɔ N’asɛm mu. Gyedzi ma hɛn akoma nyin wɔ ɔdɔ mu ma Nyankopɔn na nkaafo. Ber a dɛm dɔ no renyin no, yenya nkenyan dze sũasũa Agyenkwa no ber a yɛrosɔw hɛnankasa hɛn akwantu kɛse no wɔ osuanyiyɛ anamɔn kwan no do.
“Naaso,” hom se, “dɛm no yɛ tootooba dodow. Abrabɔ mu nsɛnhia, me nsɛnhia ankasa, yɛ dzen koraa ma dɛm ano edur tootooba yi. Nnkotum asã Weltschmerz yarba a edze nkasafua yinom ara: Gye Dzi, Dɔ, Yɛ.”
Ɔnnyɛ anosɛm noara na ɔsã yarba no. Ɔyɛ Nyame no dɔ na ɔgye, ɔsesɛw, na ɔma nkwa.
Nyankopɔn nyim hom. Eyɛ Ne ba. Ɔdɔ wo.
Ber mpo a hom dwen dɛ hom mmfata Ɔhwehwɛ hom boa hom.,
Ndɛ da yi ara—dabiara—Ɔhwehwɛ wo aboa wo, Ɔpɛ dɛ Ɔsã wo yarba, Opegya wo, na Ɔdze enyigye a otsim sesã w’akoma a ɔatɔ pan no. Ɔpɛ dɛ Ɔpra sum biara a ɔayɛ mununkum wɔ w’abrabɔ do no na Ɔdze N’enyimyam a ɔmmbɔadze ne hyerɛnee krɔnkrɔn no ahyɛ mu mã.
Mankasa menya sũahu yi.
Na ɔyɛ me dasegye dɛ Ewuradze Jesus Christ No Ɔsomafo dɛ hɔn a wɔba Nyame hɔ—hɔn nyina a nokwar ara wɔgye dzi, wɔdɔ, na wɔyɛ—no botum enya sũahu iyi ara bi.
Yɛgye Dzi.
Kyerɛwsɛm no kyerɛkyerɛ hɛn dɛ “na gyedzi nnyi mu a, obi nntum nnsɔ [Nyankopɔn] enyi: na nyia a ɔba Nyankopɔn nkyɛn no otwar dɛ ɔgye dzi dɛ ɔwɔ hɔ.”11
Binom no dze, wɔregye biribi edzi yɛ hɔn dzen. Ɔtɔfabi a hɛn ahomemado siw kwan no. Bia yɛdwen dɛ osiandɛ yɛyɛ enyansafo, yɛwɔ nwomasũa, anaa sũahu ntsi, yennkotum agye Nyankopɔn edzi ara. Na yɛhyɛ ase hwɛ nyamesom dɛ ɔyɛ nkwaseasɛm amambra.12
Mo sũahu mu no, eregye edzi nntse dɛ nsaano mfonyin a yɛhwɛ na ɔyɛ hɛn fɛw na yɛkã ho asɛm na yɛkyerɛ hɛn adwen wɔ ho. Ɔtse dɛ funtum dadze a yɛdze kɔ haban mu na, yɛdze hɛn enyim mfifir, akɔbɔ funtumkã wɔ asaase a ɔbɛgye aba na wɔasow eduaba ɔbɛtsena hɔ.13
Hom ntwe mpin Nyankopɔn, na Ɔbɔtwe epin hom.14 Iyi nye anohoba ma hɔn a wɔhwehwɛ agye edzi no.
Yɛdɔ
Kyerɛwsɛm no da no edzi dɛ yɛrodɔ Nyame na Ne mba yie no, nna hɛn enyigye reyɛ kɛse.15 Mbom, ɔdɔ no a Jesus kãa ho asɛm no, nnyɛ akyɛdze kraataa sin, dza wɔtow kyen, enyi fi do no. Ɔnnyɛ ɔdɔ a wɔkã no anofamfa na nkyii werɛ efir. Ɔnnyɛ “ma munhu dza a mubotum ayɛ” ɔdɔ bi.
Ɔdɔ no a Nyankopɔn kã ho asɛm no nye dza ɔhɛn hɛn akoma mu ber a yɛasoɛr anapa, na ɔtsena hɛn nkyɛn da ne nyina mu, na ɔhyɛ hɛn akoma mã ber a ewimbir no yɛbɔ hɛn ndaase mpaabɔ no.
Iyi nye Ɔsor Egya No dɔ ma hɛn a wonnkotum akyerɛ no.
Ɔyɛ ayamuhyehye yi a onnyiewiei no na ɔma yetum hu pefee ara yie mbrɛ nkaafo no tse. Yɛhwɛ ɔdɔ ahwehwɛ enyiwa mu a , yehu abɔdze bɛkyebofo a wɔwɔ onnyiewiei hyɛbea na Otumfo Nyankopɔn Ne mbabanyin na mbabaa a wɔsom bo na wɔdɔ hɔn.
Yenya hwɛ dɛm ahwehwɛ enyiwa no mu a, yennkotum atoto hɔn famu, eyi hɔn akwa anaa yetsia obiara.
Yɛyɛ
Agyenkwa N’edwuma mu no, ɔtaa dɛ “ɔnam ndzɛmba nketsenketse do na ndzɛmba akɛse dua ba.”16
Yenyim dɛ yɛrisi do ayɛ biribiara no na yɛwea wɔ mu. Sɛ yɛrobɔ clarinet abɛn, bɔll ahyɛ goal, yɛreyɛ kaar yie, anaa yɛrekã wimuhɛn mpo a, yerisi do ayɛ no na yɛwea ho mbordo no.17
Kuw a hɛn Agyenkwa dze bɔbɔɔ adze wɔ asaase do—Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no—boa hɛn ma yɛyɛ dɛm. Ɔma hɛn bea a yebotum esũasũa abɔ bra dɛ mbrɛ Ɔkyerɛkyerɛɛ no na yeehyira nkaafo wɔ kwan a Ɔyɛe no do.
Yɛyɛ Asɔrmba yi, wɔma hɛn ɔfrɛ, asodzi na akwan ahorow a yɛdze ayamuhyehye kɛsera nkaafo na yɛsom hɔn.
Ndaansa yi, Asɔr no ekenyan erosom, anaa erodɔ binom ara yie. Adwen kɛse na wɔdze taa ekyir dze hwehwɛɛ dza yɛdze bɛfrɛ nkenyan soronko yi.
Dzin kor a wosusuu ho nye yɛrenyɛn nguan, a ɔnye Christ Ne nsato no dɛ: “Nyɛn mo nguan.” no saa.18 Naaso, nna adze kor nnkɔ yie wɔ ho: wɔdze dzin no to do a ɔbɛma mayɛ German ɔkraman. No nsunsuando no, mobo adwe me ara yie wɔ dzin erosom no.
Iyi Yɛ Obiara n’Edwuma.
Nokwar, nkenyan yi nnyɛ adze fofor. Okenyan na ɔma hɛn kwan pa ara a yebotum esũasũa Agyenkwa no Ne mbrasɛm dɛ “hom ndodɔ homho nkorkor.”19 kwan a no ho tsew a ɔbɛma Asɔr no botae no, yedze edzi dwuma na yɛayɛ.
Hom ndwen asɛmpakã edwuma, asɛmpa no a wɔkyɛ no akokodur, ahobrɛadze na ndamyɛ mu no yɛ erosom nkaafo biara no hɔn sunsum mu ehiadze ho mfatoho.
Anaa ereyɛ temple edwuma—hom rohwehwɛ hom ewuakɔr edzin na hom rema hɔn daapem nhyira ho kwan. Ɔyɛ kwan krɔnkrɔn a wɔdze som
Hom nsusu ndzeyɛɛ dɛ erema nsa a ɔsensen famu no do wɔ sor, anaa erihyira ayarfo na hɔn a wohu amandze. Ana iyinom nnyɛ som pa ankasa a Ewuradze yɛe ber a Ɔnantseew asaase do?
Sɛ nnyɛ Asɔrba a, moto nsa frɛ wo dɛ “hom mbra mbɔhwɛ.”20 Hom mbra, mbɔdɔm hɛn. Sɛ eyɛ Asɔrba naaso sesei mmfa woho nnhyɛ dwumazi mu yie a, moto nsa frɛ wo, meserɛ san bra. Yehia hom!
Hom mbra, mfa hom ahoɔdzen mbɛkã hɛndze ho.
Osian hom talent soronko ahorow, dza hom tum yɛ, na hom su ntsi, hom bɔboa hɛn ma yɛayɛ yie na yenya enyigye mbordo. No nsunsuando no, yɛbɔboa ma hom ayɛ yie na woenya enyigye mbordo dɛmara.
Hom mbra, hom mbɔboa ma yɛnkyekyer ayarsã, ayamuyie, na ehumbɔbɔr amambra nkyerɛ Nyame Ne mba nyina. Na hɛn nyina robɔ mbɔdzen abɛyɛ abɔdze fofor a “ndzɛmba adadaw no etwa mu; na hwɛ ndzɛmba nyina … ayɛ fofor.”21 Agyenkwa no kyerɛ hɛn kwan a yɛmfa—tsentsen do na sor Ɔse, “Sɛ hom dɔ me a, hom ndzi me mbrasɛm do.”22 Hom mma hɛn nyina mbɔ mu mbɛyɛ nkorɔfo a Nyame pɛ dɛ yɛyɛ no.
Iyi nye asɛmpa amambra no a yɛpɛ dɛ yɛtsɛw no Jesus Christ N’Asɔr nyina mu no. Yɛhwehwɛ dɛ yɛbɛhyɛ Asɔr no dzen ma ɔbɛyɛ bea a yɛdze hɛn bɔn kyɛ hɛnho nkorkor. Bea a yekwetsir nsɔhwɛ no dɛ yɛbɔhwehwɛ mfom, yɛakã binom ho nsɛm, na yɛabrɛ hɔn adze. Bea a, nkyɛ yɛbɛtsen nsa akyerɛ mfom no, yebepegya na yɛaboa hɛn ho ma yɛakrɔn dɛ mbrɛ yebotum.
Monto nsa mfrɛ hom bio. Hom mbɔhwɛ. Hom mbɛkã hɛn ho. Yehia hom.
Nkorɔfo a Hom Nndzi Mu
Hom bohu dɛ nkorɔfo a wɔyɛ fɛw ara yie a wiadze wɔ dze ma hyɛ Asɔr yi mu mã. Wɔyɛ etuu, wɔdɔ, wɔyɛ ayamuyie, na wodzi nokwar. Wɔyɛ edwuma dzen, wɔdɔpɛ afɔrbɔ, na ber binom mpo mu wɔyɛ no ndamyɛ mu.
Na hɔn so wonndzi mu koraa.
Wɔyɛ mfomdo horow.
Ofi ber to ber no wɔkã dza ɔnnsɛ dɛ wɔkã. Wɔyɛ ndzɛmba a nkyɛ hɔn yamu annkyɛ wɔannyɛ.
Naaso hɔn nyina wɔ botae kor yi—wɔpɛ dɛ wotu mpon na wɔtwe bɛn Ewuradze, hɛn Agyenkwa, Jesus Christ mpo no.
Wɔrobɔ mbɔdzen dɛ wɔbɛyɛ adze yie.
Wɔgye dzi.Wɔdɔ.Wɔyɛ.
Wɔpɛ dɛ wɔbra pɛsɛankonyasu adze, wɔnya ayamuhyehye, wɔyɛ ahotsew yie, tse dɛ Jesus.
Enyigye ho Kwan Tɔɔtsen no
Nyew, abrabɔ tum yɛ dzen mber binom mu. Nokwar hɛn nyina yɛwɔ hɛn ber a enyidado nnyi na ɔyɛ abagura.
Naaso Jesus Christ asɛmpa no ma enyidado. Na, wɔ Jesus Christ N’Asɔr mu no, yɛnye nkaafo bɔmu hwehwɛ bea a yɛbɛtse dɛ ɔyɛ fie—bea a yebenyin, bea a, yebɔbɔ mu, yeetum agye edzi, yɛadɔ, na yɛayɛ.
Hɛn nsonsonoee biara mmfa ho no, yɛhwehwɛ dɛ yebofua hɛnho nkorkor dɛ hɛn Ɔsor Egya dɔfo Ne mbabanyin na mbabaa.
Ɔyɛ me enyisɔ mbordo dɛ meyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no asɔrba na minyim dɛ Nyame dɔ Ne mba ara yie ma Ɔama hɔn enyigye ho kwan tɔɔtsen no na abrabɔ yi ne nkyerɛasee na kwan a yebotum enya onnyiewiei enyigye ho sũahu wɔ abrabɔ a ɔreba mu enyimyam nhyiamu mbea no.
Ɔyɛ me enyisɔ dɛ Nyame ama hɛn kwan a yebotum dze asã ɔkra mu yarba na abrabɔ mu Weltschmerz yarba.
Megye dase na megya hom me nhyira dɛ ber a yɛgye Nyankopɔn dzi , na yɛdɔ No na yɛdze hɛn akoma nyina dɔ Ne mba, na yɛbɔ mbɔdzen dɛ yɛbɛyɛ dza Nyame ahyɛ hɛn no, yebenya ayarsã na asomdwee, enyigye na ntseasee. Jesus Christ ne dzin krɔnkrɔn no mu, amen.